Tus sau: TP. Nyiaj Pov (Tim 14 lub 3 hlis 1998)
Kwv tij Hmoob, peb yuav tsom ntsoov cov lus peb nyuam qhuav nyeem no. Peb yuav faib ua 4 qib.
1. Pab Xya Caum Ob leeg rov qab los. Lawv zoo siab, lawv hais tias : “Huab Tais, tab yog cov dab phem los lawv zwm rau koj lub npe !” Yes Xus hais rau lawv tias : “Kuv twb pom Xas Tas poob saum ntuj los xws li ib kab xob laim. Kuv tau pub hwj huam rau nej kom nej tsuj tau cov nab, cov laum kiav tshooj, thiab cov yeeb ncuab muaj hwj chim tib si. Tsis muaj yam twg yuav ua xwv txheej rau nej tau.
Kwv tij, lawv 72 leeg zoo siab vim thaum Yes Xus xa lawv mus Yes Xus pub kom lawv muaj peev xwm xws li Yes Xus lub peev xwm me ntsis. Lawv mus, lawv tsis raug xwv txheej dab tsi. Lawv mus txog lub zos twg, txij thaum lawv hais tias lawv tuaj ntawm Yes Xus tuaj mas cov neeg hauv zej zog txais lawv zoo vim zeej tsoom paub tias Yes Xus yog tus muaj lub hwj huam loj. Zeej tsoom hnov hais txog cov hwj huam Yes Xus pib ua lawm.
Lawv 72 leeg ntawd tuav txog Yes Xus lub npe ntiab cov dab kom khiav ntawm cov neeg raug dab. Lawv qhuas kawg.
Yes Xus kuj nrog lawv zoo siab thiab, nws nrog lawv qhuas. Nws hais tias : “Kuv twb pom Xas Tas poob saum ntuj los xws li ib kab xob laim.” Xas Tas yog thawj tus dab phem lub npe : nws poob saum ntuj los, yam li nws poob hwj chim vim cov thwj tim tuav txog Yes Xus lub npe ntiab dab kom dab txhob zes neeg.
2. Yes Xus hais ntxiv tias : “Tsis kav nej txhob zoo siab vim dab zwm rau nej. Nej yuav zoo siab vim nej tej npe tshwm hauv Phau Ntawv nyob saum ntuj.”
Kwv tij, Yes Xus hais lo lus ntawd rau lawv kom lawv txhob muab hlob. Yog lawv tsis ceev faj mas lawv yuav xav tias lawv muaj lub peev xwm loj dua cov dab.
Qhov tseeb mas lawv yog neeg xwb. Lawv txawj ua txhaum. Yog lawv khav tias lawv rab peev xwm loj mas lawv muaj txhaum thiab dab phem yeej lawv lawm. Lawv txhob xav tias lawv peev xwm loj. Hos lawv yuav tsum xav tias Yes Xus rab peev xwm loj : tus ua kom dab poob saum ntuj los yog Yes Xus, tsis yog tus thwj tim.
Yes Xus thiaj hais rau lawv kom lawv zoo siab vim lawv lub npe tshwm hauv phau ntawv nyob saum ntuj.
Thaum Yes Xus hais txog phau ntawv ntawd mas nws ua paj lug hais. Tsis muaj tej phau ntawv zoo li neeg phau ntawv nyob saum ntuj. Yes Xus xav hais tias Tswv Ntuj paub nej npe, Tswv Ntuj saib nej yog nws cov neeg, nws yuav coj nej los nrog nws nyob lwm tiam. Vim qhov ntawd ces tsim nyog nej yuav zoo siab.
3. Yes Xus thov Leej Txiv rau nws cov thwj tim. Lub sij hawm ntawd, Yes Xus zoo siab nyob hauv Leej Ntuj Plig Ntshiab. Nws hais tias : “Txiv, Huab Tais tswv ntuj tswv teb, kuv cav lus zoo txog koj, vim koj tau zais tej ntawd rau cov neeg txawj neeg ntse, koj ho qhib rau cov me neeg. Txiv, koj tau ua li ntawd vim koj lub siab yeej nyiam li ntawd. Kuv Txiv tau muab tas puas tsav yam rau kuv. Tsis muaj leej twg paub tias Leej Tub yog leej twg, tsuas kawg Leej Txiv paub. Thiab tsis muaj leej twg paub tias Leej Txiv yog leej twg, tsuas kawg Leej Tub paub, thiab tus uas Leej Tub pom zoo qhia rau thiaj paub.”
