Zaj no vam txog LTH. Lauj Vam Thaiv phau ntawv ‘UA NEEG NTSEEG MUS RAWS TXOJ KEV TSEEM CEEB’.

Nco ntsoov tias peb muaj ob txhais taw cia mus kev tiag, tab sis tsuas yog mus ib txog kev xwb; yus yuav ib txhij siv yus ob txhais taw kom mus ob txoj kev ua ke mas tsis tau ib zaug li. Yus xav ua lub neej zwm rau ob tug tswv mas tsis tau, yus yuav tsum zwm rau ib tug xwb thiaj tau (LK 16: 13). ‘Kev teev Ntuj’ thiab ‘kev teev Dab’ los ib yam li ntawd, yog yus txiav txim siab teev Ntuj mas yus tsuas teev Ntuj ib tug xwb, vim Tswv Ntuj thawj lo qhia rau peb coj yog lo lus tias “Koj yuav teev Huab Tais Ntuj ib tug xwb.” Yog li no thiaj qhia rau peb paub tseeb tias tsis txhob muab kev teev Dab los xyaw rau kev teev Ntuj, vim yuav tsis zoo rau yus tus kheej hnub kawg ntawm yus lub neej.

‘Teev Ntuj’ yog teev tus Tswv uas nws yog tus tsim yus los ua neej nyob rau hauv lub sim ceeb no, nws yog tus tsim peb txoj sia, nws yog peb txoj sia tus tswv. Nws yog tus tsim lub ntuj lub teb thiab tsim tas ib puas tsav yam uas muaj txoj sia thiab tsis muaj txoj sia tib si, tab yog cov dab phem dab zoo los puav leej yog nws tsim tawm los tib si. Tas ib puas tsav yam uas Tswv Ntuj tau tsim los mas puav leej yog kom lawv ua lub neej muaj nqes rau Tswv Ntuj tag tib si. Tsis hais neeg los dab thiab tsiaj txhu nroj tsuag xyoob ntoo, dej hiav txwv puav leej yog Ntuj tsim los kom muaj nqes rau Tswv Ntuj tag tib si.

‘Dab’ yog Tswv Ntuj tsim los tib si, Tswv Ntuj yeej tsim cov dab muaj hwj chim thiab tsis laus tsis txawj tuag. Dab mas yog ib tug uas peb pom tsis tau ntawm qhov muag tias nws zoo li cas, tab sis yeej muaj tej yam tuaj haub rau hauv neeg lub siab ua kom neeg raug kev ntxhov rau hauv neeg lub neej, kom neeg lub siab nyob tsis tus ua ywj fab ywj fwj txog neeg lub neej thiab ua kom muaj kev phem txhawv los rau hauv neeg, kom neeg txawj muaj lub siab phem tawm tuaj. Dab yeej tos nrhw lub caij uas neeg raug tej yam kev nyuaj, mas dab kav tsij muab qhov ntawd los ua kom muaj xwm tsis zoo rau neeg lub neej ntag. Dab muaj tej yam xwm tshwm sim rau hauv neeg lub cev lub siab thiab lub tswv yim rov los ntxias neeg xwb.

Ua piv txwv zoo li thaum dab tuaj ntxias Es Vas thiab As Das nkawd, nws ua zoo li cas. Nws muab lub txiv ntoo zoo nkauj ntxim qab kawg los ntxias kom nkawd nqhis thiab xav noj zoo li yuav qab tshaj cov txiv ntoo uas nkawd niaj hnub noj lawd. Nws ua kom nkawd nqhis thiab xav noj kiag raws li tus dab hais, ces nkawd thiaj noj lawm (HP 3: 6).

