(NXL 47: 2-11; MK 6: 14-29)
Peb lub Koom Txoos ntseeg Kav Tos Liv, mas peb hwm tus Ntxuav Plig Zam yog tus nyiam Tswv Ntuj Lo Lus tas siab tas ntsws vim nws txiav txim siab coj lub neej tsis hlub txog nws lub cev, nws noj dog dig, nws hnav dog dig, nws yog tus Yaj Saub tshaj txoj kev ncaj raws Mais Xes txoj cai rau cov His Xas Lais nyob raws tus niam dej Yos Las Das. Zam yog tus tau ntuas cov neeg nyob Yus Das teb, kom lawv npaj siab tos Leej Pleev uas yuav tuaj.
Zam yog thawj tus neeg xub paub tias Huab Tais Yes Xus yog Leej Pleev. Nws pom Leej Ntuj Plig Ntshiab nqes los rau saum Huab Tais Yes Xus thaum Huab Tais Yes Xus txais kab ke ntxuav ntawm nws thiab hnov Huab Tais Leej Txiv lub suab nrov saum ntuj tuaj tias “Tus no yog kuv Leej Tub uas kuv nyiam kawg.”
Zam yog tus tau qhia thawj 2 tug thwj tim kom nkawd paub Huab Tais Yes Xus thiab nrog Huab Tais Yes Xus tham ib tog hnub. Zam yog tus tso chaw rau Huab Tais Yes Xus tshaj txog Tswv Ntuj lub Ceeb Tsheej. Zam hais tias “Kuv tsis tsim nyog daws Yes Xus cov hlua khau.”
Zam yog tus muaj cuab kav tshaj txoj kev ncaj rau cov nom tswv mloog. Thaum lawv hnov Zam tshaj txog txoj kev ncaj, mas lawv yuav muab nws tua, tab sis nws tsis ntshai, nws pheej tshaj txoj kev ncaj tas zog. Zam tib leeg yog tus yeem tuag ua tim khawv txog txoj kev ncaj.
Peb yuav xyaum ua xws li Zam Ntxuav Plig, peb yuav ua tim khawv txog Tswv Ntuj txoj kev ncaj. Vim txoj kev ncaj yog txoj kev coj peb mus cuag Tswv Ntuj. Tswv Ntuj cov lus tsis tau coj peb mus taug txoj kev yuam kev. Tswv Ntuj cov lus coj peb mus taug txoj kev ncaj. Yog qhov tseeb uas tsim nyog peb yuav khaws tseg nyob hauv peb nruab siab thiab tso peb lub siab npuab Tswv Ntuj xws li Zam Ntxuav Plig.
Peb yuav ua neeg xyuam xim txhob lam hais lus cuav thiab txhob cog lus ua dog dig xws li tus vaj Hes Los. Yog vim Hes Los cog lus rau sawv daws hnov, ces nws khuv xim Zam kawg. Tab sis vim nws cov lus cog tseg, ces nws tsis pom qab yuav ua li cas thiab thim tsis tau nws cov lus rov qab. Qhov kawg, nws thiaj ua ib siab cia cov tub rog txiav Zam lub taub hau los rau Hes Los Dias tus ntxhais raws li nws tau cog lus. Tej yam no yog ib qho piv txwv zoo qhia kom peb txawj ua neeg xyuam xim thiab txhob ua dog ua dig tsam peb yuam kev, ces peb thim tsis tau rov qab xws li tus vaj Hes Los.
