Tus sau: TP. Nyiaj Pov (Tim 22 lub 5 hlis 1998)
1. Zaj paj lug tus yaj ploj (LK 15: 3-7).
Kwv tij, Yes Xus hais zaj paj lug txog tus yaj ploj rau cov neeg tab tom mloog nws. Lawv yog ob hom neeg sib txawv.
Thawj hom yog cov neeg zoo siab mloog nws. Nws hais rau lawv tias : “Nej yog cov neeg lees txhaum lawm. Luag cov neeg khav tias lawv siab dawb siab huv, luag thuam nej tias nej yog ib co neeg txhaum. Tab sis nej tig los yuav lub siab tshiab lawm. Tswv Ntuj zoo siab rau nej, ib yam li tus tswv zov nws pab yaj, nws nrhiav tau nws tus yaj ploj, nws tsis muab ntaus. Nws puag nws tus yaj, nws muab kwv los txog tsev. Nej cov neeg txhaum uas nyob ntawm no, nej lees txhaum lawm, nej rov los cuag Tswv Ntuj, Tswv Ntuj zoo siab hlub nej dua 99 leej khav tias lawv tsis muaj txhaum.”
Zaj txhais no lub ntsiab yog pab cov neeg tig los yuav lub siab tshiab kom lawv tso siab tias Tswv Ntuj hlub lawv tiag. Tswv Ntuj tsis xav nplua cov neeg txhaum. Tswv Ntuj tsuas xav hlub cov neeg txhaum. Nws xav kom lawv rov qab los nrog nws.
Thiab nyob hauv zaj txhais no muaj lwm lub ntsiab qhuab qhia cov Fas Lis Xais uas lawv xav tias lawv siab dawb siab huv siab ntshiab vim lawv mloog txoj cai. Tab sis lawv tsis mloog Tswv Ntuj thawj lo lus qhia..
Lawv thuam luag tej. Lawv tsis kam ntseeg Yes Xus tshaj Tswv Ntuj cov lus. Cov Fas Lis Xais tsis lees txhaum. Lawv pheej nyob ua neeg muab hlob. Lawv kheev lam pom tias lawv muaj txhaum, ces Tswv Ntuj yuav zoo siab, lawv yuav ua kom Tswv Ntuj zoo siab xws li tus tswv pawg yaj zoo siab vim tus yaj ploj rov qab los lawm. Yog ib tug Fas Lis Xais lees pom nws qhov txhaum muab hlob mas Tswv Ntuj yuav zoo siab tas nrho rau nws.
Kwv tij, nej mloog zaj txhais hais txog tus yaj ploj no nej puas xav tias nej yog tus neeg muaj txhaum mus taug kev ploj nyob deb ntawm Tswv Ntuj. Los nej puas xav tias nej nyob hauv 99 tus siab dawb siab huv tsis txav mus deb ntawm Tswv Ntuj ?
Kwv tij, peb yuav ua tib zoo tsom peb lub siab, peb thiaj pom tias peb txhaum ntau zaus rau kev nyiam Tswv Ntuj thiab hlub neeg. Peb lees tias peb yog ib co neeg txhaum niaj hnub tig rov los cuag Tswv Ntuj, ces peb ua kom Tswv Ntuj zoo siab rau peb xws li tus tswv yaj zoo siab rau nws tus yaj ploj rov los lawm.
2. Zaj paj lug txog lub txiaj nyiag poob, tus tswv nrhiav tau nws lub txiaj (LK 15: 8-10).
Kwv tij, lub caij Yes Xus tshaj nws lub Moo Zoo, cov neeg tuaj mloog nws feem ntau yog cov neeg pluag tsis muaj nyiaj ntau. Yog lawv ua poob ib lub txiaj xwb mas twb yog poob loj kawg. Tus poj niam poob ib lub txiaj nyiag mas nws mob siab nrhiav tseev kom tau.
Kwv tij, peb sawv daws muaj nqi nyob ntawm Tswv Ntuj xub ntiag. Yog peb txav mus deb ntawm Tswv Ntuj, tsis mloog nws thawj los lus qhia mas peb txhob xav tias Tswv Ntuj tsis liam faj quav ntsej rau. Yog peb ua ib co neeg tsis nco txog Tswv Ntuj los txhob txwm ua tej yam Tswv Ntuj tsis nyiam mas peb zoo li nws ib lub txiaj nyiag ploj. Tswv Ntuj ua xws li tus poj niam taws teeb thiab cheb tsev kom tau nws lub txiaj nyiag. Tswv Ntuj tsis ua nchav nrhiav peb kom rov los, tab sis nws yeej ua ntau yam tshoj peb kom peb rov los nrog nws, mloog nws, nyiam nws.
Peb tau txav mus deb ntawm nws, peb txhob xav tias Tswv Ntuj ntxub peb, yuav muaj txim rau peb. Hos yog peb mloog nws lus suab tshoj peb mas nws zoo siab tas nrho rau peb xws li tus poj niam nrhiav tau nws lub txiaj nyiag.
