NPAJ SIAB TOS TXAIS HUAB TAIS YES XUS (MT 17: 9-13)
Vim Huab Tais Tswv Ntuj hlub neeg, nws thiaj xa cov Yaj Saub tuaj ntuas neeg kom tig los yuav siab tshiab ua xis Tswv Ntuj siab. Tab sis tsawg tus Yaj Saub los neeg tsis mloog, neeg tseem muab tua thiab. Muaj ib tug Yaj Saub tsis raug kev tuag, tab sis yog Tswv Ntuj coj nws mus saum ntuj lawm, yog tus Yaj Saub Es Lias.
Yaj Saub Es Lias lub npe txhais tias ‘Yas Ves yog Tswv Ntuj’. Nws yug los nyob ze xyoo 875 ua Yes Xus ntej, nws tuaj ntuas cov His Xas Lais qaum teb tias tsuas muaj tib tug Tswv Ntuj xwb yog Yas Ves tus npo cov His Xas Lais ntawm cov Hais Nkws Tos kev quab yuam ua qhev los, yog li mas cov His Xas Lais yuav tsis txhob teev cov dab Npas Has ua lawv cov Tswv Ntuj. Cov His Xas Lais yuav tau tso siab rau Yas Ves Tswv Ntuj xwb.
Tswv Ntuj lub npe ‘Yas Ves’ mas cov His Xas Lais thiab tsoom nseeg sawv daws tshwj cia ua lub npe ntshiab, ces thaum sawv daws tuav txog Tswv Ntuj lub npe, mas sawv daws yuav hu tias ‘Huab Tais’ los yog ‘Huab Tais Ntuj’ ces thaum sawv daws hais tias ‘Yas Ves Tswv Ntuj’ mas sawv daws thiaj hais zoo li no tias ‘Huab Tais Tswv Ntuj’.
Phau ntawv Npes Xis Las qhia hais tias Ntuj xaiv Es Lias ua tus qhuab qhia tib neeg thaum lub caij kawg. Nyob hauv Ntawv Ntshiab Cog Lus Qub mas cov Yaj Saub kuj hais tias thaum Tswv Ntuj tus Pleev yuav tuaj, mas Es Lias yuav xub los tso.
Cov Ntawv Ntshiab hais li ntawd, mas cov Kws Ntawv Ntshiab thiaj hais tias Huab Tais Yes Xus tsis yog Leej Pleev vim lawv twb tsis tau pom Es Lias rov nqes saum ntuj los.
Huab Tais Yes Xus hais rau lawv tias Es Lias yog tus yuav kho txoj kev kom ncaj thiab tiaj, ua ntej Leej Pleev yuav tuaj. Twb muaj ib tug tau ua zoo li ntawd, yog tus Ntxuav Plig Zam, nws tuaj ua kab ke ntxuav rau sawv daws thiab ntuas kom sawv daws hloov siab tshiab, tos Huab Tais Yes Xus. Es Lias yuav yog tus tuaj ua kom Ntuj siab nqig, ua kom phaj txiv thiab phaj tub rov sib haum xeeb, tuaj tsa cov His Xas Lais lub hwj chim kom rov sawv siab. Zam Ntxuav Plig tuaj ntuas cov Yus Das kom tu siab rau lawv cov txhaum, mas Huab Tais Tswv Ntuj thiaj tsis muab txim rau lawv; Zam Ntxuav Plig tuaj ntuas cov Yus Das kom rov tig los mloog Huab Tais Tswv Ntuj lus, mas lawv thiaj rov los npuab tau Huab Tais Tswv Ntuj; Zam Ntxuav Plig tuaj ntuas cov Yus Das kom hloov siab tshiab, mas lawv thiaj tsim nyog ua Tswv Ntuj haiv neeg, ces lawv yuav rov muaj hwj chim nyob ntawm txhua haiv neeg xub ntiag.
Li ntawd, Zam Ntxuav Plig thiaj yog tus Es Lias sawv daws hais txog.
Ob txhiab tawm xyoo tas los, Zam tawm tuaj ntuas cov Yus Das kom npaj txoj kev rau Huab Tais Yes Xus taug. Ob txhiab tawm xyoo tom qab no, lub Koom Txoos tseem ntuas peb cov neeg ntseeg kom npaj siab npaj ntsws tos Huab Tais Yes Xus yuav rov tuaj dua.
Lub caij Tos Huab Tais, mas lub Koom Txoos qhia tias yog lub caij peb yuav npaj siab tos txais Huab Tais Yes Xus yug thiab tos Huab Tais Yes Xus los zaum ob. Yog li ua ntej yuav txog lub caij Yes Xus yug, cov Leej Choj thiaj ntuas sawv daws kom hloov siab tshiab, nyias npaj nyias txoj kev kom ncaj thiab tiaj cia Huab Tais Yes Xus taug tuaj nyob hauv nyias.
Peb yuav muab txoj kev sis nyiam sis hlub los ua av txhub peb txoj kev ua kwj ua hav kom tiaj, peb yuav muab peb lub neej los ua hlau kho peb txoj kev kom ncaj.
Lub caij Tos Huab Tais no, peb yuav pheej xeeb rau Tswv Ntuj thiab ua tim khawv zeem tseeb txog Tswv Ntuj, mas peb thiaj li yuav hais tau tias ‘Huab Tais yog Tswv Ntuj; nws yog peb tus Tswv Ntuj, nws tuaj lawm.”
