YES XUS KHO TUS XAB TXHEEB TUS TUB TXIB (MT 8: 5-11)
Txiv Plig Nyiaj Pov. (Tim 11 lub 9 hlis 1997)
Thaum Yes Xus mus hauv Kas Fas Naus, ib tug xab txheeb txav los ze Yes Xus, nws thov tias “Huab Tais, kuv tus tub txib pw tom tsev, nws tes taw tuag tas. Nws mob heev kawg.” Yes Xus teb tias “Kuv yuav mus kho nws.” Tus xab txheeb hais ntxiv tias “Huab Tais, kuv tsis tsim nyog koj chaws los hauv kuv tsev, tsuav yog koj hais ib los lus xwb ces kuv tus tub txib yuav zoo hlo. Txawm tias kuv yog ib tug neeg zwm rau luag tej, kuv kuj muaj ib co tub rog zwm rau kuv thiab. Yog kuv hais rau ib tug tias ‘Koj mus!’ nws cia li mus, kuv ho hais rau lwm tus tias ‘Koj los,’ nws kuj cia li los. Kuv hais rau kuv tus tub txib tias ‘Koj ua qhov no!’ nws cia li ua.” Yes Xus hnov nws hais li ntawd, Yes Xus qhuas. Yes Xus hais rau cov neeg raws nws tias “Kuv hais tseeb rau nej, kuv tsis tau pom ib tug neeg ntseeg npaum li ntawd hauv cov His Xas Lais. Kuv hais rau nej, yuav muaj neeg coob tuaj sab hnub tuaj tuaj thiab sab hnub poob tuaj nrog Has Nplas Has, nrog His Xas Has thiab Yas Kos noj rooj qav hauv Ntuj lub Ceeb Tsheej.”
Lub caij Yes Xus nyob ntiaj teb no, lub teb chaws uas Yes Xus nyob zwm rau haiv neeg Los Mas. Lawv kav tas huv si cov teb chaws nyob ncig lub hiav txwv Mes Dis Tes Las Nes. Tus vaj ntxwv Los Mas muaj tub rog zov cov teb chaws zwm rau Los Mas, thiaj muaj ib pab tub rog tuaj nyob hauv lub tsheej Kas Fas Naus uas Yes Xus tuaj nyob ob peb zaug. Cov tub rog Los Mas ntawd luag sau nyob hauv ntau lub teb chaws tuaj, lawv zwm rau ib tug xab txheeb Los Mas.
Cov Los Mas teev hawm cov dab Los Mas. Tus tuaj thov Yes Xus yog ib tug neeg siab ncaj. Tab nws txawm yog ib tug neeg haiv Los Mas, mas nws tsis thuam cov neeg Yus Das. Nws pab lawv txhim ib lub tsev rau cov Yus Das sib txoos teev Huab Tais Tswv Ntuj niaj lis piam. Tus xab txheeb teev dab Los Mas ntawd, kuj hlub nws tus tub txib. Luag tej sawv daws tsis saib lawv cov tub txib muaj nqe dab tsi, tab sis tus xab txheeb no pom nws tus tub txib raug kev mob, ces nws xav kho, nws tsis kam tso nws tus tub txib pov tseg.
Tus xab txheeb hnov cov Yus Das cav lus zoo txog Yes Xus tias Yes Xus muaj peev xwm kho cov neeg mob. Tus xab txheeb siab ncajm nws ntseeg cov Yus Das. Tus xab txheeb, nws yog ib tug nom, nws yog ib tug pej kum neeg, nws yog tus Vaj ntxwv Los Mas tus tub tseem hwv.
Thaum ntawd Los Mas yog lub nroog nto moo loj tshaj nyob tas ntiaj teb. Tsis kav tus xab txheeb Los Mas ntawd, cia li sawv mus thov tus neeg Yus Das hu ua Yes Xus. Tus xab txheeb tsis khav tias nws loj dua Yes Xus. Nws thov kom Yes Xus kho nws tus tub txib tuag ceg thiab mob heev. Tus xab txheeb hu Yes Xus tias “Huab Tais.” Nws hais rau Yes Xus tias “Huab Tais, kuv tsis tsim nyob cia koj chaws los hauv kuv tsev.”
Vim li cas nws thiaj hais lo lus ntawd?
