Tus sau: TP. Nyiaj Pov (Tim 22 lub 4 hlis 1998)
Cov Yus Das uas lawv nrog Yes Xus yog ib haiv neeg, lawv muaj Phau Ntawv Ntshiab cog qub lus, lawv coj Mais Xes txoj cai. Mais Xes txoj cai kuj qhia tias yus yuav nyiam cov txheeb ze ib yam li yus nyiam yus. Tab sis cov kws txuj uas niaj hnub kawm Mais Xes txoj cai thiab nthuav Mais Xes txoj cai rau tsoom sid coj, lawv sib cav txhais lo lus tias : “cov txheeb ze”. Lawv sib cav tias : “Cov txheeb ze yog cov neeg twg ?”
Tus Thoob Xwm txoj cai thiaj nug Yes Xus tias : “Tsoom txheeb ze kuv yog leej twg ?” Tej tus kws txoj cai hais tias lwm haiv neeg tsis yog tsoom txheeb ze kuv. Tsoom txheeb ze kuv kawg yog haiv neeg Yus Das xwb. Tej tus tseem hais tias : “Cov neeg ntxub kuv tsis yog cov txheeb ze uas kuv yuav tsum nyiam thiab hlub.”
Cov kwv txoj cai xav tswv yim li ntawd, lawv yuam kev. Yes Xus thiaj hais zaj piav txog tus Xas Mas Lias siab zoo. Yes Xus qhia tias cov txheeb ze yus yog leej twg.
Peb tsoom Hmoob feem ntau kuj xav tswv yim zoo li cov kws txoj cai Yus Das. Hmoob feem ntau xav tias kawg yog cov Hmoob xwb thiaj yog cov txheeb ze yus. Cov Nplog, cov Thaib, cov Nyab Laj tsis yog cov txheeb ze uas kuv yuav tsum nyiam thiab hlub. Tab yog nyob hauv cov Hmoob mas tsuas muaj cov kwv tij thiab neej tsa thiaj yog cov uas yus yuav tsum hlub thiab nyiam. Vim Hmoob xav li ntawd coob leej mas peb yuav tsum kawm tias Yes Xus qhia dab tsi nyob hauv zaj piav txog tus Xas Mas Lias siab zoo.
Cov Xas Mas Lias yog ib haiv neeg nyob hauv xeev Nkas Lis Lais thiab xeev Yus Das kis nruab nrab. Cov neeg nyob hauv lub xeev Xas Mas Lias lub keeb yog tib haiv neeg xws li Yus Das : yog haiv neeg His Xas Lais, yog Has Nplas Has cov xeeb ntxwv. Tab sis lawv ncaim ntawm cov Yus Das 900 xyoo ua Yes Xus ntej. Cov Xas Mas Lias thiab cov Yus Das sib ntxub, sib thuam, sib ntaus rog zaum puav.
Tus neeg raug cov tub sab muab nws ntaus sab kawg yog ib tus Yus Das.
Phim tus Leej Choj thiab tus Les Vis yuav hlub tus ntsaj nroo laws da av ntawm ntug kev. Tab sis nkawd pom tus neeg sab, nkawd lug ib sab ntug kev mus lawm. Nkawd twb yog ib co neeg ua kab xwm hauv lub tuam tsev teev Ntuj nyob Yes Lus Xas Les. Nkawd paub Mais Xes txoj cai qhia tias yuav hlub tsoom txheeb ze.
Tab sis nkawd tsis kam xam tias tus neeg raug tub sab lwg yog ib tug txheeb ze yuav tsum hlub.
Tus Xas Mas Lias tuaj txog, nws pom tus neeg sab uas tshuav txoj sia xwb. Nws hlub tus neeg txom nyem. Nws txav los hliv roj hliv cawv rau cov qhov txhab, nws muab qhwv. Nws muab tus neeg raug sab tsaws caij nws tus luj, coj nws mus rau ib lub tsev ntiav. Nws tseem tu tus neeg raug sab ib hmo. Tag kis los, nws muab tau ob lub txiag nyiaj rau tus tswv tsev. Nws hais rau tus tswv tsev ntiav tias : “Koj muab siab rau tu tus neeg ntawd cov qhov txhab. Yog koj siv tshaj ob lub txiag npaum li cas mas thaum kuv rov los kuv mam ntxiv rau koj.” Tus Xas Mas Lias ua zoo heev.
Puag tas tus Thoob Xwm txoj cai nug Yes Xus tias : “Tsoom txheeb ze kuv yog leej twg ?” Nyem no Yes Xus nug tus Thoob Xwm txoj cai tias : “Yog leej twg ua tus txheeb ze rau tus neeg poob hauv cov tub sab tes ?”
