Tus sau: TP. Nyiaj Pov (Tim 29 lub 4 hlis 1998)
Kwv tij, ob tug viv ncaus nyias muaj nyias tus cwj pwm sib txawv, xws li peb niaj hnub pom hauv ntau lub tsev. Ntau zaus, nyob hauv lub tsev muaj ib tug nyiam kov dej num heev dua. Luag tej zoo siab pab nws, tab sis nws nyiam ua ntau dua lwm tus. Nws xav ua raws li nws siab nyiam. Mas Tas yog tus hlob, nws ib txwm nyiam ua xws li nws pom zoo ua. Ntshai yog vim nws yog tus hlob xwb.
Ntawm Mab Liab, nws zaum ntawm Huab Tais taw.
Tsis yog vim nws tsis xav pab Mas Tas. Kawg yog vim nws paub tias mas Tas yeej nyiam ua rau sawv daws noj.
Thaum Mas Tas ua mob ua zaub yuav tiav lawm nws hais rau Yes Xus tias : “Huab Tais, kuv tus niam hluas cia kuv ib leeg ua num xwb. Koj tsis hais dab tsi lod ? Koj hais kom nws pab kuv mas !”
Yes Xus paub tsev neeg ntawd. Nws paub tias Mas Tas lam hais tej lo lus ntawd xwb. Mas Tas yuav nyob twj ywm mloog Yes Xus los nrog Yes Xus tham tsis tau. Nws zoo siab ua dej num. Thiab qhov tseeb mas nws ke ua num ke mloog Yes Xus nrog Mab Liab hais dab tsi. Mas Tas thiab Mab Liab yog ob tug viv ncaus sib haum xeeb zoo thiab niaj hnub sib pab tu vaj tse.
Thaum nkawd tus nus Las Ntxas Los tuag, Mas Tas yog tus coj hauj lwm ntau ces nws thiaj xub hnov luag hais tias Yes Xus tuaj txog ze ntawm lawv lub zos, ces nws xub khiav mus tos Yes Xus. Hos Mab Liab nyob ze nws tus nus tuag lawm, nws nrog cov neeg tuaj zov Las Ntxas Los thiab tuaj ua ob tug viv ncaus luag. Mas Tas kov ub kov no ces nws xub paub tias Yes Xus tuaj txog lawm. Mab Liab nyob twj ywm txais cov neeg tuaj zov tuag. Yog tom qab me ntsis nws thiaj hnov hais tias Yes Xus tuaj txog. Mas Tas tus cwj pwm yog nyiam kov dej num ; hos Mab Liab tus cwj pwm yog nyiam txais cov tuaj zov tuag, nrog lawv tham, mloog lawv cov lus hlub.
Kwv tij, Mab Liab zaum ntawm Yes Xus taw. Nws ua dab tsi ? Lus Kas hais tias Mab Liab mloog Yes Xus cov lus. Yes Xus tsis hais lus tham pem dog dig.
Cov lus uas Yes Xus xub mus tshaj rau cov neeg nyob hauv lub xeev Nkas Lis Lais nws rov hais rau Mab Liab thiab Mas Tas mloog nyob hauv nkawd tsev. Cov hauj lwm Yes Xus ua nyob hauv ntau lub zos nyob qaum teb, Mab Liab thiab Mas Tas xav paub, Yes Xus piav rau nkawd.
Mas Tas ua dej num. Mab Liab ua tus zaum ntawm Yes Xus, nug Yes Xus, thov kom Yes Xus piav ntxiv mus. Mas Tas rau siab mloog thiab.
Lus Kas khaws zaj no tseg, nws tsis hais tias nkawd tus nus Las Ntxas Los puas nyob ntawd. Plaub tsib lub hlis tom qab, Yes Xus tsa Las Ntxas Los tuag kom rov sawv tas, mas Las Ntxas Los thiab ob tug viv ncaus ua ib rooj qav rau Yes Xus. Zam sau ntawv tseg hais tias Las Ntxas Los nrog Yes Xus noj rooj qav, Mas Tas ua num ntau. Hos Mab Liab sawv, nws mus nqa ib hwj tshuaj tsw qab, nws muab los pleev Yes Xus taw, nws daws nws cov plaub hau los muab so Yes Xus taw. Cov Yus Das muaj kev cai hli tshuaj tsw qab rau ntawm tus qhua taub hau. Mab Liab saib nws yog tus neeg txheej qis, nws tsis muaj cuab kav hli tshuaj rau saum Yes Xus taub hau, nws muab los pleev Yes Xus taw. Ob tug viv ncaus thiab tus nus tau hais sib haum tias lawv ua li ntawd rau Yes Xus vim lawv peb leeg saib Yes Xus hlob thiab lawv peb leeg nyiam Yes Xus tas siab.
Lawv peb leeg zoo siab cia Mab Liab hliv tshuaj vim Mab Liab txawj hais cov lus nyiam thiab hlub Yes Xus zoo dua. Mab Liab sawv lawv peb leeg chaw los pleev Yes Xus taw thiab muab plaub hau los so Yes Xus taw.
Kwv tij, nyob hauv Lus Kas zaj uas peb nyuam qhuav nyeem mas yog piav txog Yes Xus tuaj txog Yes Lus Xas Les, nws tuaj so hauv nws cov phooj ywg tsev nyob Npes Tas Nias, tseem tsis tau txog zaum kawg Yes Xus tuaj txog Yes Lus Xas Les, nws thiaj tsa Las Ntxas Los tuag kom sawv. Yes Xus tsa Las Ntxas Los yog lub lis piam kawg hauv Yes Xus lub neej, thaum luag yuav muab nws tua. Tus piav txog lub lis piam kawg ntawd yog Zam.
