Hnub Chiv, Lis Piam 13 caij Nyob Nruab Xyoo (A)
Hnub chiv tim 28 lub 6 hli tas los, Vaj Qhia Les Os 14 coj tsoom ntseeg thov Ntuj raws zaj tus Tshiab xa xov, mas Vaj Qhia tau muab lub Moo Zoo raws li Mas Tais, zaj 10 qib 37-42 los nthuav ntuas sawv daws li no tias tus ua Huab Tais Yes Xus thwj tim tsis yog nws ua qhov zoo rau luag tej pom xwb, tab sis tus ua Huab Tais Yes Xus thwj tim, nws tsum muab tas nrho tus kheej los khaub zig Huab Tais Yes Xus txoj kev nyiam. Tseev kom txoj kev nyiam txi txiv, mas nws yuav tsis nrhiav qhov zoo rau nws, nws yuav txiav tej yam, thiab nws yuav zoo siab txais lwm tus.
Huab Tais Yes Xus lo lus tias “Tus nyiam nws niam nws txiv dua kuv, mas nws tsis tsim nyog nrog kuv. Tus nyiam nws tej tub tej ntxhais dua kuv, mas nws tsis tsim nyog nrog kuv” (MT 10: 37), mas tsis tau txhais tias kom peb tsis txhob nyiam peb tsev neeg, tab sis yog Huab Tais Yes Xus tab tom qhia kom peb muab tas peb cov kev nyiam khaub zig rau Huab Tais Yes Xus. Thaum Huab Tais Yes Xus xa cov Hauv Paus Xa Lus mus tshaj Ntuj lub Ceeb Tsheej, mas Huab Tais Yes Xus tsis xav kom muaj ib yam dab tsi khi lawv cia, mas nws hais zoo li ntawd rau lawv. Niaj hnub no cov lus no tseem siv tau rau peb sawv daws, vim peb pom tias txoj kev nyiam twg yuav zoo txhij tau, mas txoj kev nyiam ntawd tsum rhawv hauv Huab Tais Yes Xus txoj kev nyiam nws pub rau peb xwb.
Piv li lub neej sib qaws ua txij nkawm. Tus txiv thiab tus poj niam nkawd lub neej yuav mus tau zoo, yog thaum muaj ib tug yeem tawm hauv nws niam nws txiv tsev mus muab tas nws lub neej pub rau ib tug xwb. Piv li lub neej tu me nyuam, peb tu me nyuam kom hlob tiav thiab muaj kev xyiv fab tau, yog thaum peb qhia lawv kom sawv taus thiab txawj xaiv yuav qhov zoo.
Txoj kev nyiam tseem txhib peb kom muab tej yam txiav txo pov tseg. Leej Ntshiab Aus Nkus Tis Nus tau hais tseg tias “Thaum koj tso tej yam koj nyiam pov tseg, mas koj yeej yuav ntsib kev tu siab. Txawm li ntawd, tus tseb nplej thaum nws tseb, mas nws yeej khuv xim cov noob nplej. Tab sis yog nws tseb, mas nws thiaj yuav pom nplej tuaj ua tsob tau.”
Txoj kev nyiam zoo li ntawd, yuav txi txiv tau yog thaum peb zoo siab tso tej yam pov tseg kom tau kev nyiam lwm tus neeg; zoo siab cia lub sij hawm dhau mus, kom tau muaj ib lub caij mloog lwm tus; zoo siab txo peb kev noj qab nyob zoo, kom tau nrog lwm tus ris kev txom nyem.
Huab Tais Yes Xus hais tias “Tus nrhiav nws txoj sia, nws ua nws txoj sia ploj” (MT 10: 37) yog zoo li ntawd, vim tus twg tsis qhib qhov rooj txais txoj kev nyiam, mas nws yeej yuav tsis tau saj txoj kev zoo siab tuaj ntawm txoj kev nyiam tuaj li, tus ntawd txoj sia thiaj tsis txi txiv. Yog li mas Huab Tais Yes Xus thiaj txhib peb kom kwv ntoo cuam raws nws mus vim Huab Tais Yes Xus muab nws pub rau peb, Huab Tais Yes Xus nrauj nws tus kheej kom tau nyiam peb. Yog peb ua lub neej raws li Huab Tais Yes Xus qhia no, peb yuav nrhiav tau txoj sia.
Txoj kev nyiam tsum tawm tuaj rau pom tsis yog nyob rawv hauv lo lus hais tawm los yog zais ntshis hauv nruab tswv yim xwb. Txoj kev nyiam tawm tuaj thaum peb xaiv yuav thiab nqes tes ua tab txawm yog tej yam me me xws li muab ib khob dej rau tus nqhis dej tau haus.
Huab Tais Yes Xus xa cov thwj tim tawm mus, lawv tsis ntim mov, yog Huab Tais Yes Xus xav kom lawv vam khom txog cov neeg lawv tau ntsib ua tus cev rau lawv noj. Thiab yog Huab Tais Yes Xus xav kom cov neeg ntsib cov thwj tim lawv tau txais tos cov thwj tim. Tus txais cov Huab Tais Yes Xus xa tuaj, mas yog lawv txais Huab Tais Yes Xus. Tus txais Huab Tais Yes Xus, mas yog nws txais Huab Tais Leej Txiv. Tus nyiam Tswv Ntuj, nws yuav txais Huab Tais Yes Xus cov kwv tij thiab.
