Mas Tais qhia Yes Xus lub keeb vim nws sau lub Moo Zoo rau cov Yus Das. Cov Yus Das hwm Has Nplas Has ua lawv tus yawg koob xub tau txais lo lus foom hmoov zoo ntawm Huab Tais Tswv Ntuj los. Cov Yus Das tso siab tias tus yuav cawm lub ntiaj teb yog Has Nplas Has ib tug xeeb ntxwv. Mas Tais thiaj xav qhia cov Yus Das tias Yes Xus yog Has Nplas Has xeeb ntxwv tiag, ces cov Yus Das yuav ntseeg txog Yes Xus sai. Mas Tais thiaj sau tias ‘Yes Xus yog Has Nplas Has leej tub’. Cov Yus Das kuj ntseeg tias tus cawm His Xas Lais tuaj ntawm tus vaj Das Vis tsev neeg tuaj, ces lawv hu tus cawm His Xas Lais ua ‘Das Vis leej tub’. Mas Tais txhob txwm tsis hais tias Yos Xes yug Yes Xus vim Yos Xes tsis yog Yes Xus tseem txiv, Mas Tais thiaj sau tias Mab Liab yug Yes Xus.
Txij Has Nplas Has los txog Yes Xus ntshai muaj 75 tiam, tab sis Mas Tais sau hais tias muaj 42 tiam neeg, thiab faib ua 3 txheej, ib txheej muaj 14 tiam neeg. Mas Tais muab faib ua 3 txheej 14 tiam neeg vim tias cov Yus Das saib tus zauv 3 yog tus zauv hais txog qhov kawg nkaus los yog tshaj plaws. Li ntawd 3 txheej thiaj muaj ib lub ntsiab hais tias txog lub sij hawm kawg nkaus lawm uas Tswv Ntuj yuav ua raws li cov lus tau nrog Has Nplas Has, Das Vis, thiab cov Yus Das cog lus. Das Vis lub npe yog sau muaj 3 tug txwm ntawv Hes Nplaws (דָּוִד); ib tug txawm ntawv piv tau rau ib tug zauv, ces lub npe Das Vis piv tau rau tus zauv 4+6+4 yog 14. Tswv Ntuj cog lus rau Das Vis tias yuav pub kom Das Vis ib tug xeeb ntxwv ua vaj mus li, tus ntawd yog Yes Xus. Yes Xus yog Tswv Ntuj cov lus cog kawg nkaus uas pub rau Das Vis.
Txheej ua ntej; yog txij Has Nplas Has los txog tus vaj Das Vis. Txheej no txhib cov Yus Das kom nco txog lawv lub keeb thiab lawv kev ntseeg vim Has Nplas Has yog tus piv txwv hais txog ‘lub siab ntseeg’ (Faith).
Txheej nrab; yog txij tus vaj Das Vis los txog lub caij nyob txim nyob Npas Npis Los. Txheej no txhib cov Yus Das kom nco tias tos lawv raug nplua vim lawv tsis mloog Tswv Ntuj, thiab tseem txhib kom cov Yus Das rov nyiam Tswv Ntuj dua vim Das Vis lub npe txhais tias ‘nyiam’, ces Das Vis thiaj yog tus piv txwv hais txog ‘kev nyiam’ (Love).
Txheej tom qab; yog txij lub caij cov Yus Das nyob Npas Npis Los los xaus rau Yes Xus tus txhiv cov Yus Das ntawm lawv cov txhaum. Txheej no txhib cov Yus Das kom txhob tag kev tso siab rau Tswv Ntuj vim Tswv Ntuj nco txog Tswv Ntuj cov lus cog, ces Tswv Ntuj xa Leej Tub tuaj cawm cov neeg muaj ‘kev tso siab’ (Hope) rau nws.
Nyob hauv cov npe hais txog Yes Xus lub keeb muaj 5 lub npe yog poj niam, li no; Thas Mas, Las Has, Luv, Us Lis tus poj niam, thiab Mab Liab. Plaub tug hauv lawv cov no tsis yog haiv His Xas Lais. Nyob hauv lawv plaub tug no, muaj peb tug tau ua tus yam ntxwv tsis zoo; Thas Mas rov yuav nws txiv yawg, Las Has ua poj ntiav nyob hauv lub tsheej Yes Lis Kos, Us Lis poj niam nyiag deev Das Vis. Tos Mas Tais sau txog lawv cov no, vim Mas Tais xav qhia cov Yus Das tias tab txawm tus pej kum neeg los tus neeg muaj txhaum, Tswv Ntuj yeej xaiv los ua Tswv Ntuj txoj hauj lwm. Thiab vim Mas Tais tseem xav ntuas cov Yus Das kom nco tias Yes Xus tuaj nrhiav cov neeg txhaum.
Nyob hauv Mas Tais cov lus no, tseem muaj 2-3 lo lus peb yuav tau paub txog; yog lo lus tias Yes Xus, Pleev, Yos Xes, Mab Liab.
Lo lus ‘Yes Xus’ lus As Las Mais hais tias ‘Yos Hos Suas’ txhais tias ‘Tswv Ntuj cawm’. Lo lus ‘Pleev’ yog ntxeev los ntawm lo lus Hes Nplaws tias ‘Mes Xias’ (Messiah) thiab lo lus Hes Las tias ‘Khes Tos’ (Christ) txhais tias ‘Tus tau txais roj pleev los ua vaj, los yog ua Leej Choj’. Li ntawd,thaum peb hais tias ‘Yes Xus Pleev’ (Jesus Christ), mas peb hwm Yes Xus ua ‘Vaj’ (King) thiab ua ‘Leej Choj’ (Priest), peb kuj nco tias ‘Yes Xus yog tus cawm lub qab ntuj neeg’.
‘Yos Xes’ lus Hes Nplaws hais tias ‘Yosep’ txhais tias ‘Tswv Ntuj ntxiv rau’. ‘Mab Liab’ lus Hes Nplaws hais tias ‘Maryam’ yog ncau ntawm cov Hais Nkws Tos lo lus ‘Mri’ txhais tias ‘Nyiam’. Thaum hais ua xeem lus Hes Las, mas yuav hais tias ‘Maria’.