NTHUAV ZAJ NYEEM

Mas Tais Ntawv Moo Zoo (MT 8: 5-11)
Kwv tij Hmoob sawv daws, hnub no Huab Tais Yes Xus hais tias “Kuv hais rau nej, yuav muaj neeg coob tuaj toob fab thiab xib fab tuaj nrog Has Nplas Has, nrog His Xas Has thiab Yas Kos noj rooj qav hauv Ntuj lub Ceeb Tsheej.”
Tos Huab Tais Yes Xus hais lo lus no vim tias cov neeg Yus Das xav tias tsuas yog lawv hais neeg xwb thiaj muaj cai mus nrog Tswv Ntuj nyob saum Ntuj Ceeb Tsheej, vim Tswv Ntuj tau xaiv lawv los ua Tswv Ntuj haiv neeg.
Cov kwv tij, niaj hnub no peb cov neeg coj kev cai Ntuj mas peb xav xws li cov Yus Das, peb hais tias tus txais Cim Ntxuav ua ib tug neeg ntseeg lawm, mas thaum tso lub ntiaj teb no tseg, nws yuav tau mus nyob saum Ntuj Ceeb Tsheej; cov coj qub kev cai los yog lwm txoj kev teev hawm, mas lawv tuag ces kawg mus dab phem teb.
Vim peb xav li no mas niaj hnub no peb ib txhia thiaj tsis kub siab tuaj teev Ntuj, tsis liam fab rau pab cov neeg txom nyem, tsis quav ntsej coj lub neej mus raws txoj kev sib nyiam sib hlub. Peb hais tias ua cas los kuv twb tau txais kev cawm lawm, kuv yeej yuav tau mus nyob nrog Tswv Ntuj xwb xwb li, vim kuv tau txais Cim Ntxuav ua Tswv Ntuj haiv neeg lawm.
Kwv tij Hmoob sawv daws, thov kom nej txhob xav li no, thov koj nej tso lub tswv yim zoo li no pov tseg mog.
Peb xav kom nej ua raws li tus xab txheeb nyob hauv lub Moo Zoo hnub no; muab siab rau hlub lwm tus, thov Tswv Ntuj rau cov neeg raug txom nyem, tso siab rau Tswv Ntuj lo lus thiab ntseeg tas siab tias Tswv Ntuj yog tus cawm tau peb.
Cov kwv tij,thov kom nej nco tias tus neeg yuav tau mus koom rooj qav hauv Ntuj lub Ceeb Tsheej, yog tus ntseeg thiab ua raws Huab Tais Yes Xus cov lus tias koj yuav nyiam Tswv Ntuj tas siab tas ntsws, tas koj lub zog, koj lub tswv yim, koj tus plig; thiab koj yuav nyiam lwm li koj nyiam koj, tsis hais tus txheeb koj los tsis txheeb, yog koj phooj ywg los yeeb ncuab.

Lus Kas Ntawv Moo Zoo (LK 10: 21-24)
Kwv tij Hmoob sawv daws, tej zaus nej ib txhia yuav hais tias tos kuv tsis paub Tswv Ntuj, tos kuv tsis tso siab rau Tswv Ntuj mas vim Tswv Ntuj tsis xav cia kuv paub nws, vim Huab Tais Yes Xus twb hais tias “Tsis muaj leej twg paub tias Leej Txiv yog tus twg, kawg yog Leej Tub thiaj paub, thiab yog tus uas Leej Tub xav qhia rau kom paub.”
Qhov tseeb mas txij hnub Huab Tais Yes Xus nqes los xeeb ua neeg, mas twb yog lub caij Tswv Ntuj xav qhia rau sawv daws paub txog Tswv Ntuj lawm. Tab sis tos ib txhia pheej tsis xav paub Tswv Ntuj mas yog vim lawv muab lawv lub siab kaw, lawv tsis kam txo lub hwj chim, lawv lub tsim los ua ib tug neeg me me xws li tej me nyuam, ces lawv thiaj ntsia tsis pom Tswv Ntuj thiab tsis paub Tswv Ntuj.
Nyob hauv peb sawv daws mas yeej zoo li ntawd thiab ntag, peb hais tias peb ntseeg Ntuj tsis kav yog peb tsis yeem ua ib tug neeg me mas peb yuav tsis pom Tswv Ntuj thiab.
Yog thaum ib tug kwv tij ua tsis zoo rau peb, nyob nyob muaj ib hnub nws raug txom nyem, nws tuaj thov txog peb kom pab nws, peb puas yuav pab?
Ib txhia yuav teb tias ‘kuv tsis pab nws vim tias yav thaud nws tau ua tsis zoo rau kuv’, tab sis yuav muaj ib txhia teb tias ‘txawm yav tas los nws ua tsis zoo rau kuv, los kav liam, hnub no nws raug txom nyem thiab tuaj vam txog kuv, ces kuv yuav pab nws li qhov kuv pab tau.’
Kwv tij Hmoob, ob cov neeg no cov twg thiaj yuav yog cov tau pom Tswv Ntuj? Kawg yog cov hais tias ‘kuv yuav pab nws’ vim Huab Tais Yes Xus twb tau hais rau peb paub lawm tias “Nej tau ua npaum li cas rau cov me tshaj hauv kuv tsoom kwv, mas yog nej ua rau kuv.” (MT 25: 40)
Yog li mas kwv tij Hmoob sawv daws, thov kom niaj hnub mas nej ua tus neeg me, txhob ua dev tsa tw, txhob ua tus neeg muab hlob, txhob tsa yus cai mas thaum nej pom cov neeg raug txom nyem, nej thiaj yuav paub tias tus neeg ntawd yog Tswv Ntuj xa tuaj rau nej tau tsob hwb nws, Tswv Ntuj nyob hauv tus neeg txom nyem ntawd.

Mas Tais Ntawv Moo Zoo (MT 4: 18-22)
Cov kwv tij, hnub no Koom Txoos ua hmoov nco Leej Ntshiab As Nres. As Nres yog leej twg?
Lub Moo Zoo hnub no peb hnov hais tias Huab Tais Yes Xus pom 4 tug tub puav ntses yog Xis Moos thiab nws tus kwv As Nres, Yas Kos thiab nws tus kwv Zam; ces Huab Tais Yes Xus hw lawv kom raws nws qab mus. Huab Tais Yes Xus hais rau lawv tias nws yuav tsa lawv ua tub puav neeg.
Yog peb nyeem nyob hauv Zam Ntawv Moo Zoo, peb yuav paub tias ua ntej Huab Tais Yes Xus yuav hu lawv 4 tug no los ua nws thwj tim, mas As Nres twb tau ntsib Huab Tais Yes Xus lawm, As Nres nrog Huab Tais Yes Xus tham ib nrab hnub ces As Nres thiaj paub tias Huab Tais Yes Xus yog tus Cawm Seej uas cov yaj saub tau sau txog.
As Nres kuj yog tus hais qhia rau Xis Moos kom mus ntsib Huab Tais Yes Xus thiab. Dhau ntawd, peb tseem paub ntxiv tias As Nres tau mus tshaj lub Moo Zoo nyob Hes Las thiab ob peb lub teb chaws nyob As Xias Nrab, ces As Nres tuag ua tim khawv nyob hauv lub nroog Pas Tas Xos.
Cov kwv tij, qhov peb piav los no mas yog Leej Ntshiab As Nres lub neej raws li peb paub. Tab sis hnub no muaj ib qho peb xav muab coj los twm rau sawv daws ua ke, mas yog qhov tias ua cas Huab Tais Yes Xus thiaj xaiv 4 tug tub puav ntses los raws nws qab thiab tom ntej yuav tsa lawv ua Hauv Paus Xa Lus.
Yog peb tig rov los ntsia txog peb lub neej, peb yuav pom tias ib tug neeg thaum nws mus yos ntses, mus nuv ntses mas nws tsum txawj ua siab ntev tos tiag tiag mas nws thiaj yuav ntes tau ntses. Dhau ntawd tus neeg nyiam yos ntses mas nws tsum txawj xaiv saib ntses nyiam noj cov kab zoo li cas los yog nyob rau thaj chaw twg thiaj muaj cov ntses raws li nws xav tau. Tus neeg ntes ntses mas nws yuav paub tias thaum twg tsim nyog tawm mus ntes ntses thiab thaum twg tsim nyog rov qab los nyob tim ntug nqhuab, nws yuav tsum muaj cuab kav tawm mus yog ntses nyob hauv tej hav dej nphau nphwv, tej qhov dej tob.
Cov neeg yuav ua Tswv Ntuj txoj hauj lwm kuj yuav yog cov neeg zoo li hais los no thiab: lawv yuav txawj ua siab ntev, lawv yuav mob siab ntso rau lawv txoj hauj lwm, lawv tsum paub tias yuav tshaj lub Moo Zoo rau ib tug neeg mas yuav tshaj zoo li cas thiaj coj tau lub Moo Zoo mus deev tau tus ntawd lub siab, lawv yuav tsum paub tias lub sij hawm twg yuav tsum tawm mus ua Tswv Ntuj txoj hauj lwm thiab lub sij hawm twg yuav nyob tos, lawv tsum tsis muaj lub siab ntshai cov xwv txheej yuav tuaj raug rau lawv lub neej.
Cov kwv tij, hnub no peb yuav thov Leej Ntshiab As Nres pab thov Tswv Ntuj rau peb, kom peb txawj yoog raws nws tus yam ntxwv mas peb thiaj yuav muaj peev xwm ua Tswv Ntuj txoj hauj lwm mog.

