Tus sau: TP. Nyiaj Pov (Tim 4 lub 2 hlis 1998)
Yes Xus hais tias : “Nej thov kom tus Huab Tais tswv qoob xa tub zog tuaj sau nws tej nplej siav.”
Kwv tij, peb yuav tsum thov kom Tswv Ntuj tshoj tej tus neeg kom lawv txiav siab mus tshaj rau teb chaws tias Tswv Ntuj lub Ceeb Tsheej tuaj txog ze lawm. Tswv Ntuj cov qoob yog cov neeg nyob ntiaj teb, yog cov zos nyob ncig peb lub zos. Nyob hauv cov zos no muaj ib cov nplej siav zoo sau, yam li muaj tej tus neeg uas lawv lub tswv yim siav lawv tab tom zoo siab mloog Yes Xus lub Moo Zoo, tab sis tsis muaj tus tshaj Yes Xus lub Moo Zoo rau lawv mloog.
Kwv tij Hmoob, nej ntau leej xa ntawv tuaj hais rau peb lub tshaj xov Zoo Tswv Zov Yaj tias nej xav ntseeg Yes Xus cov lus tab sis tsis muaj tus yuav qhia Yes Xus cov lus rau nej. Nej mloob lub tshaj xov no uas niaj hnub qhia nej mas nej yuav paub ntau hauj sim txog Tswv Ntuj lub Ceeb Tsheej. Thiab nej thov Yes Xus, tus Huab Tais Tswv qoob, kom nws xa neeg tshaj Ntuj lo lus tuaj rau nej. Yog nej thov Yes Xus mas nws yuav xa neeg tuaj qhia nej vim nej yog cov nplej siav zoo sau los nyob hauv Yes Xus lub Koom Txoos.
Yes Xus hais tias : “Kuv xa nej xws li ib co me yaj mus nyob hauv nruab nrab cov hma.”
Kwv tij, cov neeg mus tshaj Yes Xus lub Moo Zoo lawv zoo li ib co yaj. Lawv yog ib co neeg me. Lawv tsis muaj hwj chim. Lawv tsis ua nom. Lawv tsis muaj zog xws li cov tsov. Lawv tsuas zoo li cov me yaj.
Tab sis cov tuaj tshaj Yes Xus lub Moo Zoo lawv ntsib ntau hom neeg. Ib txhia yog cov siab zoo, yog cov nplej zoo sau. Tab sis ib txhia tiv Yes Xus cov lus, thuam Yes Xus lub Moo Zoo, cem cov tuaj tshaj Yes Xus lub Moo Zoo.
Lawv qhia nws cov Thwj Tim kom lawv xub paub tias lawv zoo li ib co yaj, tej zaud lawv yuav ntsib tej tus neeg uas yog zoo li cov hma.
Yes Xus tseem hais ib lo lus zoo li no : “Nej yuav muaj lub siab dawb xws li cov nquab, thiab nej yuav xyuam xim xws li cov nab.”
Yes Xus hais tias : “Nej txhob nqa nyiaj, txhob ris dab tsi, txhob hawm leej twg ntawm kev.”
Kwv tij, Yes Xus xav kom nws cov Thwj Tim tshaj lub Moo Zoo txhob mus zoo li ib co neeg muaj nyiaj txiag ntau. Nws hais kom lawv txhob mus tham pem ua si nrog tus ub tus no.
Tsuas mus tshaj tias Tswv Ntuj lub Ceeb Tsheej tuaj txog. Tus Thwj Tim tshaj lub Moo Zoo, nws tshaj lub Moo Zoo tiag.
Nws tsis nyob dag tsheej hnub hauv luag lub zos. Nws nqa phau ntawv Moo Zoo los Phau Ntawv Ntshiab nws tham txog Yes Xus nyob hauv cov zos Hmoob, thiab nws coj tus yam ntxwv phim cov lus Yes Xus hais nyob hauv phau ntawv Moo Zoo.
Yes Xus hais tias : “Nej mus hauv lub tsev twg nej xub hais tias : ‘Nej nyob kaj lug.’ Thiab nej noj xws li lub tsev ntawd noj kam.”
Kwv tij, Yes Xus hais li ntawd kom nws cov Thwj Tim tshaj Ntuj lus txhob nrog luag sib cav thiab txhob taij ntau yam ntawm lub tsev thiab ntawm lub zos uas lawv mus tshaj Ntuj lus rau. Yus noj txhiam xws xws li lub zos noj. Yus nrog lawv ua phooj ywg. Yuav ua raws li Yes Xus tus lwj lwm : coj tus yam ntxwv pluag xws li zeej tsoom, thiab hlub zeej tsoom. Cov neeg tshaj tias Tswv Ntuj lub Ceeb Tsheej tuaj txog yuav tsum yoog tus cwj pwm xws li Yes Xus tus cwj pwm.
Yes Xus hais tias : “Nej kho cov neeg mob kom zoo hlo. Nej hais rau lawv tias : Tswv Ntuj lub Ceeb Tsheej tuaj txog ze lawm.”
Kwv tij, Hmoob, vim li cas Yes Xus thiaj hais ob los lus ntawd ua ke : “Nej kho cov neeg mob,” thiab nej hais tias : “Tswv Ntuj lub Ceeb Tsheej tuaj txog ze.”
Yog vim Yes Xus xav kom nws cov neeg tshaj lub Moo Zoo hlub cov txom nyem thiab cov neeg raug mob nkeeg. Yog cov neeg tshaj lub Moo Zoo mus hais Yes Xus cov lus hlub neeg rau cov neeg txom nyem mas Yes Xus cov lus pab cov txom nyem kom lawv muaj lub siab loj, Yes Xus lo lus kho lawv kom lawv zoo hlo ntau.