(1XM 8: 4-7, 10-22; MK 2: 1-12)
Hnub no nyob hauv thawj zaj nyeem, coj peb hla mus rau ntu cov His Xas Lais tuaj thov kom Xas Muas tsa ib tug vaj los kav lawv.
Thaum ntawd, cov His Xas Lais lawv muaj 12 xeem, lawv muaj lawv cov Txwj Laus coj lawv. Cov His Xas Lais pom tias cov haiv neeg nyob ib ncig, lawv muaj lawv cov vaj kav lawv, cov vaj coj lawv ntaus tsam, mas lawv muaj zog, lawv ua tau ib lub teb chaws. Li ntawd, cov His Xas Lais thiaj xav muaj vaj xws li luag lwm haiv.
Ib txwm los cov His Xas Lais saib Tswv Ntuj tib tug xwb yog lawv tus vaj, hnub no cov His Xas Lais taij ib tug vaj yog neeg, mas Xas Muas thiaj tsis txaus siab. Tab sis Tswv Ntuj hais rau Xas Muas kom ua raws li tsoom sid taij. Xas Muas txhob npau taws, tus lawv yuav tso pov tseg tsis yog Xas Muas, tus lawv yuav tso mas yog Tswv Ntuj.
Tswv Ntuj hais li ntawd tas, Xas Muas thiaj qhia tias yog lawv muaj vaj, mas tus vaj yuav tswj lawv xws li tus tswv tswj nws cov qhev, tus vaj hais dab tsi mas lawv yuav tau ua raws. Cov His Xas Lais yeem cia lawv tus vaj ua tswv tswj lawv, ces Xas Muas thiaj li yuav pib tsa ib tug vaj rau cov His Xas Lais.
Ib txhiab xyoo tom qab, lub zim txwv Huab Tais Yes Xus tuaj tshaj lub Moo Zoo nyob Kas Fas Naus, muaj tsoom neeg tuaj mloog nws coob, ces plaub tus neeg kwv ib tus neeg tuag ceg tuaj rau Huab Tais Yes Xus kho. Lawv pom tias tsis muaj chaw txaus lawv coj tus tuag ceg chaws mus hauv Huab Tais Yes Xus, lawv thiaj tho lub ruv tsev tso tus tuag ceg mus rau ntawm Huab Tais Yes Xus xub ntiag.
Nyob teb chaws Yus Das, lawv ua tsev, mas lawv muab tej tus nqaj thiab ib co ceg ntoo thiab ib co av nplaum nplaum los ua ib lub ru pheeb me ntsis kom xwv cov dej nag ntws saud. Plaub tus neeg nqa tus tuag ceg, lawv mob siab thov kom Huab Tais Yes Xus kho lawv tus neeg, mas lawv thiaj li tho ib lub qhov ntawm lub ruv kom txaus tso tus tuag ceg nqes los hauv lub tsev. Ntshai cov neeg hauv tsev cem, tab sis 4 tug neeg tsis mloog, lawv tseev kom thov Huab Tais Yes Xus kho lawv tus neeg tuag ceg.
Ntawm Huab Tais Yes Xus, nws xav li cas?
Mas Kos piav tias Huab Tais Yes Xus pom lawv ntseeg, lawv tso siab rau nws, mas nws tsis nrog luag yws, tsis cem 4 tug neeg ntawd. Huab Tais Yes Xus tsuas pom lawv lub siab siab tias Huab Tais Yes Xus muaj hwj huam tuaj ntawm Tswv Ntuj tuaj, Huab Tais Yes Xus yuav kho tau lawv tus neeg tuag ceg kom zoo hlo.
Qhov loj nyob hauv zaj no yog cov lus Huab Tais Yes Xus tau hais rau cov neeg sawv nyob vij nws, thiab yog cov lus Huab Tais Yes Xus hais rau tus neeg tuag ceg.
Huab Tais Yes Xus hais zoo li no tias “Me tub, koj cov txhaum daws tas lawm.”
Vim li cas Huab Tais Yes Xus thiaj hais lo lus ntawd?
Tus tuag ceg tsuas xav kom Huab Tais Yes Xus hais ib co lus kho nws kom nws sawv tau xwb! Tus tuag ceg yeej tos cov lus ntawd tiag, tab sis Huab Tais Yes Xus xav qhia tej yam tob rau cov neeg nyob puv hauv lub tsev thiab sib txiv nyob sab nraud. Huab Taus Yes Xus pom tias nyob hauv cov neeg nyob ze ntawm nws muaj ib co Kws Ntawv Ntshiab uas lawv niaj hnub nyas ntshis Huab Tais Yes Xus thiab hais tej lo lus tiv nws. Huab Tais Yes Xus paub tias lawv tsis nyiam nws thiab lawv tsis kam zeem tias nws yog ib tug tuaj ntawm Tswv Ntuj. Huab Tais Yes Xus paub tias nyob hauv lawv siab lawv tsuas xav li no “Tus Yes Xus ntawd thuam Tswv Ntuj! Leej twg yuav daws txhaum tau? Tsuas kawg yog Tswv Ntuj tib leeg xwb!”
Huab Tais Yes Xus thiaj ncaj qha hais ob yam rau cov Kws Ntawv Ntshiab:
1) Huab Tais Yes Xus rov hu nws ua ‘Leej Neeg tus Tub’,
2) Huab Tais Yes Xus ua kom sawv daws pom tseeb tias nws muaj peev xwm kho tau neeg lub cev thiab neeg lub siab kom zoo tuaj.