Mas Tais Ntawv Moo Zoo (MT 7: 21, 24-27)
Cov kwv tij, Huab Tais Yes Xus hais tias leej twg mloog kuv cov lus thiab ua raws mas tus ntawd zoo li nws tsa lub tsev rau saum tsua, thaum los nag hlob, dej sab siv huam, cua tshuab ntsawj mas nws lub tsev yuav tsis vau.
Yog muab hais los kom to taub rau peb cov kwv tij Hmoob mas ntshe yuav hais tias yog thaum peb hnov Huab Tais Yes Xus cov lus thiab peb ua raws li Huab Tais Yes Xus qhia, mas peb txoj sia yuav ruaj khov xws li lub tsev txhos tau cov ncej tob kho kho thiab muab hmoov zeb cam rau kom ruaj ces cua hlob npaum cas mas peb lub tsev ntawd yuav tsis vau.
Cov kwv tij, thaum nej hnov peb coj Ntawv Moo Zoo tuaj twm rau nej mloog, thaum nej mloog tus Leej Choj los Xib Hwb nthuav lub Moo Zoo nyob hauv lub tsev txoos hauv Hnub Chiv, mas nej yuav muab siab xav saib cov lus ntawd yog Huab Tais Yes Xus tab tom hais qhia dab tsi rau nej, Huab Tais Yes Xus tab tom hais kom hnub ntawd nej ua lub neej zoo li cas thiaj yuav xis Tswv Ntuj siab nyiam.

Mas Tais Ntawv Moo Zoo (MT 9: 27-31)
Kwv tij Hmoob sawv daws, ob tug dig muag rov pom kev vim nkawd ntseeg tias Huab Tais Yes Xus muaj hwj chim kho kom nkawd rov pom kev tau. Hnub no peb sawv daws ua neej nyob mas peb kuj zoo li ob tug dig muag ntawd, peb tso siab tias Huab Tais Yes Xus yeej muaj peev xwm cawm peb, qhib peb lub siab dig no kom rov pom kev tau thiab.
Tab sis qhov ua ntej tshaj mas peb tsum paub tias peb yog ib tug neeg mob, peb lub siab tab tom poob rau kev tsaus ntuj, peb lub tswv yim tab tom qauj; peb xav kho peb tus mob, peb xav kom lub siab kaj, lub tswv yim rov pom kev; mas thaum ntawd Huab Tais Yes Xus thiaj yuav kho tau peb.
Kwv tij Hmoob, txhua hnub ua ntej yuav pw mas peb yuav nyob ntsiag to rov xav txog peb lub neej saib hnub no peb tau ua txhaum dab tsi, peb tau ua tsis zoo rau leej twg, peb puas tau ua lub neej nyob hauv kev tsaus; ces peb yuav thov Huab Tais Yes Xus peb tus Tswv Ntuj kom pab peb, ntxuav peb, kom peb lub siab kaj, rov pom kev, thiab peb yuav nco ntsoov cav txog Tswv Ntuj lub koob meej mus li mog.

Mas Tais Ntawv Moo Zoo (MT 9: 35-10: 1,5A, 6-8)
Cov kwv tij, niaj hnub no nyob hauv peb tsoom Hmoob, mas peb muaj cov tub tshaj Ntuj Lus tsawg tsawg, yog li mas peb yuav niaj hnub sib koom siab thov Tswv Ntuj xaiv cov tub hluas ntxhais hluas hauv peb haiv Hmoob los ua Tswv Ntuj txoj hauj lwm, peb yuav thov Tswv Ntuj xa nws cov tub zog tuaj sau nws cov qoob nyob hauv peb haiv Hmoob raws li cov lus Txiv Plig Txhiaj Foom tau sau tseg tias “Peb tus Huab Tais Yes Xus Pleev, niaj hnub no peb nco koj lo lus tseem ceeb qhia peb tias ‘tseem tshuav ib co yaj uas tsis tau los nyob sab laj kab hauv no’, peb kuj nco txog tus Hauv Paus Xa Lus Paj Lug tej lus hais tias ‘cov tsis tau xub hnov koj lo lus, mas lawv yuav ua li cas ntseeg? Yog tsis muaj cov tub tshaj Ntuj Lo Lus, mas luag yuav ua cas hnov tau Tswv Ntuj lob Moo Zoo?’
Hnub no peb thov koj hu tej tus tub ntxhais hluas Hmoob kom los ua koj lub luag hauj lwm tshaj lub Moo Zoo. Thov koj pub koj Leej Ntuj Plig Ntshiab los tshoj kom muaj tej tus npaj siab los coj lub neej tab seeb ua Txiv Plig, ua Phauj, thiab ua Xib Hwb.”

Lus Kas Ntawv Moo Zoo (LK 5: 17-26)
Kwv tij Hmoob, Huab Tais Yes Xus hais rau tus tuag ceg pw hauv lub txaj tias “Me kwv, kuv daws koj cov txhaum tas lawm”, thiab hais tias “Koj saw, koj nqa koj lub txaj, koj rov mus tsev”, ces tus tuag ceg cia li sawv tsees tiag!
Cov kwv tij Hmoob, peb ntseeg tias Huab Tais Yes Xus muaj hwj huam daws tau peb cov txhaum, ces peb thiaj nquag mus txais lub Cim Daws Txhaum ntawm Leej Pleev, kom peb rov tau nrog Tswv Ntuj sib haum xeeb.
Cov kwv tij, nej ntseeg, nej tso siab rau Tswv Ntuj thiab ua raws li Tswv Ntuj hais, mas Tswv Ntuj thiaj yuav daws tau nej cov txhaum, coj tau nej rov los mus nyob hauv nej Txiv Tswv Ntuj tsev.
Thaum peb mus daws txhaum tas, mas peb yuav nco ntsoov cav txog Tswv Ntuj lub koob meej xws li tus tuag ceg hauv lub Moo Zoo hnub no mog!

Mas Tais Ntawv Moo Zoo (MT 18: 12-14)
Cov kwv tij, Huab Tais Yes Xus hais tias yog peb muaj ib tug yaj poob zoo lawm, peb yuav nrhiav kom tau tus yaj ntawd, mas peb thiaj yuav muaj kev zoo siab; nyob ntawm Tswv Ntuj los Tswv Ntuj yeej xav li ntawd thiab.
Niaj hnub no peb pom tias muaj cov neeg ntseeg coob tau tso txoj kev ntseeg tseg, lawv tsis kub siab tuaj teev Ntuj, ua Tswv Ntuj txoj hauj lwm. Qhov no ua rau Tswv Ntuj tu siab kawg nkaus, tsis kav Tswv Ntuj tsis taus siab yau, Tswv Ntuj tseem niaj hnub tawm mus nrhiav tus neeg ncaim ntawm Tswv Ntuj. Yog li peb ne, peb yuav ua li cas kom Tswv Ntuj thiaj rov muaj kev zoo siab? Peb yuav nyob twj ywm txuag peb pawg ntseeg kom nyob ruaj xwb, los peb yuav sib pab tawm mus coj peb tus kwv tij rov qab los?
Cov kwv tij Hmoob, peb txhob cia txoj hauj lwm no rau Txiv Plig ua tus ua xwb, peb yuav tau koom tes nrog Txiv Plig mas thiaj yuav sib pab nrhiav tau tus yaj poob zoo mog!
Thov kom nyob hauv lub caij Tos Huab Tais no, peb sib tuav tes tawm mus nrhiav kom tau Tswv Ntuj tus me nyuam yaj poob zoo, mas Tswv Ntuj lub siab thiaj xyiv fab tuaj mog!

Mas Tais Ntawv Moo Zoo (MT 11: 28-30)
Kwv tij Hmoob sawv daws, niaj hnub no muaj ntau tus ua neej nrog txoj kev mob hlwb, ntau tus ua neej nyob hauv kev qaug zog, muaj ntau tus mas lub hlwb dhia tas txwv tsis tau so li. Tab sis kuj muaj coob leej lawv txawj nrhiav tej lub sij hawm so, nyob ntsiag to kom lawv lub siab rov kaj, kom lawv lub hlwb txhob xav ntau.
Hnub no Huab Tais Yes Xus hais rau peb sawv daws tias “nej los cuag kuv mog, nej los so nyob hauv kuv mas! Nej tso nej tej kev khwv, kev ntxhov siab, nej lub nras rau kuv mas, nej muab los hloov kuv lub.”
Cov kwv tij, peb yuav nrhiav lub sij hawm los nyob nrog Huab Tais Yes Xus, nrog nws tham, cev peb tej kev iab kev khwv rau nws, ces ntseeg tau tias peb yuav plam ntawm peb lub nras, peb kev khwv, kev mob hlwb, kev txom nyem.
Nej kav tsij los nrhiav Huab Tais Yes Xus, ces nej yuav tau chaw so los siav!

Mas Tais Ntawv Moo Zoo (MT 11: 16-19)
Kwv tij Hmoob sawv daws, tos Huab Tais Yes Xus hais cov lus peb tau hnov hauv hnub no, vim tias cov Yus Das tsis ntseeg tias nws yog Tswv Ntuj Leej Tub, lawv tsis ntseeg tias nws yog tus Tswv Ntuj xa tuaj cawm lawv. Tsis tas li ntawd, lawv kuj tsis ntseeg tias Zam Ntxuav Plig yog tus yaj saub tuaj npaj Leej Tub txoj kev. Lawv hais tias Zam yog niag neeg raug dab, hos Yes Xus mas yog niag neeg hu dab thiab quav cawv.
Cov kwv tij, nej ho xav li cas? Nej puas yuav xav li cov Yus Das xav?
Peb sawv daws twb to taub zoo lawm tias Huab Tais Yes Xus yog tus Tswv Ntuj xa tuaj cawm peb, txhiv peb hauv kev txhaum, coj peb tus ntsuj plig rov mus cuag Tswv Ntuj.
Hnub no peb yog neeg txhaum, peb paub tias peb yeej txhaum tiag, ces Huab Tais Yes Xus yuav tuaj nrog peb nyob, pab coj peb kom hla dhau kev txhaum.
Peb yuav niaj hnub xav ntsoov txog peb cov txhaum, tu siab rau peb txoj kev txhaum, thov Huab Tais Yes Xus tuaj pab daws peb tej txhaum.
Peb txhob ua tus neeg muab hlob ntsia tsis pom peb cov txhaum mog!

