1. LUB KOOM TXOOS QHOV NPOG

1. Yes Xus yog lub teeb kaj tas txhua haiv neeg.
Peb tsoom Tswv Qhia uas tau tuaj sib sau ntawm no, peb txiav siab tshaj lub Moo Zoo rau tas txhua leej txhua tus nyob ntiaj teb no. Ntiaj teb neeg sawv daws thiaj yuav tau txais Leej Pleev txoj kev pom kev tuaj kaj sawv daws lub siab. Peb ntseeg khov kho tias ‘Tswv Ntuj vam txog lub Koom Txoos los pab txhawb nqa tas txhua haiv neeg sawv daws, kom xwv thiaj li npuab tau Tswv Ntuj lub siab. Tsis tas li ntawd, Tswv Ntuj tseem siv lub Koom Txoos pab nres tas txhua leej txhua tus nyob ntiaj teb no kom xwv lawv thiaj npuab Tswv Ntuj lub siab thiab’. Yog vim qhov ntawd, peb yuav tau tshaj lus txog lub Koom Txoos tej dej num uas hlub neeg, kom xwv tas ntiaj teb neeg npuab Yes Xus Pleev lub siab.

2. Leej Txiv lub hom phiaj cawm ntiaj teb neeg.
Ib txwm los, Huab Tais Leej Txiv lub siab zoo heev, nws thiaj tsim tas ib puas tsav yam nyob ntiaj teb no thiab nyob saum ntuj. Huab Tais Leej Txiv yeej xav txhawb nqa tas txhua haiv neeg, kom xwv sawv daws tau kev mus nrog Tswv Ntuj koom txoj sia.
Tab txawm tib neeg poob hauv qhov txhaum yog vim As Das, los tsis kav Huab Tais Leej Txiv tsis tau tso neeg pov tseg. Huab Tais Leej Txiv tau pub txiaj ntsim ntau heev los rau tas ntiaj teb neeg tag mus li. Qhov hais no, mas yog Leej Pleev, uas yog ntiaj teb neeg tus Cawm Seej.
Cov neeg uas ib txwm los Tswv Ntuj xub paub lawv thiab Tswv Ntuj xaiv lawv los ua Tswv Ntuj tug, mas Tswv Ntuj faib txoj hmoov zoo rau lawv, kom xwv lawv thiaj yuav yoog raws li nws Leej Tub tus piv txwv. Qhov kawg, ces nws Leej Tub yuav muaj ib tsoom kwv coob coob, hos Yes Xus yuav yog sawv daws tus tij laug.
Cov neeg ntseeg txog Yes Xus Pleev, mas Tswv Ntuj tau hu lawv los ua lub Koom Txoos Ntshiab.
Li ntawd, lub Koom Txoos Kav Tos Liv thiaj tau tshwm sim tuaj, yog vim Leej Ntuj Plig Ntshiab tej txiaj ntsim. Ua li mas thaum txog hnub kawg, ces lub Koom Txoos thiaj yuav tau txais Tswv Ntuj lub hwj chim los ua nws tug.

3. Leej Tub cov hauj lwm.
Txij thaum tseem tsis tau tsim ntuj tsim teb, mas Tswv Ntuj tau xaiv peb nyob hauv nws Leej Tub, uas yog Yes Xus Pleev lawm. Li ntawd, Tswv Ntuj xub txiav siab tias peb yuav ua nws cov tub ki tshiab nyob hauv Leej Pleev. Huab Tais Leej Txiv xav kom txoj kev ntshiab dawb huv no tsheej xeeb tuaj, kom xwv nws coj tas txhua yam nyob saum ntuj thiab nyob ntiaj teb no los zwm rau tib tug tswv, uas yog tus Tswv Ntuj khuv leej neeg tas nrho(EFX 1: 4-10). Tswv Ntuj thiaj xa nws Leej Tub Yes Xus yug los ua neeg nyob ntiaj teb no, ces Yes Xus thiaj tuaj yeem leg nws Txiv tej hauj lwm. Nws thiaj tau ua kom Tswv Ntuj lub Ceeb Tsheej pib muaj tuaj nyob ntiaj teb no ib yam nkaus. Tsis tas li ntawd, Yes Xus tseem tau qhib Tswv Ntuj lub Ceeb Tsheej uas ib txwm los tau muab npog tseg cia tsis pub rau ntiaj teb neeg paub. Yes Xus tau mloog Leej Txiv lus tom thawj mus txog qhov kawg, ces nws thiaj txiav siab ua lub luag hauj lwm cawm neeg kom dim ntawm qhov txhaum tiav tag raws li Leej Txiv Tswv Ntuj siab xav.
Yog vim lub Koom Txoos Kav Tos Liv, ces Tswv Ntuj lub Ceeb Tsheej thiaj muaj tuaj nyob hauv lub sim ceeb no. Tswv Ntuj lub txiaj ntsim kuj tau nqes los pab txhawb nqa lub Koom Txoos, kom nws loj hlob mus zuj zus. Li ntawd, tsim nyog peb yuav tau nco txog qhov tob no tias lub Koom Txoos txhawv ntawm Yes Xus lub siab lub plawv los thiab nws yeej yog raws li peb pom nyob hauv Ntawv Moo Zoo tias “Thaum tus tub rog xuas rab hmuv nkaug Yes Xus phab tav, mas tam sis ntawd ib cov ntshav thiab ib cov dej tawm los” (Z 19: 34). Qhov no, yog Yes Xus xub hais txog nws txoj kev uas yuav tuag nyob saum ntoo cuam, ces Yes Xus thiaj tias “Ntawm kuv, mas thaum luag yuav tsa  siab rau saum ntiaj teb, mas kuv yuav rub tas ib tsoom neeg los cuag kuv” (Z 12: 32) Yog vim li no, peb yuav zoo siab ntseeg tias “Yes Xus tau muab nws lub neej los txi rau Ntuj, ces Yes Xus thiaj yog peb Txoj Kev Hla”  (1 KLN 5: 7).
