Nplej tuaj xyaw nroj (MT 13: 36-43)
Kwv tij Hmoob sawv daws, lub Moo Zoo hnub no hais txog ‘cov noob zoo,daim teb, cov nroj, thiab cov neeg siab ncaj’.
Huab Tais Yes Xus txhab txhais rau cov thwj tim tias cov noob zoo yog cov tub hauv lub Ceeb Tsheej; lawv ua neej xis Tswv Ntuj siab, daim teb yog lub qab ntuj neeg, cov nroj yog dab phem cov tub; lawv tsis xaiv qhov zoo thiab lawv yuav ua xis lawv siab ntshaw. Huab Tais Yes Xus yog tus tseb cov noob zoo, dab phem yog tus tseb cov noob nroj.
Cov neeg siab ncaj tsis yog cov neeg tsis tau ua txhaum li, tab sis cov neeg siab ncaj yog cov fim Tswv Ntuj thiab fim sawv daws zoo. Tus fim Tswv Ntuj mas nws ua xis Tswv Ntuj siab. Tus fim zeej tsoom mas nws hlub thiab ua ncaj rau sawv daws.
Tos Huab Tais Yes Xus muab cov noob zoo thiab cov nroj los ua paj lug qhia txog Ntuj lub Ceeb Tsheej. Vim tias nyob rau Huab Tais Yes Xus teb chaws, lawv cog nplej mov mog, mas cov nroj tuaj hauv daim teb muaj tsob zoo tib yam li tsob nplej mov mog thiab, yog tsis ua tib zoo saib yuav tsis paub tias tsob twg yog nplej thiab tsob twg yog nroj. Lawv tsum tos kom txhawv tso mam paub. Ib yam li peb cov Hmoob cog nplej, peb pom tias muaj ntau zaus muaj cov nplej dev tuaj xyaw cov nplej zoo, peb yuav paub tias tsob twg yog nplej dev kawg yog thaum nplej txhawv daj hnab xwb.
Huab Tais Yes Xus hais ntxiv tias nyob hauv lub qab ntuj no cov neeg ua xis Tswv Ntuj siab lawv nyob xyaw cov neeg ua ywj siab ntshaw. Tos Tswv Ntuj tsis xub rho dab phem cov tub tawm hauv lub qab ntuj neeg mus vim tias Tswv Ntuj hlub lawv, ces Tswv Ntuj ua siab ntev tos saib puas muaj ib hnub twg lawv hloov siab tshiab los ua xis Tswv Ntuj siab. Tsis tas li ntawd, yog Tswv Ntuj maj nrhuav cov neeg phem, mas ntshai tsam teeb meem yuav tuaj raug cov neeg zoo thiab.
Tswv Ntuj ua siab ntev tos kom txog hnub kawg, yog tias cov neeg tsis ua xis Tswv Ntuj siab, lawv tsis hloov siab, mas thaum ntawd Tswv Ntuj mam tso cov Tshiab tuaj sau lawv pov rau hauv lub qhov hluav taws. Ntawm cov neeg siab ncaj los yog cov neeg zoo ua xis Tswv Ntuj siab, mas thaum nyob ntiaj teb no ntau zaus lawv ntsib teeb meem vim cov neeg siab tsis ncaj ua phem rau lawv, tab sis txog thaum kawg lawv yuav nyob saum Ntuj Ceeb Tsheej.
Kwv tij Hmoob sawv daws, niaj hnub no peb nyob nrog cov neeg siab phem siab nkhaus, mas peb tsis txhob ntshai, peb yuav ua tiag nyiaj ua tiag uv, peb tsis txhob nrog lawv raus tes ua tej yam tsis zoo, tsis txhob txiav txim rau lawv, peb ua tim khawv txog qhov zoo mus ntxiv. Peb yuav ua tib zoo saib ntawm peb, saib niaj hnub peb puas ua cov noob zoo los peb ua cov nroj rau luag lwm tus. Peb tso siab rau Tswv Ntuj tias yog peb ua xis Tswv Ntuj siab, mas txog hnub kawg peb yuav tau nrog Tswv Ntuj nyob mus li.
