Ntuj lub Ceeb Tsheej, lub noob zaub roj, thiab poov xab (MT 13: 31-35)
Ntuj lub Ceeb Tsheej raws li hauv Ntawv Moo Zoo tsis yog ib thaj chaw los ib lub teb chaws nyob nruab yaj thiab nruab yeeb, tab sis Ntuj lub Ceeb Tsheej yog ib yam uas muaj Tswv Ntuj ua tus nyob thiab ua tus kav. Qhov twg muaj Tswv Ntuj nyob, qhov ntawd yog Ntuj lub Ceeb Tsheej. Yog li Tswv Ntuj nyob qhov twg? Qhov twg muaj kev sib nyiam sib hlub, Tswv Ntuj nyob qhov ntawd; qhov twg muaj kev ncaj ncees, Tswv Ntuj nyob qhov ntawd; qhov twg ua xis Tswvv Ntuj siab, Tswv Ntuj nyob qhov ntawd. Li ntawd, thaum peb sib nyiam sib hlub, peb ua ncaj, thiab ua xis Twv Ntuj siab, mas Ntuj lub Ceeb Tsheej thiaj nyob hauv peb; peb muaj Tswv Ntuj nyob hauv peb, peb muaj Tswv Ntuj ua tus kav peb.
Tos Huab Tais Yes Xus hais tias Ntuj lub Ceeb Tsheej zoo li lub noob zaub roj, vim tias lub noob zaub roj yog ib lub noob me heev tab sis thaum hlob tuaj yuav ua ib tsob ntoo loj rau me nas me noog tau tuaj nkaum. Lub noob zaub roj thiaj tam li yog txoj kev ua neeg me tsis muaj tsim dab tsi ntawm sawv daws xub ntiag, tab sis yuav yog chaw vam khom rau sawv daws.
Tos Huab Tais Yes Xus hais tias Ntuj lub Ceeb Tsheej zoo li cov poov xab, vim tias cov poov xab tsawg tsawg xwb tab sis muaj peev xwm ua tau kom cov hmoov nplej su tuaj puv nkawd lub thoob. Cov poov xab thiaj tam li lub zog hloov tau neeg lub siab.
Ntuj lub Ceeb Tsheej zoo li lub noob zaub roj thiab cov poov xab thiaj txhais tau tias qhov twg muaj kev sis nyiam sis hlub, qhov twg muaj kev ncaj, qhov twg sawv daws ua xis Tswv Ntuj siab, tab txawm me me xwb los yuav ua chaw vam khom rau sawv daws, yuav hloov tau sawv daws kom txawj sib nyiam, txawj ua ncaj, txawj ua xis Tswv Ntuj siab.
Kwv tij Hmoob, peb cov neeg ntseeg mas Huab Tais Yes Xus xav kom peb ua zoo li lub noob zaub roj thiab cov poov xab. Peb coj txoj kev nyiam mus pub rau cov ib puag ncig, peb ua ncaj rau lawv, peb ua cov hauj lwm xis Tswv Ntuj siab.
Thaum peb ua zoo rau luag, tab txawm tsis muaj neeg pom los peb txhob qaug zog kav tsij ua mus ntxiv. Peb yuav muab peb kev nyiam kev hlub pub rau cov nyob ib ncig, ua chaw vam khom rau lawv. Peb yuav niaj hnub nyeem Ntawv Ntshiab thiab xav tswv yim saib Tswv Ntuj hais lus dab tsi rau peb.
