Lub caij ntawd, cov ua Ntuj kev cai nyob sib xyaws nrog cov ua dab nyob hauv ib tsev neeg; qee zaus tus txiv ua dab, tus poj niam ua Yes Xus kev cai; los nyob hauv cov me nyuam muaj ob peb tug ntseeg txog Yes Xus. Qee zaus tus tswv tsev ua dab, ib tug qhev ua Ntuj kev cai.
Sawv daws sib xyaws nyob hauv zos; nyob hauv ib pawg muaj 50 los 100 lub tsev, mas muaj ob peb lub tsev ua Yes Xus kev cai. Qee zaus sawv daws paub hais tias ob peb lub tsev ntawd ntseeg txog Yes Xus, qee zaus tsis muaj leej twg paub.
Lawv sib xyaws nyob ntawm qhov chaw ua hauj lwm; nyob hauv ib lub tsev ua kab xwm, qee zaus yog tus thawj ua Ntuj kev cai, luag tej tsis ua. Nyob hauv ib pab tub rog muaj ib co ua Ntuj kev cai. Nyob hauv ib lub tsev kawm muaj ib co me nyuam ua Ntuj kev cai, los tus Xib Hwb ntseeg txog Yes Xus.
Nyob hauv tus vaj Los Mas lub tuam tsev kuj muaj neeg ua Ntuj kev cai. Tus vaj Dias Les Xias Nus (Diocletianus) nws poj niam ua Ntuj kev cai. Tej vaj Los Mas muaj ib tug los ob tug ua Ntuj kev cai kuj muaj.
Thaum txog xyoo 220 los 230 ib tug Xib Hwb qhia Ntuj kev cai hu ua ‘Tes Tus Lias Nus’ (Tertulianus) sau tej phau ntawv ntuas cov ntseeg kom lawv ua siab loj, thiab nws sau tej phau ntawv teb rau cov neeg teev dab uas lawv liam ub liam no txog cov neeg ua Ntuj kev cai; nws hais tias “Peb cov neeg ua Ntuj kev cai, peb tsis yog ib co neeg nyob ib cag. Peb niaj hnub mus tom khw, peb nyob hauv cov tshav nyob hauv nroog, peb mus nyob hauv cov tsev teev dab, peb nyob hauv cov tsev tsim tshuab, peb nyob hauv cov tsev luam, peb nyob hauv cov txwj laus, peb nyob hauv pab neeg kav teb chaws. Peb ua tas ib puas tsav yam hauj lwm; peb ua tus ntswj nkoj, peb ua tub rog, peb ua liaj ua teb, peb ua luam.”
Cov ua Ntuj kev cai nyob xyaw cov ua dab, mas ntau zaus nyuaj hauj sim. Nyob hauv cov tsev kawm ntawv, mas cov ua dab thuam thiab luag cov ua Ntuj kev cai. Nyob Los Mas tus vaj ua ib lub tsev kawm rau cov nom tswv cov me nyuam tau kawm ntawv. Nyob hauv cov me nyuam muaj ib tug hu ua ‘As Les Xis Mes Nos’ (Aleximenos) nws ua Ntuj kev cai, nws muaj ib tug npawg ua dab. Tus npawg xav luag As Les Xis Mes Nos, ces tus npawg sau ib tug duab nyob ntawm phab ntsa hauv tsev kawm; yog ib tug duab ntoo cuam thiab ib tug luj dai ntawm tus ntoo cuam, thiab muaj ib lo lus sau tias “As Les Xis Mes Nos tsev tus Huab Tais.” Tiam sis hnub tom qab, nyob hauv cov qab lo lus ntawd, As Les Xis Mes Nos ntxiv cov lus no rau tias “As Les Xis Mes Nos yuav teev nws tus Huab Tais ntawd mus li.” Tus duab thiab cov lo lus tseem nyob txog tav no (The Alexamenos graffito). Ua li, mas peb thiaj paub hais tias tab yog nyob hauv cov me nyuam, mas lawv kuj muaj lus sib cav txog Ntuj kev cai; cov ua dab thuam tiam sis cov ua Ntuj kev cai ua siab tawv ntseeg zoo li qhov qub.
