Mas Tais sau tias: Yes Xus Pleev lub keeb chiv muaj zoo li no: thaum Yos Xes qhaib Mab Liab lawm, thiab nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub. Nws tus txiv Yos Xes yog ib tug neeg siab ncaj, nws tsis xav kom luag tej hais lus xaiv lus ncua txog Mab Liab, ces nws txiav tias nws yuav nrauj Mab Liab twj ywm. Thaum Yos Xes xav li ntawd, nws ua npau Suav pom ib tug Tshiab tuaj hais rau nws tias “Yos Xes, Das Vis xeeb ntxwv, koj txhob ntshai yuav koj poj niam Mab Liab los nyob hauv koj tsev. Nws xeeb tub, tab sis yog tuaj ntawm Leej Ntuj Plig Ntshiab tuaj. Nws yuav yug ib tug tub; koj yuav tis nws npe hu ua Yes Xus. Vim tus yuav cawm nws haiv neeg ntawm lawv cov txhaum, yog nws.” Tej xwm ntawd tshwm sim tuaj thiaj muaj raws li tus Yaj Saub lo lus hais tias ‘Tus Nkauj Tsim Txiaj yuav xeeb tub, nws yuav yug ib tug tub. Luag yuav tis npe rau tus tub ntawd tias Es Mas Nus Es. Lub npe ntawd yog hais tias Huab Tais Ntuj nrog peb nyob.’ Thaum Yos Xes tsim los, nws ua raws li tus Tshiab qhia kom nws ua. Nws coj Mab Liab los nrog nws nyob (MT 1: 18-24)
Yos Xes yog Das Vis xeeb ntxwv. Das Vis tau ua vaj 1,000 xyoo ua ntej. Nws cov xeeb ntxwv coob kawg, tus nplua nuj kuj muaj, tus txom nyem pluag pluag kuj muaj. Tus coj raws kev cai kuj muaj. Tus hla tej yam kev cai kuj muaj. Tab sis sawv daws muaj lub koob meej nto npe tias yog tus vaj Das Vis tsoom xeeb ntxwv. Yos Xes pom tias Mab Liab muaj me nyuam lawm, nws yeej mus nug Mab Liab thiab Mab Liab qhia nws tias tus me nyuam yog tuaj ntawm Leej Ntuj Plig Ntshiab tuaj. Tab sis Yos Xes tsis to taub, ces muaj ib hmos, Tswv Ntuj tuaj tshoj Yos Xes siab, ces nws thiaj to taub tias yog nws yuav Mab Liab, mas yuav muaj 2 yam zoo tuaj, xws li:
1. Zej zog yuav xyav tsis tau lub moo phem rau Mab Liab, vim zej zog sawv daws yuav xav tias Yos Xes yog tus me nyuam leej txiv.
2. Tus me nyuam yuav yog Das Vis xeeb ntxwv, raws li cov Yaj Saub ib txwm hais tias Leej Pleev yuav yog Das Vis ib tug xeeb ntxwv.
Hais txog kev ua tshoob kos, mas nyob hauv Yes Xus lub teb chaws, lawv pib ua thaum tsaus ntuj. Tus nyab cov neeg tuaj nyob hauv tog niam tais yawm txiv tsev thiab pab tus nyab tu zam hnav tsoos thiab pleev tshuaj tsw qab. Ces lawv tos tus vauv tuaj tos tus nyab tawm hauv tsev mus. Tus vauv nrog nws cov neeg tshuab raj ntaus nruas, taws teeb taws tsau tuaj tos tus nkauj nyab hauv tsev thiab coj tus nkauj nyab mus kom txog tus vauv tsev. Thaum txog lub caij cov qhua tuaj noj tshoob tuaj txhij, mas lawv kaw qhov rooj thiab pib ua tshoob.
