Hnub tim 29 lub 6 hli tas los no yog hnub hwm Leej Ntshiab Pob Zeb thiab Leej Ntshiab Paj Lug, yog li Vaj Qhia Les Os 14 thiaj ua tswv cuab coj lub Txoos Txi Ntuj nyob hauv Leej Ntshiab Pob Zeb lub Tuam Tsev Teev Ntuj nyob tim Vas Tis Kas. Hnub no Vaj Qhia hais txog Leej Ntshiab Pob Zeb tias nws tsis yog ib tug neeg zoo txhij tab sis nws muab siab mloog sawv daws, ces nws thiaj coj tau sawv daws los koom tau ib lub siab.
Nyob hauv Ntawv Cog Lus Tshiab nyiam nyiam hais txog Pob Zeb tias yog tus txuag cov neeg ntseeg sawv daws kom nyob tau ua ib pab kwv tij ua ke. Tas Pob Zeb sid, nws pheej xeeb rau lub luag hauj lwm no. Thaum lawv ua lub Rooj Ncauj Lus nyob Yes Lus Xas Les los txiav saib cov pej kum neeg tig los ua Huab Tais Yes Xus thwj tim, lawv puas yuav ua kab ke txiav raws li cov Yus Das txoj cai los tsis ua. Thaum ntawd, sawv daws tawg ua ob pab sib cav muaj ceem, mas muaj Pob Zeb ua tus rub sawv daws rov los sib haum xeeb. Pob Zeb rub sawv daws los koom ib lub siab tau vim nws ‘mloog’ lawv hais. Txog qhov kawg, Leej Ntuj Plig Ntshiab tshoj Pob Zeb, ces Pob Zeb thiaj li xaiv yuav qhov txuag kom nyob hauv sawv daws muaj kev sib haum xeeb.
Txawm tias Pob Zeb yog neeg siab dav, tsis kav Pob Zeb kuj tsis yog ib tug neeg zoo txhij. Pom tias Pob Zeb tsis lees paub Huab Tais Yes Xus txog 3 zaug thaum cov txwj laus tso neeg tuaj ntes Huab Tais Yes Xus. Pom tias Paj Lug tau cem Pob Zeb txog qhov nws ua txawv qhov nws hais. Qhov tseem ceeb peb ntsia pom nyob hauv Pob Zeb yog qhov tias nws paub tias nws tau ua yuam kev, mas nws lees tias nws yuam kev lawm tiag, ces nws hloov siab, tab sis nws tsis tso nws txoj hauj lwm pov tseg.
Vaj Qhia tseem hais ntxiv tias nyob ntawm Pob Zeb tus duab, peb pom muaj ‘tus yawm sij’. Pob Zeb tus yawm sij no yog cia qhib cov qhov rooj hauv lub Koom Txoos, kom cov chav tsev hauv lub Koom Txoos sib txuas tau ua ke, ces cov chav tsev ntawd koom tau ua ib lub tsev loj cia tos txais sawv daws.
Nyob hauv lub Koom Txoos los yeej zoo li ntawd, cov neeg ntseeg sib koom ua tau ib lub Koom Txoos tsis yog sawv daws nyias yuav raws li nyias zaj tswv yim, tab sis cov ntseeg sib koom ua tau tib lub Koom Txoos vim lawv nrhiav qhov zoo tib yam nyob hauv lawv nruab siab thiab nyob hauv qhov tseeb. Qhov tseeb qhov pom kev xwb thiaj pab tau kom ib leeg txia ua txoj kev loj hlob rau ib leeg.
Nyob hauv qhov pom kev no, peb thiaj yuav paub txog txoj hauj lwm Tswv Ntuj cob rau Pob Zeb thiab cov tuaj tom qab sawv Pob Zeb chaw los saib Tswv Ntuj haiv neeg ntshiab. Txoj hauj lwm no yog ‘mloog sawv daws lub suab’, ces vam txog Tswv Ntuj pab kom cais tau tias lub suab twg yog lub suab txhawb siab, lub suab twg yog lub suab coj kev, lub suab twg yog kom txhim kho qhov yuam kev, lub suab twg yog qhia, lub suab twg pab ntxiv zog, lub suab twg yog ntuas, thiab lub suab twg yog kom nrog sawv daws mus ua ke.
