Yes Xus yog txoj kev sawv rov los (Z 11: 19-27)
Kwv tij Hmoob sawv daws, thaum Las Ntxas Los tuag, nws tus muam Mas Tas thiab Mab Liab tu siab kawg, tsis kav nkawd tseem ntseeg khov ntseeg ruaj tias Huab Tais Yes Xus yog Leej Pleev, yog Tswv Ntuj Leej Tub, tus muaj hwj chim loj dua txoj kev tuag. Mas Tas hais tias “Huab Tais yog koj ntxov tuaj ntawm no, mas kuv tus nus yuav tsis tuag. Kuv paub tias nyem no koj nyob ntawm no, koj thov yam twg ntawm Tswv Ntuj, mas Tswv Ntuj yuav muab rau koj” (Z 11: 21).
Mas Tas ntseeg li nws hais, tab sis ntshai yog nws tseem tsis to taub qhov nws ntseeg, mas thaum Huab Tais Yes Xus hais tias Las Ntxas Los yuav tsis tuag, nws thiaj li xav tias yog Huab Tais Yes Xus hais txog lub caij neeg lub cev sawv rov los. Nws tsis xav tias yog Huab Tais Yes Xus hais tias tam sim no Huab Tais Yes Xus tsa tau Las Ntxas Los kom sawv los.
Kwv tij Hmoob, Huab Tais Yes Xus zeem tseeb rau Mas Tas tias “Kuv yog Txoj Kev Sawv Rov Los, thiab yog Txoj Sia. Tus ntseeg txog kuv, tab yog nws tuag lawm, nws yuav muaj txoj sia nyob. Leej twg ntseeg txog kuv, nws yuav tsis tuag ib zaug” (Z 11: 25-26).
Huab Tais Yes Xus tsis tau hais tias nws yuav tsa neeg tuag sawv rov los, nws hais tias nws yog kev sawv rov los. Li ntawd, tus ntseeg txog Huab Tais Yes Xus, nws lub cev nqaij tsuas tuag xwb, hos nws tus plig muaj txoj sia nyob mus li.
Kwv tij Hmoob sawv daws, peb hais tias peb ntseeg txog Huab Tais Yes Xus, yog li peb muab ua tib zoo xav saib peb puas ntseeg tiag, peb puas cia siab rau Huab Tais Yes Xus li Mas Tas, peb puas lees tias Huab Tais Yes Xus yog Leej Pleev tus cawm peb hauv txoj kev tuag, yog Tswv Ntuj Leej Tub, yog peb tus Huab Tais.
