YES XUS LUB NRA YOG TXOJ HAUJ LWM NYIAM LUB QAB NTUJ NEEG (MT 11: 28-30)
Yaj Saub His Xais hais cov lus ntuas tsoom His Xas Lais kom nco ntsoov tias tus loj tshaj mas yog Huab Tais Tswv Ntuj, nws hais tias Huab Tais Tswv Ntuj yog tus Tswv tsim txhua tsav yam, tsis hais cov hnub qub puag saum ntuj, los cov tsiaj nyob hauv lub ntiaj teb. Yaj Saub His Xais hais ntxiv tias cov neeg tos txog Huab Tais Tswv Ntuj, mas lawv lub zog rov tshiab tuaj, lawv tej tis tej tw hlav xws li tis tw dav, lawv khiav tsis paub sab, lawv mus kev tsis paub qaug zog, vim Huab Tais Tswv Ntuj yuav ntxiv zog rau lawv.
Yaj Saub His Xais ntuas cov His Xas Lais kuj yog nws xav kom lawv rov tso siab rau Huab Tais Tswv Ntuj, lawv yuav xub nco txog Huab Tais Tswv Ntuj ua ntej, mas Huab Tais Tswv Ntuj yuav ntxiv zog rau lawv, Huab Tais Tswv Ntuj yuav rov kho lawv kom tshiab tuaj.
Nyob hauv lub Moo Zoo, Huab Tais Yes Xus kuj ntuas cov thwj tim kom tso siab thiab nrhiav Huab Tais Yes Xus, ces lawv yuav tau so los siav. Huab Tais Yes Xus hais tias “Tas nej sawv daws uas nej khwv, thiab ris nra hnyav, nej tuaj cuag kuv mog! Kuv yuav cia nej so los siav. Nej txais kuv tus quab. Nej kawm ntawm kuv mog, vim kuv siab zoo, kuv tsis muab hlob, nej tus plig yuav nrhiav tau chaw so los siav. Vim kuv tus quab kwv yooj yim, thiab kuv lub nra sib“ (MT 11: 28-30).
Hub Tais Yes Xus lub nra nyob saum nws tus quab; yog txoj hauj lwm nyiam lub qab ntuj neeg.
Huab Tais Yes Xus xav kom peb txo lub nra hnyav saum peb tus quab pov tseg, ces peb tig hlo los txais Huab Tais Yes Xus lub nra no mus ris, mas peb thiaj yuav tau so los siav.
Thaum peb ua cov hauj lwm nyiam thiab hlub lwm tus; yam li peb pub cuab tam rau cov neeg pluag, peb pab tus neeg txom nyem, peb tsim kev haum xeeb nrog tus ntxub peb; mas peb lub siab kaj lug, peb zoo siab tas nrho.
Thaum peb muaj cuab tam ntau tab sis peb ua neeg cuaj khaum, thaum peb pom lwm tus neeg txom nyem peb tsis nqes tes pab, thaum peb hais lus sib cav sib ceg tsim yeeb ncuab tas mus li; mas peb lub siab nyob puas tus?
Peb kawg tsuas muaj kev ntshai thiab xav tsis tas.
Huab Tais Yes Xus hais tias “Nej yuav kawm ntawm kuv“, yog xyaum ua neeg siab zoo, xyaum ua neeg me tsis muab hlob. Yog peb ua neeg siab zoo thiab ua neeg me nyob ntawm sawv daws xub ntiag, mas tsis tas yuav tos peb tso lub ntiaj teb no tseg tso, peb mam tau txais kev kaj siab, nyob kaj nrig. Hnub no kiag los peb lub siab yeej yuav kaj, peb lub neej yeej yuav nyob xyiv fab luag ntxhi.
Huab Tais Yes Xus thiaj li ntuas peb kom kawm ntawm nws; ua tus neeg siab zoo, tsis muab hlob, ua cov hauj lwm sis nyiam sis hlub; mas peb lub zog thiaj yuav loj mus li, thiab peb tus plig thiaj yuav tshiab tuaj.
Lub caij Tos Huab Tais no, thov kom peb sawv daws kawm ntawm Huab Tais Yes Xus mog.
