Hnub tim 5 lub 4 hlis tas los yog Hnub Chiv Hla, Vaj Qhia Les Os 14 ntuas cov ntseeg sawv daws tias ‘Kev Hla’ yog kev tso siab uas rub peb tawm hauv txoj kev tuag.

Txoj kev tuag lub hwj chim niaj hnub hem peb, tsis hais nyob sab hauv peb xws li kev txhaum, kev nyob twm zeej, thiab tag kev cia siab; los nyob sab nraud xws li kev tsis ncaj ncees, kev iab hiam, thiab tsov rog. Vaj Qhia hais li no “Huab Tais Yes Xus kev hla txhib peb kom tsa taub hau thiab qhib peb lub tswv yim, mas peb thiaj li yuav pom tias Huab Tais Yes Xus lub qhov ntxa khoob lug lawm thiab txhua txoj kev tuag peb ntsib, tseem tshuav ib qhov chaw seem rau peb txoj sia tshiab tau nyob. Txoj kev tuag tsis yog peb txoj sia lub hauv ntsis.”

Tom qab ua lub Txoos Txi Ntuj tas, Vaj Qhia muab ib lo lus rau sawv daws xav tswv yim tias “Huab Tais Yes Xus yeej txoj kev tuag thiab dab phem tau li cas? Peb pom tias Huab Tais Yes Xus ua zoo li lub noob nplej poob rau hauv daim av. Lub noob daim plhaub lwj, ces hlav kaus ua yub tshwm hauv cov av tuaj ua tsob nplej. Zoo ib yam li muaj neeg ua phem rau peb kom tu siab, ua rau peb lub siab lub tswv yim mob, tab sis peb tsis xaiv ua phem pauj rov; peb xaiv kev hlub, ces peb thov Ntuj rau tus neeg ua phem rau peb.” Vaj Qhia lo lus no lub ntsiab yog xav qhia tias Huab Tais Yes Xus yeej tau txoj kev tuag thiab dab phem kuj yog vim Huab Tais Yes Xus xaiv txoj kev nyiam kev hlub, thiab Huab Tais Yes Xus yeem ua qhov xis Leej Txiv Tswv Ntuj siab.

Hais txog kev kub ntxhov nyob rau lub zim txwv no, mas Vaj Qhia Les Os vam txog Vaj Qhia Fas Ntshis Kus lo lus los ntuas sawv daws tias “Niaj hnub no peb ua neej nyob xyaw kev ua phem lim hiam, mas zoo li peb cia li tsis quav ntsej txog tsoom neeg ntau ntau txhiab lawv txoj kev tuag, tsis liam fab rau cov hauj lwm tawm hauv txoj kev sib ntxub thiab sib tawg. Lub tswv yim no niaj hnub hlob mus zuj zus. Peb txhob cia lub tswv yim zoo li no tuaj cag nyob hauv peb, peb yuav nyob ntsiag ntsiag tsis ua dab tsi tsis tau, peb tsis txhob zwm rau txoj kev phem ntawd. Leej Ntshiab Aus Nkus tau ntuas tias ‘Yog koj ntshai tuag, mas koj yuav nyiam Huab Tais Yes Xus kev sawv rov los.’”

Li ntawd, Vaj Qhia thiaj thov kom cov thawj coj tsoom kuj cuab tso tseg kev siv riam phom sib ntaus sib tua, kev ua phem lim hiam rau tsoom pej xeem vim kev thaj yeeb tseeb tiag tsis yog so txhob sib tua, tab sis kev thaj yeeb tseeb tiag yog kev hloov siab.

“Thov tus neeg tuav riam phom tso nws cov riam phom pov tseg. Thov tus nyiam tsim kev tsov rog tig los tsim kev thaj yeeb. Txoj kev thaj yeeb no tsis yog siv dag zog yuam, tab sis yog siv kev sib tham. Txoj kev thaj yeeb no tsis yog ntshaw tswj luag, tab sis yog ua kev nkag siab luag. Txoj kev thaj yeeb Huab Tais Yes Xus nqa tuaj rau peb, yog txoj kev hloov peb siab kom tau nyob kaj lug.”

Kawg no Vaj Qhia caw tsoom ntseeg hauv lub Koom Txoos Kav Tos Liv thoob qab ntuj tuaj koom siab nrog Vaj Qhia thov Ntuj rau lub ntiaj teb kom nyob thaj yeeb. Vaj Qhia hais li no “Txiv thov caw sawv daws nrog Txiv thov kev thaj yeeb rau lub ntiaj teb nyob hauv Hnub Xya tom ntej no, yog ncaj rau hnub tim 11 lub 4 hlis. Txiv xav kom peb tso txoj kev ntshaw tsim kev sib tawg pov tseg, tso kev xav ua tus tswj pov tseg, tso lub hwj chim pov tseg. Txiv xav kom peb tig los thov Tswv Ntuj tseb kev thaj yeeb rau lub ntiaj teb uas tab tom puas ntsoog vim tsov rog.”