Ntawm Lus Kas zaj uas peb nyeem mas yog ntau lub hli ua ntej, Yes Xus tuaj nrog zeej tsoom ua ib lub ntees teev Ntuj nyob Yes Lus Xas Les.
Mas Tas hais rau Yes Xus tias : “Kuv tus niam hluas cia kuv ib leeg ua num xwb.”
Yes Xus teb zoo li no : “Mas Tas, Mas Tas ! Koj txhawj, koj siv zom ua ntau yam ! Tab sis tsuas muaj tib yam xwb uas peb yuav tsum muaj.”
Yes Xus hais li ntawd. Nws xav qhia dab tsi rau Mas Tas thiab rau peb sawv daws ?
Kwv tij, thawj yam uas Yes Xus xav qhia rau peb yog zoo li no : yam uas Tswv Ntuj saib loj tshaj thiab muaj nqi tshaj yog qee tej lub caij nrog Tswv Ntuj nyob twj ywm, mloog nws hais lus rau peb hauv peb nruab siab. Yes Xus hais rau peb tias : “Tsuas muaj tib yam xwb uas peb yuav tsum muaj : yog nrog Yes Xus sib tham, yog qee lub caij cia rau mloog saib Yes Xus hais dab tsi rau peb.”
Vim li cas Yes Xus thiaj hais lo lus ntawd rau peb ?
Yog vim ntau zaus peb xav ua neeg nquag dhau. Tab txawm yog ua cov hauj lwm pab luag tej los ua cov hauj lwm tshaj Ntuj lus mas peb nquag dhau.
Peb kub siab ua ntau yam hauj lwm tsob hwb Tswv Ntuj los pab luag. Tej zaus peb xav tias yog Tswv Ntuj xav kom peb ua tej ntawd ; tab sis tej zaus yog yus xwb xav tswv yim tias Tswv Ntuj xav kom yus ua txoj hauj lwm ntawd, tab sis yuav ceev faj tej zaus yog yus nyiam ua li ntawd xwb, hos Tswv ntuj tsis tos kom yus ua li ntawd.
Yog koj tsis qee tej lub caij cia rau teev Ntuj mas koj yuam kev xwb xwb. Peb zoo li Mas Tas : peb siab fab dhau rau txoj kev ua num, peb siab fab dhau txog peb cov hauj lwm. Peb xav tias lub caij teev Ntuj yog nkim zim txwv dag.
Nyob hauv lub Koom Txoos muaj ntau tus neeg ntseeg los ntau tus txiv plig pheej xav kov hauj lwm, lawv tsis txawj qee tej lub caij ua xws li Mab Liab : zaum twj ywm ntawm Yes Xus taw. Peb yuav tsum txawj tso hauj lwm tseg los mloog Yes Xus. Peb tej hauj lwm tas huv si thiaj yog ua nyob hauv txoj kev nyiam Tswv Ntuj thiab nyiam luag nyob hauv Tswv Ntuj. Yog peb tsis qee tej lub caij nyob ntawm Yes Xus taw, peb tsis hais rau nws tias peb nyiam nws, peb tsis hais rau nws tias peb tej hauj lwm yog ib co txi zoo cev rau nws, yog peb tsis txawj cheem peb tes taw los nyob twj ywm nrog Yes Xus tham, mas ntshai tsam cov hauj lwm peb ua tsis tshua yog Tswv Ntuj cov hauj lwm. Tsuas yog ib co hauj lwm yus nyiam ua xwb.
Kwv tij, peb yuav tsum qee tej lub sij hawm los zaum twj ywm ze ntawm Yes Xus xws li tus niam hluas Mab Liab : vim Yes Xus hais tias Mab Liab xaiv txoj hauj lwm zoo dua.
Yuav tsum uas xws li Mas Tas thiab, sawv daws thiaj muaj noj, muaj haus, muaj hnav, muaj lom zem : tab sis koj yuav tsum qee tej lub caij los ua xws li Mab Liab. Tus haus paus xa lus Paj Lug hais tias : yog tias koj tsis muaj lub siab nyiam Yes Xus mas koj zoo li ib lub nruas nrov dag xwb.
Muab piv rau ob niam txiv Hmoob.
Ntau zaus hauj sim peb pom ob niam txiv Hmoob siv zog ua hauj lwm kom tau ntau yam toob xib, kom tau nyiaj txiag, kom nto koob meej. Nkawd ua tsheej hli tsheej xyoo. Tab sis nkawd tsis txawj nyob twj ywm sib tham hauv kev sib hlub, tsis txawj sib hais ib lo lus sib hlub. Nkawd muaj tas puas tsav yam toob xib, tab sis nkawd kev sib hlub tsuag lawm, ploj ntais lawm. Nkawd lub neej puas zoo ? Puas lom zem ?
Nkawd puas muaj lub siab kaj ? Nkawd puas zoo siab ua neej ?
Ob niam txiv yuav tsum txawj qee tej lub caij cia rau hais cov lus sib hlub, ces nkawd lub neej thiaj lom zem ; cov hauj lwm hnyav sib tuaj, nkawd ob leej muaj lub ntsej muag sib luag ntxhi.
Hais txog kev nyiam Tswv Ntuj kuj yog zoo ib yam.
Koj yuav tsum qee tej lub caij cia rau hais tias : “Yes Xus, kuv nyiam koj !” Koj yuav zoo siab nyob twj ywm ze ntawm Yes Xus, ces koj lub neej tib si yog ib lub neej yeej kev ntxhov siab lwj plawv : koj txais Yes Xus kev kaj siab lug los nyob txawm hauv koj.