Kwv tij, cov neeg me uas Yes Xus hais txog no yog Yes Xus cov thwj tim, yog cov neeg zoo siab ntseeg Yes Xus. Leej Txiv Tswv Ntuj pub kom lawv paub Tswv Ntuj lub Ceeb Tsheej. Cov neeg kawm txuj ntau nyob Yes Lus Xas Les paub Tswv Ntuj lub Ceeb Tsheej tsis npaum li Yes Xus cov thwj tim. Cov Thoob Xwm ntawv niaj hnub thuam Yes Xus thiab thuam Yes Xus cov thwj tim lawv tsis paub Tswv Ntuj lub Ceeb Tsheej, lawv muab lawv lub siab kaw nti.
Tsuas kawg Yes Xus thiaj paub Leej Txiv, vim Yes Xus yog Tswv Ntuj Leej Tub. Cov thwj tim kuj paub Leej Txiv Tswv Ntuj vim Yes Xus qhia lawv.
Kwv tij, peb kuj yog cov neeg kawm Yes Xus cov lus. Yes Xus qhia peb tias Tswv Ntuj yog peb Txiv xws li yog nws Txiv. Peb cov neeg uas niaj hnub zoo siab mloog Yes Xus cov lus mas peb paub Tswv Ntuj yog ib tug zoo li cas. Huab Tais Leej Txiv kuj xa Leej Ntuj Plig Ntshiab tuaj kaj peb lub tswv yim. Ces peb paub Leej Txiv Tswv Ntuj thiab paub nws Leej Tub Yes Xus. Peb lub ncauj tsis txawj hais lus ntau txog Leej Txiv thiab Leej Tub thiab Leej Ntuj Plig. Tab sis thaum peb tuav txog lawv peb leeg lub npe mas Tswv Ntuj lub txiaj ntsim los nyob puv nkaus hauv peb lub siab, ces peb lub ncauj tsis txawj piav, tab sis peb lub siab kaj.
4. Yes Xus tig ntsia nws cov thwj tim thiab hais rau lawv tias : “Cov qhov muag tau pom tej yam nej pom lawv txoj hmoov zoo. Kuv hais rau nej tias : “Cov Yaj Saub thiab cov Vaj thaud ntau leej xav pom tej yam nej pom no los lawv tsis tau pom, xav hnov tej yam nej tau hnov no los lawv tsis tau hnov.”
Kwv tij, puas muaj zoo li Yes Xus hais rau nws cov thwj tim no ? Yes Xus hais txog cov Yaj Saub thiab cov Vaj yug los ntau pua xyoo ua nws ntej nyob hauv nws lub teb chaws. Muaj tej tus Yaj Saub thiab tej tus Vaj tos txog tus Huab Tais yuav cawm ntiaj teb.
Nyob hauv peb haiv Hmoob tau ntau pua xyoo los lawm muaj coob leej tos txog tus Huab Tais yuav pub tas puas tsav yam zoo rau Hmoob. Zim txwv no tseem muaj coob leej Hmoob tos ib tug Huab Tais yuav hloov Hmoob lub neej kom zoo tuaj. Yes Xus hais rau nws cov thwj tim : “Nej txoj hmoov zoo vim nej qhov muag pom thiab nej pob ntseg hnov tus uas coob leej yav thaud lawv xav pom thiab xav hnov.”
Kwv tij Hmoob, peb txoj hmoov zoo vim peb tau kev hnov tus Huab Tais cawm ntiaj teb nws cov lus. Peb txoj hmoov zoo vim Yes Xus lub Moo Zoo nrov tuaj txog hauv peb tej tsev. Yog nej qhib nej lub siab los mloog Yes Xus cov lus mas Yes Xus los nyob txawm hauv nej nruab siab, nws mloog nej tsis tseg. Yes Xus yog Huab Tais Tswv Ntuj nrog peb nyob.
Kwv tij, hnub no peb nyuam qhuav kawm Yes Xus ib co lus 15 fiab tej. Peb tau kawm dab tsi ?
Peb tau kawm 5 yam no :
Ib : yog peb tso siab rau Yes Xus mas peb yeej cov dab phem uas niaj hnub tuaj zes peb, tuaj txob peb.
Ob : Yes Xus pov hwm peb kom ntau yam xwv txheej txhob tuaj nphav peb lub siab thiab peb lub cev.
Peb : Peb muaj chaw tso siab tias peb tej npe tshwm hauv phau ntawv nyob saum ntuj, yam li Tswv Ntuj saib peb yog nws cov neeg hauv nws cuab nws yim, peb hu txog nws thaum twg kuj tau : nws mloog peb mus li.
Plaub : Peb yog ib co neeg me, tab sis Yes Xus pub kom peb lub tswv yim thoob tsib tuaj. Tswv Ntuj qhia tej yam rau peb uas cov kws txuj lawv tsis paub thiab lawv tsis to taub.
Tswv Ntuj pub kom peb paub tias nws nyiam peb, nws hlub peb.
Tsib : Yes Xus nrog peb nyob nraim : tsuas yog peb thiab peb lub siab kom nco txog nws mas nws ua kom peb lub siab pom nws.