6. Dab phem ntxub lub Koom Txoos thiab cov Leej Choj
Cov neeg hauv kuv tsev, mas peb nyiam hais lus tsis zoo txog cov Leej Choj. Thaum kuv tseem me me mas kuv txiv peb nyiam hais tias ‘cov Leej Choj mas lawv tau zoo nyob dua peb, lawv mas muaj ub muaj no, lawv tau yam ub yam no.’ Peb nyiam nyiam hais li ntawd tiag.
Huab Tais Yes Xus lub suab nrov rau kuv tias ‘Koj xav tias koj yog leej twg, koj thiaj saib koj yog Tswv Ntuj thiab koj txiav li ntawd rau tus ub tus no? cov Leej Choj ntawd lawv yog tib neeg, kuv tau muab qhov ntshiab pub rau lawv, kom lawv tau ua hauj lwm pab lub cheeb tsham lawv nyob. Yam no yog lub txiaj ntsim kuv pub rau lawv, cov neeg hauv lub cheeb tsham ntawd tsim nyog yuav thov Ntuj rau cov Leej Choj, nyiam lawv thiab pab txhawb pab nta lawv.’
Nej puav leej paub tias thaum muaj ib tug Leej Choj hauv nej lub zos qaug, mas tas cov neeg yuav tau pab hwj pab tsa nws. Nej paub tias cov dab ntxias neeg mas lawv ntxub cov neeg ntseeg hauv lub Koom Txoos heev, tshwj xeeb yog cov Leej Choj, cov dab phem ntawd ntxub peb lub Koom Txoos tshaj plaws vim tias lub Koom Txoos muaj cov Leej Choj qee lawv txoj sia los pab sawv daws.
Nej sawv daws yeej paub ntsoov tias cov Leej Choj lawv yog cov neeg tau pub lawv txoj sia cia rau Huab Tais Yes Xus. Leej Txiv Tswv Ntuj Nyob Mus Li yog tus pub lawv ua tau hwj huam kom lub ncuav mov txia ua Leej Pleev lub Cev. Li ntawd, vim muaj cov Leej Choj ob txhais tes, mas thiaj muaj Leej Pleev lub Cev thiab cov Ntshav; vim cov Leej Choj ob txhais tes no mas cov dab phem thiaj ntxub lawv.
Cov dab phem ntxub peb cov ntseeg hauv lub Koom Txoos Kav Tos Liv vim lub Cim Yug no tiag, vim tias Cim Yug yog tus yawm sij qhib Ntuj Ceeb Tsheej lub qhov rooj. Yog tsis muaj lub Cim Yug ces yuav tsis muaj leej twg mus tau hauv Ntuj Ceeb Tsheej li.
Thaum koj ntxhov siab tu siab, Tswv Ntuj yuav los nyob nrog koj, yog nyob hauv lub Cim Yug no ntag. Yog vim koj txoj kev ntseeg, mas Huab Tais Yes Xus thiaj pub kom koj tau pom nws thiab hais lus rau koj tias ‘koj yog Tswv Ntuj me nyuad!’ thiab yog thaum leej twg thov Ntuj zam txhaum, mas yuav muaj ib yam yuav piav tsis tau tsheej xeeb nyob hauv tus neeg ntawd; Huab Tais Yes Xus yuav coj tus ntawd tus plig mus tom lub tsev teev Ntuj uas tsoom ntseeg tab tom ua lub txoos teev Ntuj, thiab pub kom tus plig ntawd tau txais lub txiaj ntsim daws txhaum thiab txais Huab Tais Yes Xus lub Cev los yug nws tus plig. Yog lub caij peb tsis paub yuav piav li cas, vim tus twg txais Huab Tais Yes Xus lub Cev thiab cov Ntshav mas nws thiaj mus tau hauv Ntuj Ceeb Tsheej. Yam no yog yam txawv thiab ceeb laj to taub, yam no yog lub txiaj ntsim loj tshaj uas muaj nyob hauv lub Koom Txoos Kav Tos Liv, yog lub txiaj ntsim Huab Tais Tswv Ntuj pub rau lub Koom Txoos. Txawm li ntawd, muaj coob leej tseem niaj hnub hais lus thuam lub Koom Txoos, lawv tsis paub tias yog muaj lub Koom Txoos mas lawv thiaj tau txais kev cawm thiab coj mus cuag cov hluav taws hlawv them txim. Nyob hauv teb chaws them txim, lawv tseem yuav tau txais Cim Yug lub txiaj ntsim ntxiv, lawv tau txais kev dim lawm tiag.
