Yes Xus tuaj txais kab ke ntxuav ntawm Zam hauv tus dej Yos Las Das tas, nws mus rau teb chaws suab puam, ces dab phem tawm tuaj ‘ntxias’ (tempted) Yes Xus.
Yes Xus yog Tswv Ntuj Leej Tub tiam sis ‘nws yeem ua xws li ib tug neeg me’, Yes Xus tuaj txais kab ke ntxuav ntawm Zam Ntxuav Plig kom zeem tseeb tias nws yog neeg zoo tiag; nws tsis rhuav cov yaj saub xub ua nws ntej tuaj. Yes Xus tsis rhuav cov yaj saub uas tau ntau pua xyoo los lawd lawv xub tuaj qhia Tswv Ntuj cov lus. Yes Xus tuaj ua Tswv Ntuj cov hauj lwm nyob ntiaj teb no kom tiav. Cov yaj saub mas lawv tsuas pib cev Tswv Ntuj Lo Lus rau haiv neeg tos tus Huab Tais yuav tuaj cawm. Zam yog ib tug yaj saub cev Tswv Ntuj Lo Lus rau zeej tsoom xws li cov yaj saub. Hnub no Yes Xus tuaj cuag Zam kom xwv sawv daws paub tias Yes Xus tsis thuam cov neeg uas ua nws ntej tuaj.
Yes Xus tsis muaj txhaum, nws tsis tas yuav txais kab ke ntxuav, tab sis Yes Xus xav muab tas nws los koom nrog tsoom sid ua ke, mas Yes Xus thiaj li tuaj txais kab ke ntxuav. Tsis tas li ntawd, Yes Xus txais kab ke ntxuav tseem yog lub cim tias Yes Xus yuav pib nws txoj hauj lwm ntxuav neeg cov txhaum.
Leej Ntuj Plig pub lub zog (power) rau Yes Xus kom ua tau nws txoj hauj lwm. Leej Ntuj Plig nqes xws li tus nquab.
Vim li cas Leej Ntuj Plig Ntshiab nqes los xws li ib tug nquab?
Vim nquab yog ib tug tsiaj siab mos (gantle), Yes Xus kuj yuav yog ib tug neeg siab mos xws li tus nquab thiab.
Qee leej hais tias ib txwm cov Yus Das hais tias thaum Tswv Ntuj tseem tsis tau tsim lub ntiaj teb, mas Tswv Ntuj lub Tswv Yim yuj saum nplaim dej xws li ib tug nquab (HP1: 2). Nyob hauv ntawv Hauv Paus kuj tau hais txog Nos Hes tso tus nquab mus tshuaj ntiaj teb, ces tus nquab kwv ib tug ntsis txiv ntoo roj los nrhiav Nos Hes. Qhov no yog lub cim hais txog kev chiv dua tshiab (new beginning). Nyem no thaum Yes Xus pib tshaj nws lub Moo Zoo, yog zoo li Tswv Ntuj rov tsim ntiaj teb neeg tshiab, ces Leej Ntuj Plig Ntshiab tseem rov tawm tuaj yuj saum Yes Xus xws li ib tug nquab.
Mas Kos hais tias thaum Yes Xus tawm los tim ntug dej, Zam pom ntuj qhib plho, muaj ib lub suab nrov saum ntuj tuaj. Lub suab ntawd zeem tseeb txog Yes Xus tias yog Tswv Ntuj Leej Tub. Zaj no qhia tias nyob hauv Tswv Ntuj muaj 3 leeg Huab Tais sib koom ua ib ke; yog Huab Tais Leej Txiv uas nws lub suab nrov saum ntuj tuaj zeem tseeb txog Yes Xus, Huab Tais Leej Ntuj Plig yees ua ib tug nquab nqes los rau saum Yes Xus, thiab Huab Tais Leej Tub uas nws tuaj txais kab ke ntxuav ntawm Zam.