Nyob hauv ib lub tsev tus txiv tsev tsis ua Ntuj kev cai, tus poj niam ua, mas ntau zaus tus txiv zoo siab rau qhov tias nws tus poj niam ua ib tug poj niam siab ncaj thiab mloog lus zoo. Tiam sis tus txiv tsis tshua zoo siab tso nws poj niam mus teev Ntuj thaum ib tag hmo Hnub Xya; tus txiv kuj hnov luag tej hais ntau lo lus phem txog cov neeg ntseeg txog Yes Xus lawv txoj kev mus teev Ntuj thaum ib tag hmo. Ib tug tswv kuj tsis zoo siab tso nws cov qhev mus teev Ntuj hmo ntuj, ces ntau zaus cov qhev nyiag mus teev Ntuj.
Ib tug tub luam ua Ntuj kev cai, nws xav mus txais nyiaj ntawm ib tug tub luam ua dab, mas tus ua dab xav kom tus ua Ntuj kev cai hu txog dab los cog lus hais tias nws yuav them rov qab xwb, tiam sis tus ua Ntuj kev cai yuav hu txog dab tsis tau, mas nws yuav ua zoo li cas. Ib tug neeg ntaus hlau, nws ua Ntuj kev cai, thaum cov ua dab tuaj thov kom nws ntaus tej twj teev dab, mas nws yuav ua zoo li cas. Ib tug txawj nhcuav nyiaj ua Ntuj kev cai, cov ua dab thuaj thov kom nws nchuav tej tus mlom teev dab, mas nws yuav ua zoo li cas.
Ib tug Xib Hwb qhia ntawv tiam sis nws kuj yuav tsum qhia kev cai nyob hauv nws lub tsev kawm thiab, nws puas yuav qhia txog kev teev dab los tsis qhia. Nyob hauv lub nroog uas muaj cov neeg ua Ntuj kev cai nyob, lawv nquam paj nquam nruas nyob hauv cov tshav ua si, lawv yuav muab neeg tua pov tseg; yog cov ua Ntuj kev cai tsis mus xyuas, mas yog zoo li lawv xav ntuas cov mus xyuas hais tias cov mus xyuas tej yam zoo li ntawd, mas lawv kuj ua phem. Ua li, mas cov neeg ntseeg txog Yes Xus puas yuav mus xyuas.
Muaj tej yam hauj lwm cov neeg ntseeg ua tsis tau kiag thiab cov Tswv Qhia txwv tsis kheev ua; yam li: Tsis kheev ua tswv tsev niam ntiav, tsis kheev puab mlom teev dab, tsis kheev sau duab teev dab, tsis kheev ua yees siv, tsis kheev ua Xib Hwb nyob hauv tseem hwv tsev kawm, tsis kheev ua neeg sib twv ntaj twv riam nyob hauv cov tshav ua si, tsis kheev ua Leej Choj teev dab, tsis kheev zov cov tsev teev dab, tsis kheev ua nom txiav txim, tsis kheev ua txiv neeb, tsis kheev ua tus saib lub hnub los saib kab teg, los ua tus txhais zaj npau suav.
Ua li, mas muaj ntau yam hauj sim uas cov neeg ua Ntuj kev cai ua tsis tau xws li cov teev dab.
Cov neeg ua Ntuj kev cai nyob xyaw cov neeg teev dab, mas lawv yuav tsum muaj ib lub cim pab lawv sib zeem; yog lawv ua Ntoo Cuam lub Cim me me nyob saum hauv pliaj, los nyob ntawm hauv siab, los nyob ntawm caj npab, los nyob ntawm di ncauj.
Cov tsev ua Ntuj kev cai ntau zaus lawv kuj muaj tej lub cim sib zeem; ntau zaus lawv sau ib tug ntses. Tus ntses lus Hes Las lawv hais tias ‘IKTUS’. Tsib tug tsiaj ntawv ntawd kuj yog tsib lo lus hais tias ‘Yes Xus, Tswv Ntuj Leej Tub, Cawm’.
Cov ua Ntuj kev lawv tsis hlawv lawv cov neeg tuag xws li cov ua dab, vim lawv xav tias lawv yuav tsis txhob hlawv tej lub cev uas Tswv Ntuj yuav tsa kom sawv rov qab los, los puas tej zaum lawv xav ua raws li Yes Xus; thaum Yes Xus tuag, mas luag muab nws zwm hauv lub qhov ntxa, ces cov neeg ntseeg txog Yes Xus xav ua raws li ntawd. Cov ua Ntuj kev cai thiaj muab lawv cov neeg tuag zwm rau hauv ntxa. Lawv tsis ua toj ntxas nyob saum npoo av, lawv ua ntxa nyob hauv av. Cov ntxa ntawd hu ua ‘Nkas Tas Nkoos’ (Catacomb).