Txhua txhia zaus yog peb cov neeg ntseeg nquag sib sau los teev hawm Tswv Ntuj nyob hauv Thaj Txi Ntuj Ntshiab, mas peb thiaj li yuav loj hlob zuj zus rau hauv txoj kev cawm. Li ntawd, mas thaum peb los mus txais lub Cim Yug, peb yuav tau nco ntsoov sib koom siab koom ntsws, xws li tus Hauv Paus Xa Lus Paj Lug lo lus tias “Muaj tib lub ncuav mov xwb, ces peb sawv daws kuj yuav tsum koom ua ib lub cev thiab xwb. Peb sawv daws koom ua ib lub cev, yog vim peb sawv daws xav txais tib lub ncuav mov ntawd” (1 KLN 10: 17).

4. Leej Ntuj Plig pab kom lub Koom Txoos rov ntshiab.
Leej Ntuj Plig Ntshiab yog Tswv Ntuj lub tswv yim uas pub txoj sia rau tas ntiaj teb neeg thiab nws yog thooj li lub qhov dej txhawv uas pub txoj sia tas mus li rau tib neeg nyob ntiaj teb no. Yes Xus thiaj tau tshaj tias “Leej twg nqhis dej, kom nws tuaj cuag kuv. Leej twg ntseeg txog kuv, mas kom nws haus.Tej yam no yuav tshwm sim tuaj raws li Ntawv xub hais tseg tias ib cov niam dej muaj txoj sia yuav txhawv ntawm nws lub hauv siab los”(Z 7: 37-38).Ua li mas peb yuav tau nco ntsoov tias yog vim muaj Leej Ntuj Plig Ntshiab, ces Leej Txiv thiaj pub txoj sia rau tas ntiaj teb neeg, kom xwv sawv daws tau kev dim ntawm txoj kev ua txhaum. Huab Tais Leej Txiv tau pab ntiaj teb neeg zoo li ntawd, mus txog hnub nws yuav tsa cov neeg tuag lub cev kom sawv rov los nyob rau hauv Yes Xus Pleev. Tus Hauv Paus Xa Lus Paj Lug tseem hais tias “Yog vim Tswv Ntuj tsa Yes Xus uas nws twb tuag lawm sawv rov qab los, mas Tswv Ntuj lub tswv yim thiaj nyob txawm hauv ntiaj teb neeg, ces yav tom ntej Tswv Ntuj tseem yuav pub txoj sia rau tib neeg lub cev tuag, vim Leej Ntuj Plig Ntshiab nyob txawm hauv tib neeg”(LM 8: 10-11). Li ntawd, peb thiaj yuav tsum khaws tej lo lus tseem ceeb tias Leej Ntuj Plig Ntshiab, uas yog Tswv Ntuj lub tswv yim, nws yeej nyob txawm hauv lub Koom Txoos thiab nws kuj nyob txawm hauv cov neeg ntseeg txhua tus lub siab tas mus li. Peb ntseeg li no, kuj yog vim Ntawv Ntshiab sau cia tias tib neeg yog Tswv Ntuj lub tuam tsev, Leej Ntuj Plig thiaj los nyob txawm rau hauv tib neeg lub siab (1 KLN 3:16). Tsis tas li ntawd, nyob rau hauv cov neeg ntseeg lub siab, mas Leej Ntuj Plig Ntshiab kuj niaj hnub thov Huab Tais Leej Txiv kom peb sawv daws hu Tswv Ntuj ua ‘As Npas’, ces Leej Ntuj Plig Ntshiab thiaj zeem tseeb tias peb yog Tswv Ntuj cov me nyuam (LM 8:15-16).
Leej Ntuj Plig Ntshiab tseem yuav coj lub Koom Txoos mus taug txoj kev tseeb tag huv tib si thiab kom muaj raws li Yes Xus tej lus uas nws tau cog tseg rau ntiaj teb neeg tias “Thaum Leej Ntuj Plig Ntshiab uas nws qhia qhov tseeb tuaj txog, mas nws yuav coj tas ntiaj teb neeg mus rau qhov tseeb tag huv tib si” (Z 16: 13). Yeeb vim tias peb muaj Leej Ntuj Plig qhib peb qhov muag, ces peb thiaj li pom tseeb tias Tswv Ntuj ua kom cov neeg ntseeg sib hlub thiab sib haum xeeb. Li ntawd, nyob rau hauv lub Koom Txoos, peb thiaj pom muaj ntau yam hauj lwm rau sawv daws ua, tab sis tsuas yog Leej Ntuj Plig Ntshiab tib leeg xwb uas nws pub kom txhua yam hauj lwm ntawd sib dhos tau raws siab xav. Yog vim li no, ces Ntawv Ntshiab thiaj xub cim tseg tias Tswv Ntuj pub ntau yam txiaj ntsim, tiam sis yog tuaj ntawm Leej Ntuj Plig tib leeg tuaj xwb, ces nyob rau hauv lub Koom Txoos yuav muaj ntau txoj kab xwm tshwm sim, tab sis yog tuaj ntawm tib tug Huab Tais tuaj. Yog vim li ntawd, ces Tswv Ntuj thiaj ua cov hauj lwm no rau tas ntiaj teb neeg (1 KLN 12: 4-6).
Leej Ntuj Plig Ntshiab yog tus pab lub Koom Txoos kom xwv txhua yam rov nthuav thiab tshiab tuaj, uas yuav tsis muaj caij tag ib zaug li thiab Leej Ntuj Plig Ntshiab kuj coj lub Koom Txoos hau kev, kom xwv lub Koom Txoos rov npuab Leej Txiv Tswv Ntuj lub siab zuj zus. Yog vim li ntawd, ces cov thawj coj hauv lub Koom Txoos thiab cov pej xeem ntseeg thiaj tsis ncaim ntawm Tswv Ntuj.
Qhov tias niaj hnub no lub Koom Txoos cov thawj coj thiab cov pej xeem huab hwm sawv daws sib koom siab koom ntsws los ua ke, mas yog ib lub txiaj ntsim uas Huab Tais Leej Txiv, Huab Tais Leej Tub thiab Huab Tais Leej Ntuj Plig Ntshiab pub rau lub Koom Txoos. Li ntawd, cov neeg ntseeg Ntuj uas nyob rau hauv lub Koom Txoos Kav Tos Liv, sawv daws thiaj yuav tsum tau los sib hlub thiab sib pab tsim kev vam meej thiab kev thaj yeeb rau ib zeej tsoom hauv tej zej zos thiab hauv lub teb chaws uas sawv daws nyob raws li Tswv Ntuj siab xav.

