TSWV NTUJ HLUB PEB, NWS TSO LEEJ TUB TUAJ NRHIAV PEB (MT 8: 12-14)
Cov His Xas Lais tau lub npe tias yog Tswv Ntuj haiv neeg, tsim nyog lawv yuav yog ib haiv neeg muaj teb chaws nyob ruaj, lawv tsim nyog yuav tau nyob thaj yeeb; tab sis yog peb saib hauv cov His Xas Lais liv xwm, mas pom tias lawv tsuas ntsib kev raug quab yuam ua luag qhev, thiab lawv nyob tsis muaj teb chaws ntau xwb. Cov His Xas Lais raug xwv txheej tsis tseg, mas ntau zaus lawv tsis tshuav kev tso siab rau Tswv Ntuj, ces Huab Tais Tswv Ntuj thiaj tshoj cov neeg siab ncaj sawv ua Yaj Saub tuaj ntuas cov His Xas Lais kom rov tso siab rau Tswv Ntuj thiab kom lawv ua neeg ntshiab rau Tswv Ntuj.
Hnub no peb hnov tus Yaj Saub His Xais cov lus ntuas cov His Xas Lais kom lawv tso siab vim tias yuav muaj ib tug tuaj nplij lawv. Thaum tus nplij haiv His Xas Lais yuav tuaj, mas cov His Xas Lais yuav xub npaj lawv tus kheej kom txhij tso. Lawv yuav tsum npaj txoj kev tos txais tus Huab Tais yuav tuaj. Lawv yuav tau mloog tus yuav tuaj tshaj Tswv Ntuj lub moo rau lawv.
Yog nej coj ib pab tsiaj mus noj zaub tab sis ib tug ploj lawm, mas nej puas qab siab zov cov tsiaj tseem nyob xyaws npoj? Nej kawg ua siab fab txog tus tsiaj ploj lawd, nej kawg tawm mus nrhiav kom pom tus tsiaj ncaim npoj mus.
Yog nej muaj ob peb tug me nyuam, ib tug ploj lawm, mas nej puas yuav tawm nrhiav kom ntsib?
Nyob rau lub teb chaws His Xas Lais, mas tsoom sid nyiam yug yaj yug tshis, ces Huab Tais Yes Xus thiaj muab lawv lub nej yug yaj yug tshis los ua piv txawv qhia txog Tswv Ntuj lub siab hlub neeg.
Huab Tais Yes Xus hais txog tus tswv zov yaj tawm mus nrhiav tus yaj poob zoo. Huab Tais Yes Xus xav qhia cov Yus Das thiab qhia peb sawv daws tias Tswv Ntuj lub siab hlub neeg yog zoo li ntawd. Tswv Ntuj zoo li tus tswv tsiaj tsis xav kom nws ib tug tsiaj ploj li, Tswv Ntuj zoo li leej niam leej txiv tawm nrhiav nkawd tus me nyuam poob zoo kom pom.
Huab Tais Yes Xus zaj paj lug no zoo qhia ntau yam rau peb thiab; yam li Huab Tais Yes Xus xav txhib peb tias yog nyob hauv peb tsev neeg, peb pab pawg, los hauv peb lub zos; yog muaj ib tug tau ua yuam kev, peb yuav pab nws tau li cas? Peb puas yuav pab coj nws rov los nyob hauv peb vaj peb tsev, los nyob hauv peb pawg ntseeg, rov los koom zos nrog peb?
Peb yuav ua xws li tus tswv zov yaj uas siv tas nws lub zog tawm mus nrhiav tus yaj poob zoo. Thaum peb ntsib lawm, peb yuav hlub nws, ua tib zoo rau nws.
Peb tsoom neeg zoo li cov yaj, peb sib raws ua ib npoj tiag, tab sis kuj muaj tej tus tsis nyiam xyaw npoj, nyiam khiav mus noj zaub rau qhov ub qhov no. Nyob ib ncig pab yaj, mas muaj hma muaj tsov tos ntsoov tom tus yaj ncaim npoj. Nyob hauv peb lub neej kuj zoo li ntawd, muaj kev haub ntxias tos chua peb tawm hauv npoj neeg ntseeg mus. Muaj ntau zaus peb yog tus yaj poob zoo, peb pom lwm yam muaj nqes dua peb txoj kev ntseeg.
Niaj hnub no peb pom tias muaj cov neeg ntseeg coob tau tso txoj kev ntseeg tseg, lawv tsis kub siab tuaj teev Ntuj, ua Tswv Ntuj txoj hauj lwm. Qhov no ua rau Tswv Ntuj tu siab kawg nkaus, tsis kav Tswv Ntuj tsis ntaus siab yau, Tswv Ntuj tseem hlub peb, Tswv Ntuj tseem niaj hnub tso neeg tawm tuaj nrhiav tus ncaim ntawm Tswv Ntuj, rov coj lawv los nyob xyaw npoj, rov los nyob poo lub Koom Txoos.
Tswv Ntuj hlub peb, nws tso Leej Tub nqes los nrhiav cov neeg txhaum, rub lawv tawm hauv lub qhov tuag mus txais txoj sia nyob mus li. Li ntawd, puas tsim nyog lub caij Tos Huab Tais no peb yuav hloov siab tshiab tso tej yam peb tau ua yuam kev pov tseg, tig los nrhiav Huab Tais Yes Xus peb tus Zoo Tswv Zov Yaj, hu nrhiav Huab Tais Yes Xus xws li tus yaj quaj hu nrhiav nws tus tswv, thov Huab Tais Yes Xus tuaj coj peb rov mus nyob hauv nws lub Koom Txoos Ntshiab.