Nyob ntiaj teb no, muaj cov haiv neeg xub ua ntxa nyob hauv tiv txwv av dua cov neeg ua Ntuj kev cai; yog cov Hais Nkws Tos. Tiam sis cov ua Ntuj kev cai nyob Los Mas lawv ua ntau tshaj tej, lawv coob zuj zus, mas lawv cov neeg tuag kuj ntau zuj zus. Tas peb puas tawm xyoo lawv muab lawv cov neeg tuag tas huv tib si los zwm hauv tej ntxa nyob hauv av. Vim li ntawd, mas cov ntxa nyob hauv av thiaj loj loj tas nrho.
Lawv khawb tej txoj kev ntev ntev nyob hauv av, lawv muab lawv cov neeg tuag log nyob ntawm ob sab ntsa kev, ib sab kuj muaj ob peb txheej. Nyob Los Mas xwb cov ntxa ua tej txoj kev ntev li 1,200 Kis Los Mev.
Cov ntxa ntawd, muaj ib tug tswv; yog ib tug neeg muaj nws ua Ntuj kev cai, nws muaj av, muaj ib lub loog. Nws pib ua ib lub ntxa rau nws tsev neeg ua Ntuj kev cai. Nws pab cov neeg pluag ua Ntuj kev cai, nws kheev lawv coj lawv cov neeg tuag tuaj zwm nyob hauv nws thaj ntxa. Sawv daws sib pab khawb kom luj zuj zus ntxiv, ntev zuj zus. Tas ob puas los peb puas xyoo, mas lawv sib pab khawb ntxiv zuj zus, ces thiaj tau tej txoj kev ntev ntev puv cov ntxa tas. Ncauj ke lawv ua los tshwm nyob hauv ib tug neeg muaj nws lub loog.
Qee zaus yog ib pab neeg ua Ntuj kev cai lawv sib pab yuav ib thaj av nyob sab nroog nraud. Lawv thiaj khawb av, lawv ua lawv txoj kev mus puv hauv cov ntxa, lawv ua ncauj ke tshwm sab nraud, lawv kuj ua zoo nkauj thiab.
Cov ntxa ntawd tsis yog ib qho chaw log cov neeg tuag xwb, kuj yog qhov chaw uas sawv daws nyiam tuaj sib sau nyiam tuaj teev Ntuj.
Cov neeg tuag nyob hauv ntxa ntawd, mas ntau leej yog tej tus neeg tuag ua Yes Xus tim khawv, yog tej tus Tswv Qhia, los tej tus Vaj Qhia, los tej tus Leej Choj, los yog Xib Hwb, los tej tus neeg nto koob meej zoo tuag ua Yes Xus tim khawv. Ua li, mas cov neeg ua Ntuj kev cai khawb tej kev dav dav nyob ze cov tim khawv lawv tej ntxa. Lawv muab hmoov zeb sib los leem rau, lawv sau duab rau ntawm phab ntsa.
Thaum cov neeg ua Ntuj kev cai mus hauv cov ntxa ntawd, mas lawv lub siab nco ntsoov txog Ntuj zoo dua, lawv hnov Yes Xus cov tim khawv nyob ze ze lawv. Lawv pom cov duab haus txog Yes Xus ua hwj huam yees ntxwv, los hais txog Yes Xus tsim lub Cim Yug, los hais txog Yes Xus kwv ib tug yaj, los hais txog Yes Xus sawv rov los.
Lawv mus xyuas cov ntxa ntawd thaum twg, mas lawv lub siab rov qab kuj tuaj thaum twg.
Cov nom tswv tsis muaj cuab kav yuav nkag mus hauv cov ntxa ntawd, lawv txoj cai kuj tsis kheev mus ntes cov neeg mus nyob hauv cov ntxa ntawd. Ua li mas tej lub caij uas nom tswv hiam cov neeg ua Ntuj kev cai heev, mas lawv mus teev Ntuj nyob hauv cov ntxa ntawd, lawv sib ntsib nyob ntawd, lawv sib ntuas, sib pab ua siab loj nyob hauv cov ntxa ntawd.
Yog vim li cas thiaj muaj neeg xav ua Ntuj kev cai?
