Es Les Nas yug hauv yim neeg pluag txom nyem. Xyoo 274 Es Les Nas yuav Koos Taas, mas nkawd muaj ib tug me nyuam yog Koos Taas Tis Nus. Xyoo 292 Es Les Nas thiab Koos Taas sib nrauj. Xyoo 308 Koos Taas tuag, ces Koos Taas Tis Nus thiaj coj nws niam Es Les Nas rov los nrog nws nyob.

 Es Les Nas nyiam Yes Xus tas siab, nws kuj hlub nws tus tub Koos Taas Tis Nus tas ntsws. Es Les Nas pom Koos Taas Tis Nus muab tus xeeb ntxwv tua, mas Es Les Nas xav them txim rau nws tus tub, Es Les Nas thiaj tawm rooj mus nrhiav Yes Xus tus Ntoo Cuam. Thaum ntawd, Es Les Nas muaj 78 xyoo lawm.

  Es Les Nas tuaj txog, nws pom nyob ntawm qhov chaw Yes Xus tuag mas twb muaj tej lub tuam tsev teev dab, muaj ib lub ntsa zeb xov lub nroog Yes Lus Xas Les. Es Les Nas kom lawv rhuav pov tseg tas huv tib si. Thaum lawv rhuav tas puas tsav yam zoo li ntawd, lawv thiaj pom ib lub ncov roob me me, yog lub ncov roob Nkos Nkos Tas. Lawv tseem khawb ntxiv, ces muaj ib hnub lawv pom peb tug ntoo cuam nyob ua ke nyob hauv ib tug kwj.

Tus Tswv Qhia nyob Yes Lus Xas Les xav paub peb tug ntoo cuam ntawd saib Yes Xus tus yog tus twg. Nyob ntawd muaj ib tug poj niam mob mob yuav tuag. Lawv nqa cov ntoo cuam los chwv tus poj niam. Ob tug ntoo cuam ua ntej tsis ua dab tsi, tus ntoo cuam tim peb nyuam qhuav chwv kiag tus poj niam ntawd xwb mas tam sim ntawd nws cia li zoo hlo, ces sawv daws thiaj li paub hais tias tus ntoo cuam ntawd yog Yes Xus tus tiag.

Es Les Nas muab Yes Xus tus Ntoo Cuam faib ua peb ya. Nws xa ib ya mus rau Los Mas, ib ya rau lub nroog Koos Taas Tis Nos Pos Lis, thiab ib ya nyob Yes Lus Xas Les. Es Les Nas ua nws txoj hauj lwm tas, nws rov los nyob hauv Koos Taas Tis Nos Pos Lis.