5. Tswv Ntuj lub Ceeb Tsheej.
Nyob rau hauv haiv neeg His Xas Lais, mas Tswv Ntuj tau cog lus tseg tias “Tswv Ntuj yuav txhim tsa Tswv Ntuj lub Ceeb Tsheej los kho tib neeg ntiaj teb tej nplooj siab nplooj ntsws.” Yog vim li no, ces lub caij Yes Xus tau mus tshaj Tswv Ntuj lub Moo Zoo rau ib zeej tsoom, Yes Xus thiaj tau xub hais tseg tias “Thaum txog lub caij teem, mas Tswv Ntuj lub Ceeb Tsheej kuj los txog ze ze, kom sawv daws hloov siab tig los ntseeg txog Tswv Ntuj lub Moo Zoo mog” (MK 1: 15).
Yog vim Yes Xus lo lus, tej hauj lwm, thiab lub neej tas huv tib si; mas lub Ceeb Tsheej thiaj ci ntsa iab tuaj nyob nruab nrab hauv neeg.
1. Yes Xus tau tshaj lub Moo Zoo.
Yes Xus hais tias lub Moo Zoo uas hais txog Tswv Ntuj lub Ceeb Tsheej, mas yog zoo ib yam li cov noob nplej, uas muaj neeg coj mus tseb thiab poob rau saum tej thaj av sib txawv. Yog tias peb tsis kub siab txais Tswv Ntuj Lo Lus, mas peb yuav tsis yog cov tau txais txoj hmoov zoo. Tab sis yog tus twg muab siab rau mloog Tswv Ntuj Lo Lus, mas tus ntawd yuav tau txais Tswv Ntuj lub Ceeb Tsheej los ua nws tug, ces peb Txiv nyob saum ntuj kuj yuav nrog nws zoo siab.
2. Yes Xus cov hwj huam yees ntxwv ua los pab neeg.
Hais txog tej yam hwj yuam yees ntxwv uas Yes Xus tau ua thaum nws tshaj Tswv Ntuj lub Moo Zoo nyob ntiaj teb no, mas muaj ntau zaug kawg, xws li no:
2.1 Yes Xus tau kho ib tug neeg mob ruas kom rov huv tuaj (MT 8: 1-4).
2.2 Yes Xus kho ib tug neeg tuag ceg thiab Yes Xus daws nws cov txhaum (MK 2: 1-12).
2.3 Yes Xus ua kom mov ntsu tuaj (MT 14-13-21).
2.4 Yes Xus ua kom cua daj cua dub rov tus yees (MT 8: 23-27).
2.5 Yes Xus tau tsa 3 tug neeg tuag sawv rov los.
2.6 Yes Xus tau ua kom dej txia ua cawv nyob Kas Nas.
Qhov tseeb tiag nyob hauv Ntawv Moo Zoo cov Hauv Paus Xa Lus tau khaws tseg mas Yes Xus tau ua hwj huam yees ntxwv los pab neeg coob tshaj no. Tsis tas li ntawd, nyob rau hauv Ntawv Moo Zoo kuj tseem muaj ib lo lus tseem ceeb hais li no tias  “Yes Xus mus ncig txhua cov nroog thiab cov zos huv si, nws tau qhia sawv daws nyob hauv cov tsev txoos, nws tshaj lub Moo Zoo txog Ntuj lub Ceeb Tsheej, nws tseem kho sawv daws tej txiab xeeb thiab tej mob nkeeg tas huv si. Yes Xus pom tsoom pej xeem, mas nws hlub lawv kawg, vim tias lawv sawv daws sab thiab qaug zog luj luas zoo yam li ib cov yaj uas tsis muaj tswv zov” (MT 9:35-36).
Lo lus tias ‘Yes Xus tseem kho sawv daws tej txiab xeeb thiab tej mob nkeeg tas huv si’, no zoo qhia rau peb tias lub caij uas Yes Xus ua hwj huam yees ntxwv li ntawd los pab kho neeg, mas yog ib yam ua puav pheej tau tias ‘twb txog lub caij uas Tswv Ntuj nqes los cawm neeg ntiaj teb lawm’. Li ntawd, Yes Xus cov hwj huam yees ntxwv uas tau ua los pab ntiaj teb neeg, kuj zoo qhia tias ‘Tswv Ntuj lub Ceeb Tsheej kuj nqes los txog ntiaj teb no lawm tiag thiab’.
3. Yes Xus muab nws txoj sia los txi Ntuj, ces hnub 3 Yes Xus sawv rov los thiab nws xa Leej Ntuj Plig Ntshiab tuaj nrog cov thwj tim nyob.
Txhua txhia lub caij uas peb ntsia saum Yes Xus tus ntoo cuam, mas peb haj yam zoo siab thiab ntseeg tias “Yes Xus Pleev, uas nws yog Tswv Ntuj Leej Tub, nws tau muab nws txoj kev nyiam kev hlub uas muaj zog tag nrho los tsob hwb luag tej thiab nws tau muab nws txoj sia los ua nqe txhiv coob leej, ces tom qab uas cov neeg siab phem iab hiam Yes Xus thiab muab nws tua tuag rau saum ntoo cuam, mas hnub 3 Tswv Ntuj thiaj tau tsa Yes Xus sawv rov los txais Tswv Ntuj lub hwj chim.” Yog vim li ntawd, Yes Xus yuav tsis rov tuag ntxiv lawm, vim txoj kev tuag tsis muaj cuab kav rov tuaj raug Yes Xus ntxiv.
Ua li mas txij hnub ntawd los mus, Yes Xus yog tus Huab Tais Pleev thiab yog tus tuam Leej Choj uas khuv leej neeg tag nrho mus ib txhiab ib txhis, xws li Ntawv Hes Nplaws sau tseg tias “Yes Xus muaj txoj sia nyob mus li thiab nws thov Ntuj los pab txhua haiv neeg huv tib si” (HN 7: 25).
