(1XM 15: 16-23; MK 2: 18-22)
Yog thaum twg Huab Tais Yes Xus thiaj hais tias tas lub caij uas nraug vauv nrog lawv nyob, lawv yoo mov tsis tau. Tab sis hnub nraug vauv mus deb, ces lawv yuav yoo mov, thiab hais tias tsis muaj leej twg ntxiv ib daim ntaub tshiab rau lub khaub tsho tshaj sab, tsis muaj leej twg ntim cawv tshiab rau hauv ib co hnab tawv qub?
Yog hnub uas Huab Tais Yes Xus mus noj mov hauv Mas Tais tsev tas, nws tawm los nraum zoov, mas Huab Tais Yes Xus thiaj li hais cov lus uas peb nyuam qhuav mloog tas los no.
Thaum Huab Tais Yes Xus tab tom nrog Mas Tais thiab Mas Tais cov phooj ywg noj mov, mas Huab Tais Yes Xus qhia tias nws tuaj cawm cov neeg txhaum. Tos Huab Tais Yes Xus hais li ntawd yog vim cov Fas Lis Xais thuam tias Huab Tais Yes Xus nyiam fim cov neeg txhaum thiab nrog cov neeg txhaum noj mov ua ke. Ntawm Huab Tais Yes Xus, mas nws saib cov neeg txhaum yog zoo li cov neeg muaj mob nkeeg, Huab Tais Yes Xus xav fim lawv kom tau kev pab lawv dim ntawm lawv tus mob nkeeg uas yog lawv cov txhaum. Huab Tais Yes Xus qhia cov Fas Lis Xais tias cov Fas Lis Xais nyiam mus teev Ntuj tiam sis lawv tsis nco qab hlub cov neeg txhaum. Cov neeg txi Ntuj tsis hlub cov neeg txhaum, mas Tswv Ntuj tsis nyiam lawv thaj txi Ntuj.
Thaum Huab Tais Yes Xus tawm hauv Mas Tais tsev mus lawm, nws thiaj hais dua ib zag tshiab rau lawv; yog cov lus saud.
Zam cov thwj tim thiab cov Fas Lis Xais tsoom thwj tim lawv coj cov kab ke yoo. Huab Tais Yes Xus cov thwj tim yuav tsis yoo vim Huab Tais Yes Xus tseem nrog lawv nyob, ces thiaj tsis tau txog lub caij lawv yuav yoo. Muaj ib hnub twg Huab Tais Yes Xus raug tshem, mas hnub ntawtd lawv mam yuav yoo.
Cov neeg ntseeg txog Huab Tais Yes Xus yauv tsis txhob muab cov kev cai qub los xyaw rau Huab Tais Yes Xus txoj cai uas yog kev cai tshiab.
Lub caij ntawd, Zam twb tuag lawm tiam sis Zam cov thwj tim kuj tseem ua ib pab li qhov qub (HL18: 24, 19: 1). Zam cov thwj tim yoo tshaib xws li cov Fas Lis Xais uas lawv yoo tshaib raws ib txog kev cai nruj; lawv yoo tshaib ntau dua tsoom neeg Yus Das huv si.
Thaum Zam cov thwj tim tuaj nug Huab Tais Yes Xus, lawv xav nug tias vim li cas Huab Tais Yes Xus cov thwj tim tsis yoo tshaib. Qhov tseeb, mas Yes Xus thiab nws cov thwj tim kuj coj cov kab ke yoo tshaib ib yam nkaus li tsoom pej xeem. Peb paub li no vim Mas Tais tau hais txog txoj kev yoo tshaib nyob hauv nws phau ntawv Moo Zoo (MT 6: 16-18, 17: 21; HL 13: 3, 14, 23, 27: 9).
Tos Zam cov thwj tim nug Huab Tais Yes Xus, mas yog vim lawv pom Huab Tais Yes Xus thiab cov thwj tim coj cov kab ke yoo xws li tas tsoom pej xeem xwb, lawv pom tias Huab Tais Yes Xus cov thwj tim tsis coj raws li cov Fas Lis Xais tus piv txwv.
Huab Tais Yes Xus pom tias cov Fas Lis Xais tus piv txwv tsis haum cov kev cai tshiab uas nws tuaj qhia. Huab Tais Yes Xus qhia txoj kev sib nyiam sib hlub; Huab Tais Yes Xus hais tias txoj kev sib nyiam sib hlub zoo dua qhov tias yauv caiv ub caiv no.