Mas Tais Ntawv Moo Zoo (MT 17: 10-13)
Kwv tij Hmoob sawv daws, nyob hauv cov Yus Das kev thov Ntuj hauv lawv vaj tse, mas lawv yuav npaj ib lub rooj zaum cia. Lub rooj zaum no mas tsis pub leej twg zaum, lawv hais tias tseg cia rau tus yaj saub Es Lias, vim lawv ntseeg tias ua ntej tus Cawm Seej yuav nqes los, mas Tswv Ntuj yuav rov xa Es Lias los tso.
Thaum Huab Tais Yes Xus lub hwj chim tawm tuaj rau 3 tug thwj tim pom nyob saum roob Tas Npos, mas lawv pom Mais Xes thiab Es Lias, ces lawv paub tseem lawm tias tus Cawm Seej lawv tos yog Huab Tais Yes Xus tiag.
Hnub no lawv thiaj rov nug txog Es Lias ntxiv tias ua cas cov Yus Das pheej cav tias Es Lias yuav xub los ua ntej.
Huab Tais Yes Xus thiaj teb rau lawv tias Es Lias yuav tsis rov los, tab sis tus los ua ntej nws yog Zam Ntxuav Plig vim tias Zam thiab Es Lias ntawd ua tib txog kab xwm, yog qhia tsoom sid txog tus Cawm Seej.
Yog li mas cov kwv tij, peb Hmoob hais tias muaj ib hnub mas vaj Hmoob yuav nqes los cawm peb haiv neeg Hmoob. Hnub no twb muaj tus qhia peb txog peb tus vaj Hmoob lawm, yog Yes Xus. Tsuas tos saib thaum twg peb thiaj yuav qhib lub tswv yim kom pom xwb.
Peb txhob ua li cov Yus Das txheej thaud, es muab lub tswv yim kaw tuag nthi, tsis ntsia pom txog tus Cawm Seej uas cov yaj saub twb hais txog.

Mas Tais Ntawv Moo Zoo (MT 21: 23-27)
Kwv tij Hmoob, cov thawj leej choj thiab cov laus neeg nug Huab Tais Yes Xus tias nws muaj cai qhov twg los qhia zeej tsoom sawv daws, ces Huab Tais Yes Xus thiaj rov nug lawv tias yog li Zam Ntxuav Plig ho muaj cai qhov twg los ua lub Cim Ntxuav rau sawv daws. Lawv tws lust sis paub yuav teb zoo li cas, ces Huab Tais Yes Xus thiaj hais rau lawv tias yog lawv tsis muaj lus teb ces ntawm nws los kuj tsis muaj lus teb thiab.
Cov kwv tij, muaj ntau zaus peb ua xyem xyav, peb xav cia Tswv Ntuj teb peb lo lus thov, tab sis Tswv Ntuj tsis teb peb, los peb yuav tso siab tias muaj ib hnub Tswv Ntuj cov hauj lwm yuav tawm tuaj rau peb pom xws li tsis ntev tom ntej ces lawv tau pom tias Huab Tais Yes Xus tau cai ntawm Tswv Ntuj los qhia sawv daws.

Mas Tais Ntawv Moo Zoo (MT 21: 28-32)
Cov kwv tij, hnub no Huab Tais Yes Xus hais ib zaj paj lug rau cov thawj leej choj thiab cov laus neeg uas tuaj nug saib nws muaj cai qhov twg los qhia tsoom sid. Zaj paj lug no Huab Tais Yes Xus txhob txwm hais los ntuas lawv ntag, kuj yog hais los ntuas peb cov neeg ntseeg sawv daws thiab.
Huab Tais Yes Xus hais tias leej txiv muaj 2 tug tub, nws hais rau nkawd kom mus ua teb. Thawj tug cav ncauj tsis kam mus, tab sis ib pliag nws xav tau ces nws sawv mus ua lawm. tus ob mloog lus dua, nws teb tias ‘awm, kuv mam mus’, tab sis nws tsis mus.
Cov kwv tij, nyob hauv nej ib tsev neeg twg, tej zaus nej kuj tau ntsib tej xwm zoo li Huab Tais Yes Xus zaj paj lug no thiab.
Nej cov ua niam ua txiv, nej yuav hlub tus tub twg dua?
Ntawm nej cov ua me nyuam, nej xav tias nej yuav coj tus yam ntxwv twg, nej niam thiab txiv thiaj yuav tsis tu siab rau nej?
Yog li nyob hauv txoj kev ntseeg ne, peb yuav xaiv ua tus tub twg, peb Leej Txiv Tswv Ntuj thiaj yuav hlub peb thiab tsis tu siab rau peb? Nej xaiv mog!

Lus Kas Ntawv Moo Zoo (LK 7: 19-23)
Cov kwv tij, muaj ntau lub sij hawm nyob hauv peb txoj kev ntseeg, mas peb lub siab ua xyem xyav txog Huab Tais Yes Xus xws li lub Moo Zoo hnub no. Thaum peb lub siab ua xyem xyav li ntawd, Huab Tais Yes Xus xav kom peb qhib qhov muag ntsia ib puag ncig peb, ces peb yuav pom qhov tseeb, peb lub siab yuav rov nyob ruaj hauv txoj kev ntseeg.
Thaum peb ntsia ib puag ncig, peb yuav pom cov ua tim khawv txog kev nyiam. Vim Tswv Ntuj yog kev nyiam, ces peb thiaj tso siab tau tias muaj Tswv Ntuj tiag.
Peb yuav pom cov neeg raug txom nyem, peb yuav pom cov neeg tshaib plab, peb yuav pom cov neeg muaj mob nyob ib ncig peb. Peb lub siab khuv leej lawv, hlub lawv, xav pab cawm lawv. Thiab peb kuj pom ib pab neeg siab dawb ua hauj lwm pab lawv tiag!
Thaum ntawd ces yog peb tab tom pom Huab Tais Yes Xus thiab Huab Tais Yes Xus tab tom tshoj peb siab kom nqes tes pab lawv.

Lus Kas Ntawv Moo Zoo (LK 7: 24-30)
Kwv tij, Zam Ntxuav Plig yog tus Tswv Ntuj xa tuaj npaj txoj kev rau Huab Tais Yes Xus, yog tus tuaj ntuas sawv daws kom hloov siab tshiab, kom tu siab rau lawv cov txhaum. Yog tus twg tsis tu siab rau nws cov txhaum mas nws yuav pom tsis tau Huab Tais Yes Xus.
Hnub no Huab Tais Yes Xus thiaj hais tias tus twg hnov Zam cov lus thiab txais kab ke ntxuav tas, mas nws yuav lees tias Tswv Ntuj yog tus ncaj, cov tsis kam txais Zam cov kab ke ntxuav mas tus ntawd tau xyeeb Tswv Ntuj zaj tswv yim pov tseg.
Kwv tij Hmoob, vim li no ua ntej peb yuav tig los ntseeg txog Yes Xus, peb thiaj tsum xub txais Cim Ntxuav tso.
Thaum peb txais Cim Ntxuav lawd, ces txhais tias txij no mus peb yuav lees Tswv Ntuj lawm tiag, tab sis vim peb yog me nyuam neeg tsis muaj zog txaus tiv thaiv dab phem kev haub ntxias, mas peb thiaj niaj hnub poob rau txoj kev txhaum tas mus li.
Yog li mas peb thiaj yuav nrhiav sij hawm mus lees peb cov txhaum rau Tswv Ntuj, thiab yuav rov tu siab rau peb cov txhaum, zoo li peb rov tau ntxuav peb lub siab, lub tswv yim, thiab tus ntsuj plig kom rov huv tuaj.
Tshwj xeeb mas yog lub caij Tos Huab Tais yuav rov tuaj no.

Zam Ntawv Moo Zoo (Z 5: 33-36)
Kwv tij Hmoob, Huab Tais Yes Xus hais tias nws cov hauj lwm yuav ua tim khawv tias nws yog tus Tswv Ntuj xa tuaj cawm lub ntiaj teb neeg.
Peb ua neej nyob peb kuj yuav ua xws li Huab Tais Yes Xus lo lus no, tsis yuav hais lus dab tsi ntau ntau kom sawv daws nkag siab, qhov tseem ceeb yog nqes tes ua hlo txoj hauj lwm ntawd.
Txawm tias hnub no yuav muaj tus pom los tsis pom, tsis ua cas tsuav yog Tswv Ntuj pom xwb ces txaus peb siab lawm.
Kwv tij Hmoob sawv daws, nyob hauv nej mas nej yuav tsis txhob nug dab tsi ntau thiab mog, yog nej pom tias ib tug neeg twg ua ib txog hauj lwm tseem ceeb muaj qab hau, ces nej cia li pab nws kom nws txoj hauj lwm ntawd tiav, mas yuav yog qhov zoo tshaj.

Mas Tais Ntawv Moo Zoo (MT 1: 1-17)
Cov kwv tij Hmoob, zaj lus nej hnov no yog hais txog Huab Tais Yes Xus lub keeb los yog tus cag tias los qhov twg los, zoo xws li peb cov kwv tij Hmoob thaum tseem coj qub kev cai uas lawv laig dab mas tsum laig ib phaj rau ib phaj. Qhov no kuj yog Hmoob lub tswv yim qhia kom cov xeeb ntxwv tom qab paub txog lawv tus cag. Tab sis peb tsuas paub li 3 txog 4 phaj xwb ces tsis nco lawm.
Ntawv Moo Zoo sau piav txij Huab Tais Yes Xus rov mus txog hlo lub hauv paus cag yog Has Nplas Has, yog 40 tiam neeg los yog 40 phaj neeg.
Huab Tais Yes Xus yog tus uas Tswv Ntuj tau cog lus cia tias yuav los cawm nws Has Nplas Has cov xeeb ntxwv hauv kev ua dab phem qhev.
Hnub no txawm tias peb yog haiv neeg Hmoob, tsis kav peb twb zeem Huab Tais Yes Xus ua peb tus tij nyob hauv txoj kev ntseeg lawd, mas peb thiaj muaj Has Nplas Has ua peb tus yawg koob, peb txia ua nws haiv neeg thiab.
Li ntawd mas cov kwv tij, yuav txog lub caij peb tus tij laug Huab Tais Yes Xus yug lawm, peb yuav npaj siab kom ntshiab txaus tos nws los nyob hauv peb ua ke mog.