Ntau leej lawv pom tas tsoom neeg teev dab sawv daws lam tau lam ua lwj ua liam tsis mloog kev cai dab tsi li; ntau leej xav yuav ib co kev cai pab ua neeg siab dawb siab huv, lawv ntsib Yes Xus kev cai, mas lawv zoo siab yuav. Tas cov neeg me, cov neeg txom nyem, cov neeg ua qhev, thiab cov neeg pluag lawv hnov Yes Xus cov lus hlub cov neeg me cov neeg pluag; lawv hnov Yes Xus hais tias “Cov neeg muaj txoj hmoov zoo yog cov pluag, vim Ntuj lub Ceeb Tsheej yog lawv li.” Txog tav no, cov neeg txom nyem, cov neeg pluag lawv kawg hnov sawv daws cem lawv thiab thuam lawv, muab lawv ntaus thiab muab lawv tua, ces thaum lawv ntsib Yes Xus kev cai, tam sim ntawd lawv lub neej zoo li rov tshiab tuaj; lawv ua Huab Tais Tswv Ntuj cov me nyuam, lawv muaj ib tug Huab Tais tuag nyob saum ntoo cuam pab lawv ris lawv txoj kev txom nyem.
Tas sawv daws cov neeg siab ncaj nyob hauv tas tsoom neeg ua dab, lawv pom cov neeg ua Ntuj kev cai zoo siab tuag kom tau teev Yes Xus mus li, lawv pom cov neeg ntseeg pab sawv daws thiab hlub sawv daws, lawv pom cov ua Ntuj kev cai yog ib co neeg tsis thuam leej twg; luag tej thuam lawv, ua phem rau lawv; tiam sis lawv ua siab zoo rau sawv daws, ua neeg tsim txiaj, mas tus twg siab ncaj tus twg pom hais tias Ntuj kev cai zoo dua cov tiag.
Yog vim li ntawd, mas neeg thiaj ua Ntuj kev cai coob zuj zus. Cov neeg pluag kuj ua, cov neeg muaj kuj ua, cov qhev kuj ua, cov ua tswv kuj ua. Tus twg yug los muaj ib lub siab ncaj, nws txoj hmoov ntsib Ntuj kev cai, mas nws cia li yuav Ntuj kev cai, cov vaj txwv tsis tau.
Tus xav ua Ntuj kev cai nws yuav ua zoo li cas?
Ib tug neeg nws hloov siab, nws xav ua Ntuj kev cai, mas nws tsis tau txais lub Cim Ntxuav tam sim ntawd. Nws kawm Ntuj kev cai ib ntus tso. Lawv kawm Yes Xus tej lus teej qav teej num cawm ntiaj teb, lawv kawm Ntawv Moo Zoo, kawm Paj Lug cov tsab ntawv, kawm Ntawv Ntshiab. Muaj tej tus Tswv Qhia kuj tau sau ntawv ntuas tas tsoom sid, cov neeg ua Ntuj kev cai lawv rov qab sau cia nyob hauv lawv tej tsev. Cov paub Yes Xus cov lo lus qhia ntau lawv kuj qhia, sawv daws sib pab sib qhia.
Lub caij uas lawv nyiam txais lub Cim Ntxuav dua, mas yog hnub nyoog Hla, vim lawv xav nrog Yes Xus sawv rov qab los muaj ib txog sia tshiab. Thaum yuav txog lub caij ua Hmoov Hla, cov Leej Choj thiab cov Xib Hwb rov qab nug cov pej xeem saib lawv puas paub Ntuj kev cai zoo, ces lawv thiaj pib ua cov kab ke ntxuav rau; lawv ua Ntoo Cuam lub Cim rau, lawv cev zaj ntseeg rau, lawv ua zaj ntiab dab. Hnub ua lub Cim Ntxuav, mas lawv ua nyob hauv ib tug dej ntws, los nyob hauv ib lub pas dej, los lawv muab dej los hliv rau saum tus txais lub Cim Ntxuav. Ntau zaus tus ua lub Cim Ntxuav yog ib tug Tswv Qhia.
Kev cai, thaum lawv ua lub Cim Ntxuav tas, mas lawv muab roj los ua lub Cim Txhab Zog tam sim ntawd; lawv thiaj tau Ntuj lub txiaj ntsim pab ua tim khawv.
Lawv ua lub Cim Yug zoo li cas?
Cov neeg ua Ntuj kev cai puag thaud, lawv nyob ze lub caij Yes Xus nyuam qhuav tuag thiab sawv rov los. Yes Xus nyob hauv lawv lub siab, lawv nco txog Yes Xus tsis tseg, lawv thiaj xa ua lub Cim Yug raws li Yes Xus qhia.