Yes Xus tsis kam nrog tus Thoob Xwm txoj cai sib cav tias : “Txoj cai qhia li ub li no.” Yes Xus tshuas nug tias : “Koj ntsib ib tug neeg raug kev txom nyem loj, koj puas yuav pab nws ? Koj puas yuav zoo siab ua tus txheeb ze nws ? Txhob nug tias tus neeg raug sab puas yog tus txheeb ze koj. Hos koj tsuas yuav txaus siab hais li no : “Kuv yuav ua tus txheeb ze nws.”
Kwv tij, yog yus ntsib ib tug neeg tab tom raug txom nyem, yus txhob rov nug yus tias : “Tus ntawd puas nrog kuv yog ib haiv neeg ? Nws puas yog kuv kwv tij los yog neej tsa ? Nws puas coj ib txog kev teev hawm Tswv Ntuj zoo li kuv ? Nws puas yog ib tug tau hlub kuv ib zaug, ces kuv yuav tsum hlub nws ?”
Yes Xus qhuab qhia yus tias : “Koj kav tsij tsuag tsuag ua tus txheeb ze tus neeg txom nyem ! Koj hlub nws mog, thiaj yog qhov uas Tswv Ntuj tos ntawm koj ! Tswv Ntuj coj tus neeg txom nyem rau koj pom nws : ib txwm tsis yog ib tug neeg txheeb ze koj. Tab sis koj zoo siab ua tus txheeb ze nws.
Tus Xas Mas Lias siab zoo tsis tau xaiv tus neeg txheeb ze uas nws yuav nyiam thiab hlub.
Tus Xas Mas Lias siab zoo txais tus neeg uas Ntuj xa tuaj rau nws. Nws thiaj muab nws cov roj thiab nws cov cawv thiab nws cov ntaub los qhwv tus neeg cov qhov txhab. Nws muab nws tus luj rau tus neeg sab caij.
Nws muab nws cov nyiaj los ntiav ib lub txaj rau pw. Nws zov hmo los tu thiab saib tus neeg raug mob. Thaum nws rov qab los nws tseem siv ib lub caij rov tuaj xyuas saib tus neeg cov qhov txhab puas zoo lawm. Tus Xas Mas Lias ua tej ntawd vim nws tsuas mloog nws siab zoo thiab nws saib tias yog Twv Ntuj pub kom nws ntsib tus neeg ntawd.
Tswv Ntuj pub lub txiaj ntsim muaj nqi rau cov neeg zoo siab ua txheeb ze rau tus uas Tswv Ntuj xa tuaj ntsib lawv.
Tau 50 xyoo ua ntej no, muaj ib tug pej kum neeg tuaj nyob ib lub zos Hmoob hauv lub xeev Moos Loob, Los Tsuas teb. Tus pej kum neeg ntawd tsis paub ib lo lus Hmoob, tsis txawj ua noj ua haus xws li Hmoob. Nws tuaj thov ib tug yawg laus Hmoob kom tus yawg laus txais nws los nyob hauv nws tsev. Tus yawg laus zoo siab txais tus pej kum neeg tseem hluas ntawd.
Tus pej kum neeg tsis ntim nyiaj txiag tuaj : tus yawg laus yug tus pej kum neeg hluas ntawd 3 lub hlis, pub ib lub txaj thiab ib co pam tshiab rau nws pw.
Tus pej kum neeg hluas ntawd tseem thov kom tus yawg laus pab nws mus hais rau cov tswv tsev Hmoob hauv lub zos kom lawv pab tus hluas ua ib lub tsev rau nws xws li cov tsev Hmoob. Tus yawg laus tau pab txiav peb ya cav txhav ntseeg los ua thawj 3 tug ncej tsev rau tus pej kum neeg hluas. Nws pab tus hluas kwv peb tug ncej los txog nws tsev. Tseem tos ib hlis ntxiv tus yawg laus Hmoob hu cov txiv neej hauv nws lub zos los sib pab tsa ib lub tsev rau tus pej kum neeg hluab nyob.
Sawv daws puav leej pab tus hluas dawb xwb.
Kwv tij sawv daws, ntshai yog Tswv Ntuj tuaj tshoj tus yawg laus Hmoob, tus yawg laus tsis yig, nws mloog Tswv Ntuj, nws ua tus txheeb ze rau tus pej kum neeg hluas ntawd, pab nws dawb zoo li yog nws leej tub. Tos peb xyoos ntxiv Tswv Ntuj pub txiaj ntsim los pauv rau tus yawg laus. Tus yawg laus nrog nws tsev neeg txais lub Cim Ntxuav los ua thawj yim Hmoob teev hawm Yes Xus nyob hauv nws lub teb chaws. Nyem no muaj ntau puas ntau txhiab yim Hmoob txais lub Cim Ntxuav. Vim tus yawg laus ua xws li tus Xas Mas Lias siab zoo, nws thiaj txais tus pej kum neeg uas Tswv Ntuj xa tuaj ntsib nws.
Kwv tij, peb xyaum yoog raws li tus Xas Mas Lias zoo tus piv txwv mas Tswv Ntuj tsis qia dub, nws yuav pub paj tshab tsim txiaj los pauv rau peb.