(2XM 18: 9, 30- 19: 4; MK 5: 21-43)
Tus poj niam tsob ntshav, nws vam txog cov kws tshuaj kho nws tus mob, nws sim ntau tus kws tshuaj, nws siv nws cov nyiaj txiag tas los ntiav lawv kho nws. Nws ua li ntawd 12 xyoos lawm, nws txom nyem tas nrho vim raws Mais Xes Txoj Cai, mas cov poj niam lub caij tsob ntshab lawv yog neeg tsis huv, nws tsis muaj cai mus ntsib mus fim leej twg, nws tsis muaj cai kov leeg twg; tab yog luag tej tsoos tsho nws kov tsis tau. Tus poj niam muaj ib tug mob li ntawd, nws tsis tau kev vam txog leej twg pab nws. Tau ob peb hlis los lawm, nws hnov zeej tsoom piav txog ib tug hu ua Yes Xus. Tus Yes Xus ntawd siab zoo, tab txawm yog tej tus neeg tsis huv xws li cov neeg mob ruas, mas Yes Xus kov lawv thiab kho lawv kom zoo hlo. Tus poj niam tsob ntshav hnov luag piav tias Yes Xus tsis nyiam Mais Xes Txoj Cai cais neeg, lawv cais cov neeg mob ruas, cais cov poj niam los ntshav, cais cov neeg teev dab, cais cov tub tseem hwv pab cov Los Mas. Lawv cais neeg, lawv kuj caiv toob xib, caiv ntau yam hauj lwm. Yes Xus tsis nyiam tej txoj cai cais neeg thiab txoj cai caiv ub caiv no. Sawv daws paub tias Yes Xus tshaj rau zeej tsoom tias tsuas muaj tib txog cai xwb; yog koj yuav nyiam Tswv Ntuj tas siab tas zog thiab yuav hlub tsoom txheeb ze xws li koj rov hlub koj.
Tus poj niam tsob ntshav, nws hnov luag hais Huab Tais Yes Xus, nws tso siab tias Huab Tais Yes Xus yuav hlub nws. Tus poj niam xav tias “Hnub twg Yes Xus tuaj nyob hauv peb lub zos, ntshai kuv yuav hla qhov caiv, kuv yuav thov nws pab kho kuv.”
Muaj ib hnub uas tus poj niam pom zej zog mus ntsauv Huab Tais Yes Xus. Nws tsis hais dab tsi rau leej twg. Nws ua ib siab maj mam nkag hauv pab neeg, nws tuaj txog ze ntawm Huab Tais Yes Xus nraub qaum, ces nws xav twj ywm tias “Tab yog kuv tau kov nws lub tsho xwb, mas kuv yeej yuav dim ntawm kuv tus mob!”
Tus poj niam nyob ze Huab Tais Yes Xus. Tus poj niam khoov cev kov Huab Tais Yes Xus tw tsho. Ua cas tus poj niam hnov zoo li ib lub zog mus thoob nws lub cev; nws paub tam sis ntawd tias nws qhov los ntshav tu nrho lawm. Nws zoo siab.
Ntawm Yais Los, nws xav coj Huab Tais Yes Xus mus kho nws tus ntxhais sai sai. Huab Tais Yes Xus tab tom yuav rau siab mus, tab sis muaj tej tus tuaj ntawm Yais Los tsev tuaj, lawv hais rau Yais Los tias nws tus ntxhais tsis nyob lawm, kom nws txhob txob Huab Tais Yes Xus ntxiv. Lawv tsis xav tias Huab Tais Yes Xus yuav pab tau tus ntxhais ntxiv. Tab sis Yais Los tseem tso siab tias Huab Tais Yes Xus yuav pab tau. Huab Tais Yes Xus pom tias Yais Los tso siab zoo dua nws cov neeg uas nyuam qhuav tuaj txog. Huab Tais Yes Xus hais rau Yais Los tias “Koj txhob txhawj! Tsuav yog koj ntseeg.”
Nyob hauv zaj no, peb pom tias Huab Tais Yes Xus ua hwj huam kho ib tug neeg mob thiab rov pub txoj sia rau ib tug neeg tuag. Huab Tais Yes Xus ua tau li ntawd, vim nkawd tso siab rau nws. Ob zaj hwj huam ntawd, kuj yog 2 lub cim qhia peb tias Huab Tais Yes Xus kho tau peb lub siab tsis huv xws li nws tau kho tus poj niam tsob ntshav, Huab Tais Yes Xus ua tau kom peb lub siab rov nyiam Tswv Ntuj yam li kom peb lub siab rov muaj ntuj txoj sia xws li nws ua tau kom tus me ntxhais rov muaj txoj sia.
Huab Tais Yes Xus hais rau tus poj niam tsob ntshav tias “Koj lub siab ntseeg cawm koj lawm” thiab hais rau Yais Los tias “Koj txhob txhawj, tsuav yog koj ntseeg.” Peb yuav to taub ob lo lus ntawd zoo li no:
1. Vim koj ntseeg, mas koj tus mob thiaj zoo hlo lawm.
2. Vim koj ntseeg, ces koj tuaj cuag kuv, kuv tsa koj sawv thiab muaj txoj sia.
3. Vim koj ntseeg, koj tso siab, koj tsis muab hlob, mas kuv ua raws li koj xav.
Tus poj niam tsob ntshav, nws kov Huab Tais Yes Xus, ces nws thiaj zoo hlo. Huab Tais Yes Xus cev tes tuav tus me ntxhais, ces nws thiaj rov muaj txoj sia. Tej ntawd, zoo qhia peb tias peb yuav coj peb lub siab los nyob ze ntawm Huab Tais Yes Xus, ces Huab TaisYes Xus yuav pub nws tej txiaj ntsim rau peb.
Zaj no yog ib zaj zoo txhib peb lub siab, kom peb txawj ua neeg ntseeg khov ntseeg ruaj. Yog peb muaj lub siab ntseeg khov kho, mas tab txawm peb raug xwv txheej loj, tsis kav peb txawj ua siab loj, vim peb ntseeg tias Huab Tais Yes Xus lub hwj huam pab peb. Yog tus poj niam tsob ntshav nws hnov luag tham txog Huab Tais Yes Xus, tab sis nws tsis muaj lub siab ntseeg, nws puam chawj, mas ntshai nws tus mob yeej yuav tsis txawj zoo. Tab sis vim tus poj niam tsob ntshav muaj lub siab ntseeg khov kho, nws muaj kev tso siab tias Huab Tais Yes Xus yeej yuav tsum kho tau nws. Thaum tus poj niam cev tes mus kov raug Huab Tais Yes Xus lub tsho, mas nws tus mob plam plaws ntawm nws, kuj yog vim nws lub siab ntseeg thiab Yes Xus lub hwj huam pab cawm nws.
Yais Los cov neeg tuaj caum nws thiab qhia nws tias nws tus me ntxhais twb tuag lawm. Huab Tais Yes Xus nrog Yais Los mus hauv Yais Los tsev. Huab Tais Yes Xus hais tias “Tus me ntxhais no tsis tuag, nws pw tsaug zog xwb.” Zaj no xav qhia peb tias lub caij uas peb tag sim neej nyob ntiaj teb no, mas tsuas yog peb tsaug zog xwb. Yog peb tso siab rau Yes Xus, yog peb muaj lub siab ntseeg khov kho rau Tswv Ntuj, mas txog hnub kawg Tswv Ntuj yuav pub kom peb rov muaj txoj sia xws li tus me ntxhais ntawd.
