(MT 20: 20-28)
Kwv tij Hmoob sawv daws, tab xawm cov thwj tim raws Huab Tais Yes Xus tau 2 xyoo ntau lawm, tsis kav lawv tseem tsis to taub zoo txog Huab Tais Yes Xus cov lus qhia txog Ntuj Ceeb Tsheej, ces lawv tseem xav tswv yim raws li cov Yus Das ib txwm xav. Lawv ntseeg tias Huab Tais Yes Xus yog tus Mes Xias los yog Leej Pleev tiag, yog tus Leej Pleev yuav sawv ua vaj kav cov Yus Das, yog li Ntuj lub Ceeb Tsheej thiaj yog nyob ntiaj teb no. Thaum Huab Tais Yes Xus sawv ua vaj, mas cov thwj tim yuav muaj hwj chim ua cov loj nyob ntawm tsoom Yus Das xub ntiag. Yog li hnub no Yas Kos thiab Zam nkawd niam thiaj li taij Huab Tais Yes Xus kom txog hnub ntawd, Huab Tais Yes Xus tsa nkawd ua ob tug loj dua cov nyob ntawm Huab Tais Yes Xus sab xis thiab sab laug.
Kwv tij, peb nquag hnov tias thaum peb cov niam cov txiv lawv los ntseeg txog Huab Tais Yes Xus, mas yog lawv xav tau txais kev pab thiab ntau zaus yog lawv xav khiav kom dim txoj qub kev cai muab lawv tsuam cia. Ib txhia thaum lawv los ua neeg ntseeg, lawv kawm Ntuj kev cai, lawv paub txoj kev ntseeg lawm, mas lawv ruaj nreb rau txoj kev ntseeg, ces lawv pheej xeeb rau Tswv Ntuj. Tab sis muaj ib txhia lawv tsis hloov siab tshiab, lawv ntseeg tab sis lawv tseem coj tus cwj pwm li qub, ces thaum lawv pom tias txoj kev ntseeg tsis mus zoo li lawv xav, mas lawv fav xeeb rau Tswv Ntuj, lawv tig mus vam txog lwm yam.
Ntawm peb cov niaj hnub no ne, peb los ntseeg mas peb vam txog dab tsi? Peb los ntseeg, peb puas yuav raws Huab Tais Yes Xus mus kom txog qhov kawg tab txawm raug txom nyem luaj twg?
Huab Tais Yes Xus yuav hais rau peb ib yam li hais rau Yas Kos thiab Zam tias “Nej puas haus taus lub ntim uas kuv yuav haus?”
Lub ntim Huab Tais Yes Xus hais txog no yog koom nrog Huab Tais Yes Xus txais kev txom nyem thiab nrog Huab Tais Yes Xus tuag saum Ntoo Cuam. Yog peb teb zoo li nkawd teb tias peb haus tau, mas txhais tau tias peb yuav tsum zoo siab nrog Huab Tais Yes Xus raug kev txom nyem thiab zoo siab tuag ntawm peb cov txhaum kom tau txais txoj sia tshiab.
Thaum cov thwj tim hnov Yas Kos thiab Zam los thov Huab Tais Yes Xus li ntawd, mas lawv tsis zoo siab rau nkawd. Vim lawv los puav leej xav tau ua tus loj zaum ntawm Huab Tais Yes Xus sab xis thiab sab laug thiab. Huab Tais Yes Xus thiaj li qhia qhov tseeb rau lawv tias nyob hauv Ntuj lub Ceeb Tsheej tus loj tshaj cov yog tus ua sawv daws tus tub txib. Li ntawd, tus twg xav ua tus thawj, nws yuav tsum ua sawv daws tus qhev. Ces Huab Tais Yes Xus hais kom lawv saib nws ua piv txwv. Lawv hu Huab Tais Yes Xus ua Xib Hwb thiab Huab Tais, tab sis tsis yog lawv ua tus tsob hwb Huab Tais Yes Xus tab sis yog Huab Tais Yes Xus ua tus tsob hwb lawv.
Kwv tij Hmoob sawv daws, tus twg ua sawv daws tus tub txib, tus twg yeem ua tus qhev, tus ntawd thiaj yog tus muaj hwj chim loj tshaj cov.
Li ntawd, niaj hnub peb thiaj yuav tsum rov nug tus kheej tias “Hnub no kuv yuav ua leej twg tus tub txib thiab kuv yuav pab leej twg tau?”