Piv txwv li thaum tus dab Xas Tas ntxias Huab Tais Yes Xus, nws ua zoo li cas. Nws xub pom tias Yes Xus tsis noj mov tau ntev hnub lawm, nyob hauv Yes Xus lub cev nws tshaib plab heev lawm. Ces tus dab Xas Tas thiaj xav tias zaum no mas kuv yuav xub ntxias kom Yes Xus mloog nws lub cev tso, vim Yes Xus lub cev tshaib  heev, xav noj mov heev lawm. Ces dab Xas Tas thiaj tuaj haub Yes Xus lub siab li no tias “Yog koj yog Tswv Ntuj Leej Tub tiag no, koj sim kom cov pob zeb no txia ua mov saib” (MT 4: 3).

Tej yam zoo li no thiaj ua kom peb pom tau tias dab yog leej twg : dab yog ib lub tswv yim phem ntxias neeg lub siab kom phem xwb, dab tsis yog tus tswv tsim yus txoj sia, dab yog tus yuav txo yus txoj sia xwb.

Niaj hnub nyem no los dab phem yeej ua hauj lwm haub neeg lub siab, yuj neeg kom mus rau hauv kev txhaum xwb, dab yeej muab tej yam uas neeg lub cev lub siab ntshaw txog rov los ntxias neeg kom neeg poob mus ciaj ua dab tug, kom txog hnub Tswv Ntuj txiav txim rau cov dab los kom neeg nrog cov dab tib si poob mus rau lub qhov tuag mus li tib si kom thiaj zoo dab lub siab. Yeej muaj ntau txoj kev uas dab ntxias kom neeg mus nrog dab poob rau lub qhov tuag.

Thaum ub Tswv Ntuj tau tsim muaj cov Dab Ntuj (Tshiab) thiab pub hwj chim rau lawv kom ua tau tej yam muaj txiaj ntsim zoo los rau Tswv Ntuj, kuj zoo li Tswv Ntuj tau tsim kom muaj neeg los nyob rau hauv lub sim ceeb no kom neeg tau ua ib lub neej zoo muaj nqes rau Tswv Ntuj thiab xwb. Tab sis cov Dab Ntuj mas Ntuj tau tsim lawv ntse tshaj, thiab Ntuj pub kom lawv ua tau ntau yam zoo rau Tswv Ntuj.

Tswv Ntuj cia cov Dab Ntuj no nyob ywj lawv siab raws li lawv muaj kev txawj ntse thiab muaj hwj chim raws li Tswv Ntuj tau pub rau lawv lawd. Ces kuj muaj cov Dab Ntuj uas lawv khav tias lawv ntse txaus lawm thiab lawv thiaj xav txeeb ua tus loj nyob ntawm Tswv Ntuj xub ntiag los kav cov me tshaj uas Tswv Ntuj tau tsim los nyob hauv lub sim ceeb no, tseem ceeb yog cov uas Ntuj tau tsim los nyob hauv ntiaj teb no.

Tab li cas los Tswv Ntuj nws yog tswv, nws yeej muaj lub hwj chim loj tshaj uas cov dab no lawv tseem tsis tau paub txog li. Thaum cov Dab Ntuj tsis mloog Tswv Ntuj lus lawd, Tswv Ntuj thiaj tau caum lawv tawm ntawm Tswv Ntuj lub Ceeb Tsheej mus, kom mus ua dab phem, dab tu caj tu ces tsis muaj tswv saib xyuas; lawv thiaj poob kev txom nyem, lawv thiaj yuav tsum tuaj haub ntxias ntiaj teb neeg kom nrog lawv ua txhaum rau tus tswv, kom tus tswv txiav txim rau neeg mus nrog cov dab phem no tib si, kom thiaj zoo lawv siab. Vim lawv yeej paub lawm hais tias hnub kawg tus tswv yuav tsum tau txiav txim rau lawv zaum kawg thiab cais cov phem thiab cov zoo kom nyias nyob nyias.

Cov dab phem uas muaj lub npe uas Yes Xus tau hais thiab Ntuj tau qhia rau cov Yaj Saub paub yog cov no: Xas Tas, Lus Xis Fes. Cov Dab Ntuj zoo uas peb paub lawv lub npe yog: Miv Kas, Las Fais, Nkas Nplias.