Tom qab ntawm Yes Xus nce mus saum ntuj lawm, Yes Xus tau tso Leej Ntuj Plig nqes los rau saum cov thwj tim raws li lo lus uas ib txwm los Huab Tais Leej Txiv xub cog tseg, ces txij ntawd los mus thiaj muaj Tswv Ntuj lub Ceeb Tsheej nyob rau hauv ntiaj teb no.
Tswv Ntuj lub Ceeb Tsheej hauv ntiaj teb no, yog dab tsi?
Tswv Ntuj lub Ceeb Tsheej hauv ntiaj teb no, mas yog Yes Xus lub Koom Txoos, ces lub Koom Txoos no thiaj li tau txais Tswv Ntuj cov txiaj ntsim ua ntus zus los mus txog rau niaj hnub nyem no thiab tseem yuav muaj nyob mus ib txhiab ib txhis tsis paub kawg.
Lub Koom Txoos no kuj yuav thooj li ntawv sau tseg tias ‘Muaj ib lub noob zaub roj, uas chiv thawj mas me tshaj plaws, tab sis ntev mus ces lub noob zaub roj uas me me no yuav loj tuaj tsheej xeeb ua ib tsob ntoo faj khaum loj, ces yuav muaj tas puas tsav yam noog ya los ua zes rau saum tej ceg ntoo uas muaj ntxoov ntxoo’. Li ntawd, niaj hnub nyem no lub Koom Txoos kuj loj hlob hlav kaus zuj zus tuaj raws li Tswv Ntuj tau npaj tseg tiag thiab lub Koom Txoos kuj tos nrhw txog lub caij uas tas ntiaj teb neeg rov nrog Yes Xus Pleev sib koom los ua ib tsev neeg loj nyob rau hauv Tswv Ntuj lub Ceeb Tsheej, ces sawv daws yuav ua ke txais Tswv Ntuj lub hwj chim thiab cov txiaj ntsim mus ib txhiab ib txhis.

6. Lub Koom Txoos piv tau rau dab tsi.
1. Lub Koom Txoos thooj li yog ib lub nkuaj yaj.
Nyob rau hauv Ntawv Moo Zoo, mas Yes Xus tau qhia tias lub Koom Txoos thooj li yog lub nkuaj yaj. Hos cov neeg ntseeg mas thooj li yog pab yaj uas muaj Yes Xus yog tus Tswv Zov Yaj.
Yes Xus hais ntxiv tias “Kuv yog lub qhov rooj, tus twg nkag ntawm kuv mus rau hauv lub nkuaj yaj, mas nws yuav txais kev cawm. Nws yuav nkag tau rau hauv lub nkuaj yaj thiab kuj yuav muaj peev xwm tawm los nrhiav tau lub tshav zaub mos”, mas cov lus no txhais tias “Yes Xus, yog tus qhib qhov rooj txais sawv daws tib si mus rau hauv nws lub Koom Txoos, mas nyob rau hauv lub Koom Txoos, ntiaj teb neeg tib si yuav txais tau Tswv Ntuj cov txiaj ntsim uas cawm neeg.”
Tsis tas li ntawd, Ntawv Moo Zoo kuj tseem hais ntxiv tias Yes Xus tuaj ua kom ntiaj teb neeg tau txoj sia loj zuj zus thiab Yes Xus yog tus Zoo Tswv Zov Yaj. Tus Zoo Tswv Zov Yaj, mas nws siv nws txoj sia los pab nws cov yaj. Yog vim li ntawd, Yes Xus thiaj li siv nws txoj sia los txi Ntuj rau saum ntoo cuam, kom tau kev theej ntiaj teb neeg lub txhaum, ces Yes Xus thiaj siv nws txoj sia los cawm nws cov yaj saum tus ntoo cuam.
Ua li mas cov neeg ntseeg yuav tau nco ntsoov saib Yes Xus tus ntoo cuam thiab peb yuav tau qhuas txog Yes Xus txoj kev nyiam kev hlub uas muaj zog tas nrho los ua piv txwv hlub peb sawv daws cov tsev neeg thiab luag tej tias “Tus zoo tswv tsev thiab tus zoo niam tsev, mas nws yeej kam siv nws txoj sia los hlub thiab pab txuag nws cov me nyuam kom kawg siab kawg ntsws. Hos tus nom tswv uas zoo, yeej kam siv nws txoj sia los hlub luag tej ib yam li Yes Xus tus lwj lwm.”
Vim Yes Xus txoj kev hlub li no, yuav ciaj sia nyob mus ib txhiab ib txhis, ces yog leej twg txais Yes Xus los nyob hauv nws nruab siab thiab nws qhib siab rau Yes Xus cov lus los txhim kho nws tej siab ntsws, mas tus neeg ntawd yuav tau txais Tswv Ntuj txoj sia nyob mus li los ua nws tug.
2. Lub Koom Txoos thooj li yog ib daim teb.
Nyob rau hauv daim teb uas yog Yes Xus lub Koom Txoos, mas muaj ib tsob ntoo txiv cawv. Yes Xus hais tias “Kuv yog tsob txiv cawv, nej yog cov ceg”, mas txhais tias Yes Xus yog lub hauv paus, hos peb cov neeg ntseeg mas yog thooj li cov ceg. Cov ceg no yuav loj hlob thiab yuav txi txiv tau, yuav tsum yog txuas rau tus kav uas yog lub hauv paus, mas thiaj li muaj dej nce mus yug cov ceg kom txi txiv. Ua li mas, peb yuav tsum to taub tias yog peb tsis kam muab peb lub neej thiab txoj sia mus txuas rau Yes Xus, mas peb yuav thooj li tsob ntoo uas tsis loj hlob thiab yuav tsis txi txiv, vim tias tsis muaj dej mus yug cov ceg.
Yes Xus hais tias “Nyob hauv kuv, txoj hmab twg tsis txi txiv, kuv Txiv yuav muab txiav pov tseg. Yog leej twg tsis nyob hauv kuv, luag yuav muab nws pov tseg rau sab nraud, xws li tus ceg khaub nws yuav qhuav. Luag yuav sau cov ceg qhuav ntawd mus pov rau hauv hluav taws kom kub hnyiab.” Yog vim li ntawd, Yes Xus thiaj xaus lus tias “Yog nej ncaim ntawm kuv mus lawm, mas nej yuav ua tsis tau dab tsi.”