Lus Kas Ntawv Moo Zoo (LK 1: 5-25)
Cov kwv tij Hmoob, lub Moo Zoo hnub no piav txog tus ntxuav plig Zam yug los. Zam yog ntxeev los ntawm lo lus tias ‘Yos Has Nas’ txhais tias ‘Yas Ves yog tus ntxim nyiam’ los yog ‘Yas Ves yog tus tus zoo siab’ (Yahweh is gracious).
Zam yog ib tug tau txais Leej Ntuj Plig Ntshiab nyob puv hauv nws txij puag nruab thiab los, Zam yog tus txais tus Es Lias lub tswv yim thiab lub hwj huam ua yaj saub npaj ib haiv neeg qhib siab tos Tswv Ntuj Leej Tub uas yog Huab Tais Yes Xus.
Kwv tij Hmoob, raws li nej twb paub lawm tias Zam tau ua kab ke ntxuav rau zeej tsoom kom lawv hloov siab tshiab los coj tus yam ntxwv tshiab mas lawv thiaj yuav txais tau Tswv Ntuj Leej Tub los nyob hauv lawv. Thaum kawg Zam raug txiav caj dab tuag ua tim khawv txog kev ntseeg.
Hnub no Zam tau tuaj rhawv txoj kab ke no mas lub Koom Txoos thiaj ua cov kab ke txais lub Cim Ntxuav rau cov neeg txiav siab tias yuav taug txoj kev tshiab, txoj kev txais Huab Tais Yes Xus ua tus cawm lawv txoj sia hauv kev txhaum.
Li ntawd mas kwv tij Hmoob, hnub no peb yuav rov tu siab rau peb cov txhaum, peb yuav hloov siab tshiab los tos peb tus Huab Tais Yes Xus tab tom yuav tuaj sai sai no mog.

Lus Kas Ntawv Moo Zoo (LK 1: 26-38)
Tswv Ntuj tus Tshiab hais rau Mab Liab tias ‘Mab Liab, koj txhob ntshais. Tswv Ntuj saib koj ntxim Tswv Ntuj siab. Koj yuav xeeb tub, koj yuav yug ib tug tub, nws yuav yog ib tug loj, luag yuav muab nws hu ua tus Nyob Siab leej tub.’
Kwv tij Hmoob sawv daws, nyob hauv peb txhua tus mas Tswv Ntuj lub hwj chim kuj roos peb xws li roos Mab Liab thiab, Tswv Ntuj pub nws lub zog rau peb kom ua neej tau nyob hauv Tswv Ntuj txoj kev. Yog peb tig ntsia lub neej dhau los, peb pom tias muaj ntau zaus peb raug teeb meem, ntsib xwv txheej, ua cas peb hla dhau, yeej yog vim Tswv Ntuj nrog peb, pab peb.
Yog li mas kwv tij Hmoob, thov kom peb tso siab rau Tswv Ntuj thiab cia Tswv Ntuj txib peb raws li Tswv Ntuj lub siab nyiam mog.

Lus Kas Ntawv Moo Zoo (LK 1: 39-45)
Cov kwv tij, thaum Mab Liab mus xyuas Es Lis Xas Npes, nws hais lus nyob kaj lug rau Es Lis Xas Npes, mas tus me nyuam nyob hauv nws plab dhia zoo siab.
Nyob hauv peb ne, peb puas yuav zoo siab vim tias tshuav 4 hnub lawm xwb, Tswv Ntuj Leej Tub yuav yug los, nws yuav tawm tuaj rau peb pom.
Thov kom peb sawv daws npaj ib qho chaw hauv nruab siab cia tos Tswv Ntuj Leej Tub tuaj yug nyob hauv peb lub neej mog, thov kom peb ua lom zem tos txais Tswv Ntuj Leej Tub tus tab tom yuav tuaj mog, thov kom peb tsa suab cav txog Tswv Ntuj lub koob meej thiab ua Tswv Ntuj tsaug mog.

Lus Kas Ntawv Moo Zoo (LK 1: 46-56)
Kwv tij Hmoob, thaum tus phauj Es Lis Xas Npes hais tias Mab Liab yog tus tau txoj hmoov zoo, yog tus yuav ua Huab Tais leej niam, ces Mab Liab thiaj cav txog Tswv Ntuj. Mab Liab tsis muab hlob, nws tsis xav tias zaum no mas nws yuav yog tus loj dua tas sawv daws.
Mab Liab ua Tswv Ntuj tsaug uas tau xaiv ib tug me nyuam neeg me me tsis muaj tsim dab tsi los ua hauj lwm rau Tswv Ntuj.
Yog li mas cov kwv tij, nyob hauv lub caij Tos Huab Tais no, peb yuav yoog raws Mab Liab tus yam ntxwv, peb yuav yim ua neeg me dua qhov qub, peb yuav niaj hnub ua Tswv Ntuj tsaug uas niaj hnub no nws hu peb los ua nws txoj hauj lwm, nws hu peb los koom tos nws Leej Tub.

Lus Kas Ntawv Moo Zoo (LK 1: 57-66)
Kwv tij Hmoob, hnub no nej rov hnov hais txog thaum tus Ntxuav Plig Zam yug, ces tas ib tsoom neeg nyob ze ntawd tuaj nrog Es Lis Xas Npes thiab Ntxas Kas Lias zoo siab. Lawv tis lub npe rau Zam thiab pom tias thaum ntawd, Ntxas Kas Lias rov hais lus tau, mas lawv ntshai, vim lawv paub tias Zam yog tus tau txais Tswv Ntuj lub hwj chim, nws muaj Tswv Ntuj txhais tes nrog nraim.
Kwv tij Hmoob sawv daws, thaum peb yug los Tswv Ntuj txhais tes yeej nrog nraim peb xws li nrog nraim Zam, tiam sis vim peb coj lub neej tsis ntshiab, peb lub siab tsis nyob hauv kev kaj, mas Tswv Ntuj txhais tes thiaj tau plam ntawm peb mus.
Hnub no thov peb tig los ntxuav peb lub siab lub tswv yim kom ntshiab tos txais peb tus Huab Tais mog.

Lus Kas Ntawv Moo Zoo (LK 1: 67-79)
Kwv tij Hmoob sawv daws, hmo no thaum ib tag hmo mas peb yuav ua kev zoo siab tos peb tus Huab Tais yug los. Yog li mas hnub no peb yuav cav txog Tswv Ntuj xws li Ntxas Kas Lias tau cav txog Tswv Ntuj tias ‘His Xas Lais tus Huab Tais Tswv Ntuj nto koob meej, vim nws tuaj xyuas thiab tuaj npo nws haiv neeg. Nws tsa ib txog kev cawm muaj zog rau peb nyob hauv nws tus tub txib Das Vis tsev neeg. Peb tus Tswv Ntuj lub siab hlub mos nyoos, nws xa lub hnub saum txheej siab tuaj xyuas peb. Nws kaj cov neeg zaum hauv qhov tsaus ntuj thiab cov nyob hauv kev tuag tus duab ntxoo. Nws hwj peb txhais taw mus taug txoj kev thaj yeeb.’

Mas Tais Ntawv Moo Zoo (MT 10: 17-22)
Huab Tais Yes Xus hais tias “Thaum luag ntes nej, mas nej tsis txhob txhawj tias yuav hais li cas thiab yuav teb dab tsi. Lub sij hawm ntawd, Ntuj yuav muab cov lus teb rau nej. Sawv daws yuav ntxub nej vim kuv lub npe. Tab sis tus twg ua siab ntev nyiaj txog qhov kawg, mas nws yuav txais kev cawm.”
Kwv tij Hmoob sawv daws, hnub no peb ua hmoov nco txog Leej Ntshiab Tes Fas Nos, nws yog ib tug ua piv txwv txog Huab Tais Yes Xus cov lus no, vim nws yog thawj tug thwj tim tuag ua tim khawv txog Yes Xus.
Tes Fas Nos yog ib tug hauv 7 tus tub tsob hwb uas cov Hauv Paus Xa Lus tsa los tuav txoj hauj lwm saib cov rooj noj mov. Tes Fas Nos yog neeg ntseeg ruaj, nws thoob tsib thiaj muaj Leej Ntuj Plig Ntshiab nyob puv hauv nws.
Muaj ib hnub cov neeg siab phem nrog Tes Fas Nos sib cav tsis yeej ces lawv xiab cov neeg kom liam rau tsoom pej xeem tias Tes Fas Nos thuam Mais Xes thiab thuam Tswv Ntuj. Lawv tuaj ntes Tes Fas Nos mus hais plaub ntawm lub rooj txwj laus Xas Nes Nrees.
Tswv Ntuj muab ib co lus rau Tes Fas Nos teb cov txwj laus ua rau lawv tws kev, thiab nws tau hais ib co lus ua tim khawv txog Huab Tais Yes Xus, ua rau cov txwj laus npau taws heev kawg, lawv thiaj muab pob zeb txawb Tes Fas Nos tuag.
Ua ntej yuav tuag, Tes Fas Nos thov Ntuj tias “Huab Tais Yes Xus, thov koj txais kuv tus plig. Huab Tais, koj txhob muab qhov txhaum ntawd rau lawv ris.”
Kwv tij Hmoob, peb txoj kev ntseeg loj tsis txaus thiab peb tso siab tsis txaus li Tes Fas Nos, tsis kav muaj ib yam peb yuav kawm ntawm Tes Fas Nos, yog qhov tias peb yuav ua siab ntev nyiaj ris peb txoj kev txom nyem kom mus txog qhov kawg, peb thiaj yuav tau txais kev cawm xws li Tes Fas Nos, yog tau ua Leej Ntshiab nrog Huab Tais Yes Xus nyob ua ke saum Tswv Ntuj lub Ceeb Tsheej.

Lus Kas Ntawv Moo Zoo (LK 2: 22-35)
Kwv tij Hmoob sawv daws, tus yawg laus Xis Mes Oos yogi b tug nyiam teev Ntuj, ces Tswv Ntuj thiaj pub nws nyob laus nkoos kom tau pom Tswv Ntuj Leej Tub tus yuav tuaj cawm lub qab ntuj neeg. Thaum yawg Xis Mes Oos pom Huab Tais Yes Xus, nws paub tias tus me nyuam no yog Tswv Ntuj Leej Tub tiag, qhov no txaus nws siab lawm, nws thiaj tsa suab hlo tias “nyem no koj tso koj tus tub txib mus kaj lug vim kuv qhov muag tau pom koj txoj kev cawm lawm.’
Cov kwv tij, yog peb ua neej nyob hauv Tswv Ntuj txoj kev, coj nraim raws li Tswv Ntuj Lo Lus mas peb yuav nyob hauv Tswv Ntuj kev kaj, peb yuav ntsib kev zoo siab xws li tus yawm laus Xis Mes Oos no.