Yos Xes mloog Tswv Ntuj lus zoo xws li Mab Liab. Mab Liab tuaj yeem ua Tswv Ntuj tus ntxhais txib. Yos Xes kuj tuaj yeem ua Tswv Ntuj tus tub txib thiab. Peb qhuas tias lub caij ntawd, Tswv Ntuj txawj xaiv ib co neeg uas lawv muaj lub siab zoo txais ib txog hmoov loj. Yos Xes yog ib tug txiv neej tsim txiaj kawg. Nws yuav Mab Liab los ua nws poj niam, tab sis nws paub tias Mab Liab yog tus yug tus yuav cawm ntiaj teb neeg, ces Yos Xes hwm nws poj niam lub cev, nws tsis kov Mab Liab lub cev li. Nws zoo saib ua li ntawd tas ib sim neej, vim nws to taub zoo tias Tswv Ntuj xaiv nws los ua ib tug pab coj Tswv Ntuj Leej Tub los ua neeg nyob ntiaj teb no. Nws thiaj tuaj yeej coj lub neej zoo li nyob tab seeb nrog Mab Liab thiab Yes Xus.
Mab Liab thiab Yos Xes yog 2 tug piv txwv zoo pab cov neeg ntseeg kom txawj coj lub neej tsim txiaj. Ua ntej ntawm nkawd yuav sib sau ua nkawd lub neej nyob ua ke, mas twb yeej sib hais haum lawm. Nkawd thiaj nyob tau ua ke raws li peb hnov los no. Nkawd yeej xub sib tham tias yuav muaj tub muaj kiv, ces nkawd npaj siab tos txog hnub nkawd sib yuav. Li ntawd, thaum nkawd sib yuav tau, mas niam mloog txiv hais, txiv kuj mloog niam qhuab. Peb thiaj yuav vam txog Mab Liab thiab Yos Xes nkawd txoj hmoov zoo thiab mus xyaum ua raws nkawd tus lwj lwm.
Peb tau hnov ib zaj nyob hauv Mas Tais ntawv Moo Zoo zoo li no, mas ntshai coob leej yuav txais tsis tau thiab yuav xav tias yog dag. Peb ua neeg nyob, yog yus cia li mus yuav ib tug poj niam uas yus tsis tau deev, tab sis nws xeeb tub mas ntshai tsis yooj yim. Yus yeej yuav tsum xav tias tus hluas nkauj ntawd, yog deev lwm tus hluas nraug xwb thiaj xeeb tub tau. Hos Mab Liab los yeej xav tias nyob nyob nws cia li xeeb tub, mas ntshai Yos Xes yeej tsis kam yuav nws lawm. Xyov Yos Xes puas ntseeg nws siab. Tab sis qhov tiag, Mab Liab tsis tau ntsib ib tug txiv neej twg li. Yos Xes thiab Mab Liab nkawd sib qhaib raws kev cai, tab sis nkawd kuj tsis tau sib ntsib thiab nyob ua ke. Vim Yos Xes yog ib tug kws ntoo, ces nkawd nyias muaj nyias hauj lwm. Yog vim Mab Liab thiab Yos Xes yog neeg siab ncaj thiab mloog Tswv Ntuj Lus, ces nkawd mloog thiab ua raws li Ntuj tus Tshiab xa lus tuaj rau nkawd.
Chiv thawj Yos Xes xav muab Mab Liab nrauj ntsiag to thiab tsis yuav, tab sis yog vim Yos Xes mloog Tswv Ntuj lus, nws tsis xav kom zej zog xyav Mab Liab lub moo tsis zoo. Yos Xes zoo siab txais Mab Liab los ua nws poj niam. Nkawd 2 leeg ua lub neej sib hlub thiab sib pab, ib tug tsis tib ib tug. Nkawd zoo siab tos txog lub caij Mab Liab daws cev, thiab yug tus me tub. Tej yam no, yog ib yam xwm zoo uas phim peb yuav yoog raws Mab Liab thiab Yos Xes nkawd tus piv txwv. Peb yuav xyaum qhib peb lub siab kom dav fo thiab mloog Tswv Ntuj Lus. Peb thiaj yuav ua tau ib yim neej nyob sov siab tsis muaj chaw sib tib.