Peb Hmoob mas peb tseem muaj peb npe hu thiab, yam li ‘Ntxwg Nyoog’, thiab tseem muaj ib co dab ntxiv uas yog cov Txiv Neeb lawv thiaj paub txog; tsis paub tias yog dab zoo los dab phem, tab sis yog nyob saum Ntuj tuaj; mas lawv hais tias muaj tag nrho yog 9 tug xwb. Cuaj tus dab no lawv puav leej yog ib pab kwv tij xwb; muaj 4 tug yog mus ua dab phem dab noj neeg lawm, yog neeg mob tuag mas yog 4 tug no noj xwb; tshuav 5 tug uas lawv tseem nyob rawv rau saum Ntuj. Tus ua tij kiag nws yog tus loj, nws nyob kiag hauv lub plawv uas yog lub yis Ntuj kiag. Hos plaub tug kwv mas nyob kiag rau plaub ceg kaum Ntuj ntag.

Tus tij laug hu ua ‘Theej Tuam Yej’. Plaub tug kwv npe hu ua ‘Lwj Vis Txhee’, ‘Xwm Kuj Phij’, ‘Neem Thee Xa’ thiab ‘Chij Laaj Lwm’. Muaj 4 tug uas lawv mus ua dab noj neeg lawm, mas lawv tseem yog 5 tug li hais los no cov kwv thiab, lawv cov npe yog hu li no: ‘Kau Cooj Txhij’, ‘Puaj Tuam Cuj’, ‘Cawv Tshuav Khawv’, tshuav ib tug tsis nco qab npe lawm.

Dua li no lawm mas kuj tseem muaj ntau yam dab nyob raws toj roob hauv pes, nyob qhov zeb qhov tsua, qhov dej qhov hav tib si. Tseem muaj cov dab nas tsuag me me uas Hmoob hu tias Dab Ntxaum thiab dab Phis Nyas Vais, dab Poj Ntxoog.

Lo lus Hmoob hais tias ‘Dab’ yog txhais zoo li cas?

Lo lus no mas txhais tias ‘Qhov muag pom tsis tau, tab sis lub siab thiab lub tswv yim xav tau tias yeej muaj ib yam zoo li ntawd tiag.’

Ua cas peb cov poj yawm txwv koob teev dab?

Peb cov poj yawm txwv koob teev dab mas muaj txij li hnub uas tus dab phem tau txia ua nab tuaj ntxias tau Es Vas thiab As Das nkawd noj lub txiv ntoo coj noob neej mus zwm rau kev tuag lawm, mas Tswv Ntuj thiaj tso cov Tshiab pab cawm neeg ntawm tus dab phem ua ntej thaum nws Leej Tub Yes Xus tseem tsis tau yug los ua neeg thiab yuav tuag los cawm neeg ntawm lub txim coj neeeg mus zwm rau kev tuag rov sawv. Ces Huab Tais Ntuj tso cov Tshiab tuaj pab neeg tiv thaiv tus dab phem xwb.

Tswv Ntuj yog tus tsim neeg los, nws yeej ib txwm pub ntau yam txiaj ntsim tuaj cawm neeg, uas peb tseem paub tsis tau txog li. Yeej muaj Leej Ntuj Plig qhia rau tej tus neeg kom sau ntawv tseg tias “Ntuj pub ntau yam txiaj ntsim, tiam sis yog tuaj ntawm Leej Ntuj Plig tib leeg tuaj xwb. Muaj ntau txoj kab xwm, tab sis yog tuaj ntawm tib tug Huab Tais tuaj. Muaj ntau txoj hauj lwm, tab sis yog tib tug Tswv Ntuj ua cov hauj lwm ntawd nyob hauv txhua leej tib neeg. Ntuj pub Leej Ntuj Plig rau peb kom peb pab tau tsoom sid. Ib txhia, Leej Ntuj Plig pub ib zaj lus thoob tsib rau lawv. Ib txhia, Leej Ntuj Plig pub ib zag txuj ci rau lawv. Ib txhia, Leej Ntuj Plig pub kom lawv muaj ib lub siab ntseeg. Ib txhia, Leej Ntuj Plig pub kom lawv txawj kho mob. Ib txhia, Leej Ntuj Plig pub kom lawv txawj ua hwj huam yees ntxwv. Ib txhia, Leej Ntuj Plig pub kom lawv txawj ua Yaj Saub. Ib txhia, Leej Ntuj Plig pub kom lawv txawj pom tias puas yog dab. Ib txhia, Leej Ntuj Plig pub kom lawv txawj hais ntau xeem lus. Ib txhia, Leej Ntuj Plig pub kom lawv txawj txhais ntau xeem lus. Tas ib puas tsav yam ntawd, yog Leej Ntuj Plig tib leeg ua, yog Leej Ntuj Plig tib leeg muab faib rau zeej tsoom sawv daws, raws li nws nyiam” (1KLN 12: 4-11).