Thaum lawv ua lub Cim Yug, mas lawv xav rov qab nco txog Yes Xus. Yes Xus twb tau hais tias “Thaum nej xav nco txog kuv, mas nej yuav rov qab ua zoo li kuv nyuam qhuav qhia rau nej.” Thaum lawv ua lub Cim Yug lawv kuj xav noj Yes Xus lub Cev thiab haus nws cov Ntshav. Tswv Qhia Is Nyas Xyus sau ntawv hais tseg tias “Lub Cim Yug yog Yes Xus lub Cev. Yog lub Cev raug txom nyem kom tau them peb cov txim txhaum. Yog lub Cev uas Huab Tais Leej Txiv tsa kom sawv rov qab los.” Tswv Qhia Yus Tis Nus sau hais tias “Lub Cim Yug yog ib hom txhiam xws yug neeg lub siab, kawg yog cov neeg ntseeg thiab txais lub Cim Ntxuav lawm, thiab mloog Yes Xus cov lus qhia, mas lawv thiaj li txais tau hom txhiam xws ntawd. Peb tsis noj cov mov ntawd thiab haus cov cawv ntawd xws li peb niaj hnub no mov haus cawv. Yog vim cov mov thiab cov cawv muab los ua lub Cim Yug yog Yes Xus lub Cev thiab yog Yes Xus cov Ntshav. Thaum Yes Xus yug los, nws yuav ib lub Cev thiab ib co Ntshav xws li peb. Thaum peb ua lub Cim Yug, nws kuj tseem ua kom cov mov thiab cov cawv ntawd txia ua nws lub Cev thiab cov Ntshav.”
Cov neeg ua Ntuj kev cai puag thaud lawv ntseeg zoo li ntawd, lawv ntseeg zoo li Paj Lug, lawv ntseeg zoo li cov Hauv Paus Xa Lus, lawv ntseeg zoo li peb. Yog vim li ntawd, mas niaj hnub Chiv lawv xav ua lub Cim Yug; lawv xav nco txog Yes Xus thiab txais Yes Xus lub Cev.
Cov neeg ua Ntuj kev cai, thaum txog hnub Chiv thaum ib tag hmo, mas lawv sawv daws los sib sau nyob hauv cov tsev teev Ntuj. Thaum lawv pib ua, mas lawv xub hais ib zag thov kom Huab Tais Tswv Ntuj hlub lawv thiab daws lawv cov txhaum, lawv hais zaj ‘Huab Tais Leej Txiv aib! Koj ua siab hlub peb cov me yaus.”
Lawv thov Ntuj zoo li ntawd tas, mas lawv nyeem Ntawv Ntshiab Cog Lus Qub, nyeem Ntawv Moo Zoo, nyeem cov tsab ntawv, thiab tej zaj hais txog cov neeg tuag ua Yes Xus tim khawv. Thaum lawv nyeem ntawv zoo li ntawd tas, mas tus Tswv Qhia los Leej Choj, los puas tus Xib Hwb thiaj ntuas sawv daws. Thaum ntuas tas lawm, mas lawv tso cov neeg tsis tau txais lub Cim Ntxuav rov qab mus tsev, yog vim cov ntawd tsis tau txais lub Cim Ntxuav, mas lawv tsis muaj cai txi Ntuj ntxiv thiab txais tsis tau Yes Xus lub Cev.
Thaum cov tsis tau txais lub Cim Ntxuav rov qab mus tsev tas lawm, mas lawv mam pib ua lub Cim Yug. Lawv nqa cov mov thiab cov cawv los tso rau saum lub thaj txi Ntuj, ces cov Xib Hwb mus pab txais cov mov thiab cov cawv los tso rau saum lub thaj. Tus Tswv Qhia thiaj cev mov cev cawv rau Tswv Ntuj txais.
Tus Tswv Qhia hais zaj “Tsim nyog peb yuav cav txog peb tus Huab Tais Tswv Ntuj”, ces sawv daws hais zaj “Faj Tim Huab Tais Ntshiab.” Hais tas, mas tus Tswv Qhia hais cov lus xws li thaud Yes Xus qhia “Thaum tshuav ib hmos Yes Xus yuav tuag….” Thaum ntawd, Yes Xus tuaj nyob saum lub rooj txi Ntuj, sawv daws txi Yes Xus rau Huab Tais Leej Txiv, ces sawv daws npaj siab yuav txais Yes Xus lub Cev.