Txuas mus Vaj Qhia ho hais txog Paj Lug tias Huab Tais Yes Xus hloov Paj Lug ntawm tus neeg tsim txom cov neeg ntseeg mus ua tus neeg hlub sawv daws.
Yog peb ntsia Paj Lug daim duab, peb pom tias Paj Lug tuav phau ntawv thiab nqa rab ntaj. Ob yam no tsom txog Tswv Ntuj Lo Lus lub zog.
Nyob hauv tsab ntawv xa mus rau cov Hes Nplaws hais tias “Tswv Ntuj lo lus muaj txoj sia. Tswv Ntuj lo lus ua tau hauj lwm. Tswv Ntuj lo lus ntse dua ib rab ntaj ob sab hniav. Nws txeem mus tau hauv tus plig thiab hauv nruab nrab lub tswv yim. Nws mus tau rau hauv cov pob qij txha thiab cov paj hlwb. Tswv Ntuj lo lus txawj txiav txim rau lub siab ntshaw thiab rau tej zaj tswv yim nyob hauv nruab siab” (HN 4: 12). Tswv Ntuj lo lus ua hauj lwm zoo li ntawd rau hauv Paj Lug nruab siab thaum nws tseem hluas. Tswv Ntuj lo lus hloov Paj Lug lub siab lub tswv yim, ces Paj Lug thiaj hloov ntawm tus neeg hiam lub Koom Txoos los ua tus coj lub Moo Zoo mus pub rau cov pej kum neeg. Tswv Ntuj lo lus coj Paj Lug ntawm ntawm txoj kev ua neeg muaj lub siab lim hiam mus nyob hauv txoj kev ua neeg muaj lub siab nyiam siab hlub.
Paj Lug yeem cia Tswv Ntuj lo lus tuaj hloov nws thiab coj nws los nyob hauv txoj kev nyiam.
Tom qab ua lub Txoos Txi Ntuj tas, Vaj Qhia coj sawv daws teev Ntuj raws li zaj Tswv Ntuj tus Tshiab xa xov, mas Vaj Qhia hais lus los ntuas sawv daws tias “Tswv Ntuj cia peb sib txawv, kom nyob hauv peb nyias zoo tsis thooj li nyias, tab sis nyob hauv peb tsis muaj kev sib tawg sib cais ib yam li Pob Zeb thiab Paj Lug, nkawd sib txawv tsis hais lub teb chaws nkawd yug, nkawd txoj kev kawm, nkawd tus cwj pwm. Ua ntej Huab Tais Yes Xus yuav hu nkawd los ua nws thwj tim, nkawd sib txawv. Tom qab Huab Tais Yes Xus hu nkawd los ua nws txoj hauj lwm, los nkawd sib txawv. Huab Tais Yes Xus tsis hloov nkawd kom zoo tib yam, mas nkawd thiaj tshaj lub Moo Zoo raws li nyias zaj tswv yim. Leej Ntuj Plig Ntshiab tshoj cov sau Ntawv Ntshiab kom tsis txhob zais nkawd qhov sib txawv no cia vim tias nkawd qhov sib txawv no yog ib lub moo zoo rau cov neeg ntseeg thiab.
Pob Zeb thiab Paj Lug tsis yog nkawd sib tw ua Huab Tais Yes Xus thwj tim, tab sis nkawd yog ob lub cim qhia txog kev tsis sib thooj uas mauj Leej Ntuj Plig yog tus muab los sib ntxiv ua ib ke. Li ntawd, nkawd uas yog ob tug pov hwm lub Koom Txoos nyob Los Mas tau ua lub neej ntsib kev txom nyem ua ke, tau paub txog kev thooj siab koom ntsws ua ke, tau tsob hwb thiab tshaj txog kev sib haum xeeb. Nkawd kev ua tim khawv muaj feem tseem ceeb taw kom pom tias cov neeg ntseeg lub neej yog kev tsob hwb, kev koom ib lub siab, thiab kev rov sib haum xeeb.