Yog li no peb thiaj paub tau tias txhua yam zoo uas Tswv Ntuj pub rau neeg ua tau, puav leej yog Tswv Ntuj lub txiaj ntsim cawm neeg txoj sia tag tib si. Tab yog muaj cov txiaj ntsim zoo tuaj ntawm Tswv Ntuj tuaj rau neeg los, zoo li neeg pheej tsis paub txog tus Tswv Ntuj zoo pes tsawg; vim qhov kawg tseem pheej yuam kev mus rau dab xwb. yam li ‘cov dab nyeg’ uas Hmoob tsa los teev.

Yog hais txog cov dab nyeg no, mas lawv kuj muaj zaj muaj tus txheej txheem rau cov npe dab ntawd, thiab teev tiam lawv los ua cov pov hwm tas tsev neeg thiab kev khwv kom muaj noj muaj haus rau tsev neeg tib si. Tej yam li hais no los puav leej yog Ntuj lub txiaj ntsim tuaj cawm neeg tag tib si. Tsuas tshuav qhov tias lawv tsis nco tias tus loj tshaj uas muab tej yam ntawd tuaj pab lawv, yog leej twg. Ces lub tswv yim tseem pom txog qhov me me uas Ntuj xa tuaj pab neeg ntawd xwb, zoo li tsis paub txog tus tswv yog tus twg. Yog vim li ntawd, Tswv Ntuj thiaj xav kom neeg uas yog Tswv Ntuj tsim tawm los; hwm Tswv Ntuj ua neeg tus tswv thiaj yog qhov ncaj ncees li tus tswv tau xav kom muaj neeg los nyob hauv nws lub Ceeb Tsheej.

Ntuj thiaj yuav tsum rov xa nws Leej Tub tuaj yug los ua ib lub cev neeg zoo li neeg rov los qhia neeg kom paub txog tus tswv tsim neeg tiag tiag. Vim tias Tswv Ntuj tso Leej Ntuj Plig tuaj qhia neeg lub siab, los neeg lub qhov muag tsis pom thiab pob ntseg tsis hnov mas neeg ntseeg nyuaj, vim muaj txoj kev phem nyob ua ke nrog kev zoo; zoo cuag nkaus li txoj kev phem npog neeg lub qhov muag kom txhob pom txog Tswv Ntuj txoj kev zoo. Vim yog neeg lub keeb twb yeej poob rau kev txhaum li cov dab phem lawm, ces kev tuag twb poob los rau neeg txoj sia, neeg lub cev raug tus tswv txiav txim kom rov mus ua av, vim Tswv Ntuj tau tsim neeg ntawm av los.

Tswv Ntuj txawm ua zoo npaum li cas los pab neeg, los neeg tsis nco hwm Tswv Ntuj ua neeg tus tswv lawm. Neeg lam mus tsa tej yam los teev ua tus pov hwm neeg zoo li xwm kab, ncej tas, dab vaj dab tsev.