Tus xab txheeb lub tsev twb yog tsev nom zoo nkauj, tab sis tus xab txheeb nco ntsoov tias nws yog ib tug neeg teev dab thiab cov Yus Das caiv tsis kam chaws mus hauv cov neeg teev dab tej tsev. Tus xab txheeb tsis xam tias nws yog nom. Nws hwm cov neeg teev Tswv Ntuj, nws xyiv fab pab lawv, nws saib nws me dua Yes Xus. Nws saib Yes Xus yog Huab Tais.
Yes Xus kuj tsis thuam cov neeg teev dab xws li cov Yus Das lawv thuam thiab lawv tsis kam fim cov neeg teev dab hauv lawv tej tsev. Yes Xus yeej npaj mus txog tus xab txheeb lub tsev.
Zoo li yog ob tog tsis sis thuam, ob tog tsis muab hlob; tus xab txheeb hwm Yes Xus vim Yes Xus yog ib tug neeg muaj Tswv Ntuj lub hwj huam nrog nws, Yes Xus kuj hwm tus xab txheeb vim nws pom tus xab txheeb yog tus vaj ntxwv Los Mas ib tug neeg siab ncaj.
Tus xab txheeb hais rau Yes Xus tias “Tsis tas koj yuav tuaj txog kuv tsev. Kuv yog ib tug neeg zwm rau tus vaj ntxwv, tab sis kuv muaj ib co neeg zwm rau kuv. Kuv hais rau ib tug tias ‘koj mus’, ces tus ntawd mus. Kuv hais rau lwm tus tias ‘koj los’, ces nws los. Li ntawd, yog koj hais kom kuv tus tub txib tus mob thim hlo mas tus mob yuav thim los xwb.”
Tus xab txheeb zwm rau tus vaj ntxwv Los Mas teev hawm dab, tab sis tus xab txheeb ntseeg txog Yes Xus ntau hauj sim.
1. Nws ntseeg tias Yes Xus muaj peev xwm kho cov neeg mob.
2. Nws ntseeg tias tab txawm Yes Xus nyob deb, mas Yes Xus kho tau tus neeg mob uas nyob deb.
3. Tus xab txheeb mem tau tias Yes Xus muaj ib lub peev xwm tuaj ntawm Tswv Ntuj tuaj ib yam li tus xab txheej muaj ib lub peev xwm tuaj ntawm tus vaj ntxwv Los Mas tuaj. Yes Xus lo lus muaj zog yog vim Yes Xus yog Tswv Ntuj tus neeg.
Li ntawd, tus xab txheeb ntseeg txog Yes Xus zoo dua ntau tus neeg Yus Das. Vim cov nom Yus Das xws li cov Fas Lis Xais thiab cov saib lub Tuam Tsev Teev Ntuj coob leej tsis yeem lees tias Yes Xus yog tus tuaj ntawm Tswv Ntuj tuaj.
Yes Xus hnov tus xab txheeb hais ib co lus tso siab rau nws lub hwj huam, ces Yes Xus hais rau cov neeg raws nws tias “Nyob hauv cov Yus Das los cov His Xas Lais, kuv tsis tau ntsib ib tug neeg ntseeg cuag li tus xab txheeb Los Mas no!” Yes Xus tseem hais ntxiv tias “Muaj coob leej yuav tuaj ntawm cov pej kum teb teev dab tuaj zaum ntawm los rooj qav nyob pem Ntuj lub Ceeb Tsheej.” Ces Yes Xus hais rau tus xab txheeb tias “Koj rov mus mog! Xav kom koj tau raws li koj lub siab ntseeg.”
Tus xab txheeb ntseeg tias Yes Xus kho tau nws tus tub txib. Nws rov mus tsev, nws pom nws tus tub txib tus mob twb zoo lawm.
Kwv tij Hmoob, nej tso siab rau Yes Xus xws li tus xab txheeb tau tso siab. Yes Xus yuav pub nws lub txiaj ntsim rau nej. Yog Yes Xus pom tias lub txiaj ntsim zoo tshaj rau nej yog lub txiaj ntsim twg, ces nws yuav pub lub txiaj ntsim ntawd rau nej; tej zaus nws pub lub txiaj ntsim raws li nej thov, tej zaus nws pub lwm lub txiaj ntsim pab nej lub siab kom nej ntseeg zoo dua. Yes Xus pub kev kaj siab lug, pub kev thaj yeeb hauv nruab siab rau cov neeg ntseeg txog nws tiag.
