Tus sau: TP. Nyiaj Pov (Tim 17 lub 9 hlis 1997)
Yes Xus tsis teb rau Zam ob tug thwj tim tias : “Kuv yog tus tuaj cawm ntiaj teb neeg. Nej txhob tos lwm tus.”
Tab sis Yes Xus ua tus cawm ntiaj teb cov hauj lwm. Ib txwm cov Yaj Saub ntxov tshaj tias thaum Leej Pleev yuav tuaj mas nws yuav ua dab tsi. Tus Yaj Saub His Xais tau hais peb zaug tias Leej Pleev yuav ua kom cov dig muag rov pom kev, ua kom cov neeg ceg tawv mus tau kev, cov lag ntseg yuav hnov lus, Leej Pleev yuav tsa cov tuag kom rov sawv, Leej Pleev yuav qhia nws lub Moo Zoo rau cov pluag.
Yes Xus twb ua tau 6 yam hauj lwm ntawd ntau rau sawv daws pom nyob hauv lub teb chaws.
Yes Xus thiaj hais rau Zam ob tug thwj tim tias : “Neb mus qhia tej yam neb pom thiab neb hnov rau Zam paub !”
Thiab Yes Xus tseem hais lo lus no ntxiv rau Zam ob tug thwj tim : “Tus kuv tsis ua nws chaw ntog nws txoj hmoov zoo.” Yog zoo li Yes Xus xav hais rau Zam tias : “Koj yuav tsum to taub zoo kuv txoj kev tshaj lub Moo Zoo. Koj txhob yuam kev, txhob ntog vim kuv. Kuv hais lus hlub zeej tsoom. Kuv ua cov hauj lwm hlub zeej tsoom vim zeej tsoom tos kom muaj tus hlub lawv, ces lawv thiaj tig los yuav lub siab tshiab. Yog koj xav tias kuv hais lus mos lus muag dhau mas koj yuam kev, koj ntog vim kuv. Kuv ua Leej Pleev cov hauj lwm, kuv kho cov neeg mob, hlub cov pluag, tsis hais lus ntxhib : cov Yaj Saub ib txwm tau xub hais tias Leej Pleev yuav yog ib tug zoo li ntawd. Koj tso siab mog ! Kuv yog Leej Pleev tuaj cawm ntiaj teb neeg.”
Kwv tij, cov neeg tshaj Yes Xus Lo Lus rau nej kuj yuav tsum taug Yes Xus tus lwj lwm : lawv yuav ntseeg tas siab cov lus lawv tshaj, tab sis lawv yuav muab siab rau hais lus mos lus muag, hais lus hlub zeej tsoom ntau dua hais lus ntxhib thiab cem luag.
Yes Xus tau hais rau Zam ob tug thwj tim tias kom Zam txhob ntog, txhob xav tswv yim yuam kev txog Yes Xus. Tab sis Yes Xus tso siab rau Zam. Zam tau siv ib co lus ntxhib los qhuab qhia cov neeg txhaum tuaj cuag nws thiab thov txais cov kab ke ntxuav plig ntawm nws.
Tab sis Yes Xus paub tias Zam yuav tsum hais lus muaj ceem ces luag thiaj ntseeg nws. Muaj zaum puav uas Yes Xus yuav hais ib co lus ntxhib kawg rau cov Fas Lis Xais tsis kam ntseeg txog nws. Yes Xus hais lus mos lus muag rau cov neeg txom nyem, tab sis nws kuj txawj hais lus ceev txhav qhi rau cov neeg muab hlob.
Vim li ntawd, thaum Zam ob tug thwj tim rov mus lawm, Yes Xus hais ib co lus qhuas txog Zam rau sawv daws mloog.
Nyob hauv pab neeg ntsauv Yes Xus hnub ntawd muaj tej tus uas lawv twb tau mus txais Zam cov kab ke Ntxuav Plig nyob hauv tus dej Yos Las Das. Yes Xus thiaj nug lawv tias : “Vim li cas nej thiaj tau mus cuag Zam ?”
Nej tau mus cuag Zam tsis yog vim nej xav pom ib tug neeg hnav tsoos laim txias. Vim Zam tsuas hnav tawv tsiaj xwb. Nej mus cuag Zam puas yog vim nej xav pom ib tug Yaj Saub ? Yog ! Zam yog ib tug Yaj Saub tiag ! Zam yog ib tug Yaj Saub loj.
Tas tsoom poj niam cov tub tsis muaj ib tug loj dua Zam ! Zam tau tshaj Tswv Ntuj cov lus xws li cov Yaj Saub loj. Cov lus uas Zam tau hais rau nej yog ib co lus tseem ceeb.”
Kwv tij, Yes Xus tau hais ib co lus zoo li ntawd qhuas txog Zam. Vim muaj tej lub caij uas cov tshaj Tswv Ntuj Lo Lus yuav tsum hais lus qhuab qhia ntxhib rau cov neeg txhaum. Xws li Zam tau hais.
Yes Xus lees meej kawg tias Zam tau lis nws tej hauj lwm zoo.