Zam Ntawv Moo Zoo (Z 1: 1-18)
Cov kwv tij Hmoob, tus Hauv Paus Xa Lus Zam pib sau nws phau ntawv Moo Zoo, nws sau tias ‘thaum lub hauv paus, Leej Lo Lus nyob ze Tswv Ntuj. Leej Lo Lus yog Tswv Ntuj. Tas ib puas tsav yam tshwm sim los vim nws.
Tej zaus nej yuav xav tias ‘Leej Lo Lus’ yog leej twg? Leej Lo Lus yog Tswv Ntuj Leej Tub, tus xeeb los ua ib lub cev neeg nrog peb nyob, nws muaj lub npe tias ‘Yes Xus’.
Cov kwv tij Hmoob, niaj hnub no Huab Tais Yes Xus tiam neeg twb dhau los law mob txhiab tawm xyoo, tsis kav Huab Tais Yes Xus tseem niaj hnub nrog peb nyob nraim. Nws nyob hauv peb, nyob hauv cov neeg txom nyem peb pom peb ntsib tom tej tog kev. Huab Tais Yes Xus niaj hnub hais lus rau peb, ntuas peb kom tig los ua neej nyob hauv qhov pom kev, vim tias Huab Tais Yes Xus ua lub teeb ci tuaj rau lub qab ntuj neeg, ces tus twg txais Huab Tais Yes Xus, tus twg mloog Leej Lo Lus mas tus ntawd thiaj yuav nyob hauv qhov pom kev, yuav ua Tswv Ntuj cov me nyuam.
Thov kom peb cov kwv tij Hmoob tso tseg lub neej tsaus ntuj nti, los nyob hauv Tswv Ntuj qhov pom kev, txais Huab Tais Yes Xus los ua lub teeb tsom kev nyob hauv lub xyoo tshiab 2023 tab tom tuaj yuav txog no mog.

Zam Ntawv Moo Zoo (Z 1: 19-28)
Kwv tij Hmoob sawv daws, thaum cov Fas Lis Xais hnov zeej tsoom cav zom zaws tias muaj ib tug neeg sawv los ua kab ke ntxuav rau tsoom pej xeem thiab ntuas kom lawv hloov siab tshiab, mas cov Fas Lis Xais thiaj xa cov leej choj thiab cov les vis tuaj cuag Zam, nug saib Zam puas yog tus Cawm Seej.
Zam teb tias nws tsis yog, nws tsuas yog tus tuaj npaj txoj kev cia rau Leej Pleev xwb.
Kwv tij Hmoob sawv daws, nyob hauv peb sawv daws, mas peb yuav ua li Zam. Peb yuav nco ntsoov tias peb yog ib tug neeg me me, peb tsuas yog tus twj cia rau Tswv Ntuj ua hauj lwm xwb, txhua yam hauj lwm zoo peb ua mas yog ua los cav txog Tswv Ntuj.
Peb yuav tsis tsa peb cai, peb yuav tsis hais lus qhuas peb tias ‘yog mas, tos lawv muaj txoj kev ntseeg ruaj li ntawd, yeej yog kuv tus no ua tus ntuas lawv ntag!’
Yog peb hais zoo li ntawd, mas ceev faj mog, tsis yog Tswv Ntuj yuav muab txim rau peb; tiam sis yog cov neeg nrog peb nyob, lawv yuav yog tus muab txim rau peb.
Cov kwv tij Hmoob, kom peb nco ntsoov tus ntxuav plig Zam lo lus tias “kuv tsis tsim nyog daws kuv tus Huab Tais txoj hlua khau.”

Zam Ntawv Moo Zoo (Z 1: 29-34)
Cov kwv tij Hmoob, Zam ua tim khawv tias Yes Xus yog tus Tswv Ntuj xaiv, Yes Xus yog tus Yaj daws qab ntuj neeg cov txhaum.
Nyob hauv cov His Xas Lais, thaum lawv ua txhaum, lawv yuav muab ib tug yaj plaub dawb paug coj mus tua txi rau Ntuj them lawv cov txhaum. Ces Zam cov lus ua tim khawv ntawd thiaj txhais tias Yes Xus yog Leej Pleev, yog tus Cawm lub qab ntuj neeg.
Kwv tij Hmoob sawv daws, yog muab tig rov los ntsia nyob hauv peb, muaj zaum puav peb pom tej tus neeg ua qhov zoo, ua hauj lwm pab cov neeg txom nyem, mas peb yuav tau ua tim khawv txog nws rau lwm tus.
Tsis tas li ntawd, nyob hauv peb cov neeg ntseeg txog Yes Xus, peb yuav tau ua tim khawv rau lwm tus tias Huab Tais Yes Xus tus peb ntseeg txog no, nws tau ua li cas los cawm peb, nws tau qhia peb kom ua zoo li cas rau lwm tus.
Peb txhob muab qhov peb paub txog Huab Tais Yes Xus no zais cia rau hauv peb siab, kav tsij nthuav rau cov nyob ib puag ncig pom mog.

Zam Ntawv Moo Zoo (Z 1: 35-42)
Cov kwv tij Hmoob, nej hnov Huab Tais Yes Xus hais rau Zam ob tug thwj tim tias “neb tuaj, neb yuav pom”. Lo lus no puas yog Huab Tais Yes Xus tab tom hais rau peb thiab?
Niaj hnub no Huab Tais Yes Xus yeej hais li ntawd rau peb tiag. Yog tias peb qhib siab ntseeg thiab mob siab rau nrhiav Huab Tais Yes Xus, mas peb yuav hnov Huab Tais Yes Xus lub suab hais no.
Cov kwv tij, thaum Huab Tais Yes Xus hais kom peb raws nws mus, mas peb yuav raws nws mus xws li Zam ob tug thwj tim, peb thiaj yuav mus txog Huab Tais Yes Xus lub chaw.
Peb yuav muab tas lub sij hawm cia nrog Huab Tais Yes Xus tham, mloog Huab Tais Yes Xus cov lus, thiab peb yuav tau tawm mus hais qhia rau lwm tus, coj lawv tuaj cuag Huab Tais Yes Xus xws li As Nres tau coj nws tus tij laug Xis Moos mus nrhiav Huab Tais Yes Xus.

Zam Ntawv Moo Zoo (Z 1: 43-51)
Kwv tij Hmoob sawv daws, lub Moo Zoo peb hnov nyob hauv hnub no yog hais txog Huab Tais Yes Xus hu Fis Lis Pos los ua nws thwj tim. Fis Lis Pos kuj mus hu nws tus npawg Nas Tas Nais kom los ua Huab Tais Yes Xus thwj tim xws li nws thiab.
Pom tau tias thaum Fis Lis Pos tau paub Huab Tais Yes Xus lawm, zoo cuag li nws tau txais ib lub cuab tam, ces nws xav pub lub cuab tam no rau nws tus pawg, nws xav kom tus npawg tau txais Tswv Ntuj lub paj tshab xws li nws.
Kwv tij, thaum peb paub Huab Tais Yes Xus lawm, peb yuav muaj kev sib hlub, muaj kev thaj yeeb, peb tau txais kev kaj siab; peb yuav tau mob siab coj lwm tus los nrhiav Huab Tais Yes Xus, los txais Tswv Ntuj lub paj tshab xws li peb thiab. Yam no yog tus cuj pwm cov neeg ntseeg yuav tsum muab ua lub tsho hnav.
Tab sis ua ntej yuav hais txog Huab Tais Yes Xus rau lwm tus, peb tsum xub ntsib thiab paub txog Huab Tais Yes Xus kom zoo tso mog, peb thiaj yuav tsis coj lwm tus mus yuam kev.

Mas Kos Ntawv Moo Zoo (MK 1: 7-11)
Cov kwv tij Hmoob, Zam hais tias “kuv muab dej los ntxuav nej, hos nws mas nws yuav ntxuav nej nyob hauv Leej Ntuj Plig Ntshiab.”
Lo lus tias ‘ntxuav’ mas yog ‘raus’ los yog ‘da’.
Yog li Zam lo lus tias “nws yuav ntxuav nej nyob hauv Leej Ntuj Plig Ntshiab”, thiaj hais tau tias Huab Tais Yes Xus yuav muab peb raus rau hauv Leej Ntuj Plig Ntshiab, cia Leej Ntuj Plig Ntshiab ua tus coj peb kev, cia Leej Ntuj Plig Ntshiab ua lub plawv nyob hauv peb txoj sia.
Ntawv Moo Zoo piav ntxiv tias Huab Tais Yes Xus tuaj txais kab ke ntxuav ntawm Zam, ces Zam pom lub ntuj qhib, Leej Ntuj Plig nqes los nyob saum Huab Tais Yes Xus thiab muaj ib lub suab hais saum ntuj tuaj tias “koj yog kuv Leej Tub uas kuv nyiam kawg, koj yog kuv qhov chaw zoo siab.”
Yog li mas cov kwv tij Hmoob, thaum peb txais lub Cim Ntxuav peb thiaj yuav txia ua Tswv Ntuj cov me nyuam uas Tswv Ntuj nyiam xws li hnub Zam hnov Tswv Ntuj hais rau Huab Tais Yes Xus.
Kwv tij, peb yuav yoog raws Huab Tais Yes Xus tus qauv, peb yuav ua raws Huab Tais Yes Xus cov lus, peb yuav muab Leej Ntuj Plig Ntshiab ua tus coj peb kev mog, mas Tswv Ntuj uas yog peb Leej Txiv thiaj yuav tsis tu siab rau peb.

