Hnub Chiv tim 29 lub 6 hli tas los yog hnub hwm Leej Ntshiab Pob Zeb thiab Leej Ntshiab Paj Lug, mas Vaj Qhia ua Tswv Cuab coj lub Txoos Txi Ntuj nyob hauv Leej Ntshiab Pob Zeb lub Tuam Tsev Teev Ntuj, ces Vaj Qhia nthuav Tswv Ntuj Lo Lus li no tias tab txawm Leej Ntshiab Pob Zeb thiab Leej Ntshiab Paj Lug lub keeb yuav sib txawv li xib tes thiab qaum tes, tsis kav Huab Tais Yes Xus hu nkawd los ua tib txog hauj lwm; yog ua tim khawv txog nkawd kev ntseeg txog Leej Pleev, yog li mas peb thiaj pom tias nkawd txaus siab tuag kom tau tshaj lub Moo Zoo.
Leej Ntshiab Pob Zeb nws lub qub npe hu ua Xis Moos, nws yog neeg puav ntses nyob Nkas Lis Lais teb; ntawm Leej Ntshiab Paj Lug, nws lub npe qub yog Xauv, nws yog ib tug Fas Lis Xais kawm ntawv siab. Pob Zeb tso txhua yam pov tseg, ces nws raws Huab Tais Yes Xus mus, ntawm Paj Lug mas ua ntej yuav ntsib Huab Tais Yes Xus mas nws hiam cov raws Huab Tais Yes Xus qab.
Muaj ntau zaus Pob Zeb thiab Paj Lug tsis sib haum; yam li Paj Lug sau nyob hauv tsab ntawv xa mus rau cov ntseeg nyob Nkas Las Tias li no tias “Thaum Pob Zeb tuaj nram As Nthias Kias, kuv tau tab meeg tiv nws vim nws yuam kev” (NLT 2: 11).
Yog li Leej Ntshiab Pob Zeb thiab Leej Ntshiab Paj Lug lub neej thiaj zoo qhia peb tias tab txawm peb lub suab sib txawv, peb tus yam ntxwv sib txawv, peb kev ua neej sib txawv, peb lub tswv yim sib txawv; tsis kav Tswv Ntuj hu peb los sib fim nyob hauv Leej Ntuj Plig Ntshiab. Li ntawd, muaj ntau zaus peb sawv daws thiaj muaj lus hais tsis sib haum, tab sis tej ntawd tsis ua chaw khuam rau peb kom ua lub neej sib haum xeeb tsis tau.
Leej Ntshiab Aus Nkus tau hais txog nkawd zoo li no tias “Peb ua ntees hwm Leej Ntshiab Pob Zeb thiab Leej Ntshiab Paj Lug kev txom nyem nyob hauv tib hnub, mas txhais tau tias nkawd ob leeg koom siab ua ib tug. Txawm nkawd tsis yog tuag tib hnub, los nkawd tseem koom ua ke tau.”
Vaj Qhia Les Os 14 hais ntxiv tias nyob hauv lub neej ua neeg ntseeg mas ntau zaus peb niaj hnub ua lub neej zoo li qhov qub, ces peb tsis nco qab txhawb txhim kho peb lub neej sab hauv. Leej Ntshiab Pob Zeb thiab Leej Ntshiab Paj Lug, nkawd lub neej ua lub zog thiab peb kom nrhiav tej txoj hau kev tshaj Ntuj Lus tshiab. Lub ntsiab lus hauv cov lus no yog nyob hauv Huab Tais Yes Xus lo lus nug cov thwj tim tias “Nej ne, nej xav tias kuv yog leej twg?” (MT 16: 15).
Niaj hnub peb yuav nco txog Huab Tais Yes Xus lo lus nug cov thwj tim li no, raws li Vaj Qhia Fas Ntshis Kus hais tsis tseg tias “Yog peb tsis xav kom txoj kev ntseeg txog Yes Xus no ploj mus, mas peb yuav tau hla kom dhau lub siab ntseeg nkees thiab theem cia. (a tired and stagnant faith). Peb yuav niaj hnub rov nug tus kheej tias “Hnub no kuv saib Huab Tais Yes Xus yog leej twg?”