Tab sis, kwv tij,Yes Xus tseem hais ntxiv ib lo lus zoo li no : “Tsis kav tus me dua cov nyob hauv Tswv Ntuj lub Ceeb Tsheej nws tseem loj dua Zam.”
Vim li cas Yes Xus thiaj hais lo lus no ? Yes Xus nyuam qhuav hais tias : “Tas tsoom poj niam cov tub tsis muaj tus loj dua Zam.” Hos nyem no Yes Xus hais tias : “Tus me dua cov hauv Tswv Ntuj lub Ceeb Tsheej nws tseem loj dua Zam !”
Kwv tij, tos Yes Xus hais ob lo lus zoo li ntawd yog vim nws xav qhia peb paub meej tias lub caij ua Yes Xus ntej txawv lub caij uas Yes Xus tuaj lawm.
Lub caij ua Yes Xus ntej yog lub caij uas cov Yaj Saub tshaj Tswv Ntuj cov qub lus : Tswv Ntuj yuav tsum hais lus ntxhib rau nws haiv neeg tsis mloog lus. Hos nyem no, Yes Xus tuaj lawm, Tswv Ntuj Leej Tub yug los nrog neeg nyob, Nyem no yog lub caij uas Tswv Ntuj qhib nws lub siab kom tas, yog lub caij uas Tswv Ntuj hlub neeg. Nyem no yog lub caij uas Tswv Ntuj hlub peb tshaj yav thaud.
Yes Xus hais rau peb tias Tswv Ntuj lub Ceeb Tsheej tuaj txog ze ntawm peb. Peb kav tsij rau siab mloog Yes Xus cov lus mog ! Tswv Ntuj xav yuav peb los ua nws cov me nyuam. Peb txoj hmoov zoo !
Yes Xus tsis hais lus cem neeg. Tab sis peb txhob xav tias peb yuav thuam Yes Xus kuj tau vim Yes Xus yuav tsis npau taws rau peb, Yes Xus tsis txawj npau taws.
Kwv tij, Yes Xus siab ntev, Yes Xus hlub neeg. Tab sis peb txhob xav tias peb yuav ua neeg lag ntseg tsis mloog nws kuj tau. Yes Xus hais tias muaj tej tus neeg tsis muab siab rau mloog cov neeg tshaj Tswv Ntuj Lo Lus. Zam tshaj Lo Lus, lawv tsis mloog. Yes Xus tshaj Lo Lus, lawv kuj tsis mloog thiab.
Lus Kas cev Yes Xus cov lus rau peb zoo li no :
Thaum tsoom sid tau hnov Zam, tab yog cov sau se, lawv cav txog Tswv Ntuj siab ncaj, lawv txais Zam lub Cim Ntxuav.
Hos cov Fas Lis Xais thiab cov Thoob Xwm Txoj Cai lawv saib Tswv Ntuj zaj tswv yim tsis muaj nqe, vim lawv tsis tuaj txais lub Cim Ntxuav ntawm Zam.
Kuv yuav muab txheej neeg no los piv rau leej twg ? Lawv zoo li leej twg ?
Lawv zoo li cov me nyuam zaum ntawm tshav puam.
Lawv rov sib qw tias :
“Peb tshuab raj ua si rau nej, nej twb tsis dhia !
Peb cuab suab nyiav, nej twb tsis nrog nyiav.”
Zam Ntxuav Plig tuaj, nws tsis noj mov, tsis haus cawv, nej hais tias : “Nws raug dab xwb !”
Leej Neeg tus Tub tuaj, nws noj, nws haus, nej ho hais tias : ‘Saib tus ntawd, yog neeg hu dab thiab quav cawv, nws nrog cov sau se thiab cov neeg txhaum ua phooj ywg.”
Tab sis tus Thoob Tsib cov me nyuam, saib tus Thoob Tsib yog tus ncaj.”
Kwv tij, lub caij no tib neeg kuj ua zoo li thaum ub uas Zam thiab Yes Xus tshaj Tswv Ntuj cov lus.
Niaj hnub no tseem muaj ntau leej tas nrho tsis mloog cov neeg tshaj Tshaj Tswv Ntuj lus. Koj hais lub ntxhib qhuab qhia lawv hos lawv tsis quav ntsej. Koj ua siab ntev siv ib co lus hmov tshua hos lawv tsis liam fab rau.
Lo lus kawg uas Yes Xus hais yog zoo li no :
“Tus Thoob Tsib cov me nyuam saib tus Thoob Tsib yog tus ncaj.”
Yuav tsum to taub lo lus no :
Tus Thoob Tsib yog Tswv Ntuj.
Tus Thoob Tsib cov me nyuam yog cov neeg muab siab rau mloog Tswv Ntuj xws li tus me nyuam muab siab rau mloog txiv.
Cov neeg muab siab rau mloog Tswv Ntuj mas lawv lees tseeb tias Tswv Ntuj hais yog, qhov ua Tswv Ntuj hais yog qhov tseeb, ces lawv ntseeg Tswv Ntuj.