Thaum peb muab peb lub neej los txuas rau Yes Xus lawm, mas peb yuav tau npuab Tswv Ntuj cov lus tiag tiag, kom peb txawj nyiam Tswv Ntuj thiab txawj ua zoo rau luag tej, kom tsim nyog peb yog Tswv Ntuj ib cov me nyuam uas muaj lub siab zoo thiab tsim txiaj, uas yoog tau raws li Yes Xus tus piv txwv.
3. Lub Koom Txoos thooj li yog Tswv Ntuj ib lub tuam tsev.
Nyob rau hauv Ntawv Ntshiab, Tswv Ntuj tau qhia peb tias “Lub Koom Txoos, mas yog Tswv Ntuj lub tsev, vim tias Tswv Ntuj nrog neeg nyob nraim” (QYTN 21: 3). Vim peb yog Tswv Ntuj lub tuam tsev, ces tas ntiaj teb neeg tib si tsis hais cov neeg tawv daj, tawv dawb thiab tawv dub; sawv daws thiaj sib koom los nyob ua ke rau hauv Yes Xus lub Koom Txoos, uas yog thooj li ib tsev neeg loj, vim Yes Xus tau xub hais tseg tias “Nej sawv daws tib si yog ib cov kwv tij, vim nej tsuas muaj ib leeg Txiv xwb, uas yog tus Huab Tais nyob saum ntuj” (MT 23:8). Li ntawd, peb yuav tau ua raws li Yes Xus cov lus, txhob saib leej twg qis qis, txhob ntxub ib tug twg kiag li thiab txhob xaiv koj pab kuv pawg. Vim cov neeg uas xaiv koj pab kuv pawg, tshwj yam zoo rau yus, hos muab yam phem rau luag, mas hom neeg no tsis muaj Tswv Ntuj nyob rau hauv nws lub siab.
Tus Hauv Paus Xa Lus Paj Lug kuj sau tseg tias “Nej tsis yog ib cov pej kum neeg, los ib cov qhua ntxiv, nej yog Tswv Ntuj tsev neeg uas nyob hauv Leej Ntuj Plig Ntshiab” (EFX 2:19-22). Tsis tas li ntawd, Paj Lug tseem hais ntxiv tias “Leej Ntuj Plig Ntshiab yog peb txoj sia, peb yuav cia Leej Ntuj Plig Ntshiab coj peb kev ua neej.” Ua li mas peb yuav tau nco ntsoov txog Tswv Ntuj cov lus kom zoo zoo, peb thiaj li txawj rov zoo siab ua Tswv Ntuj tsev neeg uas nyob kaj siab lug hauv Tswv Ntuj lub Koom Txoos.
Tus Hauv Paus Xa Lus Paj Lug tseem hais ntxiv txog kev teev Ntuj nyob hauv lub tswv yim, tias “Kuv tuav txog tus Tswv Ntuj khuv leej neeg lub npe, kuv thov qhuab ntuas nej, kom nej muab tag puas tsav yam hauv nej lub neej los txi rau Tswv Ntuj, zoo li ib cov txim ntshiab muaj txoj sia uas ntxim Tswv Ntuj lub siab. Qhov ntawd, yog txoj kev teev Ntuj nyob hauv nruab siab tiag tiag” (LM 12:1). Li ntawd, peb twb yog Tswv Ntuj tsev neeg, mas peb tej dej num uas tseem ceeb tshaj plaws, kuj yuav tsum yog kev teev hawm Tswv Ntuj nyob hauv peb lub tswv yim, mas peb thiaj txawj hwm Ntuj thiab hwm neeg.
Tus Hauv Paus Xa Lus Paj Lug tseem hais tias “Yes Xus Pleev hlub nws lub Koom Txoos, ces nws thiaj tau muab nws txoj sia los cawm lub Koom Txoos, nws xav kom lub Koom Txoos ci ntsa iab tshiab tshiab tuaj, kom lub Koom Txoos tsis tsuas ib tee qias thiab txhob muaj ib yam xyeej, ces Yes Xus thiaj li ua kom lub Koom Txoos ntshiab huv zuj zus tuaj” (EFX 5:25-28).
Yeeb vim peb yog cov tub tes tub taw hauv Tswv Ntuj lub tuam tsev, uas yog Yes Xus lub Koom Txoos, mas peb thiaj ntseeg ti txha tias “Yes Xus yeej niaj hnub muab nws tej kev hlub uas muaj zog tas nrho los txhim kho peb tej nplooj siab nplooj ntsws kom dawb huv tas mus li, kom tsim nyog peb ua Tswv Ntuj cov me tub me nyuam uas zoo nyob hauv Tswv Ntuj lub tuam tsev.”
Yog vim li no, tas nrho cov Tswv Qhia huv tib si thiaj li muaj ib qib lus sau tseg tias “Yes Xus tau pab txhawb nqa lub Koom Txoos, kom xwv peb to taub Yes Xus txoj kev nyiam kev hlub tias dav li cas, ntev li cas, siab txij li cas thiab tob li cas.”

7. Lub Koom Txoos yog Leej Pleev lub cev hlob.
Thaum peb tig los txais lub Cim Ntxuav ua neeg ntseeg Ntuj nyob rau hauv lub Koom Txoos Kav Tos Liv lawm, mas yog peb rov tsim dua ib lub neej tshiab uas los nrog Yes Xus koom nws lub cev loj hlob. Yog vim li ntawd, lub Rooj Ncauj Lus thiaj muaj ib nqe lus tseem ceeb tias “Peb koom nrog Leej Pleev, uas yog Tswv Ntuj Leej Tub, vim nws tau nqes los ua neeg xws li peb thiab nws tau ua nws lub luag hauj lwm cawm neeg. Vim tias nyob hauv nws txoj kev tuag thiab txoj kev sawv rov qab los, mas Yes Xus tau ua ib ntsug rog ntaus txoj kev tuag, ces thaum kawg nws thiaj tau txais kev yeej. Yog vim Yes Xus txoj kev yeej, mas neeg ntiaj teb thiaj li tsim tau ib lub neej tshiab.”
