(MT 12: 38-42)
Cov kwv tij, nyob hauv zaj nyeem hnub no peb pom tias cov Kws Ntawv Ntshiab thiab cov Fas Lis Xais xav kom Huab Tais Yes Xus ua tej lub cim rau lawv pom tias nws yog tus tuaj ntawm Tswv Ntuj tuaj tiag. Tab sis Huab Tais Yes Xus tsis yeem ua raws li lawv hais. Vim lawv cov lus ntawd tsuas yog zoo li cov lus thuam Huab Tais Yes Xus xwb.
Nyob hauv peb muaj ntau zaus peb nyiam nyiam thov Ntuj tias “Huab Tais Tswv Ntuj, koj mloog kuv cov lus thov txog koj mas, koj ua raws li kuv thov mas. Koj ua kiag li kuv thov, mas sawv daws thiaj yuav pom koj lub hwj huam, ces sawv daws thiaj ntseeg tias koj yog tus tseem Tswv Ntuj tiag.” Peb hais li no rau Tswv Ntuj, mas zoo li cov Kws Ntawv Ntshiab thiab cov Fas Lis Xais peb hnov hauv hnub no. Tsis yog peb tab tom ntseeg txog Tswv Ntuj tab sis yog peb tab tom thuam Tswv Ntuj. Peb tab tom ua neeg fav xeeb rau Tswv Ntuj tiag!
Huab Tais Yes Xus tsis ua ib lub cim rau lawv pom, tab sis Huab Tais Yes Xus hais txog Yos Nas nyob 3 hnub hauv tus vaj ntses lub plab rau lawv coj mus xav xwb. Nyem no lawv tsis to taub tab sis thaum Huab Tais Yes Xus tuag mus zwm av 3 hnub sawv rov los, mas lawv yuav to taub, ces vam tias lawv yuav tig los ntseeg txog nws.
Kwv tij Hmoob, Huab Tais Yes Xus twb ua lub cim loj tshaj rau peb pom lawv tiag; yog Huab Tais Yes Xus sawv hauv tub tuag teb rov los txais txoj sia tshiab nyob mus li. Tsis muaj lub cim twg yuav loj dua no lawm. Li ntawd, peb tsis tas yuav tos cia Huab Tais Yes Xus ua ib lub cim dab tsi ntxiv tso, peb mam li ntseeg txog nws.
Huab Tais Yes Xus hais ntxiv tias thaum txog Hnub Txiav Txim, cov neeg nyob Nis Nis Vas yuav nrog tiam neeg no sawv los, lawv yuav muab txim rau tiam neeg no, vim thaum Yos Nas ntuas lawv, lawv hloov siab.
Kwv tij, Yos Nas tsis tau ua ib lub cim dab tsi rau cov neeg nyob Nis Nis Vas pom, Yos Nas tsuas yog ceeb toom Tswv Ntuj cov lus rau lawv xwb, ces lawv mloog thiab hloov siab tshiab tam sid. Hos nyob ntawm cov Kws Ntawv Ntshiab thiab cov Fas Lis Xais, lawv muaj Huab Tais Yes Xus nyob nruab nrab hauv lawv, tsis kav lawv tsis ntseeg.
Niaj hnub Huab Tais Yes Xus nrog nraim peb, nws hais lus rau peb, hu peb kom los ua raws li nws cov lus qhia, peb puas ua zoo li cov neeg nyob Nis Nias Vas los peb ua zoo li cov Kws Ntawv Ntshiab thiab cov Fas Lis Xais?
Huab Tais Yes Xus hais tias tus poj vaj nyob qab teb tuaj tim npoo ntiaj teb tuaj mloog Xas Los Moos cov lus thoob tsib, hos nyob ntawm no twb muaj tus loj dua Xas Los Moos, tsis kav cov Kws Ntawv Ntshiab thiab cov Fas Lis Xais tsis mloog, mas txog Hnub Txiav Txim, tus poj vaj kuj yuav sawv los muab txim rau lawv thiab.
Yog li mas kwv tij Hmoob, niaj hnub Huab Tais Tswv Ntuj nrog nraim peb, hais lus rau peb sis tseg, peb puas muab siab nrhiav kom tau mloog Huab Tais Yes Xus cov lus zoo li tus poj vaj nyob qab teb tuaj mloog Xas Los Moos cov lus thoob tsib, los peb yuav ua zoo li cov Kws Ntawv Ntshiab thiab cov Fas Lis Xais tsis kam yuav Huab Tais Yes Xus cov lus?
Kwv tij Hmoob sawv daws, niaj hnub peb yuav muab siab rau thov Ntuj thiab txais cov Cim Ntshiab kom peb tau npuab Huab Tais Yes Xus. Thaum peb ua txhaum ua yuam kev, peb yuav maj thov Tswv Ntuj zam txhaum rau peb. Peb yuav muab siab rau nyeem Ntawv Ntshiab kom tau txais Tswv Ntuj cov lus los ua qhov pom kev coj peb kev ua neej hla lub ntiaj teb no.