Zam Ntawv Moo Zoo (Z 2: 1-12)
Kwv tij Hmoob sawv daws, lub Moo Zoo hnub no peb pom tias Huab Tais Yes Xus ua raws li nws leej niam Mab Liab thov. Yog li nyob hauv peb lub neej thiaj yuav vam txog niam Mab Liab pab thov Ntuj rau peb.
Niam Mab Liab thiab Huab Tais Yes Xus nrog peb nyob nraim, ntsia ntsoov saib peb tshuav yam twg, nws yuav pab thov yam ntawd rau peb.
Txawm tias tas lub ntiaj teb neeg yuav tso peb pov tseg, tsis kav niam Mab Liab yuav tsis tso peb ua ntsuag nos, tsuas yog peb tso siab rau nws thiab fij peb rau hauv nws txoj kev hlub peb.
Dua ntawd, peb yuav ntseeg thiab tso siab rau Huab Tais Yes Xus txoj kev nyiam thiab khuv leej peb, ces nkawd yuav pab thov Leej Txiv Tswv Ntuj rau peb zoo li tau pab tus nraug vauv hauv rooj tshoob nyob Kas Nas no.

Mas Kos Ntawv Moo Zoo (MK 2: 18-22)
Kwv tij sawv daws, hais txog kev yoo mov, mas peb cov neeg ntseeg yeej paub tias yuav yoo mov nyob hauv Hnub Rau Ntshiab kom peb tau tu siab rau peb cov txhaum, mas peb thiaj yuav hloov siab tshiab thiab npaj lub siab kom ntshiab txaus txais Hnub Hla tuaj yuav txog.
Nyob hauv cov Yus Das kev cai mas kev yoo mov yog kev tu siab thiab kev them txim, mas thiaj muaj ib lub caij tas cov Yus Das yoo mov.
Thaum txog lub caij yoo mov, cov Yus Das yoo tab sis Huab Tais Yes Xus thiab nws cov thwj tim tsis yoo, mas lawv thiaj tsis to taub txog tias ua cas Huab Tais Yes Xus thiab cov thwj tim tsis coj kab ke yoo; lawv thiaj tuaj nug saib yog vim li cas.
Huab Tais Yes Xus cov lus mas nws tsuas hais tias nyob hauv lub caij yoo; yog muaj ib rooj tshoob mas sawv daws yuav tsis yoo vim tus nraug vauv tseem nrog lawv nyob ua ke lom zem, tab sis thaum rooj tshoob dhau, nraug vauv lawv rov mus tas, mas sawv daws yeej yuav rov yoo mov tiag.
Zaj no mas yog Huab Tais Yes Xus ua paj lug hais txog nws thiab hais txog cov ntseeg hauv lub Koom Txoos. Lawv yeej yuav yoo, tab sis tsis tau txog cai xwb.
Huab Tais Yes Xus kuj hais ntxiv tias tsis muaj leej twg ntxiv ib daim ntaub tshiab rau lub khaub tsho tshaj sab, tsis muaj leej twg ntim cawv tshiab rau hauv ib co hnab tawv qub. Yog li Huab Tais Yes Xus cov thwj tim tseem yoo mov tab sis lawv txoj kab ke yuav tsis zoo li cov Yus Das txoj kab ke. Peb cov Hmoob ua Ntuj kev cai tej kab ke thiaj txawv cov kwv tij tseem coj kev cai dab qhuas txoj kab ke, tiam sis tseem yog kab lis kev cai Hmoob.

Mas Kos Ntawv Moo Zoo (MK 2: 23-28)
Kwv tij Hmoob sawv daws, thaum Huab Tais Yes Xus thiab nws 5 tug thwj tim hla ib thaj nplej, mas cov thwj tim de tej hnab nplej los ntxais, los zom noj taug kev. Hnub ntawd yog Hnub Xas Npas Tos, uas yog cov Yus Das hnub caiv, hnub so, hnub qee rau Tswv Ntuj, yog hnub ntshiab. Cov Fas Lis Xais taug kev tuaj pom, lawv thiaj yws tej ntawd rau Huab Tais Yes Xus mloog, lawv xav kom tsis txhob muaj neeg hla lawv txoj cai.
Muab hais los mas zoo li teb chaws txoj cai lij choj tswj lawv haiv neeg kom txhob ua tej yam txhaum kev cai, tsim nyog sawv daws yuav tsum coj. Tab sis Huab Tais Yes Xus lo lus teb rau lawv mas yog lo tias ‘Ntuj tsim hnub Xas Npas Tos rau neeg, tsis yog tsim neeg rau Hnub Xas Npas Tos.’
Lo lus no kuj zoo li lub teb chaws tsa tej txoj cai lij choj los tswj sawv daws kom txoj cai no muaj txiaj ntsim muaj qab hau rau lawv haiv neeg, tsis yog yuav coj los txov lawv hais neeg, los yuam lawv haiv neeg.
Huab Tais Yes Xus xav kom peb to taub, nws thiaj hais txog thaum Das Vis thiab cov kwv luag tshaib tshaib plab, lawv tau muab cov ncuav txi Ntuj noj kom tau cawm lawv siav tias ua cas lawv ua tau li ntawd.
Cov kwv tij, lub teb chaws tej kev cai lij choj mas yeej yog txoj cai zoo, yog txoj cai tsa los pab sawv daws kom ua ib tug neeg zoo, ua mus raws txoj kev sib nyiam sib hlub.
Peb txhob yuam kev tias Huab Tais Yes Xus qhia kom peb khaj cai, qhia kom peb hla tej txoj cai. Qhov Huab Tais Yes Xus qhia mas yog kom peb txhob muab txoj cai los ua txoj hlua khi peb cia kom txhob ua hauj lwm zoo xwb.

Mas Kos Ntawv Moo Zoo (MK 3: 1-6)
Kwv tij Hmoob, lub Moo Zoo piav tias thaum txog Hnub Xas Npas Tos los yog cov Yus Das hnub so, Huab Tais Yes Xus nrog tsoom sid mus sib txoos mloog Tswv Ntuj Lo Lus nyob hauv lub tsev txoos, Huab Tais Yes Xus pom tias nyob ntawd muaj ib tug neeg qhuav tes. Huab Tais Yes Xus xav pab nws thiab xav qhia sawv daws kom paub tias Tswv Ntuj kev nyiam tsis muaj hnub so, cov hauj lwm pab lwm tus yuav ua tau txhua lub sij hawm, ces Huab Tais Yes Xus thiaj pab tus qhuav tes kom nws txhais tes rov ua tau zog tuaj zoo li qhov qub.
Cov kwv tij, peb yog cov neeg ntseeg txog Huab Tais Yes Xus, peb yuav tau yoog raws Huab Tais Yes Xus tus piv txwv no thiab khaws cov lus hauv hnub no coj mus cog cia hauv nruab siab.
Huab Tais Yes Xus lo lus yog lo tias ‘Hnub caiv, puas kheev kom ua qhov zoo los cia ua qhov phem; hnub so, puas kheev cia cawm ib txog sia los txo ib txog sia.’

Mas Kos Ntawv Moo Zoo (MK 3: 7-12)
Cov kwv tij Hmoob, lub Moo Zoo hnub no piav rau peb pom tias tom qab Huab Tais Yes Xus kho cov neeg muaj mob, ua rau muaj neeg coob hnov txog tej xwm no ces lawv tuaj ntau thaj tsam tuaj nrhiav Huab Tais Yes Xus, kom lawv tau nphav tau kov Huab Tais Yes Xus, ces lawv yuav dim hauv lawv txoj kev txom nyem.
Vim neeg coob dhau ces Huab Tais Yes Xus thiaj nce mus nyob saum lub nkoj, kom neeg txhob tsuj nws.
Kwv tij, Leej Ntshiab Mas Kos tsis piav tias Huab Tais Yes Xus tau kho lawv, los yog qhuab qhia lawv. Tab sis yog peb nyeem txuas mus, peb yuav pom tias muaj ib zaug, Huab Tais Yes Xus nce mus zaum saum lub nkoj qhia lawv.
Hnub no Leej Ntshiab Mas Kos tsuas piav tias cov dab tsis huv pom Yes Xus, ces lawv khoov ti av qw tias ‘koj yog Tswv Ntuj Leej Tub!’, ces Huab Tais Yes Xus hais lus rau cov dab kom txhob hais qhia rau sawv daws xwb.
Kwv tij Hmoob, tej zaus yog vim lawv cov tuaj no lawv hnov tias Huab Tais Yes Xus muaj hwj huam pab tau lawv dim hauv kev txom nyem, lawv tsuas xav tau kev cawm xwb, lawv tsis muaj siab ntseeg tiag, ces lub Moo Zoo thiaj tsis piav tias Huab Tais Yes Xus tau kho lawv los yog hais lus qhia dab tsi rau lawv.
Yog peb muab tig rov los rau hauv peb, niaj hnub no peb raws Huab Tais Yes Xus qab, peb hais tias peb yog Huab Tais Yes Xus cov thwj tim, mas yog vim peb xav khiav kom dim tej kev txom nyem, khiav kom dhau Hmoob tej kev cai khi peb cia, los yog peb yeej muaj lub siab ntseeg tiag tiag, tso siab rau Yes Xus ua peb tus Huab Tais, peb yuav raws nws qab, coj raws li nws cov lus qhia.
Kwv tij Hmoob, peb xav kom nej ua tus neeg muaj kev ntseeg tiag, tsis yog khiav teeb meem khi nej los coj lub npe tias ‘neeg ntseeg’ tab sis nyob hauv lub siab twb tsis ntseeg. Yog li mas ua ntej nej yuav ntseeg, nej yuav tau kawm kom paub Tswv Ntuj cov lus, paub Tswv Ntuj lub siab tso, nej mam txiav siab ntseeg. Ntawm peb cov twb ua neeg ntseeg lawm, peb yuav niaj hnub soj peb lub siab tias peb vam txog dab tsi nyob hauv txoj kev ntseeg, peb puas niaj hnub ua raws li Huab Tais Yes Xus cov lus hais rau peb.

Mas Kos Ntawv Moo Zoo (MK 3: 13-19)
Kwv tij Hmoob sawv daws, thaum Huab Tais Yes Xus ua Tswv Ntuj txoj hauj lwm cawm neeg tau ib ntus, nws xaiv 12 leeg thwj tim los pab coj nws txoj hauj lwm no mus tshaj rau tej zej zos. Lawv txoj hauj lwm yog tshaj Lo Lus thiab ua hwj huam ntiab dab. Nqe no txhais tias cia lawv mus ua tim khawv txog Tswv Ntuj kev nyiam ntiaj teb neeg.
Niaj hnub no, peb cov neeg ntseeg hauv lub Koom Txoos, mas kuj yog Tswv Ntuj tau xaiv peb los ua tim khawv txog kev nyiam, coj lub Moo Zoo no mus cuag peb cov kwv tij, cov nyob ib puag ncig. Yog li mas niaj hnub peb yuav rov hais rau tus kheej tias ‘hnub no Tswv Ntuj xa kuv mus ua tim khawv txog nws txoj kev nyiam thiab hlub neeg. Kuv yuav ua tiag hlub thiab nyiam lwm tus li Huab Tais Yes Xus nyiam kuv.’

