Tus sau: TP. Nyiaj Pov (Tim 5 lub 3 hlis 1997)
Kwv tij, Yes Xus tsis caiv hnub xya, tsis yog vim nws xav txhob txwm hnyos cov Fas Lis Xais thiab cov Hes Los Dias. Yes Xus yog ib tug neeg Yus Das zoo li lawv. Hnub Xas Npas Tos Yes Xus mloog Mais Xes txoj cai. Nws mus nrog lawv teev Ntuj thiab txais Tswv Ntuj lo lus nyob hauv lub Tsev Txoos.
Tab sis Yes Xus ntseeg tsis tau tias Tswv Ntuj tsis kheev kho ib tug neeg mob hnub Xas Npas Tos. Tab yog ib tug yaj poob hauv ib lub qhov Hnub Xas Npas Tos mas Tswv Ntuj kheev kom yus mus cawm tus yaj.
Yes Xus nug cov Fas Lis Xais tias : “Ntuj puas kheev cawm ib txog sia hnub Xas Npas Tos.”
Lawv nyob twj ywm. Lawv tsis kam teb, vim muaj ib co pej xeem hauv lub tsev txoos, lawv xav tib zag tswv yim xws li Yes Xus.
Yes Xus ib txhij npau taws thiab tu siab, vim lawv kaw lawv lub siab.
Nws cia li hais rau tus neeg qhuav tes tias : “Koj tsa tes saib !”
Tus neeg tsa hlo tes.
Yes Xus hlub tus neeg raug kev mob, nws thiaj tsis caiv xws li cov Fas Lis Xais qhia kom sawv daws caiv.
Cov Fas Lis Xais nrog cov Hes Los Dias tuav xam saib yuav ua zoo li cas muab Yes Xus tua. Lawv tsuas pom tias Yes Xus qhia tsoom pej xeem kom lawv coj Mais Xes txoj cai txawv txoj kev lawv qhia. Lawv tsis kam tuav xam saib txoj kev Yes Xus qhia puas xis Tswv Ntuj lub siab zoo thiab puas phim txoj kev hlub neeg. Lawv tsuas pom tias yog Yes Xus niaj hnub qhia tsoom pej xeem ntxiv mus, mas tshuav tsis ntev tsoom pej xeem yuav tsis mloog lawv.
Cov Fas Lis Xais thiab cov Hes Los Dias xav muab Yes Xus tua.
Tab sis tsoom pej xeem siab ncaj, tsoom pej xeem txom nyem, tsoom pej xeem tsis muaj hwj chim lawv xav dab tsi txog Yes Xus ?
Kwv tij, cov neeg muab hlob tsis nyiam Yes Xus, lawv xav muab nws tua. Tab sis tsoom pej xeem raug kev txom nyem los cov nyob hauv kev khwv mas lawv sawv daws xav pom Yes Xus, xav mloog nws cov lus ntuas, xav khaub zig Yes Xus.
Tab txawm yog cov neeg raug cov dab tsis huv, thaum lawv pom Yes Xus, lawv pe, lawv zeem Yes Xus li no : “Koj yog Tswv Ntuj Leej Tub !”
Tsuas kawg yog cov neeg muab hlob ces lawv thiaj tsis kam zeem Yes Xus yog tus tuaj ntawm Tswv Ntuj tuaj.
Tau 3 xyoo ua ntej no kuv nyob Suav teb. Muaj ib tug tub tseem hwv coj kuv mus xyuas ib lub zos ntseeg txog Yes Xus . Nws chaws mus hauv lawv lub tsev teev Ntuj saib kuv ua dab tsi thiab hais cov lus twg rau cov neeg ntseeg. Hnub ntawd, tus tub tseem hwv koom tshaj ntawd nug kuv tias : “ Ua cas nyob hauv nej lub zos no pom cov duab yog ib tug neeg dai ntawm ib tug ntoo ?” Kuv piav rau nws tias tus neeg ntawd yog Yes Xus uas peb teev hawm nws. Nws nug ntxiv tias : “Vim li cas nws tuag zoo li ntawd ?” Kuv teb tias : “Yog vim nws hlub cov neeg me, hlub tsoom pej xeem. Tsoom pej xeem thiaj nyiam nws. Tab sis cov nom muab hlob tsis xav kom tsoom pej xeem raws nws qab ces lawv thiaj muab Yes Xus tua zoo li ntawd.”
Tsoom kwv tij Hmoob, yog Yes Xus rov tuaj tshaj nws cov lus nyob hauv nej cov zos pem roob nram hav mas nej yuav nyiam nws, vim nej tab tom yog cov neeg nws nyiam. Yog nej hnov luag hais tias Yes Xus tuaj txog lub zos nyob deb ntawm nej lub zos ib hnub kev los ob hnuv kev mas nej yuav sawv tsees rau siab mus txog lub zos ntawd. Ntshai nej tseem yuav xav raws nws qab ob hnub tej. Vim nej xav mloog nws cov lus, xav nyob ze ntawm nws ob peb hnub.
Kwv tij, Yes Xus tus kheej tsis tuaj txog nej zos. Tab sis nws cov lus tuaj txog nej lawm. Lub suab uas nej hnov tsis yog nws lub suab. Tab sis yog nej qhib nej lub siab los mloog nws cov lus tuaj txoj nej no mas nej lub tswv yim yuav npuab Yes Xus lub.
Kwv tij, nej txhob hais tias : “Kheev lam yog Yes Xus tuaj xyuas peb lub zos mas peb yuav ntseeg nws cov lus, peb yuav txiav siab ua nws cov thwj tim.”
Kwv tij, niaj hnub nej hnov Yes Xus cov lus tuaj txog nej.
Yog nej tsis kam txais nws cov lus mas tab txawm nws lub cev nqaij tuaj txog nej mas nej yuav tsis quav ntsej rau.
Yog nej tsis kam qhib nej lub siab rau nws chaws los nyob hauv nej lub siab mas nws chaws los nyob hauv nej tsis tau.
Kwv tij, nej thov kom Yes Xus pub nws lub txiaj ntsim pab nej tso siab rau nws ! Yes Xus nyiam nej. Nej nyiam nws mog !