(MT 13: 10-17)
Huab Tais Yes Xus cov paj lug piv tau li yog lub qhov rais rau cov neeg ntseeg txog nws; tab sis ntawm tus tsis ntseeg, mas cov paj lug yog lub phab ntsa zeb thaiv lawv kom txhob to taub thiab pom. Tus neeg ntseeg, nws zoo siab raws Huab Tais Yes Xus qab, thaum nws mloog Huab Tais Yes Xus cov paj lug, nws yuav to taub qhov tseeb nyob hauv neeg lub neej sab yeeb ceeb. Yog li peb thiaj li hais tau tias tus twg xav to taub Huab Tais Yes Xus cov lus kom zoo, nws tsum qhib siab kom dav mloog; nws yuav ua neeg me thiab muab siab rau kawm, mas Tswv Ntuj thiaj li yuav nthuav Tswv Ntuj zaj tswv yim rau nws pom.
Huab Tais Yes Xus hais tias “Tus uas twb muaj lawm, mas Ntuj yuav pub rau nws kom nws muaj ntau tshaj. Hos ntawm tus tsis muaj, ces Ntuj tseem yuav thau qhov nws muaj tawm mus” (MT 13: 12). Huab Tais Yes Xus hais li no tsis yog nws hais txog tus muaj thiab tsis muaj nyiaj txiag cuab tam tab sis yog hais txog tus muaj thiab tsis muaj txoj kev ntseeg. Tus twg ntseeg thiab nws nrhiav Tswv Ntuj, mas tus ntawd txoj kev ntseeg yuav hlob loj tuaj. Tus tsis ntseeg thiab tsis quav ntseg txog Tswv Ntuj, nws txoj kev ntseeg yeej yuav tsuag thiab tuag mus.
Kwv tij, peb lub neej sab yeeb ceeb yog zoo li ntawd.
Tus neeg twg, yog nws lub siab qhwv, mas nws tus plig yuav dig muag thiab lag ntseg mus li, ces nws thiaj ntsia tsis pom Huab Tais Yes Xus cov hwj huam thiab tsis hnov Huab Tais Yes Xus cov lus qhia.
Tos neeg lub siab qhwv vim neeg muab hlob, saib tsis pom txog luag lwm tus, coj lub siab ntxub lwm tus. Tus neeg lub siab qhwv, mas nws tsis hloov siab tshiab, ces Huab Tais Yes Xus kho tsis tau nws.
Kwv tij Hmoob sawv daws, niaj hnub peb nyeem Ntawv Ntshiab, niaj lis piam peb mus teev Ntuj, tab sis yog peb ua neeg siab qhwv, tsis qhib siab rau Tswv Ntuj thiab luag lwm tus, mas ntshai peb yuav zoo li Huab Tais Yes Xus hais nyob hauv lub Moo Zoo hnub no “Nej pob ntseg hnov los nej yuav tsis to taub. Nej ntsia tab sis nej yuav tsis pom” (MT 13: 14).