Mas Kos Ntawv Moo Zoo (MK 3: 20-21)
Kwv tij Hmoob sawv daws, lub Moo Zoo hnub no yog ib zaj luv luv xwb, tiam sis muaj lub ntsiab ntuas peb tob ntau yam.
Lub Moo Zoo piav tias muaj neeg tuaj ntsauv Huab Tais Yes Xus coob heev, tej zaum mas yog muaj ib txhia coj lawv cov neeg mob tuaj rau Huab Tais Yes Xus kho, ib txhia mas tej zaus lawv xav pom tias Huab Tais Yes Xus ua hwj huam zoo li cas, los tej zaus ib txhia xav tau mloog Huab Tais Yes Xus cov lus, los yog ib txhia lawv xav mus qhuas tus neeg muaj suab nto npe nyob hauv lawv lub zos; ces cov neeg thiaj tuaj coob coob li ntawd, ua rau Huab Tais Yes Xus thiab cov thwj tim tsis xyeej noj mov.
Lub Moo Zoo piav ntxiv tias Huab Tais Yes Xus cov neeg hnov thiab pom tias muaj neeg tuaj vij Huab Tais Yes Xus coob npaum ntawd ua rau Huab Tais Yes Xus tsis muaj ib lub sij hawm los txog hauv nws lub tsev, los xyuas nws cov neeg txheeb ze li, lawv thiaj hais rau sawv daws tias yog Huab Tais Yes Xus tsis meej pem lawm.
Cov kwv tij, peb pom tias Huab Tais Yes Xus siv tag nrho nws lub sij hawm los leg nws txoj hauj lwm, nws tsis yws los yog hais rau zeej tsoom tias ‘cia kuv mus so me ntsis tso, es nej mam coj nej cov neeg tuaj cuag kuv.’ Tiam sis Huab Tais Yes Xus saib tas sawv daws tseem ceeb dua thiab muaj qab hau dua nws lub sij hawm so. Huab Tais Yes Xus ua hauj lwm tsob hwb sawv daws tsis yog cia lawv los tsob hwb nws. Huab Tais Yes Xus xav txog tsoom sid tuaj ntsauv tuaj thov kev pab ntawm nws ua ntej qhov nws yuav xav txog nws tus kheej.
Cov kwv tij, peb hais tias ‘kuv tsis muaj sij hawm pab koj, kuv tsis muaj sij hawm ua qhov hauj lwm no, kuv tsis muaj sij hawm mloog koj tham’. Peb feem coob xav zoo li ntawd, tab sis hnub no Huab Tais Yes Xus xav kom peb kawm ntawm nws, muab tag nrho koj lub sij hawm los ua cov hauj lwm muaj qab hau, muaj txiaj ntsim, ua cov hauj lwm Tswv Ntuj xav kom koj ua. Txawm tias tej zaus qhov koj ua ntawd, yuav muaj neeg lwm tus cav los yog tsis pom zoo, los thov kom koj txhob qaug zog, txhob tso pov tseg, yog tias qhov koj tab tom ua ntawd, yog ua los pab lwm tus, ua los cav txog Tswv Ntuj.

Mas Kos Ntawv Moo Zoo (MK 3: 22-30)
Kwv tij Hmoob sawv daws, nyob hauv peb lub neej muaj ntau zaus peb ua zoo rau lwm tus, tab sis luag tej tsis pom qhov peb ua ntawd, lawv ib co tseem hais lus thuam thiab txov peb thiab. Thaum zoo li ntawd, hauv peb nruab siab xav li cas.
Hnub no peb hnov lub Moo Zoo hais tias cov thoob xwm hais tos Yes Xus ntiab dab tau, tos cov dab mloog nws lus mas yog vim Yes Xus hu txog dab los ntiab cov dab ntawd, Yes Xus yog ib tug txiv dab ntag. Yog vim li ntawd, Huab Tais Yes Xus thiaj hais ib co lus rau lawv coj mus xav.
Cov kwv tij, thaum muaj neeg hais tsis zoo rau peb, to taub yuam kev txog peb cov hauj lwm zoo ua pab lwm tus, mas peb txhob cem txhom yws lawv, qhov peb yuav ua mas yog nrhiav tej lo lus los hais rau lawv coj mus xav saib cov lus lawv hais raug lost sis raug.
Ib qho tuaj, mas thov kom peb tso siab rau Leej Ntuj Plig Ntshiab mas peb thiaj yuav tau txais kev zam ntawm Tswv Ntuj mog.

Mas Kos Ntawv Moo Zoo (MK 3: 31-35)
Cov kwv tij Hmoob, thaum nej hnov Huab Tais Yes Xus cov lus hais tias ‘leej twg yog kuv niam, leej twg yog kuv kwv tij? Kuv niam thiab kuv cov kwv tij nyob ntawm no, leej twg ua raws li Tswv Ntuj lub siab, tus ntawd yog kuv ib leeg kwv, ib leeg muam thiab ib leeg niam.’
Tej zaus nej yuav xav tias ua cas Huab Tais Yes Xus tsis lees nws niam cov kwv cov muam uas tuaj nyob sab nraud tos nws.
Yog peb muab ua zoo saib, peb pom tias Huab Tais Yes Xus hais cov lus no los cav txog Mab Liab nws leej niam, vim tias Mab Liab yog tus ua xis Tswv Ntuj siab.
Dhau ntawd, Huab Tais Yes Xus cov lus kuj zoo qhuab ntuas peb tias yog hnub twg peb ua raws li Tswv Ntuj lub siab, mas hnub ntawd peb yuav txia ntshis ua Tswv Ntuj cov me nyuam, ua Huab Tais Yes Xus ib tug kwv los yog ib tug muam tiag.
Yog li mas kwv tij Hmoob sawv daws, Huab Tais Yes Xus cov lus hnub no thiaj tsis yog hais kom peb nrauj niam nrauj txiv thiab tej kwv tij tej nkauj muam. Tab sis yog Huab Tais Yes Xus tab tom qhia qhov tseeb rau peb rov tau mus ua Tswv Ntuj cov me nyuam.
Peb yuav xyaum ua xis Tswv Ntuj siab, peb yuav mloog Tswv Ntuj lus mog.

Lus Kas Ntawv Moo Zoo (LK 10: 1-9)
Kwv tij Hmoob, nyob hauv hnub no lub Koom Txoos tseem yuav nco txog Leej Ntshiab Tis Mos Tes thiab Leej Ntshiab Tis Tos uas yog Leej Ntshiab Paj Lug ob tug kwv luag thiab.
Niaj hnub no peb pom tias cov neeg ua hauj lwm rau Tswv Ntuj mas muaj tsawg tsawg yog muab piv rau ntiaj teb neeg sawv daws, kuj zoo li Huab Tais Yes Xus cov lus hais tias ‘qoob loo zoo sau muaj ntau kawg, tab sis cov tub zog muaj tsawg’.
Yog li tsim nyog peb yuav thov Ntuj pab tshoj peb lub siab kom kuj siab txog txoj hauj lwm pab sau Tswv Ntuj cov qoob loo li Huab Tais Yes Xus hais tias ‘nej thov tus tswv qoob kom nws xa ib co tub zog tuaj sau nws cov qoob’.
Kwv tij, peb yuav ua tiag thov Ntuj kom peb tso tau lub siab ntshaw ntiaj teb cuab tam, kom peb txawj ua neeg me, nyiam tsob hwb lwm tus, mas peb thiaj yuav zoo siab nrog cov Leej Choj los cov phauj ua Tswv Ntuj txoj hauj lwm, peb thiaj yuav txawj tso siab tias yog peb muab siab rau ua Tswv Ntuj txoj hauj lwm ces Tswv Ntuj yuav saib xyuas peb, pov hwm peb kom tsis txhob raug xwv txheej los kev kub ntxhov yuav tuaj nphav peb lub neej.
Thov kom nej nrog peb thov Tswv Ntuj ua ke mog.

Mas Kos Ntawv Moo Zoo (MK 4: 26-34)
Kwv tij Hmoob, hnub no Huab Tais Yes Xus hais tias Tswv Ntuj lub Ceeb Tsheej zoo xws li lub noob nplej nyob hauv daim av, lub noob txawj hlob thiab txhawv ua hnab. Tswv Ntuj lub Ceeb Tsheej zoo xws li lub noob zaub roj me me tab sis yuav hlob ua tsob ntoo loj cia rau nej me noob tau ua chaw nkaum. Huab Tais Yes Xus cov lus no yog ua paj lug hais. Lub ntsiab mas yog zoo li no:
Nyob hauv txoj kev ntseeg, peb yuav ntsib kev txom nyem thiab xwv txheej ntau yam, txawm li ntawd los peb txhob ntaus siab me, txhob tag kev cia siab; peb tsum ua tiag nyiaj txeem ua qhov xis Tswv Ntuj siab ces muaj ib hnub peb txoj kev ntseeg yuav txi txiv rau luag tej pom ua chaw vam khom rau luag teb.
Cov kwv tij, tsis hais txoj kev ntseeg xwb, nyob hauv lub neej los yeej yuav zoo li ntawd thiab. Peb ua neej nyob mas yuav ntsib teeb meem ntau, thov kom peb ua tiag, ces txog thaum kawg peb yuav tau raws li lub siab ntshaw.