Thaum lawv tuaj txais Yes Xus lub Cev, mas ib leeg tuaj zuj zus ze ntawm tus Tswv Qhia los ntawm tus Leej Choj. Tswv Qhia foom ib lo lus kom tau nyob kaj lug rau ib tug zuj zus, thiab nws tso ib lo mov zuj zus rau hauv ib tug neeg txhais tes. Cov Xib Hwb kuj cev lub ntim rau sawv daws txais Yes Xus cov ntshav thiab.
Ua li ntawd tas, mas sawv daws ua Tswv Ntuj tsaug, ces sawv daws nyias rov mus nyias tsev. Thaum ua tas zoo li ntawd, mas twb yuav kaj ntug, sawv daws rov mus nyias mus ua nyias txoj hauj lwm.
Ib txwm, cov ua Ntuj kev cai lawv kuj xyaum nco txog Ntuj tas hnub tas hmo. ‘Nkes Mees nyob As Les Xas Nrias’ sau ntawv tseg hais tias “Yog zoo li peb zoo siab ua hmoov tas peb sim neej, vim peb nco ntsoov hais tias Huab Tais Tswv Ntuj nyob tas qhov txhia chaw; peb niaj hnub nrog Huab Tais Tswv Ntuj tham. Tab yog peb lub ncauj tsis hais lus nrov, mas nyob hauv peb lub siab peb teev Ntuj. Tus neeg ntseeg txog Tswv Ntuj, tab yog nws mus yos ua si, los nws tham, los nws so, los nws ua hauj lwm, los nws saib ntawv, mas nws nco txog Tswv Ntuj mus li.”
Xyoo 140 ib tug hu ua ‘As Lis Tis’ (Aristide) sau ntawv tseg hais tias “Niaj tag kis thiab tas hnub, cov neeg ua Yes Xus kev cai lawv hu nkaujcav txog Ntuj, lawv ua Ntuj tsaug vim Huab Tais Tswv Ntuj ua siab zoo rau lawv. Lawv noj mov thaum twg, mas lawv kuj ua Huab Tais Tswv Ntuj tsaug.”
Ntau zaus thaum lawv teev Ntuj, lawv tig ntsia sab hnub tuaj, vim Yes Xus tuaj sab ntawd tuaj, thiab Yes Xus yog lub hnub ua kom lub ntiaj teb neeg pom kev.
Thaum lawv teev Ntuj, lawv hais zaj ‘Peb Txiv’, hais cov ‘Nkauj Paj Nruag’, thiab lawv xev tej zaj tshiab yog tej zaj yuav cov lo lus nyob hauv Ntawv Ntshiab ntau; cov cov zaj cav txog Tswv Ntuj ntau dua qhov thov Ntuj.
Lub zim txwv ntawd, lawv ua lub hnub nyoog Hla xwb, tiam sis tsis ntev, mas lawv kuj pib ua lub hnub nyoog Yes Xus yug los thiab lub hnub nyoog Leej Ntuj Plig nqes los. Niaj hnub Chiv lawv rov nco txog lub hnub nyoog Hla. Hnub Xya lawv yoo mov npaj siab ua hnub Chiv.
Thaum lawv sib yuav los ua txij ua nkawm, lawv kuj hu txog Tswv Ntuj. Thaum lawv muaj neeg tuag, lawv kuj pab lawv tus tuag xws li ib co neeg xav xa lawv tus neeg mus nrog Huab Tais Leej Txiv nyob mus li. Ua li mas cov neeg ua Ntuj kev cai puag thaud, lawv kuj xyaum nyob ntawm Huab Tais Tswv Ntuj xub ntiag tas lawv sim neej, lawv ua yam twg, mas lawv ua nyob ntawm Huab Tais Tswv Ntuj xub ntiag.
Cov ua Ntuj kev cai nyob xyaw tsoom sid Los Mas, lawv coj ib tug yam ntxwv txawv luag tej. Yog vim lawv xav ua raws nraim Yes Xus tus lwj lwm, lawv muaj ib tug piv txwv uas niaj hnub lawv yoog raws; yog Yes Xus. Lawv xav ua zoo li Yes Xus. Lawv niaj hnub mloog Paj Lug tej lo lus ntuas zoo li no “Nej yuav cia nej lub cev tsim txiaj, vim nej tes nej taw yog Yes Xus tes taw. Nej yuav ua neeg siab dav siab huv xws li Leej Pleev uas nws muab tas ib puas tsav yam rau peb, nws muab nws txoj sia rau peb.”
