(MT 12: 14-21)
Kwv tij Hmoob sawv daws, thaum cov Fas Lis Xais pom Huab Tais Yes Xus kho tus neeg qhuav tes nyob hauv hnub Xas Npas Tos, mas cov Fas Lis Xais tsis zoo siab vim lawv saib tias Huab Tais Yes Xus hla txoj cai caiv hnub Xas Npas Tos. Yog lawv tsis ua dab tsi li, mas ntev mus tsoom sid yuav qog Huab Tais Yes Xus, ces tsis muaj leej twg yuav caiv hnub Xas Npas Tos ntxiv, tsis muaj leej twg yuav mloog lawv lawm. Cov Fas Lis Xais thiaj li sib sab laj yuav muab Huab Tais Yes Xus tua pov tseg.
Huab Tais Yes Xus paub tias cov Fas Lis Xais xav ua phem rau nws, ces Huab Tais Yes Xus thiaj li tawm ntawm qhov chaw ntawd mus. Tab sis muaj neeg coob coob raws Huab Tais Yes Xus, kom Huab Tais Yes Xus tau kho lawv cov mob kom zoo. Huab Tais Yes Xus pom lawv, nws hlub lawv, ces nws kho lawv zoo tas. Huab Tais Yes Xus txwv lawv tsis txhob mus qhia rau leej twg paub tias lawv tus mob zoo yog vim nws kho.
Kwv tij Hmoob sawv daws, zaj Ntawv Moo Zoo no peb pom muaj 3 yam zoo khaws coj los xav.
1. Ua neeg zoo thiab nrhiav kev maim xwv txheej. Huab Tais Yes Xus pom tias cov Fas Lis Xais xav ua phem rau nws, ces Huab Tais Yes Xus tawm mus kom deb cov neeg xav phem rau nws. Huab Tais Yes Xus tsis nrog lawv thab plaub, tsis nrog lawv sib cav, mas tsis yog Huab Tais Yes Xus ntshai lawv, tab sis vim Huab Tais Yes Xus ua neeg zoo. Huab Tais Yes Xus paub tias tsis tau txog nws lub sij hawm, ces nws nyob ntawd ntxiv los tsis muaj dab tsi zoo tuaj, nws mus ua cov hauj lwm zoo los pab cov neeg mob mas yuav zoo dua.
2. Ua tub txib siab muag siab mos rau sawv daws. Mas Tais vam txog tus Yaj Saub His Xais cov lus los hais txog Huab Tais Yes Xus tias “Tus tauj qaug, nws tsis muab lov. Tus teeb xeeb cig qauj les, nws tsis muab tshuab.” Lo lus no txhais tias cov neeg muaj mob, cov neeg txom nyem, cov neeg zeej tsoom saib tsis tau lawv, los cov tsis muaj chaw tso siab, cov tsis muaj chaw vam; lawv tuaj cuag Huab Tais Yes Xus, mas Huab Tais Yes Xus tsis ua rau lawv tu siab, Huab Tais Yes Xus ua siab muag pab lawv, ntxiv zog rau lawv kom rov sawv taus ntseg.
3. Kev tshaj Ntuj Lus tsis tas yuav siv lub ncauj hais. Huab Tais Yes Xus txwv cov neeg nws kho lawv zoo tas kom lawv tsis txhob mus hais qhia rau leej twg paub. Tos Huab Tais Yes Xus txwv lawv, vim nws tsis xav kom nws lub npe ncha mus, nws tsis xav kom tas zeej tsoom saib nws yog ib tug neeg tseem ceeb dab tsi. Qhov Huab Tais Yes Xus xav tau ntawm lawv, yog kom lawv nco rau nruab siab tias Huab Tais Yes Xus nyiam lawv thiab hlub lawv. Tsis yog kom lawv nco tias Huab Tais Yes Xus tau ua hwj huam pab cawm lawv.
Kwv tij Hmoob sawv daws, peb paub li no lawm, tsim nyog niaj hnub peb pom cov nyob ib ncig peb lawv ua tej yam yuam kev, lawv ntog rau txoj kev ua txhuam, lawv lub siab ntseeg tsuag, mas peb yuav tau cev tes mus pab lawv.
Peb paub li no lawm, tsim nyog peb ua dab tsi, mas peb txhob vam kom tau lus qhuas ntawm sawv daws, tsis tas tos cia sawv daws pom tso peb mam li ua. Tab txawm tsis muaj leej twg pom, tsis muaj leej twg hais ib lo lus zoo txog, los peb rau siab ua mus ntxiv.
Peb paub li no lawm, thaum peb ua ib yam dab tsi yog peb pom tias zoo rau sawv daws, tab txawm muaj neeg tsis nyiam peb, muaj neeg nrhiav lus rau peb, mas peb txhob nrog lawv sib cav, txhob nrog lawv sib tim ntsej tim muag dab tsi. Peb yuav ua zoo li Huab Tais Yes Xus, txav deb lawv thiab kav tsij ua mus tsis txhob ntshai dab tsi.
