(MT 13: 18-23)
Huab Tais Yes Xus txhais tias cov noob poob ntawm ntug kev, yog tus uas mloog Tswv Ntuj Lo Lus tab sis nws tsis to taub. Cov noob poob ntawm cov av pob zeb, yog cov neeg uas lawv mloog Tswv Ntuj Lo Lus, nws zoo siab txais tab sis thaum nws ntsib kev txom nyem, mas nws cia li tsis ua raws li Lo Lus lawm. Cov noob poob rau saum cov pos, yog cov neeg uas lawv hnov Tswv Ntuj Lo Lus, lawv mloog tab sis nyob hauv lawv nruab siab muaj kev txhawj xeeb ntau tsav txog ntiaj teb lub cuab tam, ces lawv ntuav Tswv Ntuj Lo Lus tawm. Cov noob poom rau thaj av zoo, yog cov neeg tau mloog Tswv Ntuj Lo Lus, ces lawv khaws coj mus xav thiab ua raws li lawv lub laj lim tswv yim thiab rab peev xwm yuav ua tau.
Kwv tij Hmoob, tus tau hnov Tswv Ntuj cov lus, nws tsis to taub vim nws lub siab twm zeeb, nws lub siab zoo li cov av qhuav tawv thiab ceev dhau, yog li Tswv Ntuj cov lus thiaj tuaj cag tsis taus. Thaum Tswv Ntuj cov lus nrhau cag tsis tau, ces dab phem ntxias neeg thiaj li tuaj cheb Tswv Ntuj cov lus tawm ntawm nws mus tau yooj yim.
Cov neeg no zoo li thaum peb mus teev Ntuj, peb tsis quav ntseg mloog Tswv Ntuj Lo Lus, peb tsis xav raws, peb tsis cia Tswv Ntuj Lo Lus chaws los chwv peb siab ntsws.
Muaj tej tus neeg, nws tau hnov Tswv Ntuj cov lus, nws ua siab kub lug, xav hloov siab tam sid, xav ua raws li cov lus nws tau hnov. Tab sis thaum nws tawm hauv tsev teev Ntuj mus, nws hnov luag hais lus xyav, nws pom luag ua li ub li no, ces nws me siab, nws lub siab txias mus.
Muaj tej tus neeg tswv yim ntse dhau, nws mloog Tswv Ntuj Lo Lus, nws to taub zoo, tab sis vim nws hlwb zoo dhau, ces nws lub tswv yim nyob tsis tus, ib plhaws rau qhov tod, ib plhaws rau qhov no, ces ua mus ua los nws tsis nco tias Tswv Ntuj Lo lus qhia txog dab tsi.
Kwv tij Hmoob sawv daws, peb txhua tus yeej muaj ib chim zoo li tau hais los no, xav kom peb ua neeg me, qhib siab rau Tswv Ntuj Lo Lus, zoo siab cia Tswv Ntuj Lo Lus los hloov peb siab ntsws; yam li thaum peb mloog Tswv Ntuj Lo Lus, peb xav raws, peb khaws los siv hauv peb lub neej, mas peb thiaj yuav txia ua daim av zoo kom Tswv Ntuj Lo Lus txi taus txiv.
Yog peb pom tias peb lub siab twm zeeb tawv qhawv, mas peb yuav tau ua neeg me tiag tiag. Yog peb pom tias peb tsis tshua muab siab rau mloog Tswv Ntuj Lo Lus, mas peb yuav muab siab rau thov Ntuj thiab txais cov Cim Ntshiab kom peb muaj Huab Tais Yes Xus cov txiaj ntsim pab peb. Yog peb pom tias peb nyiam xav txog lwm yam ntau dua xav txog Tswv Ntuj, mas peb yuav tau xyaum tswj lub siab kom nyob tus thiab txawj cia siab rau Tswv Ntuj ua tus coj.