Lub suab nrov saum ntuj tuaj hais tias “Koj yog kuv Leej Tub uas kuv nyuam kawg” ib yam li thaum Tswv Ntuj hais rau Has Nplas Has tias “Coj koj leej tub His Xas Has uas koj hlub kawg.” Ob lo lus no yog qhia tias Tswv Ntuj txaus siab rau Tswv Ntuj tus tub txib. Li ntawd, Yes Xus thiaj paub tias Tswv Ntuj pom zoo rau qhov Yes Xus ua. Yes Xus tseem paub tias nws cov hauj lwm yog tus tub txib txoj hauj lwm. Yes Xus paub tias His Xais zaj nkauj Tswv Ntuj tus tub txib yog hais txog tus tub txib raug txom nyem (HX 53).
Mas Kos sau tias Leej Ntuj Plig ‘txhib’ Yes Xus kom mus rau teb chaws suab puam, txhais tias Yes Xus paub tias Tswv Ntuj txhib nws kom mus, kom dab phem tau ‘ntxias’ (tempt) Yes Xus. Qib lus no qhia tias txhua yam xwv txheej tuaj nphav peb ntawd, tsis yog yuav tuaj ‘rhuav’ tab sis yog tuaj ‘txhawb’ peb kom muaj zog tuaj.
‘Teb chaws suab puam’ (Desert) yog thaj tsam muaj cov dab phem nyob coob. Yes Xus mus kom tau ntau tsam dab phem.
Lo lus ‘plaub caug hnub’ tej zaus yog hais txog 40 hnub tiag, los tej zaus yog hais txog lub sij hawm ntev ntev zoo li Hmoob hais tias ‘ob peb hnub’ tab sis tsis tau txhais tias ob hnub los peb hnub xwb.
‘Xas Tas’ (Satan) yog lus Hes Nplaws muaj lub ntsiab tias ‘yeeb ncuab’ los yog ‘tus tiv’ thiab tseem txhais tau tias ‘tus kom neeg’. Tom qab cov Yus Das kawm cov Hes Las tej txuj mas lawv txais cov Hes Las lo lus tias ‘Dais Npos Los’ (Diabolos) los hu txog tus ‘Dab Phem’ (Devil) ces cov Yus Das thiaj ntxiv ib lub ntsiab rau lo lus Xas Tas tias ‘tus haub neeg’. Lub zim txwv cov Yus Das mus nyob txim rau Npas Npis Los, lawv saib tias Tswv Ntuj yog lub zog qhov pom kev, ces Xas Tas yog tus tiv Tswv Ntuj yog li Xas Tas thiaj yog ‘lub zog hauv qhov tsaus ntuj’. Ntawv Cog Lus Tshiab saib Xas Tas yog tus coj txiab xeeb mob nkeeg thiab kev txom nyem txhua tsav tuaj raug rau tib neeg, thiab ntxias neeg mus ua qhov tsis zoo.
Mas Kos tsis hais tias Xas Tas ntxias Yes Xus li cas. Tab sis nyob hauv Mas Tais thiab Lus Kas Ntawv Moo Zoo hais tias Xas Tas ntxias Yes Xus kom muab nws lub hwj huam los ua ywj Yes Xus siab. Xas Tas tuaj ntxias Yes Xus saib nws yuav xaiv taug Tswv Ntuj txoj kev los yuav xaiv Xas Tas txoj kev, yuav xaiv txoj kev nyiam thiab ntoo cuam los yuav xaiv txoj kev ntxub thiab lub hwj chim.
Mas Kos hais tias Yes Xus nrog cov tsiaj qus nyob. Qhov no Mas Kos xav qhia tias teb chaws suab puam yog thaj tsam txaus ntshai heev, los ntshai Mas Kos xav qhia txog lub zim txwv ntawd, neeg thiab tsiaj qus nyob ua ke yam sib haum xeeb (HX 11: 6-9). Cov tsiaj tsis ua phem rau Yes Xus, vim lawv lees Yes Xus ua lawv tus vaj lawm.
Mas Kos tseem xav qhia tias Tswv Ntuj tsis tso neeg nyob ib leeg thaum neeg raug kev ntxias siab. Tswv Ntuj xa nws cov Tshiab los tsob hwb Yes Xus.