Ua li mas cov ua Ntuj kev cai nyob xyaw cov Los Mas tiam sis lawv xyaum yuav ib tug yam ntxwv zoo li Yes Xus tus yam ntxwv, lawv coj ib tug yam ntxwv txawv cov Los Mas tus yam ntxwv.
Hais txog txoj kev sib yuav ua txij ua nkawm, mas cov Los Mas tsis muaj cai dab tsi li. Cov neeg muaj, mas lawv hloov poj niam tas zog thiab lawv nrog cov ntxhais qhev ua si. Cov ua Ntuj kev cai hais tias “Cov sib yuav ua txij ua nkawm, lawv yuav lub Koom Txoos ua tim khawv, lawv hu txog Huab Tais Leej Txiv tuaj pab lawv kom lawv ua txij ua nkawm mus tas ib sim neej tiag.” Cov ua Ntuj kev cai thiaj saib txoj kev sib yuav yog ib txog kev uas ob tug neeg yuav sib pab nyob hauv txoj kev nco txog Ntuj thiab yuav sib pab kom yeej kev ntxhov siab lwj plawv, kev txhawj xeeb.
Hais txog nyiaj txiag thiab tas ib puas tsav yam zoo nyob ntiaj teb no, mas cov ua Ntuj kev cai kuj ua txawv cov Los Mas thiab. Yog Ntuj pub dab tsi rau cov ua Ntuj kev cai, mas lawv kuj muab dab tsi los siv thiab lawv ua Ntuj tsaug. Tiam sis lawv paub hais tias muaj ib yam zoo tiag, yog Huab Tais Tswv Ntuj lub Ceeb Tsheej. Muaj ib tug hais tias “Thaum ub peb nyiam nyiaj txiag, nyem no peb pub peb lub cuab tam rau luag tej.” Cov Tswv Qhia kuj ntuas sawv daws hais tias “Peb cov nyiaj txiag thiab peb lub cuab tam kuj yog tas tsoom sid tug. Yog peb muaj ib lub cuab tam, mas peb yuav nco ntsoov hais tias lub cuab tam ntawd tsis yog yuav cia ua kom yus ua ib tug neeg nplua nuj, yus yuav saib thiab faib yus lub cuab tam ntawd kom muaj ntau leej tau nyob zoo.”
Cov neeg ua Ntuj kev cai, thuam lawv ua txhaum tas, yog lawv xav them txim txhaum, mas lawv yuav yoo mov, lawv muab lawv cov nyiaj los pub rau cov neeg pluag, lawv thov Ntuj, thiab lawv daws txhaum ntawm cov Leej Choj los ntawm tus Tswv Qhia.
Lawv ua lub Cim Daws Txhaum nyuaj dua peb nyem no: Thaum ib tug tau ua txhaum tiag, mas lawv thov txhaum nyob hauv cov tsev teev Ntuj, lawv pe sawv daws; lawv ua li ntawd ob peb zaug, los ta sob peb hlis kuj muaj, los tas ib xyoos kuj muaj. Lawv txi Ntuj tsis tau; thaum lawv teev Ntuj, mas lawv ua ntu txais Ntuj Lus xwb, thaum txog ntu txi Ntuj, mas lawv yuav tawm mus.
Tswv Qhia los cov Leej Choj pom cov neeg muaj txhaum lawv ntxub lawv cov txhaum tiag, mas Tswv Qhia thiaj tsa tes rau saum lawv taub hau, ces nws rov qab yuav lawv los nrog tas lub txoos teev Ntuj.
Lawv ua zoo li ntawd, mas sawv daws thiaj paub hais tias Ntuj kev cai yog ib co kev cai xyaum ua neeg siab dawb siab huv tig.
Thaum lub hauv paus, lawv muaj 3 txheej neeg nyob hauv lub Koom Txoos; yog cov Xib Hwb thiab cov Phauj, cov Leej Choj, thiab cov Tswv Qhia.
1. Cov Xib Hwb, lawv pab txi Ntuj, pab txais cov mov cov cawv uas cov neeg ua Ntuj kev cai nqa tuaj. Lawv kuj mus xyuas cov neeg nyob hauv tsev loj faj, cov neeg mob, lawv xa ub xa no mus rau cov neeg pluag. Lawv qhia kev cai ntau.
