(Z 20: 1, 11-18)
Mab Liab Mas Ntas Las yog leej twg? Ntawv Moo Zoo hais tias Mab Liab Mas Ntas Las yog ib tug poj niam raws nraim Huab Tais Yes Xus thiab cov Hauv Paus Xa Lus vim Huab Tais Yes Xus tau ntiab 7 tus dab tawm ntawm nws. Ntawv Moo Zoo hais ntxiv tias thaum lawv muab Huab Tais Yes Xus dai saum Ntoo Cuam, mas cov thwj tim tso tes khiav tas, tshuav Mab Liab Mas Ntas Las, Mab Liab Yes Xus niam, Mab Liab uas yog Khos Pas poj niam, Xas Los Mes, thiab tus thwj tim Huab Tais Yes Xus nyiam thiaj sawv ze tus Ntoo Cuam xwb. Mab Liab Mas Ntas Las yog ib tug nrog cov neeg coj Huab Tais Yes Xus lub cev mus tso hauv lub qhov ntxa.
Hnub no peb hnov hais tias txog hnub pib lub lis piam Mab Liab Mas Ntas Las thiab cov poj niam thiaj sawv ntxov ntxov npaj mus tu Huab Tais Yes Xus tus qauv tom lub qhov ntxa, tab sis lawv tsis pom Huab Tais Yes Xus lub cev lawm. Lawv khiav los hais rau cov thwj tim. Pob Zeb thiab Zam thiaj li khiav mus xyuas saib puas muaj li Mab Liab Mas Ntas Las lawv hais. Nkawd tuaj txog pom muaj li hais tiag, ces nkawd xav tsis thoob, nkawd rov qab. Ntawm Mab Liab Mas Ntas Las, mas nws raws nkawd qab tuaj, nws tsis rov, nws tseem sawv ze ntawm lub qhov ntxa. Tus Tshiab thiab Huab Tais Yes Xus thiaj tawm los rau nws pom thiab hais kom Mab Liab los tshaj lub moo no rau cov thwj tim. Huab Tais Yes Xus hais tias “Koj mus cuag kuv cov kwv tij, koj hais rau lawv tias kuv nce mus cuag kuv Txiv thiab nej Txiv, mus cuag kuv tus Tswv Ntuj thiab nej tus Tswv Ntuj.” Ces Mab Liab los hais rau lawv tias “Kuv pom Huab Tais lawm, nws hais cov lus no rau kuv” (Z 20: 17-18).
Kwv tij Hmoob sawv daws, vim Mab Liab Mas Ntas Las yog thawj tus tau pom Huab Tais Yes Xus sawv rov los thiab tau coj Huab Tais Yes Xus cov lus mus hais qhia rau cov thwj tim, mas Mab Liab Mas Ntas Las thiaj tau lub npe tias ‘tus Hauv Paus Xa Lus rau cov Hauv Paus Xa Lus’ (the Apostle to the Apostles).
Ntau tiam dhau los mas lub Koom Txoos cav tias Mab Liab Mas Ntas Las thiab Mab Liab Npes Tas Nias yog tib tug xwb, tab sis txog xyoo 2021, Vaj Qhia Fas Ntshis Kus tau txiav tias nkawd ob leeg nyias muaj nyias. Yog li txij xyoo ntawd los, lub Koom Txoos thiaj muab hnub no tshwj cia ua hmoov Leej Ntshiab Mab Liab Mas Ntas Las.
Kwv tij Hmoob sawv daws, zaj nyeem hnub no peb pom tias Mab Liab Mas Ntas Las nyiam Huab Tais Yes Xus kawg nkaus, nws thiaj tsis xav ncaim ntawm Huab Tais Yes Xus lub qhov ntxa, nws xav paub saib leej twg tuaj coj Huab Tais Yes Xus lub cev mus lawm. Nws quaj thiab tsuas xav txog tus Yes Xus nws paub thaum tseem muaj txoj sia xwb, mas nws thiaj tsis nco pom tus Huab Tais Yes Xus sawv rov los muaj txoj sia nyob mus li. Thaum Mab Liab Mas Ntas Las hnov Huab Tais Yes Xus lub suab, mas nws mam cim tau, ces nws thiaj li tig los hais rau Huab Tais Yes Xus tias “Xib Hwb.”
Mab Liab Mas Ntas Las xav tuav Huab Tais Yes Xus tab sis Huab Tais Yes Xus tsis kheev, nws hais tias “Koj txhob tuav kuv vim kuv tseem tsis tau mus cuag Leej Txiv.” Huab Tais Yes Xus hais li no yog nws tsis xav kom Mab Liab muab nws lub siab dai rau tus Yes Xus uas yog neeg ntxiv, qhov Mab Liab tsum muab siab dai rau mas yog tus Yes Xus uas yog Tswv Ntuj, tus Yes Xus no yuav nrog nraim lawv nyob hauv Leej Ntuj Plig Ntshiab.
Kwv tij Hmoob, nyob hauv peb kev ua neej nyob nrog kev txom nyem hauv lub ntiaj teb no, mas ntau zaus peb zoo li Mab Liab Mas Ntas Las, peb tsuas nco txog peb txoj kev txom nyem, txoj kev iab siab, txoj kev tu siab xwb, ces peb nco tsis txog tias peb muaj Huab Tais Yes Xus nyob ntawm peb ib sab, Huab Tais Yes Xus twb hais lus rau peb los peb tsis paub tsis hnov li. Tab sis yog peb ua siab kom tus nyob ntsiag ntsiag ua zoo mloog, mas peb yuav hnov Huab Tais Yes Xus lub suab hu peb mos nyoos. Huab Tais Yes Xus tsis xav kom peb muab tas lub neej dai rau tej yam dhau los, Huab Tais Yes Xus xav kom peb cia Tswv Ntuj ua tus coj peb kev.
