TSWV NTUJ NYIAM TUS TIG LOS YUAV SIAB TSHIAB (MT 21: 28-32)

Huab Tais Yes Xus hais ib zaj paj lug rau cov thawj leej choj thiab cov laus neeg uas tuaj nug saib nws muaj cai qhov twg los qhia tsoom sid. Zaj paj lug no Huab Tais Yes Xus tab meeg hais los ntuas lawv, kuj yog ntuas peb sawv daws thiab.

Huab Tais Yes Xus hais tias leej txiv muaj 2 tug tub, nws hais rau nkawd kom mus ua teb. Thawj tug cav ncauj tsis kam mus, ib pliag nws xav tau, ces nws sawv mus ua lawm. Tus ob mloog lus dua, nws teb tias ‘awm, kuv mam mus’, tab sis nws tsis mus.

Huab Tais Yes Xus xav hais rau cov thawj leej choj tias lawv yog ib tug tub yau; lawv hais tias lawv mloog Tswv Ntuj, tab sis tseeb tiag lawv tsis mloog. Tos hais li ntawd, vim cov thawj leej choj ua xws li tus tub yau, lawv tsis kam ua xws li tus tub hlob uas chiv thawj nws hais tias nws yuav tsis mloog, tab sis tom qab nws pom nws qhov yuam kev, ces nws thiaj mus ua teb.

Cov thawj leej choj, thaum Zam Ntxuav Plig tuaj qhia lawv, mas lawv tsis mloog Zam qhia. Nyem no Huab Tais Yes Xus tuaj qhia lawv, mas lawv tseem tsis kam pom lawv qhov yuam kev, lawv tsis kam ntseeg Huab Tais Yes Xus thiab. Cov neeg sau se thiab cov poj ntiav tej tus lawv mloog Huab Tais Yes Xus, lawv yuav lub siab tshiab, mas yog lawv ua xws li tus tub hlob.

Li ntawd, lub Moo Zoo hnub no Huab Tais Yes Xus thiaj xav qhia peb tias Tswv Ntuj nyiam tus tig los yuav siab tshiab mloog Tswv Ntuj Lo Lus.