(1XM 16: 1-13; MK 2: 23-28)
Cov His Xas Lais hais tias Tswv Ntuj ua hauj lwm 6 hnub tsim lub ntuj lub teb thiab tas txhua leej uas nyob hauv lub ntuj thiab lub teb tiav, ces Hnub Xya Tswv Ntuj thiaj so.
Neeg yuav tsum coj xws li Tswv Ntuj, ces niaj Lis Piam Hnub Xya, mas tib neeg yuav caiv; yuav caiv Hnub Xas Npas Tos. Lawv tsis pub ua hauj lwm dab tsi, tsis pub mus deb. Yog cov Xib Hwb His Xas Lais tau piav thiab qhia tias hnub Xas Npas Tos yuav caiv dab tsi thiab dab tsi. Tswv Ntuj tsuas hais tias yuav caiv Hnub Xas Npas Tos kom hnub ntawd sawv daws muaj lub caij cia rau teev hawm Tswv Ntuj. Hos cov Xib Hwb piav txog 100 tawm yam uas yuav caiv. Huab Tais Yes Xus tsis saib tej yam caiv ntawd yog tuaj ntawm Tswv Ntuj tuaj. Huab Tais Yes Xus hais tias kev pab thiab hlub zeej tsoom yog Tswv Ntuj thawj lo lus qhia. Hos qhov caiv ub caiv no muaj nqi tsis cuag cov hauj lwm hlub thiab pab luag tej.
Cov Fas Lis Xais uas lawv tuaj nug Huab Tais Yes Xus tias vim li cas Huab Tais Yes Xus thiab cov thwj tim ua tej yam txwv tsis pub ua hnub xas npas tos, mas lawv yog ib pab neeg kub siab teev hawm Tswv Ntuj. Lawv niaj hnub nyeem Ntawv Ntshiab qhia Mais Xes txoj cai thiab qhia cov Yaj Saub cov lus. Lawv paub zoo tas txhua yam uas cov His Xas Lais yuav caiv Hnub Xas Npas Tos. Lawv pom tias hnub Xas Npas Tos, Huab Tais Yes Xus cov thwj tim tsis caiv ob yam: yam ib, lawv mus kev deb dhau; yam ob, lawv de cov hnab nplej.
Cov Fas Lis Xais paub Mais Xes txoj cai thiab paub cov Xib Hwb His Xas Lais tej lus piav Mais Xes txoj cai. Tab sis Huab Taus Yes Xus kuj paub Ntawv Ntshiab thiab, ces Huab Tais Yes Xus hais rau cov Fas Lis Xais tias muaj ib zaug tus vaj Das Vis noj ib co ncuav mov txi rau Tswv Ntuj. Cov mov ntawd yog cov mov caiv, tsuas yog cov Leej Choj xwb thiaj noj tau.
Huab Tais Yes Xus thiaj nug cov Fas Lis Xais tias “Nej xav txiav txim rau kuv cov thwj tim tsis caiv vim lawv de hnab nplej. Ua li nej puas yuav txiav txim rau peb tus vaj Das Vis thiab?”
Huab Tais Yes Xus hais li no ntxiv “Hnub Xas Npas Tos yog cia rau neeg.” Lo lus no Huab Tais Yes Xus xav qhia lawv tias kev hlub neeg yog ib txog kev cai loj dua caiv ub caiv no hauv Hnub Xas Npas Tos. Kev pub mov noj rau tus neeg tshaib plab yog txoj cai loj dua caiv tej qhov me me hauv Hnub Xas Npas Tos.
Huab Tais Yes Xus tau hais txog Leej Neeg tus Tub. Leej Neeg tus Tub yog leej tub?
Leej Neeg tus Tub yog Huab Tais Yes Xus ntag. Li ntawd, Huab Tais Yes Xus hais rau cov Fas Lis Xais tias nws yog Hnub Xas Npas Tos tus tswv. Yam li Huab Tais Yes Xus yog tus tswv muaj cai txiav tias yuav caiv Hnub Xas Npas Tos zoo li cas. Huab Tais Yes Xus hais lo lus ntawd tsis xis cov Fas Lis Xais siab, vim Huab Tais Yes Xus rov muab nws piv rau Tswv Ntuj. Cov Fas Lis Xais xav tias tsuas yog Tswv Ntuj tib leeg thiaj yog Hnub Xas Npas Tos tus tswv. Cov Fas Lis Xais xam tias Huab Tais Yes Xus txhaum loj kawg, ces lawv ntxub Huab Tais Yes Xus.