Tom qab lub Txoos Txi Ntuj lawm, Vaj Qhia Les Os 14 tawm los coj tsoom ntseeg teev Ntuj raws zaj tus Tshiab xa xov (Angelus) thiab ntuas sawv daws zoo li no “Hnub no lub Koom Txoos nyob Los Mas ua lub ntees loj vim tias lub Koom Txoos nyob Los Mas txhim nyob saum Leej Ntshiab Pob Zeb thiab Leej Ntshiab Paj Lug lub ntxa. Nkawd thiab cov tuag ua tim khawv lawv cov ntshav ntws los yug lub Koom Txoos kom hlob loj. Yog li mas lub Koom Txoos thiaj muaj ib lo lus hais tias ‘Ecumenismo del Sangue’ txhais tias ‘Kev sib fim hauv cov ntshav’; yog kev koom ua ib tug ntawm cov Koom Txoos ntseeg txog Yes Xus, txawm tias tseem tsis tau txhij thiab tsheej xeeb.” Yog li ntawd, hnub no Vaj Qhia Les Os 14 thiaj hais tias Tswv Ntuj tus Tub Txib tuav txoj kab xwm Tswv Qhia nyob Los Mas txoj hauj lwm yog tsob hwb kev sib koom ua ib tug. Qhov no yog Vaj Qhia lub luag hauj lwm.
Vaj Qhia hais ntxiv tias cov ntseeg sawv daws saib Leej Ntshiab Pob Zeb thiab Leej Ntshiab Paj Lug yog ob tug loj thiab tseem ceeb tshaj, mas tsis yog vim nkawd zoo tshaj, tab sis yog vim nkawd muaj lub siab zam loj.
Huab Tais Yes Xus yog lub tseem pob zeb, nws tau hais txog Pob Zeb tias yog lub pob zeb cov txhim tsev muab pov tseg, tab sis Tswv Ntuj yuav muab lub pob zeb no hloov ua lub pob zeb txheem ncov ruv tsev. Qhov no yog Pob Zeb yuav ua tus loj nyob hauv sawv daws. Ib yam li Leej Ntshiab Pob Zeb thiab Leej Ntshiab Paj Lug lub Tuam Tsev Teev Ntuj uas zim txwv no yog qhov nruab nrab hauv lub Koom Txoos, mas thaud thaj tsam no hais tau tias yog thaj tsam tsoom sid saib tsis muaj qab hau. Qhov no qhia tau tias lub Moo Zoo chiv hauv tej qhov sawv daws tsis nco txog tuaj.
Cov raws Huab Tais Yes Xus, mas lawv taug txoj kev txom nyem, yog cov tau txoj hmoov zoo txoj kev. Kev pluag hauv nruab siab, kev ua siab muag siab mos, kev tshaib nqhis txoj kev ncaj cov no puav leej ntsib kev tawm tsam. Txawm li ntawd los, Tswv Ntuj lub koob meej yuav tawm tuaj rau sawv daws pom yog nyob hauv cov kev ntawd. Tswv Ntuj lub koob meej ci ntsa nyob hauv Tswv Ntuj cov phooj ywg thiab Tswv Ntuj lub koob meej yuav ziab lawv kom ua tus neeg ntshiab nyob hauv lawv kev hloov siab tshiab tas mus li.
Ib tug neeg yuav ua tau Leej Ntshiab mas tsis yog vim nws yug los zoo txhij, tab sis vim nws txawj zam rau luag tej. Nyob hauv Ntawv Ntshiab Cog Lus Tshiab thiaj pom tias lawv tsis npog tej yam Leej Ntshiab Pob Zeb thiab Leej Ntshiab Paj Lug tau ua yuam kev, tej yam nkawd hais tsis sib haum, thiab nkawd cov txhaum. Nkawd ua ob tug Leej Ntshiab loj thiab tseem ceeb vim txoj kev zam.
Huab Tais Yes Xus cev tes mus tuav nkawd tes ntau zaus li cas, mas Huab Tais Yes Xus kuj hu peb ntau lwm zoo li ntawd. Yog li mas peb thiaj muaj chaw vam khom tias Tswv Ntuj zam rau peb tas mus li.
Vaj Qhia thov kom cov ntseeg ua tus kws tsim kev sib haum xeeb, sawv daws yuav xub sib haum xeeb nyob hauv sawv daws lub cuab thiab lub zos. Vaj Qhia hais tias “Lub Koom Txoos thiab cov Koom Txoos ncaim lawv yuav sib haum xeeb tau, mas yog sawv daws yuav tau sib zam thiab sib cia siab. Yog tias Huab Tais Yes Xus twb cia siab rau peb tau, mas peb kuj yuav sib cia siab nyob hauv Huab Tais Yes Xus lub npe tau ib yam thiab.” Kawg no Vaj Qhia thov niam Mab Liab, Leej Ntshiab Pob Zeb, thiab Leej Ntshiab Paj Lug pab thov Tswv Ntuj rau lub Koom Txoos kom hloov tau ua lub tsev nyob thiab lub tsev qhia txog kev sib fim nyob hauv lub qab ntuj muaj mob thiab sib tawg no.