(2XM 24: 2-9; MK 6: 1-6)
Yog thaum Huab Tais Yes Xus kho tus poj niam tsob ntshav thiab kho tus nom saib lub tsev txoos tus ntxhais zoo lawm, mas nws rov qab los hauv lub zos Nas Xas Les uas nws ib txwm nyob hlob, Huab Tais Yes Xus xav qhia kom sawv daws paub Tswv Ntuj Leej Tub.
Thaum txog hnub Xas Npas Tos cov His Xas Lais mus teev Ntuj thiab kawm cov Yaj Saub tej lus qhuab qhia nyob hauv cov tsev txoos. Huab Tais Yes Xus kuj mus hauv lub tsev txoos, txog lub caij nyeem cov ntawv Ntshiab, nws nce mus nyeem ntawv thiab qhuab qhia sawv daws. Thaum tsoom sid hnov Huab Tais Yes Xus tej lus qhuab qhia, mas lawv qhuas kawg vim Yes Xus cov lus muaj hwj chim. Huab Tais Yes Xus cov lus qhuab qhia zoo tsis thooj li cov Fas Lis Xais uas lawv tau kawm txuj nyob Yes Lus Xas Les. Tsoom sid kuj tseem tau sib hais zom zaws tias Huab Tais Yes Xus tau txais tej ntawd qhov twg los.
Lawv hais li ntawd vim lawv tsis xav ntseeg tias Huab Tais Yes Xus yog Tswv Ntuj Leej Tub tuaj ntawm Tswv Ntuj tuaj, lawv pom Huab Tais Yes Xus yog Yos Xes thiab Mab Liav nkawd tus tub xwb, lawv tsis txawj tso siab rau Huab Tais Yes Xus.
Ua ntej Huab Tais Yes Xus yuav rov los hauv nws lub zos, mas cov neeg hauv lub zos yeej tau hnov luag tej cav tias Huab Tais Yes Xus ua hwj huam kho cov neeg mob zoo hlo, lawv kuj hnov Huab Tais Yes Xus ntiab dab rau cov neeg raug dab nyob qhov ub qhov no. Hnub no lawv thiaj taij kom Huab Tais Yes Xus ua hwj huam yees ntxwv pub rau lawv pom, tiam sis Huab Tais Yes Xus twb paub tias lawv yuav tsis ntseeg nws li, Huab Tais Yes Xus paub tias lawv tsuas xav pom nws ua hwj huam rau lawv saib kom lom zem xwb, ces Huab Tais Yes Xus tsis ua ib yam hwj huam dab tsi nyob hauv nws lub zos Nas Xas Les li.
Huab Tais Yes Xus paub tias lawv tsis xav ntseeg txog nws, ces Huab Tais Yes Xus thiaj li hais tej lo lus rau lawv kom lawv tau xav tswv yim, nws hais tias “Ib tug Yaj Saub tsuas raug luag thuam nyob hauv nws lub teb chaws thiab nws tsoom kwv tij.”
Ntshai twb muaj zaum puav uas yus tau ua xyem xyav txog Huab Tais Yes Xus xws li cov neeg hauv lub zos Nas Xas Les uas lawv ua xyem xyav.
Tej zaug yus tau xav tias Huab Tais Yes Xus puas yog Tswv Ntuj Leej Tub tiag?
Yog tias Huab Tais Yes Xus yog Tswv Ntuj Leej Tub tiag, mas xav kom nws ua hwj huam yees ntxwv rau yus pom tso, ces yus yuav ntseeg.
Yog leej twg xav sim Huab Tais Yes Xus zoo li no, mas nws yuav tsis tau txais tej yam nws xav pom li. Nws yuav tsis pom Huab Tais Yes Xus lub hwj chim kiag li, vim Huab Tais Yes Xus yuav tsis muab rau cov neeg xav sim nws. Hos Huab Tais Yes Xus pub nws tej txiaj ntsim rau tus neeg txawj tso siab rau Huab Tais Yes Xus tiag. Yog li no mas thaum Huab Tais Yes Xus tawm tuaj xyuas nws cov thwj tim, nws thiaj hais rau Tos Mas tias “Tus tsis tau pom tiam sis nws ntseeg mas nws txoj hmoov zoo.”
Ua li mas peb yuav tsis txhob sim Tswv Ntuj, tiam sis peb tso siab rau Huab Tais Yes Xus mus li. Niaj hnub peb vam txog Huab Tais Yes Xus tuaj pab peb. Yog yus ntseeg thiab tso siab rau Huab Tais Yes Xus tiag, mas yus yuav tau txais Huab Tais Yes Xus cov txiaj ntsim, yuav tau txais kev pab ntawm Huab Tais Yes Xus.
Peb tab tom ua lub neej nyob ntiaj teb no, peb qhov muag pom tsis tau Huab Tais Yes Xus tab sis peb lub tswv yim mem tau tias Huab Tais Yes Xus yog tus muaj lub hwj chim ci ntsa nyob saum Ntuj, vim niaj zaus uas yus vam txog Huab Tais Yes Xus, mas Huab Tais Yes Xus lub hwj chim tuaj roos yus.
Yog yus xav paub Huab Tais Yes Xus kom zoo dua, mas kuj muaj lwm txoj hau kev pab yus ua kom yus paub Huab Tais Yes Xus meej tuaj, txoj hau kev ntawd yog yuav kawm kev ntseeg. Thaum yus kawm Huab Tais Yes Xus cov lus thiab yus nyeem Yes Xus lub Moo Zoo, mas yus lub tswv yim yuav paub Huab Tais Yes Xus meej tuaj. Yog vim li no mas cov neeg ntseeg txog Yes Xus thiaj li nquag kawm kev ntseeg thiab nquag nyeem Yes Xus Lub Moo Zoo.
Yog yus xav paub Huab Tais Yes Xus, mas yus yuav tsum ua neeg me, tsis khav theeb, tsis muab hlob. Lub caij yus vam txog Huab Tais Yes Xus pab yus, mas yus tso siab rau Huab Tais Yes Xus tiag tiag, yus yuav tsis kaw yus lub siab, tiam sis yus yuav zoo siab txais tej yam tuaj ntawm Tswv Ntuj tuaj.
Tus neeg yuav ntsib Huab Tais Yes Xus kawg yog tus neeg tsis muab hlob, tus txawj tso siab rau Huab Tais Yes Xus, thiab tus uas ntseeg txog Yes Huab Tais Xus xwb thiaj yuav tau txais tej yam nws thov.
Niaj zaus Huab Tais Yes Xus kho ib tug neeg mob, mas nws hais tias “Koj lub siab ntseeg cawm koj lawm”, vim li no thiaj hais tias tus yuav tau txais kev pab yog tus neeg txawj tso siab rau Huab Tais Yes Xus thiab muaj lub siab ntseeg txog Huab Tais Yes Xus tiag.
Yog yus txawj tso siab rau Huab Tais Yes Xus, mas yus lub siab ntseeg yuav cawm yus, ces yus yuav pom Huab Tais Yes Xus lub hwj chim thiab nws txog kev hlub, yus kuj yuav tau txais tej yam yus thov ntawm nws.
Kom peb nco ntsoov tias yus yuav qhib yus lub siab kom dav fo, yus rau siab kawm Yes Xus lub Moo Zoo, yus vam txog Huab Tais Yes Xus tuaj pab, yus tsis muaj hlob tsis khav theej, yus yeem ua neeg me, nyiam Tswv Ntuj thiab hlub luag tej.
