TUS ZOO SIAB NYOB HAUV TSWV NTUJ, NWS YUAV UA NEEG SIAB CEEV TXEEB NTUJ LUB CEEB TSHEEJ (MT 11: 11-15)
Thaum cov His Xas Lais fav xeeb rau Tswv Ntuj, mas Huab Tais Tswv Ntuj cia lwm haiv neeg tuaj ntaus lub teb chaws tawg thiab coj lawv mus ua qhev nyob pej kum teb. Cov His Xas Lais tsis muaj chaw tso siab ntxiv tias muaj ib hnub lawv yuav rov tsa tau ib lub teb chaws yog lawv tug.
Cov His Xas Lais ua tsis ncaj rau Huab Tais Tswv Ntuj, tsis kav Huab Tais Tswv Ntuj tseem hlub lawv thiab nco txog nws cov lus cog, mas Huab Tais Tswv Ntuj thiaj tshoj tus Yaj Saub His Xais kom cev Huab Tais Tswv Ntuj cov lus rau tsoom His Xas Lais tias yog lawv zoo siab nyob hauv Huab Tais Tswv Ntuj mus li, mas Tswv Ntuj nrog nraim lawv thiab tuav lawv tes cia, Tswv Ntuj yuav txuag lawv thiab muaj ib hnub lawv yuav tau lub neej twj lij.
Peb yuav zoo siab nyob hauv Huab Tais Tswv Ntuj li cas?
Huab Tais Yes Xus qhia tias tus neeg zoo siab nyob hauv Huab Tais Tswv Ntuj, mas nws yuav ua neeg siab ceev txeeb Ntuj lub Ceeb Tsheej.
Huab Tais Yes Xus ntuas tias “Ntuj lub Ceeb Tsheej raug luag sib txeeb, cov neeg siab ceev txeeb lub Ceeb Tsheej”(MT 11: 12). Lo lus no ntxeev tau hais tias “Ntuj lub Ceeb Tsheej yog lub cuab tam uas tas sawv daws sib txeeb kom tau ua nws tug. Tus yuav tau txais Ntuj lub Ceeb Tsheej, kawg yog tus muaj lub siab ceev xwb, hos tus qeeb siab nrhiav Ntuj lub Ceeb Tsheej mas nws yuav plam.”
Lo lus ‘siab ceev’ txhais tias ‘Yog tus neeg ua tiag nyiaj txeem’. Yog li tus neeg zoo siab nyob hauv Huab Tais Tswv Ntuj yog tus neeg ua tiag nyiaj tej kev iab kev khwv, txeem tej kev txom nyem kom nws chaws tau mus hauv Ntuj lub Ceeb Tsheej. Tus xav tau Ntuj lub Ceeb Tsheej, nws yuav tau muab siab rau thiab kub siab nrhiav, tsis yog ua si.
Cov His Xas Lais ntseeg tias ua ntej Leej Pleev yuav los, mas Es Lias yuav xub los tso, vim tias Es Lias yog tus tuaj ua Leej Pleev ntej, ces Huab Tais Yes Xus thiaj li hais txog tus Ntxuav Plig Zam tias yog tus Es Lias yuav tuaj. Huab Tais Yes Xus hais li ntawd, yog nws xav qhia lawv kom ntseeg tias tus Pleev lawv tos yog nws ntag. Yog cov His Xas Lais ntseeg tias Zam yog Es Lias, mas lawv yuav hloov siab tshiab.
Hnub no Huab Tais Yes Xus kuj ntuas peb sawv daws kom ntseeg li ntawd; kom peb ntseeg Zam cov lus ntuas kom hloov siab tshiab, tig rov los npuab Tswv Ntuj, los nrog Huab Tais Yes Xus tsim Ntuj lub Ceeb Tsheej ua ke nyob hauv lub qab ntuj no.