Cov Kws Ntawv Ntshiab yog cov neeg tau kawm phau Ntawv Ntshiab thiab kawm Mais Xes txoj cai ntau. Lawv paub tias 200 xyoo ua ntej no muaj ib tug Yus Das tau sau ib phau ntawv hu ua ‘Ntawv Das Nias’ hais txog ib tug neeg hu ua ‘Leej Neeg tus Tub.’ Phau Ntawv Das Nias hais tias Leej Neeg tus Tub yog ib tug tuaj ntawm Tswv Ntuj thiab nws muaj peev xwm ua hwj huam xws li Tswv Ntuj pub.
Huab Tais Yes Xus rov hu nws ua ‘Leej Neeg tus Tub’, Huab Tais Yes Xus hais rau cov Kws Ntawv Ntshiab tias “Kuv uas yog Leej Neeg tus Tub, kuv muaj peev xwm daws txhaum tau!” Huab Tais Yes Xus hais li ntawd rau lawv, ces lawv paub tias Huab Tais Yes Xus khav tias nws muaj lub peev xwm loj ib yam li Tswv Ntuj, vim nws daws txhaum tau.
Cov Kws Ntawv Ntshiab hnov Huab Tais Yes Xus hais cov lus ntawd, mas lawv tsis txais nws cov lus. Lawv muab lawv lub siab kaw nti, lawv pib xav hauv nruab siab tias kawg yuav tsum muab Huab Tais Yes Xus tua, mas zeej tsoom thiaj tsis raws Huab Tais Yes Xus.
Lo lus tim ob Huab Tais Yes Xus xav qhia yog qhov tias nws muaj peev xwm kho tau neeg lub cev thiab neeg lub siab kom zoo tuaj.
Cov ntxub Huab Tais Yes Xus, lawv pom Huab Tais Yes Xus ua hwj huam kho cov neeg mob ntau zaus. Tas zeej tsoom kuj pom Huab Tais Yes Xus kho cov neeg mob kom zoo hlo. Tsoom pej xeem xav tias Huab Tais Yes Xus kho tau cov neeg mob kom zoo, yog vim Tswv Ntuj pub nws lub hwj huam rau kom Huab Tais Yes Xus ua tau, ces lawv ua Tswv Ntuj tsaug. Tab sis cov hlob, xws li cov Kws Ntawv Ntshiab, lawv hais tias Huab Tais Yes Xus kho tau cov neeg mob vim nws hu txog dab los pab nws; tsis yog Tswv Ntuj pab nws, vim nws rov muab nws los piv rau Tswv Ntuj. Lawv hais tias Huab Tais Yes Xus yog tsoom dab phem ib tug neeg.
Huab Tais Yes Xus thiaj hais rau cov Kws Ntawv Ntshiab tias “Kuv muaj peev xwm kho tus neeg tuag ceg ntawd, ib yam li kuv muaj peev xwm daws txhaum. Txoj hauj lwm uas Tswv Ntuj muab rau kuv yog hlub neeg, yog pab neeg, yog cawm neeg, yog npo neeg lub cev ntawm kev raug txom nyem thiab npo neeg lub siab ntawm nws cov txhaum.”
Huab Tais Yes Xus xav ua kom cov Kws Ntawv Ntshiab pom tias nws muaj lub hwj huam kho neeg lub siab thiab lub cev, ces Huab Tais Yes Xus hais rau tus neeg tuag ceg tias “Nqa koj daim lev rov mus tsev mog!” Tus tuag ceg cia li sawv tsees, nqa zoj daim lev hla ntawm sawv daws xub ntiag.
Cov Kws Ntawv Ntshiab puas qhib lawv lub siab tig los ntseeg tias Huab Tais Yes Xus yog Tswv Ntuj tus neeg?
Lawv tsis qhib, muaj ib hnub lawv yuav muab Huab Tais Yes Xus tua. Tab sis tsoom pej xeem siab ncaj dua cov kawm txuj, lawv cav txog Tswv Ntuj tias “Peb tsis tau pom dua tej yam zoo li no ib zaug!”
Nej puas yuav ua siab tawv twm xeeb kaw nej lub tswv yim xws li cov Kws Ntawv Ntshiab, los nej puas yuav ua siab ncaj li tsoom pej xeem tsis muab hlob zoo siab cav lus zoo txog Tswv Ntuj?
Phim nej yuav txiav siab kawm Huab Tais Yes Xus cov lus, vim Huab Tais Yes Xus yog tus Huab Tais tuaj ntawm Tswv Ntuj tuaj. Nws lub Moob Zoo kho peb lub siab kom ntshiab tuaj, kom huv tuaj, thiab Huab Tais Yes Xus txuag peb lub cev, pov hwm peb lub neej kom noj qab nyob zoo.
Nej txhob ua neeg tsis quav ntsej, twb hnov hais txog Huab Tais Yes Xus yim cuaj zaug los ib puas zaug, tab sis tsis kam ua tib zoo xav tswv yim, saib yuav ua zoo li cas los tso siab rau Huab Tais Yes Xus. Nej cia Huab Tais Yes Xus ua tus tswv tswj nej lub siab mog.