Thaum muaj ib tug tas sim neej, tsis pom qab xa tus ntsuj plig mus cuag leej twg li; vim tsis paub tias tus tsim tus ntsuj plig yog leej twg lawm. Qhov kawg thiaj lam hais tias cia xa mus cuag poj cuag yawm nyob rau hauv dab teb, ntuj txias teb tsaus uas yus cov poj yawm txwv koob mus nyob lawd xwb. Thiab mam tso tus plig rov mus thawj thiab dua uas hais tias rov yug los ua ib tug neeg dua.

Hmoob xav li ntawd lawm, tab sis qhov Hmoob xav li no vim yog Hmoob xav tias “Thaum tuag lawm mas yog kawg mus ciaj ua dab lawm xwb.” Vim Hmoob thiaj muaj qhov tias thaum muaj ib pluag noj yuav tau laig niam txiv poj yawm, uas hu tias ‘Laig Dab Niam Dab Txiv’ thiab ‘Ua Nyuj Dab Npua Tai’.

Tej laus los tej txiv neeb uas lawv paub dab qhuas mas lawv hais tias “Neeg mas muaj 3 tus plig tseem ceeb. Thaum tuag lawm mas 3 tus plig ntawd mus ua zoo li no; tus ib mas nws tsis tuag, nws mus zov ntxa zov cov pob txha mus li. Tus ob mas rov mus thawj thiab ua neeg dua. Tus peb mas yog tus coj tus neeg mus rau lub qhov tuag lawm. Tus zov ntxa mas yog zov cov pob txha mus li, yog li thiaj muaj pog koob yawg koob, pog suab yawg suab. Ntau tiam uas tseem pheej yuav laig lawv mas yog vim laig rau cov plig zov ntxa no xwb. Rau qhov lawv txom nyem tsis tau noj ces thiaj rov los ua mob rau tej tub ki, yuav nrog tub ki yuav noj thiab yuav tus nyuj dab.”

Kev cai teev dab thiab kev cai teev Ntuj sib txawv li cas?

Kev cai teev dab yog teev cov dab nyeg xwb tsis yog teev dab qus. Dab nyeg uas peb Hmoob teev yog ‘Dab Neeb’, ‘Dab Xwm Kab’, ‘Dab Ncej Tas’, ‘Dab Qhov Rooj’, ‘Dab Qhov Cub Qhov Txos’, ‘Dab Txhiaj Meej’, ‘Dab Niam Dab Txiv’, ‘Dab Roog’, thiab ‘Dab Tshuaj’.

Cov dab no mas nyias muaj nyias kev uas yuav teev los pab los pov hwm yus tsev neeg, kev mob nkeeg tiv thaiv cov dab qus, kev khwv kom tau noj tau haus, tau nyiaj tau txiaj, yug tau tsiaj txhu ib puas yam tsav kom huam vam, tu tub ki kom hlob, ua qoob loo kom tau noj. Tab sis cov dab nyeg no yuav tsum tau teev tiam lawv kom zoo zoo, ib xyoos lub xyoo laus tas lub xyoo tshiab tuaj; yam li lub tsiab peb caug los txog yuav tsum muaj tsiaj txhu mus pauj rau lawv kom txhua nrho tib si, yam li tus txi qaib mas yuav muab qaib txi, tus txi npua mas yuav tsum muab npua los txi rau lawv kom tau txhij txhua mas xyoo ntawd yus tsev neeg thiaj zoo, ua dab tsi los yeej tau dab tsi raws li lub siab xav ntag. Thiab yus tsev neeg los tsis muaj mob, mus txog twg los yeej tsis ntsib mob ntsib nkeeg, ntsib dab qus thiab xwv txheej puas ntsoog rau yus tsev neeg li. Yog tias yus tsev neeg muaj tus muaj mob los, ua thaj puav neeb xwb ces cia li zoo li tsis tas yuav mus cuag kws tshuaj li.