Txoj kev yoo tshaib yog ib lub cim ntawm txoj kev tu siab. Li ntawd, lub caij Huab Tais Yes Xus tuaj tshaj nws lub Moo Zoo thiaj tsis yog lub caij yauv tu siab. Cov neeg yoo mov raws li cov Fas Lis Xais yog zoo li lawv tsis ntseeg tias Huab Tais Yes Xus yog Leej Pleev. Txoj kev tu siab uas Huab Tais Yes Xus tuaj tshaj yog txoj kev tig los yauv lub siab tshiab. Huab Tais Yes Xus tsis hais tias nyem no nws qhia kev cai tshiab uas yuav tsis txhob yoo mov, tab sis Huab Tais Yes Xus xav hais tias thaum peb yoo mov, peb yuav zoo siab vim peb tig los yuav lub siab tshiab lawm.
Huab Tais Yes Xus hais tias “Muaj ib hnub twg nraug vauv raug luag muab tshem, hnub ntawd lawv mam yuav yoo.”
Thaum Huab Tais Yes Xus hais li no, mas nws hais txog lub caij nws yuav raug txom nyem thiab tuag nyob saum ntoo cuam. Lub caij ntawd, Huab Tais Yes Xus cov thwj tim thiaj yuav raug kev tu siab.
Huab Tais Yes Xus qhia rau lawv tias tshauv tsis ntev, nws yuav raug cov neeg phem muab nws tua, hnub ntawd cov thwj tim mam yuav muaj kev tu siab loj, thiab lawv yuav coj dua ib txog kev yoo tshaib tshiab uas tsis yog yoo vim Mais Xes txoj cai xwb, tiam sis lawv yoo kom tau qee tej yam hauv lawv lub neej mus pab luag tej.
Cov Yus Das coj kam cov kab ke yoo tshaib, lawv yoo tshaib raws Mais Xes txoj cai. Lub caij yoo tshaib kuj yog lub caij ua kom cov His Xas Lais nco txog lawv cov txhaum, lawv tu siab thiab them txim txhaum.
Nyob hauv lub Koom Txoos Kav Tos Liv kuj muaj tej lub caij yoo tshaib kom yus lub cev raug txom nyem me ntsis, pab yus nco txog yus cov txhaum thiab kom yus tu siab rau yus tej txhaum, ces yus tig los yuav lub siab tshiab. Tej lub caij yoo tshaib zoo li ntawd, mas lub Koom Txoos qhia kom peb qee peb tej nyiaj txiag mus pab cov neeg pluag thiab pab cov neeg uas raug kev tshaib nqhis, lub Koom Txoos qhia kom peb ua cov hauj lwm hlub neeg, ua cov hauj lwm pab luag tej. Peb cov neeg ntseeg, mas thov kom muab siab rau ua cov hauj lwm pab cov pluag thiab hlub luag tej, sawv daws yuav niaj hnub tig los yauv lub siab tshiab.
Huab Tais Yes Xus hais tias “Tsis muaj neeg muab daim ntaub tshiab ntxiv lub tsho qub, kuj tsis muaj neeg muab lub hnab tawv qub los ntim cov cawv tshiab tsam cawv tom lub hnab qub ntuag ces cov cawv yuav txeej tas.”
Yav puag thaum ub, cov His Xas Lais muab tej daim tawv tsiaj coj los xaws ua hnab ntim cawv, cov hnab no yog ntim cawv ntev mus yuav raug cawv tom, ces lub hnab yuav ntuag. Li no thaum hliv cawv los haus tas tsis phim yuav muab lub hnab qub coj los ntim dua cov cawv tshiab, yog tseem muab los ntim dua tshiab, mas lub hnab yuav ntuag xwb. Huab Tais Yes Xus txhob txwm hais tej yam uas cov His Xas Lais ua kam los qhia rau lawv.
Huab Tais Yes Xus xav qhia tias kom peb cov neeg ntseeg tsis txhob muab tej yam kev cai qub coj los txuam xyaw rau txoj kev ntseeg Ntuj, cov neeg ntseeg yuav tsis txhob ua ob peb yam kev cai sib xyaws daws, yuav tsis txhob ua neeb, txhob saib yaig, txhob ua tej yam kev cai uas yog kev cai dab qhuas, txhob ua zoo li tus neeg tsis txawj tso siab rau Tswv Ntuj.
Peb cov neeg ntseeg, mas peb txhob ua li cov lus nyuam qhia hais tas los no. Peb tso siab rau Tswv Ntuj, ces Tswv Ntuj yuav pab peb. Peb cov neeg ntseeg yuav txav kom deb ntawm txoj kev ua phem ua txhaum, peb txhob muab ntau yam kev cai los xyaw rau txoj kev ntseeg.
