(MT 12: 46-50)
Mas Tais sau piav tias Huab Tais Yes Xus niam thiab nws cov kwv tij tuaj sawv nraum zoov. Lo lus no txhais tau tias thaum ntawd Huab Tais Yes Xus niam thiab nws cov kwv tij tseem tsis to taub tseeb txog Huab Tais Yes Xus cov dej num Huab Tais Leej Txiv txib nws tuaj ua. Lawv tseem tsis tau koom nrog Huab Tais Yes Xus ua txoj hauj lwm cawm neeg tiag.
Zoo ib yam li peb sawv daws, peb muaj peb cuab tsev neeg, mas peb yeej nyiam thiab hlub lawv raws li ntiaj teb zaj tswv yim. Tab sis yog peb kev nyiam thiab hlub peb cuab tsev neeg los cov txheeb ze ntawd khuam peb cia kom tsis tau leg txoj hauj lwm Tswv Ntuj npaj tseg rau peb, los yog ua rau peb tsis nco qab ua txoj hauj lwm xis Tswv Ntuj siab, mas thaum ntawd peb puas yuav muaj cuab kav ruaj khov rau txoj hauj lwm Tswv Ntuj txhib peb?
Mas Tais piav ntxiv tias muaj ib tug hais rau Yes Xus tias nws niam thiab nws cov kwv tij tuaj txog nraud, lawv xav nrog nws txuas lus, mas Huab Tais Yes Xus teb rau tus neeg tuaj qhia nws tias nws niam thiab nws cov kwv tij yog cov thwj tim ua raws Huab Tais Leej Txiv nyob saum ntuj lub siab.
Cov lus no tsis tau txhais tias Huab Tais Yes Xus tsis lees yuav nws niam thiab nws cov kwv tij txheeb txheeb ua nws niam thiab kwv tij tiag. Tab sis Huab Tais Yes Xus xav qhia rau tus tuaj hais rau nws ntawd kom to taub tias Huab Tais Yes Xus tsev neeg tsis yog cov koom tib tsob ntshav xwb, tab sis yog tas cov neeg mloog Leej Txiv Tswv Ntuj thiab ua xis Leej Txiv Tswv Ntuj lub siab.
Kwv tij, tus twg mloog thiab ua xis Tswv Ntuj siab, tus ntawd yog tus ntseeg txog Tswv Ntuj. Li ntawd, thaum peb hais tias peb ntseeg txog Tswv Ntuj los hais tias ntseeg txog Huab Tais Yes Xus los ntseeg txog Leej Ntuj Plig Ntshiab, mas peb puas mloog thiab ua cov hauj lwm xis Tswv Ntuj siab raws li Huab Tais Yes Xus cov lus qhia uas muaj Leej Ntuj Plig Ntshiab ua tus tshoj peb kom ua?
Kwv tij Hmoob, tab txawm peb yug los nyias muaj nyias xeem, yug los nyias muaj nyias caj ces, tab sis thaum peb tig los ntseeg txog tib tug Tswv Ntuj lawm, txawm tias yuav muaj ntau lub Koom Txoos, los peb koom muaj tib leeg Txiv, muaj tib leeg Tij, muaj tib leeg Niam. Li ntawd, peb thiaj yuav tau sib sib hlub.
Kwv tij Hmoob, ziag no peb tig los saib peb tus kheej, saib peb puas yog tuaj nrhiav Huab Tais Yes Xus vim peb tau lub npe tias yog ib tus neeg ntseeg, los peb tuaj nrhiav kom tau zaum mloog Huab Tais Yes Xus cov lus. Peb nco ntsoov tias nyob hauv lub ntiaj teb no peb tsis nyob twm zeej, peb muaj cov neeg ntseeg ua peb kwv peb tij, peb koom nrog Huab Tais Yes Xus muaj tib leeg Txiv. Peb nco tias niaj hnub peb yuav tau ua cov hauj lwm kom xis Tswv Ntuj siab, mas peb thiaj yuav yog Huab Tais Leej Txiv ib tug me nyuam tiag.