Qhov hais no mas yog kev teev tiam zoo yus cov dab kom yus tsev neeg muaj 120 leej los lawv tau noj qab nyob zoo tib si xwb. Hos yog yus tsis teev tiam lawv zoo, ces yus tsev neeg txawm muaj mob muaj nkeeg muaj ploj muaj tuag ntag.

Kev teev cov dab no puas pab yus lwm yam ntxiv zoo li cas?

Nyob hauv kev cai teev dab mas tsis muaj hais lwm yam los pab tswj neeg lub siab thiab neeg lub neej li, tsuas yog pab neeg mob thiab pab neeg kom muaj noj muaj haus xwb. Lub caij ib tug tas sim neej mas tsis muaj kev tso siab, tsuas yog hais tias phem xwb.

Kev cai teev dab tsis hais txog tus Tswv Ntuj tsim neeg uas yus yuav tsum hwm nws ua tswv tsim yus txoj sia, tsis hais txog lub neej zoo nyob rau hauv Tswv Ntuj lub Ceeb Tsheej, tsuas hais tias tuag ces kawg yog mus ciaj ua dab thiab rov mus thawj thiab ua neeg dua no xwb, tsis hais txog kev txhaum, kev sib hlub sib zam, tsis hais txog neeg lub cev yuav sawv rov los.

Kev cai teev dab qhia kom ua lub neej ntshai ntau yam, vim yog dab thiab tsis muaj kev tso siab rau ib tug tswv tseem ceeb; yam li ntshai tias thaum tuag lawm yuav tsis muaj leej twg pub rau noj, ces yuav tua nyuj tua twm thiab laig rau noj rau haus thiaj yuav tsis tshaib mus nyob hauv dab teb.

Thaum qhuab ke mas xa tus plig mus cuag poj cuag yawm xwb, tsis paub xa mus cuag tus Tswv uas yog tus tsim txoj sia tiag tiag. Vim poj yawm kuj tseem yog Tswv Ntuj tsim lawv thiab xwb. Tseem qhuab kom mus yuam kev rau lub teb chaws uas hais tias tub tuag teb, uas yog lub teb chaws txom nyem, ntshaw noj ntshaw haus, yuav tsum tau ntim thiab nqa mus noj mus haus mas thiaj yuav tsis tshaib. Yog muaj tej qhov twb yog dab ua rau yus xwb, tseem ntiab muam phauj tsawm rau tus tas sim neej ntawd kom mus tu qab nrho kiag tsis txhob rov los ua xwv txheej dab tsi rau cov tseem ua neej nyob, tab sis qhov tseem ceeb tsis yog yus tus neeg tuag ntawd ua phem rov rau tom qab, nws tsis ua li ib zaug, tus ua yog dab phem xwb.

Nco ntsoov tias dab teb yog lub teb chaws txom nyem ntshaw noj ntshaw haus xwb, vim tsis muaj tus tswv tswj thiab saib xyuas lawm.

Kev teev Ntuj yog teev tus tswv tsim yus txoj sia, tus pub lub sim ceeb no rau yus nyob, tus pub kom yus muaj noj muaj haus. Vim yog qoob loo tawm ntawm av los yug yus txoj sia. Yog txais nws tej txiaj ntsim los rau yus, uas yog txoj sia nyob mus li los rau yus; kom yus tau nrog nws koom txais ib lub cev kom tsis txawj laus tsis txawj tuag mus li. Yog rov nrog nws Leej Tub; tus nws xa tuaj cawm neeg ntawm lub qhov tuag rov sawv los dua, kom peb tau nrog nws Leej Tub koom txais ib lub cuab tam nyob hauv nws lub teb chaws uas nws yeej ib txwm npaj rau cov mloog nws lus mus nyob mus li thiab ua lawv tug. Yog qhov tsim nyog uas nws tau tsim peb los ua neeg, cia muaj nqes rau nws. Thiab peb thiaj yuav tsis raug txiav mus nrog cov dab phem nyob, vim peb tsis yog lawv tug. Yog ib lub neej peb muaj hwj chim tuaj ntawm tus tswv tuaj pab peb yeej dab phem thiab txoj kev txhaum kev tuag. Yog ib txoj kev tsis ntshai txoj kev ntshai ntau yam thiab yog ib txog kev tso siab lug mus rau hauv lub neej tom ntej uas rov sawv hauv txoj kev tuag rov los zoo li Huab Tais Yes Xus. Yog ib lub txiaj ntsim rub yus lub neej mus nyob siab dua tag nrho txhua yam kev teev dab teev mlom tib si.