Vim li tej kuv hais los no, mas cov dab phem ntxias neeg thiaj tsis nyiam cov Leej Choj. Qhov twg muaj tus Leej Choj mas qhov ntawd muaj txhais tes ntxeev lub ncuav mov thiab dej cawv ua Leej Pleev lub Cev thiab cov Ntshav pub rau tsoom ntseeg. Yog li mas peb yuav tau thov Ntuj pub rau cov Leej Choj tiag tiag, kom lawv muaj lub zog tiv tau dab phem kev haub ntxias.
Huab Tais Yes Xus pub kom kuv tau pom tej yam no.
Yog muaj cov Leej Choj mas peb thiaj tau txais lub Cim nrog Tswv Ntuj sib haum xeeb, xws li peb cov txhaum raug daws tas.
Nej puas paub tias kev lees txhaum yog dab tsi? Yog kev ntxuav yus tus ntsuj tus plig kom huv. Tsis yog muab tshuaj thiab dej ntxuav, tab sis yog muab Leej Pleev cov Ntshav los ntxuav.
Thaum kuv tus plig tsis huv, kuv tus plig qias neeg vim kuv cov txhaum. Yog kuv mus lees txhaum, mas Leej Pleev yuav muab kuv tus plig raus hauv nws cov Ntshav. Dua ntawd, yog kuv tau txiav txoj saw hlau khi kuv tus plig cia nrog kev phem thiab. Tej no mas dab phem thiaj ntxub cov Leej Choj ntag.
Tus neeg muaj txhaum, txawm tias yuav loj thiab hnyav npaum cas; los yuav muaj tus muaj hwj chim loj dua los muab nws cov txhaum ntxuav pov tseg kom tas tau.
Huab Tais Yes Xus qhia kom kuv paub tias ua cas Tswv Ntuj thiaj ntxuav tau neeg cov txhaum; qhov ntawd yog lub qhov txhab nyob ntawm Huab Tais Yes Xus lub plawv.
Nej puas paub tias muaj ntau yam nyob tob dua neeg lub tswv yim yuav ntsuas tau, qhov ntawd yog qhov tseeb hauv sab ntsuj plig, yog qhov tseeb dua txhua qhov tseeb. Vim Huab Tais Yes Xus lub qhov txhab, peb tus plig thiaj raug tsa nyob rau qhov ntshiab, vim Tswv Ntuj khuv leej mas peb tus plig thiaj tau nyob hauv Huab Tais Yes Xus lub siab mus li. Huab Tais Yes Xus tau txo nws tus Ntoo Cuam, nws hliv nws cov Ntshav los ntxuav peb cov plig kom rov dawb rov huv tuaj.
Kuv pom tias kuv tus plig rov dawb huv tuaj thaum kuv lees kuv cov txhaum rau Tswv Ntuj, kuv pom tias Huab Tais Yes Xus tau txiav txoj sawv dab phem cia cab kuv tus plig.
Txhua yam li kuv tau hais los no, yog Huab Tais Yes Xus ua nyob hauv cov Leej Choj. Li ntawd, kev thov Ntuj pub rau cov Leej Choj thiaj yog cov ntseeg txoj kab xwm. Peb thov Ntuj kom pab txuag lawv, pab thaiv lawv, pub qhov kaj rau lawv thiab coj lawv kev mus li.
Dab phem ntxub cov Leej Choj thiab peb lub Koom Txoos kawg nkaus.