Cov Phauj, lawv kuj sawv lub Koom Txoos chaw mus pab cov neeg pluag txom nyem, lawv kuj qhia kev cai thiab.
Cov Xib Hwb thiab cov Phauj kuj muaj ntau leej tuag ua Yes Xus tim khawv.
2. Cov Leej Choj, lawv pab cov Tswv Qhia, ua Tswv Qhia cov xov thawj, hloov Tswv Qhia chaw txi Ntuj.
3. Tus Tswv Qhia yog tus kav lub Koom Txoos. Nyob hauv nws lub nroog yog tus saib xyuas sawv daws, nws ua 4 yam hauj lwm no:
– Nws yog tus hauv paus teev Ntuj.
– Nws yog tus qhia kev cai thiab tso sawv daws mus qhia kev cai.
– Nws yog tus saib Koom Txoos lub cuab tam.
– Nws saib xyuas sawv daws kom ua Ntuj kev cai zoo.
Tus Tswv Qhia muaj hwj huam kawg. Cov neeg ua Ntuj kev cai pheej coob zuj zus, mas cov Tswv Qhia kuj muaj hwj chim zuj zus thiab.
Thaum yuav txog xyoo tim 300 los 400 cov Tswv Qhia muaj hwj chim cuag li cov nom kav teb chaws.
Xyoo 106 tus Tswv Qhia Is Nyas Xyus sau ntawv hais tias “Lub Koom Txoos nyob Los Mas yog lub Koom Txoos ua thawj coj luag tej, yog lub Koom Txoos ua tswj coj cov neeg sib nyiam sib hlub raws li Yes Xus lus qhia.”
Xyoo 140 tus Xib Hwb Hes Mas thaum nws sau nws phau ntawv hais txog tus Tswv Zov Yaj tas lawm, nws muab nws phau ntawv ntawd rau tus Tswv Qhia nyob Los Mas kom pab xa mus rau tas txhua lub Koom Txoos nyob tas ntiaj teb; nws saib tus Tswv Qhia nyob Los Mas muaj cai xa ntawv mus ntuas tas cov Koom Txoos nyob ntiaj teb.
Xyoo 150 ib tug Tswv Qhia nyob Fis Zias teb tau ua ib phau ntawv piav tas nws sim neej nws tau ua dab tsi. Nws hais tias nws tau mus xyuas tus Tswv Qhia nyob Los Mas ib zaug, nws hu tus Tswv Qhia nyob Los Mas ua ‘Tus Zoo Tswv Zov Yaj’ vim nws saib tus Tswv Qhia nyob Los Mas yog ib tug Tswv Qhia loj dua cov tiag.
Xyoo 180 Tswv Qhia Is Les Nes nyob Lis Yoos kuj tau sau ib phau ntawv teb rau cov neeg xav ncaim ntawm lub Koom Txoos. Thaum nws sau nws phau ntawv yuav tas, nws hais tias “Sawv daws yuav saib lub Koom Txoos nyob Los Mas yog lub Koom Txoos ua sawv daws ntej. Lub Koom Txoos twg nyob ntiaj teb no yuav tsum yuav lub Koom Txoos nyob Los Mas zaj. Tus twg ntseeg txog Tswv Ntuj nyob ntiaj teb no, yuav tsum mloog lub Koom Txoos nyob Los Mas. Yog vim cov Hauv Paus Xa Lus lawv tej lus nyob hauv lub Koom Txoos nyob Los Mas.”
Tos sawv daws saib tus Tswv Qhia nyob tim Los Mas ua tus loj dua cov, vim sawv daws paub hais tias nws yog tus hloov Pob Zeb, thiab nws yog tus Tswv Qhia saib lub nroog uas Pob Zeb thiab Paj Lug nkawd tuag. Sawv daws tuaj xyuas Pob Zeb lub ntxa, tuaj xyuas qhov chaw uas nws tuag ua Yes Xus tim khawv.
Yog vim ib txwm sawv daws yeej hwm cov Tswv Qhia uas hloov Pob Zeb, mas sawv daws thiaj cia cov Tswv Qhia nyob Los Mas los nyob ib qho chaw nyob ntawm txoj ntug kev As Pias, sawv daws tuaj xyuas lub ntxa ntawd ntau tshaj tej, lawv saib cov Tswv Qhia nyob Los Mas yog cov muaj cai khaws cov Hauv Paus Xa Lus thiab Yes Xus cov lo lus tseg.