Nqe lus no txhais tias “Peb niaj hnub yuav tsum ntseeg txog Yes Xus txoj kev tuag nyob saum ntoo cuam thiab ntseeg txog txoj kev sawv rov los, vim Yes Xus yog tus Huab Tais cawm tas ntiaj teb neeg kom dim ntawm kev ua txhaum thiab pab kom neeg rov tsim dua ib lub neej tshiab.”
Yog vim li ntawd, cov hauj lwm uas peb niaj hnub ua, mas peb thiaj yuav tsum tso rau Yes Xus los pab txhim kho peb tej siab ntsws, kom xwv peb rov plhis dua ua ib tug neeg tshiab nyob rau hauv peb lub neej, ces peb thiaj li yuav tsum niaj hnub thov Yes Xus coj peb kev ua neej tas mus li.
Tus Hauv Paus Xa Lus Paj Lug thiaj hais tias “Nyem no mus mas ib tug neeg twg yog tig los nyob hauv Leej Pleev lawm, mas nws yuav rov plhis dua lub neej tshiab. Hos tus qub neeg, mas yuav ploj ntais mus. Rau qhov ib tug tshiab yuav tawm tuaj nyob mus li hloov tus qub neeg, ces niaj hnub no nej thiaj pom muaj ib cov neeg ntseeg tshwm sim tuaj tshiab tshiab nyob rau hauv Yes Xus Pleev lub Koom Txoos” (2 KLN 5:17, NLT 6: 15).
Nqe lus no txhais tias “Peb niaj hnub yuav tau tso tus yam ntxwv qub uas tsis kam ntseeg Ntuj kiag li pov tseg, kom peb sawv daws tig los mloog Tswv Ntuj lub Moo Zoo, ces muaj ntau haiv neeg thiab kuj muaj peb ib cov Hmoob ntseeg Ntuj sawv los coob coob nyob hauv Yes Xus lub Koom Txoos.”
Ua li mas cov neeg ntseeg Ntuj sawv daws yuav tsum saib lub Cim Ntxuav muaj nqes, vim tias nyob hauv lub Cim Ntxuav ntawd mas muaj Yes Xus txoj sia nqes los rau hauv peb tej siab ntsws.
Lub Rooj Ncauj Lus tau hais tias “Thaum peb txais Yes Xus nyob rau hauv lub Thaj Txi Ntuj, mas peb yuav tau koom nrog Yes Xus Pleev ua ib lub siab.” Nqe lus no mas kom txhua txhia Hnub Chiv, peb tsis txhob nruam kev teev Ntuj kiag li, vim yog ib lub caij zoo rau peb nco ntsoov txog Yes Xus lo lus tias “Tus noj kuv lub cev thiab haus kuv cov ntshav, mas nws yuav muaj txoj sia nyob mus li”, ces Yes Xus yuav los nyob hauv nws thiab nws yuav nyob hauv Yes Xus. Leej Txiv uas nws muaj txoj sia, nws tau xa Yes Xus tuaj, ces Yes Xus thiaj muaj txoj sia vim Leej Txiv. Li ntawd, tus noj Yes Xus lub cev, nws kuj yuav muaj txoj sia, vim Yes Xus (Z 6: 54-57).
Cov Tswv Qhia tseem muab tus Hauv Paus Xa Lus Paj Lug cov lus tias “Muaj coob leej nyob hauv Yes Xus Pleev thiab sib koom ua ib lub cev. Peb sawv daws yog cov tes taw uas rov sib pab sib nres thiab los sib koom ua txoj hauj lwm (1KLN 10: 17+ LM 12: 5). Nqe lus no txhais tias “Tib neeg mas muaj tib lub cev xwb, tab sis muaj tes muaj taw thiab muaj ntau yam nyob rau hauv lub cev. Li ntawd, nyob rau hauv Yes Xus Pleev kuj zoo tib yam li ntawd.”
Ua li mas peb uas yog cov tes taw nyob rau hauv lub Koom Txoos, tsim nyog peb yuav tau sib pab sib nres kom xwv lub Koom Txoos loj hlob zuj zus thiab kom xwv lub Koom Txoos rov ntshiab zuj zus tuaj.
Tsoom Tswv Qhia kuj tau tshaj lus tias “Kawg yog Leej Ntuj Plig Ntshiab tib leeg xwb, uas nws muab txoj hauj lwm los faib rau ib zeej tsoom raws li sawv daws lub siab nyiam, ces Leej Ntuj Plig Ntshiab thiaj yog tus pab txhawb nqa lub Koom Txoos, kom xwv tas ntiaj teb neeg thiaj sib koom siab koom ntsws thiab sib nyiam sib hlub.” Li ntawd, nyob hauv peb lub Koom Txoos, yog tias muaj ib tug twg raug kev mob nkees, mas cov neeg ntseeg sawv daws thiaj li mus koom siab ua ke thov Ntuj rau tus neeg mob ntawd. 
Cov Tswv Qhia tseem sau tseg tias hauv Yes Xus lub cev, yam li nyob rau hauv lub Koom Txoos, mas sawv daws yuav sib pab txhawb nqa kom xwv txhua haiv neeg thiaj tau txais kev cawm, ces thiaj muaj raws li tus Hauv Paus Xa Lus Paj Lug cov lus tias “Yes Xus tsa cov ntshiab los ua ntau txoj kab xwm, kom xwv lawv tau kev txhim Leej Pleev lub cev. Thaum txhim tau Leej Pleev lub cev tiav lawm, mas sawv daws yuav loos los ua tib tug xwb nyob hauv txoj kev ntseeg thiab txoj kev paub Tswv Ntuj Leej Tub, ces sawv daws yuav yog ib cov neeg zoo txhij zoo txhua, vim Yes Xus lub cev hlob tiav lawm.” Li ntawd, peb yuav tau ua neeg mus raws qhov tseeb thiab nyob nraim hauv txoj kev nyiam, peb thiaj loj hlob nyob hauv txhua txoj kev uas mus tshwm rau Leej Pleev, vim tias Yes Xus yog lub taub hau.
Ua li mas tas lub cev huv tib si, yuav sib dhos thiab sib txuas ua ke nyob rau hauv Leej Pleev, vim muaj ntau txoj leeg yug thiab tuav lub cev, ces cov leeg ntawd puav leej txhib lub cev kom ua zog, kom nyias ua nyias txoj hauj lwm yug lub cev kom loj hlob, ces lub cev thiaj maj mam rov txhim nws nyob hauv txoj kev nyiam (EFX 4: 12-13+15-16).