Kwv tij, yog peb xav ua kom Twv Ntuj zoo siab mas peb niaj hnub rov qab los cuag nws mog ! Txhob nyob deb ntawm Tswv Ntuj mog ! Txhob nyob deb ntawm Yes Xus mog !
3. Zaj paj lug txog tus tub rov los nrog leej txiv nyob (LK 15: 11-32).
Kwv tij sawv daws, zaj no txhais tsis nyuaj. Leej txiv yog Tswv Ntuj. Tus tub ntxawg yog tus neeg ncaim ntawm Tswv Ntuj. Yog tus neeg mus ua nws lub neej txhaum. Yog yus, tus xav ua neeg twj lij, tsis kam zwm rau Leej Txiv Tswv Ntuj.
Yus mus ua yus lub neej nyob deb ntawm Tswv Ntuj mas Tswv Ntuj tsis yuam yus kom yus nyob ze Tswv Ntuj.
Zoo li leej txiv nyob hauv zaj txhais. Leej txiv tsis cem, tsis muab nws tus tub kaw. Leej txiv tu siab, tab sis nws cia nws tus tub mus ua nws lub neej nyob deb deb.
Leej tub thiaj mus ua nws lub neej tsis tsim txiaj. Ib yam yus tsis kam mloog Tswv Ntuj, tsis kam mloog Yes Xus cov lus. Yus ua tas puas tsav yam txhaum raws li yus lub siab ntshaw.
Tab sis yeej muaj ib hnub yus pom dheev tias yus lub neej tsis mus tshwm rau qhov twg. Yus tsis hlub leej twg, yus tsuas mloog yus tib leeg, tsis muaj leej twg hlub yus thiab. Yus lub siab pluag zuj zus. Yus rov dhuav txog yus vim yus tsis muaj ib txog kev thoob tsib. Yus tsuas mloog yus lub ces xwb.
Ces yus rov nco txog lub caij yus niaj hnub hnov Yes Xus cov lus qhia txoj kev ci ntsa rau yus. Yus xav tias yus puas rov mus cuag Leej Txiv Tswv Ntuj ? Tswv Ntuj puas yuav txais yus ? Yus tau thuam nws tiag !
Yus lub neej tam sis no qiav dhau. Yus yuav ua ib siab rov los thov Leej Txiv Tswv Ntuj hauv yus nruab siab.
Yus rov los cuag Leej Txiv Tswv Ntuj, tsis tas yuav sawv kev mus qhov twg. Tswv Ntuj nyob ze yus mus li. Yus lub tswv yim tau txav mus deb ntawm Tswv Ntuj zaj tswv yim. Tab sis Tswv Ntuj tsis tau txav mus nyob deb ntawm yus. Tswv Ntuj tseem nyob ze yus tos saib yus puas yuav nco txog nws, yus puas yuav hais ib lo lus rau nws.
Yog zoo li leej txiv nyob hauv zaj txhais : leej txiv pom nws tus tub nyob deb rov los, leej txiv khuv leej nws tus tub, nws khiav mus puag nkaus nws tus tub caj dab, nyiam nws, nwj nws tus tub.
Leej Txiv Tswv Ntuj pom hauv kuv nruab siab, nws pom tias kuv lub siab rov nco txog nws; leej Txiv Tswv Ntuj tsis chib yeej rau kuv tau ncaim ntawm nws ntev hli los ntev xyoo. Leej Txiv Tswv Ntuj hais ib co lus zoo rau hauv kuv nruab siab. Nws nwj kuv lub siab, nws ua kom kuv lub siab kub lug. Leej Txiv zoo siab pom kuv rov qab los mloog nws lub suab. Nws hais rau kuv tias :
“Koj twb tuag lawm, nyem no koj rov muaj txoj sia. Koj twb ploj lawm, nyem no rov tau ntsib koj.”
Leej Txiv xav pub nws rooj qav rau kuv noj. Leej Txiv xav pub nws Leej Tub Yes Xus lub Cev rau kuv noj thiab xav pub nws Leej Tub Yes Xus cov Ntshav rau kuv haus. Leej Txiv Tswv Ntuj zoo siab tas nrho, nws pub nws tej txiaj ntsim rau kuv lub siab xws li leej txiv nyob hauv zaj txhais muab lub tsho zoo nkauj tshaj rau nws tus tub ntxawg hnav thiab muab ntiv nplhaib los ntxig rau tub ntxawg ntiv tes.
Kwv tij sawv daws, peb tsoom neeg ntseeg txog Yes Xus hais txog txoj kev ua txhaum ntau, tab sis yog vim peb yeej ua txhaum ntau tiag. Peb tso siab tias Tswv Ntuj nyiam zam txhaum, Tswv Ntuj tos nraim cov neeg txhaum kom lawv rov los cuag nws. Nws twb tau xa nws Leej Tub Yes Xus tuaj ntxuav peb cov txim txhaum nyob saum ntoo cuam. Peb tso siab rau Leej Txiv Tswv Ntuj siab zoo, hlub cov neeg txhaum.