Kev teev tus Tswv Ntuj thiaj yog lub neej uas yus tsis muaj kev txom nyem, kev ploj tuag li lawm; vim yog nej ntseeg luaj li lub noob faj khaum mas nej hais rau lub roob no tias ‘Koj tshais chaw lawm tod’, ces lub roob kuj yuav tshais chaw, thiab tsis muaj ib yam uas nej yuav ua tsis tau.

Tus ua Ntuj kev cai, nws ua lub neej mus raws qhov tseeb, yog li mas nws yuav tsis ua tej qhov uas tsis yog tseeb lawm. Tus ua Ntuj kev cai, nws muaj kev ntseeg nyob puv nkaus hauv nws lawm, ces tsis muaj lwm yam ua xyem xyav yuav los nkag tau rau hauv nws qhov tseeb li lawm. Li ntawd, tus ua Ntuj kev cai thiaj yuav tsis ua tej yam li no ntxiv:

1. Tsis ua neeb kho, tsis kom luag ua neeb tom luag tuaj kho tus mob nyob hauv yus tsev, los puas coj tus mob mus ua neeb tom luag tsev kho.
2. Tsis mus saib xyab, saib tes, saib npau suav, ua khawv koob, daws dab hlawv roj.
3. Tsis hu plig me nyuam mos raws kev cai ua dab lawm, tsis xyeem dab nram qhov rooj, tsis hu plig rau tej tus poob plig lawm.
4. Tsis lwm qaib rau tus nyab yuav los tshiab raws li kev cai dab, tsis hu nyab tshiab plig raws li kev cai dab.
5. Tsis saib taw qaib, taub hau qaib, nplaig qaib.
6. Tsis laig dab.
7. Tsis hlawv kab yeeb xyab, tsis hlawv xyab hlawv ntawv rau nkawm dab pog nram qhov rooj.
8. Tsis tuam choj tom kev.
9. Tsis faib thiab haus cawv xeeb.
10. Tsis fiv yeem, tsaws neeb tsaws yaig, nchuav qe, tsis hlawv khaub hlab caum dab pog.
11. Mus kev deb tsis tas yuav khwb dej khwb plig, muaj me nyuam hauv plab tsis tas yuav caiv txhob hla toj pob hla dej.
12. Ua tsev tsis tas yuav tsawv qua tsev, tsis tas yuav xam hnub xam nyoog.
13. Dab tsi ploj tsis tas yuav mus ntaus tes ntaus txheeb saib.
14. Tsis txhob xyaum mus saib koob saib hmoov ces dab yuav xub qhia qhov phem los rau yus.
15. Tsis pab mus hu neeb, tsis pe dab neeb txiv neeb, tsaws neeb hwj neeb, tsis pab ntaus nruas neeb. Tsis hlawv xyab hlawv ntawv rau dab, pab luag laig dab. Tsis pab hu plig los yog txhua yam uas yog kev pab ua dab.
16. Tsis ua luag tus txiv qhuab ke, txiv cuab tsav, txiv qeej txiv nruas, txiv hau rog, txiv nkauj plig, nkauj qeej, nkauj tshais nkauj sus, nkauj hlawv ntawv thiab tsis nrog luag pe dab.
17. Tsis pab luag laig poj yawm txwv koob, ua dab roog, npua tai, nyuj dab, hu plig. Pab tsis tau luag ua kab ke tso plig.
18. Tsis noj pluas mov tu moo thiab qaib dab npua dab hauv tshoob kos.