Lub Rooj Ncauj Lus tseem hais ntxiv tias “Yes Xus Pleev tau muab nws txoj sia los cawm lub Koom Txoos, ces Yes Xus thiaj yeem tuag kom xwv tib neeg rov muaj dua ib lub siab tshiab. Vim Yes Xus xav kom lub Koom Txoos ci ntsa iab uas tsis muaj ib tee dub txuam. Yes Xus kuj tsis xav cia lub Koom Txoos ntsej muag txoom, ces Yes Xus thiaj ua kom lub Koom Txoos tshiab tshiab mos nyoos tas mus li.” Li ntawd, Yes Xus thiaj vam txog peb sawv daws huv tib si los txhim kho lub Koom Txoos kom ntshiab zuj zus tuaj, ces cov hlob nyias thiaj muaj nyias cov hauj lwm sib txawv, hos cov tub ntxhais hluas nyias kuj muaj nyias txoj hauj lwm sib txawv nyob rau hauv Yes Xus lub Koom Txoos.
Tsis tas li ntawd, lub Rooj Ncauj Lus hais ntxiv tias “Tswv Ntuj lub hwj huam, nyob txawm hauv tib neeg lub cev, ces tas ntiaj teb neeg thiaj nyob rau hauv Leej Pleev thiab tib neeg thiaj tau txais Tswv Ntuj lub hwj huam.” Yog vim li ntawd, mas peb vam tias sawv daws yuav tau khaws cov lus no tseg thiab sawv daws yuav tau ntseeg tias peb muaj Tswv Ntuj lub hwj huam nyob txawm rau hauv peb tej siab ntsws, ces tib neeg thiaj li muaj peev xwm txhim kho kom lub Koom Txoos ntshiab zuj zus tuaj.
Ua li mas thaum twg uas peb muaj kev tsis sib haum, mas peb yuav tau sib zam thiab ua kom sawv daws rov sib haum xeeb dua, ces yam twg uas zoo mas peb yuav qhuas txog qhov ntawd thiab yuav muab siab rau sib pab txhawb kom qhov ntawd loj hlob zuj zus tuaj. Yog peb ua li no, mas peb tau ua haum Tswv Ntuj lub Moo Zoo lawm, ces peb lub neej yuav loj hlob zuj zus thiab Yes Xus lub Koom Txoos kuj yuav loj hlob zuj zus tuaj. Ntev mus, cov neeg nyob ib ncig ntawm peb lawv yuav pom thiab kuj yuav ntshaw txog lub neej tshiab uas peb tau tig los mloog Tswv Ntuj lub Moo Zoo.
Yes Xus hais rau Pob Zeb tias “ Xis Moos, Yos Nas tus tub, koj txoj hmoov zoo, vim qhov koj paub no tsis yog nqaij thiab ntshav qhia koj, yog kuv txiv nyob saum ntuj qhia koj. Ua li mas kuv hais rau koj tias koj yog Pob Zeb, kuv yuav txhim kuv lub Koom Txoos rau saum lub pob zeb no. Txoj kev tuag lub hwj huam yuav tiv tsis tau lub pob zeb no. Kuv yuav muab Ntuj lub Ceeb Tsheej cov yawm sij rau koj. Koj khi yam twg nyob ntiaj teb no, Ntuj yuav saib yam ntawd yog khi nyob saum ntuj. Koj daws yam twg nyob ntiaj teb no, Ntuj yuav saib yam ntawd daws nyob saum ntuj thiab.”
Cov lus no txhais tias Yes Xus xub paub tias tsis ntev mas nws yuav rov mus saum ntuj, ces Yes Xus thiaj vam txog Pob Zeb pab ua tus ntaus thawj saib nws lub Koom Txoos rau hauv ntiaj teb no.
Yes Xus hais rau tus Hauv Paus Xa Lus Pob Zeb tias “Xis Moos, Yos Nas tus tub, koj puas nyiam kuv dua lawv cov ntawd?” Pob Zeb kuj teb rau Yes Xus tias “Huab Tais, koj paub tias kuv yeej nyiam koj tiag.” Yes Xus thiaj hais rau Pob Zeb tias “Koj coj kuv cov me nyuam yaj, mus noj zaub mog.” Yes Xus kuj rov hais zaum ob tias “Xis Moos, Yos Nas tus tub, koj puas nyiam kuv?” Pob Zeb kuj rov teb rau Yes Xus li qub tias “Huab Tais, koj paub tias kuv yeej nyiam koj tiag tiag.” Yes Xus kuj rov hais rau Pob Zeb tias “Koj zov kuv cov yaj mog!”
Tsis tas li ntawd, Yes Xus tseem rov hais zaum peb tias “Xis Moos, Yos Nas tus tub, koj puas nyiam kuv tiag?” Pob Zeb rov teb Yes Xus tias “Huab Tais, koj paub tas ib puas tsav yam thiab koj yeej paub tias kuv nyiam koj tiag tiag.” Yes Xus kuj hais rau Pob Zeb tias “Koj coj kuv cov yaj mus noj zaub mog!”
Cov lus no qhia rau peb sawv daws tias Yes Xus vam txog Xis Moos Pob Zeb thiab cov Hauv Paus Xa Lus los ua ib cov Zoo Tswv Zov Yaj, raws li Yes Xus tus lwj lwm, kom lawv sib pab tshaj Tswv Ntuj lub Moo Zoo rau tas ntiaj teb neeg.

8. Lub Koom Txoos muaj ib sab peb pom tau, muaj dua ib sab peb tsis pom.
Yes Xus lub Koom Txoos, mas muaj ib sab peb yeej ntsia pom tiag tiag, yam li yog cov neeg ntseeg Kav Tos Liv uas muaj Vaj Qhia ua sawv daws tus ntaus thawj thiab Vaj Qhia tshaj Tswv Ntuj lub Moo Zoo mus raws qhov tseeb. Tsis tas li ntawd, tseem muaj ntau yam kab ke teev Ntuj thiab 7 lub Cim Ntshiab uas pab nqa Tswv Ntuj cov txiaj ntsim cawm neeg mus rau tas txhua haiv neeg. Dua li tseem muaj kev sib nyiam sib hlub, sib pab sib nres thiab kev uas sawv daws sib koom tes mus pab cov neeg txom nyem nyob rau ntau lub teb chaws.
