Tom qab ntsib cov tub ntxhais hluas tas, Vaj Qhia ua tswv cuab coj lub Txoos Txi Ntuj nyob hauv hnub ua hmoov Huab Tais Yes Xus lub hwj chim tawm tuaj. Vaj Qhia nthuav zaj nyeem hauv Ntawv Moo Zoo tias Pob Zeb xav tsa tsev tsam phooj kom tau nyob ntsia Huab Tais Yes Xus lub hwj chim ntxiv mus, tab sis Huab Tais Yes Xus tsis tau hu peb los nyob ntsia nws lub hwj chim zoo li ntawd. Huab Tais Yes Xus hu peb los mloog nws lo lus, los ntsuas lub ntiaj teb cov xwm, thiab txiav siab raws Huab Tais Yes Xus.
“Peb tsum nkag mus nyob hauv Huab Tais Yes Xus lub rooj tham, tsis yog nyob sab nraud no ntsia. Peb raug hu los twm Ntawv Ntshiab nrog Huab Tais Yes Xus, muab nthuav kom phim peb lub zim txwv, thiab txiav siab taug Huab Tais Yes Xus txoj lw kev.” Vaj Qhia hais, “Peb tuaj nyob ntawm no kom tau yeej peb kev tso tseg thiab kev ntshai, kom tau rhuav qhov ua xyem xyav ib yam li thaud cov Hauv Paus Xa Lus ua xyem xyav pov tseg. Huab Tais Yes Xus hu peb los muaj feem xyuam nyob hauv nws zaj kwv huam, kom tau sau zaj liv xwm tshiab.”
Hais li ntawd tas, mas Vaj Qhia hais ntxiv tias lub Koom Txoos yog qhov chaw pab qhia kom cov ntseeg txawj mloog thiab txawj txiav siab, kom to taub tias peb muaj txoj sia nyob rau leej twg thiab yuav ua neej mus zoo li cas.
“Lub Koom Txoo yog qhov chaw qhia peb kom paub mloog tias lub suab twg yog Tswv Ntuj lub suab, lub suab twg yog peb lub tswv yim xwb. Lub Koom Txoos yog qhov chaw qhia peb cov muaj cuab kav mloog Leej Ntuj Plig Ntshiab tshoj peb raws Huab Tais Yes Xus kom muaj lub siab loj siab tawv thiab muaj tswv yim. Thaum peb txav mus deb ntawm Huab Tais Yes Xus thiab ntawm luag tej, mas peb txoj sia yuav tsis zoo li qub ntxiv. Tab sis hnub twg peb rov los npuab Huab Tais Yes Xus, peb rov muaj txoj sia tshiab ntxiv, peb yuav hloov mus.”
Vaj Qhia muab Leej Ntshiab Fas Ntshis Kus thiab Leej Ntshiab Kaj los ua piv txwv txog kev hloov mus vim nkawd tso txoj qub kev pom tseg kom tau ua lub neej zoo li Huab Tais Yes Xus lub tias “Txawm tias Leej Ntshiab Fas Ntshis Kus hla lub ntiaj teb no mus lawm 800 xyoo, tsis kav nws lub neej tseem ntxim peb siab, mas lub laj thawj yog qhov no; nws muaj cuab kav tso txoj kev nws swm tseg, kom tau ntsib txoj kev muaj ntsis zoo li Huab Tais Yes Xus txoj.”
Vaj Qhia txhib cov tub ntxhais hluas tias niaj hnub no Aws Los Pas Tuam Teb thiab tas nrho lub ntiaj teb tab tom ntsia lawv. Tseev kom lawv txia ua ib cov Leej Ntshiab tshiab, mas lawv tsum muaj cuab kav ntseeg txog lub cov lus hauv Ntawv Moo Zoo, lawv tsum hlob loj ua tus neeg zoo txhij nyob hauv Huab Tais Yes Xus kev twj lij, thiab lawv tsum puag kev pluag xws li yog lawv tus kwv tij.
Vaj Qhia hais tias lub ntees zaum no lub npe yog ‘Mus!’, lo lus no tsis yog ib zaj hau lus xwb, tab sis yog tsum ‘tawm mus’ raws cov kev tsis muaj nyob hauv daim ntawv theej teb. Cov kev ntawd tawm tuaj rau pom yog tias peb mloog lub suab hauv nruab siab, ua raws li Leej Ntuj Plig Ntshiab tshoj, thiab raws Huab Tais Yes Xus tus sawv rov los.
“Mus! Tawm mus. Yog kom zoo mloog yuav hais tias ‘Peb tawm mus ua ke!’. Thov kom peb rhais ruam tawm mus nrhiav cov neeg tsis muaj leej twg nco txog, lawv yog cov raug kev tsis ncaj ncees thiab neeg kev muab hlob tsis lees paub txog lawv lub meej mom thiab lawv txoj kev npau suav.” Vaj Qhia txhib cov tub ntxhais hluas, “Vaj Qhia Fas Ntshis Kus tau kev txhawb siab los ntawm Leej Ntshiab Fas Ntshis Kus tus pluag txom nyem nyob As Xis Xis, nws tau ntuas kom txhob poob rau txoj kev ntxias peb ua ib tus neeg ntseeg nyob nrug deb ntawm Tswv Ntuj cov qhov txhab, tab sis Huab Tais Yes Xus xav kom peb chwv ntiaj teb neeg kev txom nyem, kov lawv daim cev nqaij tab tom raug kev mob kev ntsaj.”
Hais txog lub qab ntuj, mas Vaj Qhia hais tias yog peb kwv peb tij uas peb tsum nyiam thiab tsob hwb. Yog peb xav kom qab ntuj no dim ntawm kev cai siv hwj chim thiab yog peb xav rhuav lub ntsa cais tib neeg, mas peb yuav tsum tso lub qab ntuj tawm hauv txoj kev ntshai, kev tsis paub, thiab kev siv lub zog los ua phem tawm tsam. Yog peb cia siab rau Tswv Ntuj mas peb yuav pom ib yam li Leej Ntshiab Fas Ntshis Kus thiab Leej Ntshiab Kaj tau pom; nkawd pom tias lub qab ntuj no muaj cov kwv cov muam cov tij cov viv uas peb yuav tau nyiam lawv thiab tsob hwb lawv, tsis yog cia rau peb tswj peb yuam. Lub qab ntuj no tsis yog yam peb yuav txhim tus ntsa zeb los thaiv, tab sis yog yam peb yuav tau qhib siab dav txais thiab puag cia.
“Txiv thov kom cov me nyuam sawv daws muab tas nrho nej lub zog hauv txoj kev ua tib neeg; tsis hais kev txawj ntse, laj lim tswv yim, hauj lwm, kev phooj kev ywg, kev nyiam kev hlub, thiab kev thov Ntuj los tsim kom Leej Ntshiab Fas Ntshis Kus txoj kev npau suav tsheej xeeb tuaj rau pom.”