Hnub Chiv, Lis Piam 14 caij Nyob Nruab Xyoo (A)
Hnub Chiv tim 5 lub 7 hli tas los ua ntej yuav thov Ntuj raws zaj tus Tshiab xa xov nyob ntawm lub tshav puam Leej Ntshiab Pob Zeb, Vaj Qhia Les Os 14 tau nthuav lub Moo Zoo hauv hnub no rau tsoom ntseeg sawv daws mloog; yog zaj Huab Tais Yes Xus caw cov neeg sab thiab qaug zog los so hauv nws (MT 11: 25-30). Vaj Qhia hais tias Tswv Ntuj tsis muab hlob, mas Tswv Ntuj thiaj li ua nws txoj num ntsiag ntsiag. Yog li tus neeg tsis muab hlob thiab qhib siab txais Tswv Ntuj xwb thiaj yuav pom tau Tswv Ntuj; tus neeg ruaj siab rau nws zaj tswv yim thiab xav tias nws ntse txaus, mas nws yuav tsis pom Tswv Ntuj.
Tswv Ntuj kev thoob tsib tawm tuaj rau peb pom thaum Tswv Ntuj Leej Tub yeem ua tus me txais ntiaj teb neeg lub cev nqaij kom tau nyob ze cov neeg sab qaug zog thiab hais rau lawv tias “Tas nej sawv daws uas nej khwv thiab ris nra hnyav, nej tuaj cuag kuv mog!” (MT 11: 28).
Huab Tais Yes Xus hais li ntawd tas, nws tseem hais kom lawv txais nws tus quab.
Huab Tais Yes Xus tus quab tsis yog lub nra hnyav nws muab tsuam peb txoj sia, tab sis Huab Tais Yes Xus tus quab yog nws txoj kev.
Huab Tais Yes Xus txoj kev yog kev nyiam; vim nws nyiam peb, mas nws muab nws ua nqi txhiv peb. Huab Tais Yes Xus hu peb kom los nrog nws mus kev ua ke. Huab Tais Yes Xus hais tias “Yog leej twg xav los raws kuv, nws yuav tsum nrauj nws, nws yuav kwv nws tus ntoo cuam, nws yuav lawv kuv qab” (MT 16: 24). Li ntawd, kev nrauj tus kheej vim txoj kev nyiam zoo li no thiaj li yog Huab Tais Yes Xus tus quab. Qhov no yog lub ntsiab tseem ceeb hauv Huab Tais Yes Xus cov lus qhia thiab yog Tswv Ntuj kev thoob tsib lub plawv uas muaj kev nyiam cig kub lug.
Tus ntoo cuam sib kha vim muaj Huab Tais Yes Xus ua tus pab peb kwv thiab Huab Tais Yes Xus tsis cia peb ib leeg xwb raug tus ntoo cuam tsuam.
Nyob hauv txoj kev ua qhev, peb muaj Huab Tais Yes Xus ua qhov chaw tso peb dim. Huab Tais Yes Xus yog peb qhov chaw tso siab, thaum peb nyob nruab nrab hauv kev sib ntaus sib tua. Thaum peb ua txhaum, Huab Tais Yes Xus yog kev zam txhaum rau peb. Huab Tais Yes Xus zoo li ntawd, nws thiaj yog txoj kev peb ntshaw taug. Huab Tais Yes Xus qhia peb kom paub txog Tswv Ntuj qhov tseeb thiab paub txog tib neeg, nws hais tias “Tsis muaj leej twg paub Leej Txiv, tsuas kawg Leej Tub thiaj paub, thiab tus uas Leej Tub pom zoo qhia rau kom paub” (MT 11: 27).