Li ntawd, qhov uas muaj neeg coob coob nyob thoob ntiaj teb zoo siab ntseeg txog Tswv Ntuj thiab ua tub tes tub taw nyob rau hauv Yes Xus lub Koom Txoos, mas yog vim lub Koom Txoos ua cov hauj lwm raws li Yes Xus qhia thiab cov Hauv Paus Xa Lus tuav lub Koom Txoos raws li uas Yes Xus tus lwj lwm. Yog vim li ntawd, ces lub Koom Txoos Kav Tos Liv niaj hnub no thiaj muaj Vaj Qhia ua cov neeg ntseeg sawv daws tus ntaus thawj. Vaj Qhia yog tus sawv Pob Zeb chaw.
Txhua txhia hnub, Yes Xus tau xa Leej Ntuj Plig Ntshiab tuaj nres tsoom neeg ntseeg sawv daws tib si nyob hauv Yes Xus lub Koom Txoos. Li ntawd, cov neeg ntseeg Ntuj uas muaj Leej Ntuj Plig Ntshiab lub zog nres lawv, mas lawv yeej siv zog ua kom Yes Xus lub Koom Txoos loj hlob mus thiab vam meej zuj zus.
Yog vim li ntawd, mas fab no tib neeg ob lub qhov muag thiaj ntsia tsis pom, yam li thaum Leej Ntuj Plig Ntshiab tuaj tshoj cov neeg teev dab kom tig los ntseeg txog Tswv Ntuj, mas txhua tus tib neeg nyob ntiaj teb thiaj ntsia tsis pom. Vim tias tej yam no, yog Leej Ntuj Plig Ntshiab cov txiaj ntsim uas nws tau ua kom muaj coob leej txia ntshis los ua Tswv Ntuj cov me nyuam nyob hauv Yes Xus lub Koom Txoos.
Lub Rooj Ncauj Lus tseem tau tshaj lus tias “Tus pab cev lus rau Tswv Ntuj, mas tsuas yog Leej Pleev tib leeg xwb, vim Yes Xus nyob txawm hauv Tswv Ntuj thiab ntiaj teb neeg kis nruab nrab, ces niaj hnub no mas Leej Pleev thiaj tsim thiab pab roos nws lub Koom Txoos Ntshiab uas nyob ntiaj teb no kom nthuav dav thiab vam meej zuj zus. Li ntawd, Yes Xus Pleev thiaj ua cov hauj lwm ntawd tas mus li.”
Yes Xus lo lus kawg hais rau nws cov thwj tim thaum nws yuav nce mus saum ntuj tias “Nej qhia kom lawv coj tas puas tsav yam lus kuv tau qhia rau nej. Hos ntawm kuv, mas kuv niaj hnub yuav nrog nraim nej nyob mus txog lub zim txwv ntiaj teb kawg.”
Yog vim Yes Xus pheej xeeb rau nws tej lus uas tau hais tseg rau nws cov thwj tim, mas cov neeg ntseeg niaj hnub no thiaj li yuav tsum sib koom los taug txoj kev ntseeg txog Tswv Ntuj, taug tib txoj kev tso siab thiab tib txog kev sib nyiam sib hlub. Li ntawd, thiaj muaj coob coob leej zoo siab ua tub tes tub taw nyob hauv lub Koom Txoos Kav Tos Liv, vim lub Koom Txoos pab Yes Xus Pleev thiab pab Leej Ntuj Plig, kom xwv Ntuj txoj sia tau kev nqes los nyob rau hauv cov neeg ntseeg tej siab ntsws, ces cov neeg ntseeg hauv Yes Xus lub Koom Txoos yuav maj mam loj hlob mus zuj zus thiab vam meej zuj zus.
Yes Xus Pleev yog tseem Tswv Ntuj, tiam sis nws muab nws lub hwj chim hle, ces nws yeem nqes los ua neeg xws li ib tug qhev. Tab txawm Yes Xus yog Tswv Ntuj Leej Tub, uas nyob ntawm Tswv Ntuj xub ntiag, Yes Xus yog tus nplua nuj tshaj plaws, tsis kav nws tuaj yeem nqes los rau ntiaj teb xaiv lub neej xws li ib tug neeg pluag pluag thiab txom txom nyem, kom xwv ntiaj teb neeg xyaum taug Yes Xus tus lwj lwm, kom sawv daws txawj ua ib lub neej nplua nuj zuj zus nyob hauv txoj kev sib nyiam sib hlub, uas Tswv Ntuj xav kom muaj zoo li ntawd. Ua li mas nyob hauv Lus Kas phau ntawv Moo Zoo, mas Yes Xus tus thwj tim thiaj muaj lo lus sau tseg tias “Huab Tais Leej Txiv tau xa Leej Pleev mus tshaj lub Moo Zoo rau cov neeg txom nyem thiab xa lus rau cov neeg uas lawv tu siab rau txoj kev lawv tau ua txhaum, kom tig los ntseeg txog Tswv Ntuj tej lus thiab tig los ua neeg zoo, ces lub neej yuav rov zoo zuj zus tuaj.”
Yog vim li ntawd, lub Moo Zoo thiaj hais tias “Yes Xus txhob txwm nrhiav cov neeg ploj, kom lawv tau kev dim.” Li ntawd, mas peb sawv daws yuav tau xyaum yoog raws li Yes Xus tus piv txwv, xws li peb yuav tau hlub cov neeg muaj mob uas lawv raug kev txom nyem loj thiab cov neeg pluag pluag, ces tsim nyog peb yuav tau nco ntsoov tias “Lub caij twg los xij, uas peb pab cov neeg txom nyem, yog thooj li peb ib txhij pab Yes Xus kiag, ces Huab Tais Leej Txiv yuav foom hmoov zoo rau peb sawv daws lub neej.”
Tsis tas li ntawd, kom peb nco ntsoov Yes Xus lo lus tias “Nej tau ua npaum li cas rau cov me tshaj hauv kuv tsoom kwv, mas yog nej tau ua rau kuv lawm” (MT 25: 40).