(1V 3: 4-13; MK 6: 30-34)

Huab Tais Yes Xus cov thwj tim mus tshaj lub Moo Zoo rau cov zej zog uas nyob tsis deb tsis ze ntawm lub pas dej Nkas Lis Lais. Cov thwj tim rov los txog tsev, lawv piav rau Huab Tais Yes Xus tias lawv tau tshaj lub Moo Zoo zoo li cas.

Ua ntej no, Huab Tais Yes Xus mus txhua Nkas Lis Lais teb, nws qhia kev cai hauv lawv cov tsev txoos, nws tshaj lub Moo Zoo hais txog lub Ceeb tsheej. Huab Tais Yes Xus kho tas puas tsav yam mob thiab puas tsav yam txiab nkeeg hauv tsoom sid kom zoo hlo. Huab Tais Yes Xus lub koob meej nto moo lug mus puv tas teb chaws. Tsoom pej xeem coj cov neeg raug tas puas tsav puas yam mob thiab raug kev txhawj xeeb tib si tuaj cuag Huab Tais Yes Xus, ces muaj neeg coob coob raws Huab Tais Yes Xus. Nws hlub tsoom pej xeem, nws pom tsoom lawv zoo li pab yaj uas tsis muaj tus tswv saib xyuas. Yog cia pab yaj nyob li no xwb, mas tsis ntev yuav raug cov hma tom noj, thiab ntau tus yuav poob zoo tas; lawv yauv poob rau hauv txoj kev tuag uas yog txoj kev txhaum. Huab Tais Yes Xus hlub lawv, nws thiaj li tso nws cov thwj tim mus qhia sawv daws hauv tej zej zog. Huab Tais Yes Xus pub kom cov thwj tim ib txhij cawm tsoom pej xeem lub cev mob nkeeg, thiab cawm lawv tus ntsuj plig huv tib si.

Yav thaum ub, cov thwj tim tsuas yog ib co neeg puav ntse, lawv niaj hnub ntes ntses nyob hauv lub hiav txwv Nkas Lis Lais. Lawv yog ib co neeg liaj neeg teb, thiab yog tej tus neeg sau se. Lawv niaj hnub ua lawv tej hauj lwm, twb tsis muaj ib zaug uas lawv tau txais kev zoo siab npaum li zaum no.

Txij li cov thwj tim tau raws Huab Tais Yes Xus ib xyoos los txog tav no, mas cov thwj tim tsuas pom Huab Tais Yes Xus kho neeg mob, thiab hnov Huab Tais Yes Xus qhia Tswv Ntuj cov lus ntau ntau. Hos zaum no cov thwj tim tau ua ib cohauj lwm tseemceeb, lawv tshaj lub Moo Zoo rau hauv tej zej zos raws li lawv tus Xib Hwb Yes Xus.

Thaum muaj cov neeg raug dab tuaj cuag cov thwj tim, thiab thov kom lawv ntiab dab, mas cov thwj tim tuav txog Huab Tais Yes Xus lub npe los ntiab dab, ces tam sis ntawd dab phem cia li tawm plaws ntawm tus neeg raug dab. Tseem muaj cov neeg mob uas luag coj tuaj rau cov thwj tim thov Ntuj rau. Cov thwj tim tsa tes rau saum cov neeg mob, lawv tuav txog Huab Tais Yes Xus lub npe los kho mob, ces cov neeg mob nkeeg zoo lawm. Cov thwj tim xav tsis txog tias lawv yuav ua tau ib co hauj lwm loj zoo li no. Lawv tso siab rau Huab Tais Yes Xus, ces lawv kuj ua tau.

Huab Tais Yes Xus cov thwj tim nyob hauv luag tej zos ntau hnub, ces lawv rov qab los cuag lawv tus Xib Hwb, lawv qhuas txog tej yam uas lawv tau pom thiab lawv tau ua.

Huab Tais Yes Xus pom tias cov thwj tim tau ua cov hauj lwm tshaj Ntuj Lus rov qab los khw khwv, mas lawv yuav tsum so thiab lawv yuav tsum muaj caij rov kawm nws cov lus ntxiv. Li ntawd, Huab Tais Yes Xus thiaj li coj cov thwj tim mus rau ib qho chaw xu kev lawm.

Tab sis cov neeg pom Yes Xus thiab cov thwj tim caij nkoj mus, mas lawv mem tau tias Yes Xus thiab cov thwj tim yuav mus lawm qhov twg, ces cov neeg maj zeeg nrawm nroos mus taw rau qhov chaw uas Huab Tais Yes Xus lawv yuav mus. Huab Tais Yes Xus pom tsoom pej xeem, nws hlub lawv tas siab vim lawv zoo xws li ib co yaj tsis muaj tsw, tsis muaj tus saib xyuas. Huab Tais Yes Xus mloog nws lub siab hlub sawv daws.

Huab Tais Yes Xus yog tus Zoo Tswv Zov Yaj, nws yuav tu nws pab yaj. Nws yuav pub nws cov lus nyiaj lus kub rau lawv lub siab noj, ces nws qhia lawv ntev loo. Sawv daws mloog Huab Tais Yes Xus ib tog hnub, nws lub suab txeem nyob hauv sawv daws siab, nws cov lus nplij sawv daws siab.

Ntawm peb, mas peb yog ib cov neeg niaj hnub khwv ua noj ua haus, puas phim peb yuav nrhiav ib lb lub caij so me ntsis kom peb los siav?

Peb cov neeg ntseeg, mas peb ua hauj lwm 6 hnub, hos Hnub Chiv peb so ib hnub. Peb so ib hnub, mas tsis txhais tias peb nyob, noj, los pw twj ywm tsis ua dab tsis li. Peb tsis ua li ntawd!

Niaj Hnub Chiv, peb tso liaj teb tseg, tso peb tej hauj lwm uas peb niaj hnub khwv ua tseg, peb mus teev Ntuj thiab txais Huab Tais Yes Xus cov lus nyob hauv tsev teev Ntuj, peb koom ua Thaj Txi Ntuj.

Niaj hnub Chiv, peb ua li no, mas peb lub cev tau so me ntsis thiab peb lub siab tau txias Huab Tais Yes Xus cov lus, ces peb muaj ib lub siab thoob tsib txawj xav tom ntej tom qab, txawj nyiam, thiab txawj hlub luag tej dua. Hnub Chiv, mas peb cov neeg ntseeg txog Yes Xus ib txhij tau so thiab tau teev Ntuj.

Thov kom peb ua ib co neeg nyiam nrhiav Huab Tais Yes Xus, nyiam mloog Huab Tais Yes Xus thiab nyiam pab luag tej zoo li Huab Tais Yes Xus cov thwj tim uas nyiam tshaj Ntuj Lus thiab nyiam pab luag tej. Peb kuj ua zoo li tsoom pej xeem uas rau siab nrhiav kom tau mloog Huab Tais Yes Xus qhuab qhia.