Tus sau: TP. Nyiaj Pov (Tim 4 lub 2 hlis 1998)
1. Yes Xus tsis xav hu ib co hluav taws nqes saum ntuj los nplua cov Xas Mas Lias uas tsis kam txais nws.
Kwv tij, peb ntau zaus xav ua xws li Yes Xus ob tug Thwj Tim Yas Kos thiab Zam. Thaum peb txais kev teev hawm Yes Xus lawm, mas peb xav kom Tswv Ntuj nplua cov neeg tsis kam ntseeg, los nplua cov neeg hiam cov neeg ntseeg, los nplua cov neeg thim kev ntseeg.
Peb xav kom Tswv Ntuj tso xwv txheej los nplua lawv.
Tab sis Yes Xus tsis xav hem neeg kom lawv ntseeg nws. Yes Xus tsuas txais cov neeg zoo siab mloog nws. Nws tsis yuam neeg kom ntseeg nws. Yes Xus pom ib pab neeg tsis kam txais nws mas nws tsis cem lawv. Yes Xus mus cuag lwm pab neeg. Peb yuav ua xws li Yes Xus : thaum ib tug neeg los ib pab neeg tsis mloog peb qhia Yes Xus lub Moo Zoo rau lawv mas peb yuav tsis txhob tu siab rau lawv, txhob npau taws rau lawv. Peb mus tshaj Yes Xus lub Moo Zoo rau lwm pab neeg.
Yes Xus tau hu Yas Kos thiab Zam ua ‘Xob cov tub’, vim nkawd xav hu Xob los nplua cov Xas Mas Lias. Peb txhob ua xob cov tub hu txog Ntuj los nplua cov tsis ntseeg Yes Xus.
2. Yes Xus xav kom cov neeg ua nws Thwj Tim lawv zoo siab mloog lus sai, txhob khuv xim txog yam ub yam no.
Kwv tij, ntau leej hnov Yes Xus cov lus, lawv nyiam Yes Xus co lus, ces lawv hais tias lawv zoo siab nrog Yes Xus mus, lawv zoo siab nrog cov tub tshaj lub Moo Zoo ua hauj lwm. Peb Hmoob tej tus nyiam Yes Xus lub Moo Zoo, peb xav mus qhia lub Moo Zoo rau peb tsoom Hmoob.
Peb puas kam ua tiag nyiaj tej yam nyuaj ? Puas kam taug tej me kev ntxhab nce toj nqes hav ? Puas kam tiv tshav tiv nag ? Puas kam mus thov pw hauv luag tsev, noj tej yam luag pub rau noj ? Yus tuaj yeem tawm rooj mus tshaj Yes Xus lub Moo Zoo npaum li cas ? Puas yog ib lis piam ib zaug ? Los ib hlis ib zaug ? Los ib xyoos ob peb hnub ? – Yes Xus tsis yuam kom yus tshaj lub Moo Zoo npaum li nws tau ua. Nws tsuas hais rau tus xav ua Yes Xus Thwj Tim hais tias : “Yog koj mus tshaj lub Moo Zoo mas kuv zoo siab, tab sis koj npaj lub siab loj thiab kub, koj thiaj yuav ua tau.”
Tseem muaj ib tug hais rau Yes Xus tias : “Huab Tais, kuv yuav raws koj mus, tab sis thov koj cia kuv mus hais ib lo lus tso kuv tsev neeg tseg tso.” Yes Xus hais rau nws tias : “Leej twg pib tuav rab voom nws ho tig ntsia rov tom qab mas nws tsis tsim nyog ua ntawm Tswv Ntuj lub Ceeb Tsheej.”
Kwv tij, lo lus peb no muaj me ntsis zoo li lo lus ob uas peb nyuam qhuav nthuav. Tus hais tias nws xav mloog Yes Xus hu nws ua Thwj Tim tab sis nws xav xub mus xyuas nws cov neeg tso kom lawv zoo siab thiab kom yus zoo siab mas Yes Xus hais rau nws tias : “Koj tseem tsis tau pib mus tshaj lub Moo Zoo hos koj xub mus xyuas koj tsev neeg, xyuas niam thiab txiv, xyuas cov tub cov ntxhais, xyuas kwv tij neej tsa, mas lwm hnub koj pib tshaj lub Moo Zoo me ntsis koj tseem yuav nco txog lawv, koj tseg tsis tau lawv, koj yuav tso hauj lwm tshaj Ntuj lus tseg tas zog kom tau rov tuaj xyuas lawv. Koj yuav yog zoo li tus pib tuav rab voom tig ntsia rov tom qab, koj yuav ua koj tej dej num tsis tau.”
Peb leej twg xav ua Yes Xus Thwj Tim tshaj lub Moo Zoo mas leej twg yuav txhob tig ntsia rov tom qab tas zog. Lub caij peb tshaj Ntuj Lo Lus peb tsuas muaj tib lub siab tshaj Ntuj Lo Lus xwb.