1 1 Kuv yog tus Txwj Laus. Kuv sau ntawv tuaj rau tus Niam Pog uas Ntuj xaiv, thiab rau nws cov me nyuam : kuv nyiam lawv tas siab tas ntsws. Tsis yog kuv tib leeg thiaj nyiam lawv xwb : tas cov neeg paub qhov tseeb tib si nyiam lawv, 2 vim muaj txoj kev tseeb nyob hauv peb, txoj kev tseeb yuav nrog peb nyob mus li.
3 Lub txiaj ntsim, nrog Ntuj txoj kev khuv leej, thiab txoj kev thaj yeeb tuaj ntawm Leej Txiv Tswv Ntuj, thiab ntawm Yes Xus Pleev, uas yog Leej Txiv tus Tub, yuav nrog peb mus li, nyob hauv txoj kev tseeb thiab txoj kev nyiam.
4 Kuv zoo siab heev, vim kuv ntsib koj ib co me nyuam mus taug txoj kev tseeb, raws li lo lus qhia uas peb tau txais ntawm Leej Txiv los. 5 Niam Pog, kuv thov koj : nyem no, peb kav tsij sib hlub mog. Kuv tsis sau ib lo lus qhia tshiab tuaj rau koj, tsuas sau lo lus qhia uas peb yeej muaj, txij puag thaum lub hauv paus los lawm : yog qhov peb yuav sib nyiam sib hlub.
6 Txoj kev nyiam, yog txoj kev ua neej raws li cov lus qhia. Lo lus qhia ntawd yog qhov tias nej yuav nyob hauv txoj kev nyiam. Nej tau hnov cov lus ntawd txij thaum lub hauv paus los lawm.
7 Muaj coob tus ntxias neeg tau ri mus nyob thoob qab ntuj. Lawv tsis lees ntseeg txog Yes Xus Pleev yug los ua ib lub cev neeg. Tus ntxias neeg li ntawd, yog tus tiv Leej Pleev. 8 Nej ceev faj, kom nej txhob plam txoj hauj lwm uas peb tau siv zog khwv. Nej ceev faj, kom nej tau txais tus nqi zog tas huv si.
9 Tus twg hla txoj kev tseeb, mas nws tsis nyob hauv Leej Pleev lo lus qhia, nws tsis tau Tswv Ntuj ua nws tug. Tus nyob hauv lo lus qhia, nws tau Leej Txiv thiab Leej Tub ua nws tug.
10 Thaum muaj ib tug tuaj cuag nej, yog nws tsis coj lo lus qhia ntawd tuaj, mas nej txhob txais nws, nej txhob foom kev kaj lug rau nws. 11 Tus foom kev kaj lug rau ib tug neeg zoo li ntawd, mas nws nrog tus neeg ntawd koom ua ib co hauj lwm.
12 Kuv xav sau txog ntau yam tuaj rau nej, tab sis kuv tsis xav siv ntawv thiab siv kua mem los sau. Kuv vam ntsoov tias kuv yuav tuaj cuag nej, ces kuv yuav nrog nej hais lus, peb txoj kev zoo siab yuav puv puv phwj yaws.
13 Koj tus viv ncaus uas Ntuj xaiv, nws cov me nyuam xa lus hmov tshua tuaj rau koj.