Mas Kos Ntawv Moo Zoo (MK 4: 35-41)
Kwv tij Hmoob sawv daws, nyob hauv lub Moo Zoo, peb pom tias Huab Tais Yes Xus cov thwj tim txoj kev ntseeg hlob tsis tau txaus, lawv tsis tso siab tas tas rau Tswv Ntuj, lawv txawm muaj kev ntshai, yog li thaum lawv ntsib cua daj cua dub ntsawj lub nkoj, lawv thiaj ntshai, txawm tias hnub ntawd Huab Tais Yes Xus yuav nrog lawv ua ke.
Cov kwv tij, niaj hnub no peb zoo li Huab Tais Yes Xus cov thwj tim ntawd, peb tseem muaj kev ntshai, peb tseem ua xyem xyav tas zog. Thov kom peb niaj hnub thov Ntuj pab peb txawj ua siab loj, kom peb ua siab khov nruaj nreb rau txoj kev ntseeg.
Peb yuav hais rau Huab Tais Yes Xus tias ‘Huab Tais, thov koj hais ib lo lus rau kuv, kom kuv lub siab nyob tau ntsiag thiab tus yees tsis txhob ua xyem xyav ntxiv txog koj lawm mog.’

Mas Kos Ntawv Moo Zoo (MK 5: 1-20)
Cov kwv tij Hmoob, nej saib thaum tus neeg raug cov dab tsis huv zoo lawm, nws ua li cas. Nws thov Huab Tais Yes Xus tias “Huab Tais, cia kuv nrog koj mus puas tau?”
Huab Tais Yes Xus hais rau nws tias “Koj tsis txhob nrog kuv mus mog! Koj rov mus tsev, mus nrog koj tsev neeg nyob, koj qhia lawv txog tas txhua yam uas Huab Tais tau ua rau koj thiab nws tau khuv leej koj li cas.”
Kwv tij, ua cas Huab Tais Yes Xus tsis pub nws raws Huab Tais Yes Xus mus. Yog li nyob hauv peb ne, Huab Tais Yes Xus puas kheev peb raws nws qab.
Huab Tais Yes Xus hu peb ua nws thwj tim thiab muab tib txog hauj lwm rau peb. Txoj hauj lwm ntawd yog tshaj lub Moo Zoo.
Kwv tij Hmoob sawv daws, peb tsis thas yuav yog ib tug Leej Choj, Leej Phauj, Tub Tsob Hwb, los yuav yog Xib Hwb, es thiaj yuav ua Tswv Ntuj txoj hauj lwm tshaj lub Moo Zoo.
Peb ua niam, ua txiv, me nyuam, ua tub lag tub luam, ua liaj ua teb, ua neeg ntiav luag zog, los peb puav leej tshaj lub Moo Zoo tau.
Cov kwv tij Hmoob sawv daws, Huab Tais Yes Xus niaj hnub hais rau peb li tau hais rau tus neeg raug dab ntawd. Huab Tais Yes Xus hais tias “Koj kav tsij mus hais qhia koj tsev neeg mog, koj yuav hais rau lawv tias Tswv Ntuj hlub koj npaum cas thiab Tswv Ntuj khuv leej koj li cas. Koj mus ua rau lawv ib yam li kuv tau ua rau koj. Koj ua raws li kuv cov lus, ces zoo puav tam li koj tau nrog kuv ua ke lawm.”

Mas Kos Ntawv Moo Zoo (MK 5: 21-43)
Kwv tij Hmoob sawv daws, lub Moo Zoo hnub no peb hnov hais txog 2 zaj: zaj ib yog tus poj niam tsob ntshav, nws ntseeg tias tsuas yog nws tau kov Huab Tais Yes Xus lub tw tsho xwb, mas nws yuav zoo; zaj ob yog zaj Huab Tais Yes Xus hais kom Yas Los ntseeg, mas nws tus ntxhais yuav sawv rov los.
Ob zaj no muaj tib lub ntsiab, yog ‘ntseeg’ ces yuav tau raws li ‘ntshaw’.
Kwv tij Hmoob, Huab Tais Yes Xus tsis tau hais tias kuv yuav ua kom koj zoo, los yog hais tias kuv yuav tsa koj tus ntxhais sawv rov los. Huab Tais Yes Xus tsuas hais tias ‘Koj lub siab ntseeg cawm koj lawm. Koj txhob ntshai, tsuav koj ntseeg xwb.’
Yog li mas kwv tij Hmoob sawv daws, thov kom peb tuav txoj kev ntseeg kom ruaj, tso siab tias Huab Tais Yes Xus yog tus cawm peb, Huab Tais Yes Xus yuav pub kej kag siab lug rau peb, thiab yuav thov Leej Txiv Tswv Ntuj pub rau peb.
Thov kom peb ntseeg thiab nrhiav Huab Tais Yes Xus mus li mog. Nyob zoo sawv daws.

Mas Kos Ntawv Moo Zoo (MK 6: 1-6)
Kwv tij Hmoob, lub Moo Zoo nag hmo mas peb hais tias tus poj niam tsob ntshav thiab Yais Los, nkawd ntseeg ces nkawd tau raws li ntshaw. Tus poj niam tsob ntshav nws qhov tsob ntshav cia li tu hlo thaum nws tau kov Huab Tais Yes Xus tw tsho, Yais Los tus me ntxhais rov sawv thaum nws ntseeg tias Huab Tais Yes Xus muaj peev xwm cawm tau tus ntxhais.
Hnub no lub Moo Zoo piav tias thaum Huab Tais Yes Xus mus txog lub zos nws hlob, mas lawv ua xyem xyav, lawv tsis ntseeg, ces Huab Tais Yes Xus thiaj ua tsis tau ib yam hwj huam yees ntxwv nyob ntawd.
Cov kwv tij, muab tig los xav rau hauv peb, muaj tej yam tshwm nyob hauv peb lub neej ua rau peb xav tsis thoob los yog nco tsis txog, mas tej zaus peb yuav hais tias ‘tej zaus lam yog xwb’, los peb yuav hais tias ‘yog tej yam hwj huam’ vim peb tsis muaj lub siab ntseeg, tab sis yog peb ua zoo saib mas peb yuav pom tias yog Tswv Ntuj kev khuv leej peb.
Yog li mas cov kwv tij, yog peb xav tau txais los yog xav pom Tswv Ntuj kev khuv leej, peb tsis txhob ua xyem xyav, peb yuav tso siab ntseeg thiab qhib siab dav saib mas peb thiaj yuav pom.
Piv txwv tias hnub no peb tsis muaj nyiaj, tab sis nyob nyob cia li muaj ib tug yawg laus hais kom peb pab nws, peb ua ib siab pab, ces nws muab me ntsis nyiaj rau peb.
Yog peb xav li cov neeg tsis muaj kev ntseeg xav, mas peb yuav hais tias yog tus laus neeg ntawd muab ua txiaj ntsig pauj rau peb, los peb yuav xav tias ua cas yuav yog lub zoo caij rau kuv ua luaj li no.
Tab sis yog peb xav li ib tug neeg ntseeg mas peb yuav xav tias yog Tswv Ntuj pom kuv txom nyem, Tswv Ntuj thiaj pub kom kuv tau pab tus yawg laus ntawd, ces nws thiaj tau muab qhoc nyiaj no rau kuv. Kuv yuav ua Tswv Ntuj tsaug.
Cov kwv tij, peb yuav tau ntseeg tiag tiag, mas Tswv Ntuj thiaj yuav qhib tau peb lub tswv yim kom pom Tswv Ntuj kev khuv leej mog.

Mas Kos Ntawv Moo Zoo (MK 6: 14-29)
Cov kwv tij Hmoob sawv daws, hnub no peb hnov hais txog 3 tus neeg; Zam Ntxuav Plig, Hes Los thiab Hes Los Dias. Zam Ntxuav Plig muaj lub siab nrhiav qhov tseeb thiab hwm Tswv Ntuj; Hes Los muaj lub siab xav paub Huab Tais Yes Xus tab sis nws lub siab ntshaw hwj chim hiab nyiam kev ua si lom zem, nws thiaj tsis ntsib Huab Tais Yes Xus; Hes Los Dias muaj lub siab ntxub thiab npau rau tus Ntxuav Plig Zam, mas nws thiaj ntxias tus ntxhais kom thov Zam lub taub hau.
Kwv tij Hmoob, nyob hauv peb mas peb lub siab zoo li cas, puas yog li Zam Ntxuav Plig, Hes Los, los yog Hes Los Dias. Dhau ntawd, peb yuav xaiv lub siab zoo li cas los hnav.
Peb paub tias txawm Zam raug txiav caj dab tuag, tsis kav Zam lub siab tseem nyob txog niaj hnub no, tab sis Hes Los thiab Hes Los Dias mas tas sawv daws tsuas cav tias nkawd yog neeg siab phem li hiam.
Hnub no txawm nej lub siab yuav zoo li Hes Los thiab Hes Los Dias lub, los thov nej hloov siab tshiab los hnav lub siab nyiam qhov tseeb, ua qhov ncaj xws li tus Ntxuav Plig Zam mog.

Mas Kos Ntawv Moo Zoo (MK 6: 30-34)
Kwv tij Hmoob sawv daws, lub Moo Zoo hnub no peb pom tias thaum Huab Tais Yes Xus pom cov thwj tim khwv vim lawv taum mus tshaj lub Moo Zoo thiab ua hauj lwm raws li Huab Tais Yes Xus cov lus, ces Huab Tais Yes Xus hais kom lawv mus so. Qhov so zoo tshaj mas yog so nrog Huab Tais Yes Xus hauv tej qho chaw xu kev. Thaum lawv tau so nyob ze Huab Tais Yes Xus lawd, lawv yuav tau so los siav, lub siab rov kaj, lub cev yuav rov muaj zog tuaj. Yog li mas thaum peb sab thiab qaug zog, peb thiaj yuav tsum mus so nyob hauv Huab Tais Yes Xus, mas peb lub siab thiaj yuav kaj yuav muaj zog dua tuaj.
Cov kwv tij, Huab Tais Yes Xus tsis yog peb qhov chaw so los siav xwb, nws tseem muaj lub siab hlub neeg thiab. Yog li Huab Tais Yes Xus thiaj zoo siab qhia lawv thiab tham pub rau lawv mloog.
Huab Tais Yes Xus lub siab hlub neeg no yuav yog ib tug yam ntxwv cov raws Huab Tais Yes Xus yuav tau xyaum.
Hnub no, thov kom peb nrhiav sij hawm so nrog Huab Tais Yes Xus thiaj mob siab qhia txog Huab Tais Yes Xus rau cov neeg qaug zog, mas lawv thiaj yuav tau nrog peb so los siav nyob ua ke.