Hnub chiv tim 20 lub 7 hli no Vaj Qhia Les Os 14 ua Tswv Cuab coj lub Txoos Txi Ntuj nyob hauv lub Tuam Tsev Teev Ntuj As Npas Nos (the Cathedral of Albano), mas Vaj Qhia hais txog ‘kev txais qhua’ (hospitality), ‘kev tsob hwb’ (service), thiab ‘kev mloog’ (listening) tias yog 3 yam keeb cheem tsum (essential element) nyob hauv txoj hauj lwm txhim kev khaub zig Tswv Ntuj thiab luag tej.

Lis piam no yog lis piam tim 3 uas Vaj Qhia tshais chaw tuaj so nyob Kas Tes Nkas Dos Fos, nyob ntawm no muaj lub Tuam Tsev Teev Ntuj As Npas Nos, mas Vaj Qhia Les Os 14 thiaj ua lub Txoos Txi Ntuj hauv Hnub Chiv nyob ntawm no. Lis piam no yog Lis Piam Hnub Chiv 16 caij Nyob Nruab Xyoo, lub Moo Zoo raws li Leej Ntshiab Lus Kas phau ntawv, zaj hais txog Huab Tais Yes Xus mus so hauv Mas Tas thiab Mab Liab nkawd tsev (LK 10: 38-42).

Vaj Qhia hais tias yog peb saib nyob hauv zaj nyeem hauv phau ntawv Hauv Paus thiab lub Moo Zoo hnub no, yuav pom tias Tswv Ntuj Lo Lus xav txhib peb txog kev txais qhua, kev tsob hwb qhua, thiab kev mloog qhua hais.

Nyob hauv phau ntawv Hauv Paus piav txog Has Nplas Has txais 3 tug qhua thiab pam ib pluag mov rau lawv noj. Zaj no pom tias Has Nplas Has ua tus tswv tsev siab zoo, nws xyiv fab luag ntxhi txais cov qhua. Phau ntawv Hauv Paus piav tias hnub ntawd yog lub sij hawm ntuj sov tshaj thaum nruab hnub nrig, tab sis Has Nplas Has lub siab zoo rau cov qhua li no tau hloov hnub sov ntawd ua hnub muaj kev zoo siab, vim tias hnub ntawd ib tug hauv 3 tug qhua tau muab ib lub moo zoo rau Has Nplas Has tias hnub no lub xyoo tom ntej Has Nplas Has poj niam yuav yug tau ib tug tub.

Los txog cov lus hauv Lus Kas Ntawv Moo Zoo, tseem qhia peb tias Tswv Ntuj ua zoo li cas tuaj ntsib peb. Huab Tais Yes Xus ua ib tug qhua tuaj so hauv Mas Tas thiab Mab Liab tsev, vim nkawd yog Huab Tais Yes Xus ib tug phooj ywg zoo.

Nkawd ob viv ncaus txais Huab Tais Yes Xus sib txawv; Mas Tas rau siab ntso lis qav num, Mab Liab rau siab mloog Huas Tais Yes Xus hais lus. Mas Tas hais Huab Tais Yes Xus kom pab hais Mab Liab los pab nws, tab sis Huab Tais Yes Xus hais rau Mas Tas kom xeev tau tias qhov tseem ceeb dua mas yog kev mloog. Txawm li ntawd, Vaj Qhia tsis xav kom sawv daws muab xav tias Mas Tas thiab Mab Liab nkawd ib tug zoo dua ib tug. Qhov Vaj Qhia xav hais rau sawv daws, mas yog qhov tias thaum muaj ib tug qhua tuaj so hauv peb tsev, peb tsum yuav tau tsob hwb lawv thiab mloog lawv lus tham.

Tseev kom peb tuav ob yam hauj lwm no ua ke tau nyob hauv peb lub neej, mas peb tsum tau xub muab kev khaub zig Tswv Ntuj saib ua qhov ua ntej tshaj thiab peb yuav ua raws li peb kev ntseeg qhia kom peb ua. Peb yuav ua lub neej raws li peb kev ntseeg tau, mas peb yuav muab Tswv Ntuj Lo Lus los xav los ntuas peb siab thiab mloog Leej Ntuj Plig Ntshiab tshoj peb. Yog kom peb txawj muab Tswv Ntuj Lo Lus los ntuas siab thiab hnov Leej Ntuj Plig Ntshiab hais lus rau peb, mas peb yuav muab siab rau nyob ntsiag ntsiag thiab thov ntuj, peb tshem yam looj koov peb lub tswv yim pov tseg, kom peb lub tswv yim npuab ntsoov Tswv Ntuj thiab cia Tswv Ntuj hais lus rau peb.

Vaj Qhia ntuas tias qhov no yog qhov cov ntseeg yuav tau txhim kho dua nyob hauv lub neej niaj hnub no. Tshwj xeeb mas yog nyob hauv lub caij ntuj sov uas yog lub sij hawm sawv daws tso hauj lwm tseg, ces sawv daws tawm mus ua si thiab tau sib ntsib, mas yog zoo caij zoo nyoog rau rov txhim kho lub neej ua neeg ntseeg tshiab.

Caij ntuj sov muaj sij hawm ntau rau peb tau txhawj txog lwm tus, muaj sij hawm ntau rau peb tau nrog lwm tus ntaus phooj ywg, muaj sij hawm ntau rau peb tau mloog luag tej hais lus. Txhua yam no yog nthuav peb kev nyiam tawm los rau sawv daws. Yog peb ua li no mas peb muaj feem pab txhim kev thaj yeeb, muaj feem pab cov neeg nyob ib ncig peb kom lawv ntaus tsam yeej kev sib cais pab cais pawg, ces sawv daws rov haum xeeb tau.

Txhua yam no yuav ua tau tiav, mas peb tsum ua siab ntev thiab muab peb lub sij hawm fij rau. Txawm li ntawd, xav kom sawv daws nco tias kev mloog luag lwm tus, thiab tsob hwb luag thiaj yog tib txoj hau kev pab tsim thiab txhawb kev sib khaub zig tau.