YES XUS TXHIB PEB KOM THAU YAM PEB MUAJ LOS PUB RAU LWM TUS (MT 15: 29-37)

Yaj Saub His Xais hais tias “Huab Tais Tswv Ntuj ua ib rooj qav, nws cia tas txhua haiv neeg tuaj noj. Tos Huab Tais Tswv Ntuj ua nws rooj qav vim tias hnub ntawd Huab Tais Tswv Ntuj tau rhuav kev tuag pov tseg, ces tas sawv daws raug txhiv hauv kev tuag lawm.” Hnub Huab Tais Tswv Ntuj ua roj qav raws li Yaj Saub His Xais hais, mas yog hnub ntiaj teb kawg raws li Yes Xus tau hais tseg rau nws cov thwj tim.

Mas Tais xav qhia tias Yes Xus yog tus Huab Tais hlub cov pej kum neeg tib yam li cov Yus Das, Yes Xus cawm cov pej kum neeg li cov Yus Das, ces Mas Tais thiaj li sau piav tias Yes Xus tuaj txog ntawm ntug dej ntuj Nkas Lis Lais, nws nce mus saum roob. Yes Xus zaum, ces tej pab neeg coob tuaj cuag Yes Xus, lawv coj tej tus neeg ceg tawv, tej tus tuag ceg, tej tus dig muag, tej tus nplaig txhav, thiab lwm cov mob tuaj tso ntawm Yes Xus ko taw. Yes Xus kho lawv zoo tas tib si. Ib zeej tsoom qhuas kawg, vim lawv pom cov nplaig txhav hais taus lus, cov tuag ceg rov muaj zog, cov deeg pauv rov mus taus kev, cov dig muag rov pom kev tuaj. Ces lawv cav txog His Xas Lais tus Tswv Ntuj lub koob meej. Thiab Mas Tais sau ntxiv tias Yes Xus ua hwj huam kom mov ntsu tuaj yug cov neeg teev pej kum dab ib yam li tau yug cov Yus Das.

Mas Tais hais txog ntau yam mob vim nws xav qhia tias cov neeg txom nyem lawv coob kawg, lawv tos txog ib tug yuav cawm lawv. Lawv cav txog Tswv Ntuj vim lawv pom tias Yes Xus yog Tswv Ntuj tus neeg, nws ua Tswv Ntuj cov hauj lwm.

Mas Tais xav qhia tias Yes Xus yog tus Tuam Kav Xwm daws tas tsoom sid tsis hais cov Yus Das los cov pej kum neeg qhov tshaib nqhis uas lawv tshaib txog qhov tseeb ntau dua tshaib txog mov noj.

Lo lus tias ‘lawv tsis muaj dab tsi noj’, mas yam li yog lawv tshaib plab tab sis lawv tseem tshaib txog qhov tseeb ntau dua, lawv thiaj li raws Yes Xus 3 hnub, lawv xav nrog Yes Xus nyob tas zog; lawv paub tias Yes Xus yog cov His Xas Lais tus Pleev yuav sau sawv daws los nyob ua ke thiab yuav pub txoj kev nyob kaj siab lug rau sawv daws.

Yes Xus ua kom 7 lub ncuav mov thiab 2 tug ntses ntsu tuaj txaus cov neeg coob coob tau noj tsau. Yes Xus tsis yog pub mov thiab nqaij rau cov neeg raws nws kom lawv tau noj tsau lawv plab xwb, Yes Xus tseem kho lawv cov txiab mob kom zoo thiab.

Tseem tshuav ib yam tob tob nyob hauv Lo Lus hauv hnub no, yog qhov tias Yes Xus tau muab nws cov nqaij thiab ntshav los ua txhiam xws yug peb txoj sia hauv sab ntsuj plig, cawm peb tus plig kom dim hauv txoj kev tuag, ntxuav peb hauv kev txhaum, ces peb thiaj tau mus koom Huab Tais Tswv Ntuj rooj qav saum Tswv Ntuj lub roob.

Peb paub tias Yes Xus muab nws txoj sia los theej peb txoj sia, Yes Xus muab nws cev nqaij thiab ntshav los yug peb tus plig.

Tseem tshuav dab tsi peb yuav kawm tau ntawm lub Moo Zoo hnub no thiab?

Yam peb kawm tau, yog Yes Xsus tus yam ntxwv. Yes Xus muab nws lub sij hawm los pab cov neeg txom nyem; Yes Xus pom lawv mas nws hlub lawv, Yes Xus ntshai tsam lawv tshaib plab mas nws thiaj txhib cov thwj tim kom thau lawv cov mov los pub rau sawv daws noj.

Hnub no Yes Xus kuj txhib peb, kom thau yam peb muaj coj los pub rau cov tsis muaj; tsis hais cuab tam, nyiaj txiag, txhiam xws, los peb lub dag zog.

Lub caij Tos Huab Tais yog lub caij tshwj tseg rau peb tau hloov siab tshiab, cia peb tau ntxuav qhov phem qhov tsis zoo tawm hauv peb lub siab mus.

Ib yam phem tsis xis Tswv Ntuj siab, mas yog lub siab qia dub cuaj khaum.

Tsim nyog peb hnov Tswv Ntuj Lo Lus hauv hnub no lawm, peb yuav thov Yes Xus tuaj rhuav thiab ntxuav peb lub siab lub tswv yim kom tshiab tuaj, kom tsis txhob muaj qhov cuaj khaum qia dub nyob hauv peb ntxiv.

Peb tsis yog thov Yes Xus tuaj ntxuav peb lub siab xwb, peb kuj yuav koom nrog Yes Xus ntxuav peb siab thiab.

Nej kav tsij thau yam nej muaj coj los pub rau tus tsis muaj, mas nej lub siab thiaj yuav tsis cuaj khaum.