(1V 2: 1-4, 10-12; MK 6: 7-13)
Huab Tais Yes Xus xub xa nws cov thwj tim mus tshaj lub Moo Zoo rau cov His Xas Lais tso, vim Tswv Ntuj ib txwm xub xaiv haiv His Xas Lais los ua Tswv Ntuj haiv neeg. Tswv Ntuj xub xaiv haiv His Xas Lais, ces phim Huab Tais Yes Xus yuav xub cev txoj kev cai tshiab rau cov His Xas Lais tso.
Huab Tais Yes Xus tau tshaj lub Moo Zoo rau cov His Xas Lais ua ntej, tsis kav nws tsis tso cov pej kum neeg pov tseg, nws yuav pab lawv thiab. Li ntawd, thaum Huab Tais Yes Xus sawv rov los thiab yuav mus lawm saum ntuj, nws thiaj li txib cov thwj tim kom li mus tshaj lub Moo Zoo rau txhua haiv neeg.
Huab Tais Yes Xus cov thwj tim yog ib co neeg uas tau raws Huab Tais Yes Xus ntev hauj sim, lawv tau hnov Huab Tais Yes Xus cov lus qhia thiab lawv tau pom Huab Tais Yes Xus ua ntau yam hwj huam pab tsoom pej xeem.
Hnub no Huab Tais Yes Xus xa lawv mus tshaj lub Moo Zoo, Huab Tais Yes Xus pub kom lawv muaj hwj chim ntiab dab tau. Huab Tais Yes Xus tseem qhia ob peb yam rau lawv, ces nws cia lawv mus tshaj lub Moo Zoo.
Huab Tais Yes Xus pub hwj huam rau cov thwj tim. Cov hwj huam ntawd yog tej lub cim tias Tswv Ntuj xav cawm sawv daws.
Yog peb muab Mas Tais, Mas Kos, thiab Lus Kas lawv 3 leeg cov lus coj los ua ke, mas peb thiaj hnov Huab Tais Yes Xus cov lus txhij dua. Lawv 3 leeg hais sib txawv me ntsis, tab sis lawv puav leej xav piav txog ib lub ntsiab xwb, yam li cov tub tshaj Ntuj Lus tsuas yuav tej yam pab tshaj Ntuj Lus xwb, lawv tsis ua zam zoo, tsis coj tej yam muaj nqes kom luag tej qhuas; cov tub tshaj Ntuj Lus yuav saib Yes Xus lub Moo Zoo yog yam muaj nqes thiab tsim txiaj dua puas tsav yam; cov tub tshaj Ntuj Lus txhob nqa dab tsi nrog lawv li vim tej ntawd yuav khaum txoj kev tshaj Ntuj Lus.
Huab Tais Yes Xus qhia tias Tswv Ntuj lub Ceeb Tsheej muaj nqes tshaj tas txhua yam. Li ntawd, cov tub tshaj Ntuj Lus yuav tsum coj tus yam ntxwv phim cov neeg saib tas puas tsav yam tsis muaj nqes npaum lub Moo Zoo. Cov tub tshaj Ntuj Lus nco ntsoov tias lawv tsuas nqa tej yam pab tshaj Ntuj Lus xwb, lwm yam mas txhob yuav.
Cov tub tshaj Ntuj Lus ua Tswv Ntuj cov hauj lwm, lawv yog ib co neeg coj lub neej pluag. Li ntawd, tsim nyog cov kwv tij hauv lub Koom Txoos yuav pab yug cov tub tshaj Ntuj Lus kom lawv ua tau Tswv Ntuj tes hauj lwm vim tias tus tub zog tsim nyog txais nws pluas mov noj.
Tus twg txais cov tub tshaj Ntuj Lus, mas tsis yog nws txais ib tug qhua xwb, tab sis yog nws txais Huab Tais Yes Xus. Tus twg mloog cov tub tshaj Ntuj Lus, mas yog nws mloog Huab Tais Yes Xus cov lus.
Huab Tais Yes Xus kuj qhia rau cov Hauv Paus Xa Lus tias lawv yuav raug xwv txheej zoo li cas. Huab Tais Yes Xus hais tias yuav muaj ib co neeg tsis xav txais nws, lawv yuav hais lus xaiv txog lub Koom Txoos, los lawv yuav hiam cov tub tshaj Ntuj Lus. Huab Tais Yes Xus kuj qhia tias cov Hauv Paus Xa Lus yuav ceev faj, lawv yuav ua neeg xyuam xim thiab yuav ua neeg siab ncaj.
Huab Tais Yes Xus xa lawv mus ua tej pab 2 leeg, vim nws pom tias yog 2 leeg mus ua ke mas thiaj li zoo dua, nkawd tau kev sib pab zoo dua; tej lub caij uas ntsib kev nyuaj los muaj neeg tsis kam txais lub Moo Zoo, mas nkawd 2 leeg yuav tau kev sib txawb zog, ces nkawd lub siab thiaj yuav muaj zog tuaj. Peb tsoom kwv tij uas tub tshaj Ntuj Lus, mas Tswv Ntuj tau pub ib lub zog rau sawv daws huv tib si, muaj ntau zaus uas Tswv Ntuj pab peb ua peb tej hauj lwm; yog thaum peb coob leej sib pab ua tes hauj lwm ntawd.
